1 तबा यूसूफ अपरो अजी को टोन्ड मा पड़के वोको चुम्‍मा लियो अखिन रोवन लगयो। 2 अखिन यूसूफ ना बइद ला जोन वोको सेवक होतो हुकुम दियो, का वोको अजी को लास मा सुगंध देवनवालो चीज लक भरे। तबा वय इसराइल को लास ला सुगंध देवनवालो चीज लक भर दियो। 3 यो काम मा चाड़िस दिवस लगयो। काहेका लास मा लेप लगान को लाय इतरोच दिवस लगत होतो। अना सत्तर दिवस तकन मिसरी गिन वोको लाय सोक करीन। 4 जब सोक को दिवस पूरो भयो तबा यूसूफ फरओ को घराना को लोक गिनला कह्यो , यदि तुम्‍हरो दया मोरो पर से ता मोरी यो मोरो यो पिराथना फराओ ला आयकाव। 5 मोरो अजी ना असो सांग के चोव मी मरनवालो सेऊ मोरो लक असो करार कर का जोन कबर मीना अपरो लाय कनान देस मा खुदवायो सेव वोमा च तू मोला गाड़ देवजोस एकोलाय अबा मोला आपरो अजी ला गाडन को लाय वहाँन जावन दे तबा मी लवट आहीन। 6 तबा फराओ ना कह्यो आपरो अजी ला कियो गयो करार को अनुसार लक आपरो अजी ला गाड़ो। 7 अखिन यूसूफ अपरो अजी ला माती देवन को लाय चल पड़यो तबा वोको संग फराओ को सप्पा दास वोको खानदान को सियानो गिन अखिन मिसर देस को सप्पा धरम सियानो, 8 अखिन यूसूफ को बंस को सप्पा लोकगिन अखिन वोको भाऊ गिन वोको अजी को वंस को लोक भी होतिन उनना गोसेन देस मा अपरो लेकरा बारा अना मेढा- सेरी को करप ला सोड़ो होतिन। 9 वहाँन वोको संग रथ अखिन अखीन घुड़सवार भी गयीन, अखिन एक लगत मोठो भीड़ होतो। 10 जब वय यरदन के उस पार आटद को खरियान तकन पहुँचयो तो वहाँन पर उन ना लगत रोवन लगयो अखिन वोना अजी को लाय सात दिवस तकन रोवत रहीन। 11 जब वोना नगर मा को रव्हन वारो कनानी लोक गिनना आटद को खरियान मा वोना रोवनो ला चोयके कह्यो, यो ता मिसरी गीनको भारी विलाप मजे सोक सेत एकोलाय वोना जघा को नाव आबेल-मिसरेम पड़यो जोन यरदन नद्दी को वोनागन सेत। 12 अखिन जसो वोना आपरो टूरा गिनला करन लाय सांगयो होतो उनना साजरो लक वसोच करीन। 13 मजे वोला कनान देस मा लेजाय के मकपेला को वोना जमीन वालो गुफा मा जोन ममरे को दिनउगती मा से माती दियो। एना जमीन ला अबराहम ना हित्ति एपरोन लक जमीन को संग कबर को लाय ले लियो होतो। 14 अखिन यूसूफ आपरो अजी ला माती देयके अपरो भाऊगिन समेत जोन वोको अजी ला माती देवन गयो होतिन सब मिसर लवट गयीन।

15 जब यूसूफ को भाऊ गिनना चोयो का आमरी अजी ता मर गयोसे। तबा उनना कह्यो, कहीं असो ता नाहती का यूसूफ को संग अमीना जोन बुराई करयो सेत वोको बदला आमरो लक लेय। 16 एकोलाय उनना यूसूफ को जवर असो खबर धाड़ीन, तोरो अजी ना मरन लक पूढा असो कह्यो होतो, 17 तुम लोक यूसूफ लक असो परकार लक सांगने, मी तोरो लक बिनती करासू का आपरो भाऊ हुन को पाप छिमा कर देव। काहेका उन ना तोरो संग बूरो करयो सेत। अब किरपा करके आपरो अजी को परमेस्वर को दास को गलती छिमा कर। उनको असी गोस्टि आयक के यूसूफ रोवन लगयो। 18 अखिन वोको भाऊ गिन भी वोको पूढा जमिन मा पड़ के कव्हन लगीन, चोव अमी ता तोरो सेवक सेजन। 19 यूसूफ ना कह्यो भेव नोको करो, का मी परमेस्वर को जघा मा सेऊ? 20 तुम्हि तो मोरो संग बुराई करन को सोचयो, पर परमेस्वर ना वोला भलाई मा बदल दियो, जोन लक लगत लोक जिन्दो सेत। अना लगत को जान बचहेत। 21 एकोलाय अबा भेव नोको करो, मी तुमरो लेकरा बारा को पालन- पोसन करतो रहीन।

22 अब यूसूफ अपरो अजी को खानदान को संग मिसर मा रहयो, अखिन यूसूफ एक सौ दहा साल जित्तो रहयो। 23 अखिन यूसूफ ना एपरेम को तीसरो पीढ़ी तकन चोवयो, अखिन मनस्से को टूरा माकीर को टूरा गिनला भी आपरो टोघरा मा राखयो। 24 अखिन यूसूफ ना आपरो भाऊहुन लक कव्हयो, मि तो मरनो पर सेऊ पर परमेस्वर तुमरो पक्कोच हेत करहेत। अना तुम्हि ला यो देस लक हेड़के वोना देसमा पहुँचा देहेत जोनको करार वोना अबराहम इसहाक अखिन याकूब लक कियो होतो। 25 मंग यूसूफ ना इसराइली गीनला कसम खिलायो का "यहोवा परमेस्वर तुमरो सूधी लेहेत। अखिन तुम्हि यहान लक मोरो हाड़ लेयके जावने।" 26 तबा यूसूफ एक सौ दहा बरस को होयके मर गयो। अखिन वोको लास ला सुगंध देवन वालो चीज लक लपेट के मिसर देसमा च लास को सन्दूक मा ठेय देयीन।