1 तबा यूसूफ अपरो जवर ऊभो लोक हुन को समोर खुदला नही रोक पायो अखीन चिल्लाय के कह्यो, मोरो जवर लक लोक हुनला बाहेर कर देव। भाऊ हुन को समोर परगट करतो बेरा वोको संग कोनी नही होतो। 2 तबा उ चिल्‍ला-चिल्‍ला के रोवन लगयो, तबा मिसर को रव्हनवारो लोक हुन अवाज आयकीन। अना फराओ को राजमहल मा यो खबर पहूच गयो। 3 तबा यूसूफ अपरो भाऊ हुनला कव्हन लगयो, मी यूसूफ सेऊ। का मोरो अजी अबा तकन जिन्दो से? एको जवाब वोको भाऊ गिन नही दे सकीन, काहेका वय भेव को कारन लक घबरा गयो होतीन। 4 मंग यूसूफ ना अपरो भाऊ हुन लक कह्यो, मोरो कठा आव, यो आयक के वय वोको जवर गयीन। मंग वोना कह्यो मी तूमरो भाऊ यूसूफ सेऊ, जोनला तुम्हिना मिसर आवन वालो को हातमा बीक दीयो होतो। 5 अब तूमी नोको पस्ताव? तुमी मोला बिको होतो योको लाय निरास नोको होय। काहेका परमेस्वर ना तुमरो पिरान बचान काजी मोला तुमरो पूढा धाडयो से। 6 काहेका अब दोन बरस लक गीरानी पड़यो से अखीन पाँच साल तकन असोच गिरानी पड़हेत ना ता नागर चलेत ना फसल मा इरा लगहेत। 7 एकोलाय परमेस्वर ना मोला तुमरो लक पूढा धाड़यो से का तुम्हि धरती मा जित्तो रव्हो अखीन तुमरो लगत सन्तान गीनको पिरान बचायो जाय। 8 असो परकार लक अब मोला यहाँन धाड़न वालो तुम्ही नही पर परमेस्वर से। अखीन वोच फराओ ला अजी जसो अना मोला वोको घर को मालीक अना सप्पा मिसर मा मालीक ठयरा दियो से। 9 अखीन लवकर जायके मोरो अजी लक कव्हो, तोरो टूरा यूसूफ असो कव्हासेत, का परमेस्वर ना मोला सप्पा मिसर को मालीक बनायो से। एकोलाय तू बिना उसीर को मोरो जवर चलो आव। 10 अखीन तोरो रव्हनो गोसेन छेतर मा होहेत। अखीन तू अना तोरो नाती नतरा सेरी-मेढा, गाई-बइल को करप अखीन तोरो सप्पा काही मोरो जवर रहेत। 11 अखीन गीरानी को जोन पाँच साल होहेत, उनमा मी वसोच तोला पाल-पोस करहु। असो नोको होय का तू अना तोरो खानदान अना जितरो तोरो संग सेत अब भूको मरहेत। 12 अखीन तुम अपरो डोरा लक चोवो, अखीन मोरो भाऊ बिन्यामीन भी अपरो डोरा लक चोवा सेत, का जोन आमरो लक गोस्टी करासेत उ यूसूफ आय। 13 तुम मोरो सब ठाठ-बाट ला जोन मिसर मा सेत तुम्हिना डोरा लक चोवयो सेव। उ सप्पा मोरो अजी ला सांगने अखीन वोला लवकर यहान आनो। 14 तबा उ अपरो भाऊ बिन्यामीन को गरो लगके रोयो। अना उ भी रोवन लगयो। 15 उ अपरो सप्पा भाऊहुन ला चूमयो, रोयो अखीन गोस्टी करन लगयो। 16 यूसूफ को भाऊ गिन आयोसेत यो गोस्टी को खबर फरओ को महल तकन पहोच गयो, अना एकोलक फराओ अखीन वोको दास गीन खूस भयीन। 17 एकोलाय फराओ ना यूसूफ लक कह्यो, अपरो भाऊ हुनलक कव्हो का एक काम करो तुम कनान देस लक अपरो जनावर ला लदाय के मीसर देस मा आय जाओ। 18 अखीन अपरो अजी अखीन अपरो घर को लोक गिनला लेयके मोरो जवर आओ। अखीन मिसर देस मा जोन काही साजरो लक साजरो से उ मी तुम्हिला देहू। अना वय मीसर मा राजसाही पकवान जेहेत। 19 अखीन उनला हुकुम दियो का वय लहान-लहान लेकरा अखीन आईमाई गिनको लाय मिसर देस को गाड़ी लेयके जाव, अना आपरो अजी ला संग आनो। 20 अखीन वय आपरो जुनूस को चिन्ता नोको करेत। काहेका सप्पा मिसर देस को साजरो लक साजरो जुनूस उनको च सेत। 21 इसराइल को टूराहुन ना वसोच करीन। यूसूफ ना फराओ को हुकुम को अनुसार उनला गाड़ी दियो अखीन रस्ता को लाय जेवन को चीज भी दियो। 22 यूसूफ ना उनमा लक हरेक भाऊ गिनला एक-एक जोड़ी कपरा दियो। अखीन बिन्यामीन ला तीन सौ खूरो को सिक्‍का को संग पाँच जोड़ी कपरा दियो। 23 अपरो अजी को लाय यो चीज धाड़यो, दहा गढव मा मिसर देस को साजरो लक साजरो चीज, दहा गाढव मा अनाज अना भाकरी, अना अजी को यातरा को लाय जेवन को जूनूस। 24 तबा वोना अपरो भाऊ गिनला सार करीस। अखीन वय चलयो गयीन। अखीन वोना उनलक कह्यो, रस्ता मा झगड़ा नोको करने। 25 मिसर लक आय के वय कनान देस मा अपरो अजी याकूब को जवर पहुंच्यो। 26 अना ओको लक यो कह्यो, "यूसूफ अब तकन जीन्दो से, अना पूरो मिसर देस पर सासन वोच करासे।" पर ओना उनको गोस्टी पर भरोसा नही करयो, अना आयक के दंग भय गयो। 27 तबा उनना आपरो अजी याकूब लक यूसूफ को सप्पा गोस्टी जोन वोना सांगो होतो वोला सांग देइन। अना तबा वोना गाड़ी गीनला चोवयो, जोन यूसूफ ना वोला आनन लाय धाड़यो होतो, तबा गोस्टी वोको जान मा जान आयो। 28 अना इसराइल ना कह्यो, बस मोरो टूरा यूसूफ अब तकन जिन्दो से मी आपरो मरन को पूढ़ा वोला चोहीन।