1 तबा यूसुफ न अपनो घर को अधिकारी ला हुकुम दियो, "इन मानूस गीन को बोरा मा जितरो जेवन की चिज समाय सकेत उतरो भर देव, अखीन एक- एक झन को सिक्का ला उनको बोरा को मुंहडा मा राख देव। 2 अना मोरो खूरो को कटोरा सब लक लहान भाऊ को बोरा को मुंहडा मा वोको अनाज को रूपिया संग धर देव।" यूसूफ की यो हुकुम को अनुसार ओना वसोच करयो। 3 सक्कारी होतो च उनला उनको गढव समेत सार कर देयीन। 4 इन नगर लक लटपट हिटयो होतीन अना दूहूर भी नही गयो होतीन का यूसूफ न अपनो घर को अधिकारी लक कह्यो, "उन मानूस गीनको मघानी जाव, अना उनलक भेट करके उनला कहो, तुम्ही ना नेकी को परतीफर बदी लक काहे देवासो?तुम्हीना आमरो मालीक को उ खूरो को कटोरा काहे चोरायो सेव? 5 का यो वा खूरो को कटोरा नहात जोनमा आमरो मालीक पीवासे अना लूको गोस्टी ला जानासेत? तुम्ही ना जोन यो काम करयो सेव यो लगत बूरो सेत?" 6 तबा उनना जायके पकड़ लेयीन अना असोच गोस्टी करीन। 7 तबा उनना उनको लक कहीन, ओ मालीक तुमी असो गोस्टी कायलाय करासेव? असो काम तोरो दासगीन नही कर सकत। 8 चोवो जोन सिक्‍का आमरो बोरा को मुँहडा पर हिटयो होतो जब अमी कनान देस लक आय के तोला सांग दियो होतो अना वापीस करयो। तबा भला तोरो मालीक को घर लक अमी खूरो अना सोन्नो को जुनूस कसो चोराबीन? 9 तोरो दास गीनको जवर लक जोन को कन वा चीज हीटेत उ मार दियो जाहेत?अना अमी भी वोना मालीक को दास बन जाबीन। 10 वोना कह्यो तुमरो कव्हनो सच्चो होहेत। जोनको जवर वा कटोरा हीटेत, उ दास बन जाहेत, अना बाकी निरदोस होहेत। 11 एको पर वय आपरो-आपरो बोरा धरती मा मडाय के खोलन लगीन। 12 तबा वय ढूढन लगीन अना मोठो को बोरा लक लहान को बोरा तकन तपासिन अना कटोरा बिन्यामीन को बोरा लक हीटयो। 13 तबा उनना आपरो-आपरो कपरा चीरीन अना आपरो-आपरो गढव मा बजन लाद के नगर लवट गयीन। 14 जब यहूदा अना वोको भाऊ हुन यूसूफ को घर पहुँचयो, अना यूसुफ वहाँच होतो तबा वय वोको पूढा भूईमा पड़ गयीन । 15 यूसूफ ना उनलक कह्यो, तुम्ही लोक हुन यो कसो काम करीसेव? का तुम्हीला मालूम नहात का मोरो जसो मानूस सगून चोव सका सेत? 16 यहूदा ना कह्यो अमी लोक आपरो मालीक लक काजक कव्ह सका सेजन? काजक सांग के अमी आपरो आपला निरदोस साबीत करबीन ? परमेस्वर ना तोरो सेवक गीनको अधरम ला राख लियो सेत। अमी अना जोन को जवर कटोरा हीटेत उ भी अमी सब आपरो मालक को दास सेजन। 17 वोना कह्यो "असो करनो मोरो लक दूहूर रहेत। पर जोन मानूस को जवर मोरो कटोरा रहेत वाच मोरो दास होहेत अना तुम्ही बाकी साजरो लक आपरो अजी को जवर चले जाव।"

18 तबा यहूदा वोको जवर जायके कव्हन लगयो, ओ मोरो मालीक तोरो दास तोरो लक एक गोस्टी कव्हनो चाव्हासे, हुकुम देव, अना तोरो गुस्सा तोरो सेवक पर नोको भड़के, काहेका तू ता फराओ को जसो सेस। 19 मोरो मालीक ना आपरो सेवक गीनला पूसयो होतो। का तुमरो अजी अना भाऊ से? 20 अखीन अमीना कह्यो होतो हव मालीक आमरो बुड़गा अजी अना बुड़गा पन को एक अखीन टूरा से। अना वोको एक भाऊ मर गयो से, एकोलाय वा आपरो मायको एकच टूरा से अना आमरो अजी वोको लक लगत पिरेम करासे। 21 तबा तूना अपरो सेवक गीनला कह्यो होतो वोला मोरो जवर आनो जोनला मी चोऊ। 22 तबा अमीना अपरो मालीक लक कह्यो होतो उ टूरा आपरो अजी ला नही सोड़ सकत, नही ता वोको अजी मर जाहेत। 23 अखीन तूना आपरो सेवक गीनला कह्यो होतो, यदि तुमरो लहान भाऊ नही आहेत ता तुम मोरो जवर मंग नही आय सकासो। 24 एकोलाय जब अमी आपरो अजी तोरो सेवक को जवर गयो तबा अमीना वोला आपरो मालीक को सब गोस्टी आयकवायो। 25 तबा आमरो अजी ना कह्यो मंग जायके आमरो लाय जरासि जेवन को चीज लेके आन। 26 अमीना कह्यो अमी नही जाय सकबीन हव यदी लहान भाऊ आमरो संग रहेत ता अमी जाबीन काहेका यदी लहान वालो नही रहेत ता अमी वोना मानूस को पूढा नही जाय सकत। 27 तबा तोरो सेवक मोरो अजी ना कह्यो, तुम्ही ला मालूम सेत का मोरो बायको लक दूई टूरा जलम लेयीन। 28 अना उनमा लक एक तो मोला सोड़ के चले गयो, अना मीना पक्को कर लियो का उ चीर डाखयो गयो, से तबा लक मी वोको तोन्ड नही चोयो सेऊ । 29 यदि तुम एला भी मोरो डोरा को आड़ में ले जाओ अना कोनी आफद एको पर आय जाहेत ता तुम्‍हरो कारन लक यो बुड़गो पनमा दूख को संग अधलोक मा उतर जाहीन। 30 एकोलाय जब मी आपरो अजी तोरो सेवक को जवर पोहचो अना यो टूरा संगमा नही रहेत। ता जोन वोको परान योच मा अटको से। 31 यो कारन लक असो चोवके का मोरो टूरा नहात उ लवकर मर जाहेत तबा तोरो सेवक गीनको कारन लक तोरो सेवक जोन आमरो अजी सेत बुड़गा पनमा से दूख को संग अधलोक जाहेत। 32 मंग तोरो सेवक आपरो अजी ला असो कव्हके यो टूरा ला आपरो जुम्मेदारी लक आनयो सेऊ का अदी मी तोरो टूरा ला नही आनीन तो मी हरामेसा को लाय तोरो दोसी बन जाहीन। 33 एकोलाय अबा मी तोरो दास यो टूरा को बदलाचमा आपरो पीरभू को दास होवन को लाय हुकूम दे अना यो टूरा ला मोरो भाऊ गिनको संग जावन दे। 34 काहेका टूरा को बीना मी कसो आपरो अजी को जवर जाय सकासू असो नही होय सकत का मोरो अजी पर जोन आफद आहेत वा मोला चोवनो पड़हेत।