1 तबा इसराइल आपरो सब काही धरके बेरसेबा ला गयो अखीन वहाँन अपरो अजी इसहाक को परमेस्वर को लाय बली चघायो, 2 तबा परमेस्वर ना इसराइल ला रातमा दरसन देयके कहीस, "ओ याकूब, ओ याकूब वोना कह्यो काजक हुकुम सेत?" 3 तबा परमेस्वर ना कह्यो, मी परमेस्वर सेऊ, तोरो अजी को परमेस्वर तू मिसर देस जावन को लाय नोको भेव खाय। काहेका मी वहान लक एक मोठो रास्ट बनाहू।" 4 मी तोरो संग-संग मिसर जाहीन, अखिन वहान लक तोला दुबारा आनीन। पर यूसूफ च तोरो डोरा बंद करहेत। 5 तबा याकूब बेरसेबा लक चलयो, अखिन इसराइल को टूरागिन, आपरो लहान-लहान लेकरा-बारा अखीन आईमाई गीनला जोन गाड़ी फराओ ना धाड़यो होतो, वोमा याकूब भी बस गयो अना जावन लगीन। 6 याकूब अना वोको सन्तान अपरो जनावर सेरी-मेढा, गाइ-बइल अखीन कनान देस मा अपरो जमा कियो सप्पा धन ला लेय के मिसर आयीन। 7 याकूब अपरो टूरा-नाती, बहू-बेटी समेत आपरो खानदान ला आपरो संग मिसर आनीस। 8 याकूब को संग मिसर देस आवन वारो को सूची असो परकार लक सेत। इसराइल को मोठो, रूबेन, 9 अखीन रूबेन को टूरागीन, हनोक, पललू, हेसरोन अखीन कम्मीर होतीन। 10 सीमोन को टूरा यमूएल, यामीन, ओहद, याकीन, सोहर, अखीन एक कनानी बायको लक जलमो हुयो साऊल भी होतो। 11 लेवी को टूरा गेसरन, कहात, अखीन मरारी होतो। 12 यहूदा को टूरागीन एर, ओनान, सेला पेरेस, अखीन जेरह नाम को टूरा भयीन। पर एर अखीन ओनान कनान देस मा मर गयो होतीन। अखीन पेरेस को टूरा हेसरोन अखीन, हामूल होतीन। 13 इस्साकार को टूरागीन तोला, पुब्बा, योब, अखीन सिमरोन होतीन। 14 जबूलून को टूरा सेरेद, एलोन, अखीन यहलेल होतीन। 15 लिआ को टूरागीन, जोन याकूब लक पद्दनराम मा जलमो होतीन। उनको टूरी दीना भी होती। यो सब कूल तैतीस झन होतीन। 16 मंग गाद को टूरा सिप्योन, हाग्गी, सूनी, एसबोन, एरी, अरोदी, अखीन अरेली होतीन। 17 आसेर को टूरा यिम्ना, यिस्र्वा, यिस्वी अखीन बरीआ होतिन। अखीन वोकी बहिन सेरह होती, अखीन बरीआ को टूरा हेबेर अखीन मल्किएल होतीन। 18 याकूब लक जिल्पा, जोनला लाबान ना अपरो टूरी लिआ, ला दियो होतो। वोको टूरागीन अना नाती योच सेत। अखीन वोको कन लक सोला परान होतीन। 19 मंग याकूब को बायको राहेल को टूरा यूसूफ अखीन बिन्यामीन होतीन। 20 अखीन मिसर देस मा ओना, पुरोहित, पोतीपर को टूरी आसनत लक यूसूफ को योच टूरा जलम लेयीन, मजे मनस्से अखीन एपरेम। 21 अखीन बिन्यामीन को टूरा बेला, बेकेर, अस्बेल, गेरा, नामन, एही, रोस, मुप्पीम, हुप्पीम, अखीन आरद होतीन। 22 राहेल को टूरागीन जोन याकूब लक जलम लेयीन योच होतीन, वोको सप्पा टूरा अखीन नाती चवदा पिरानी भयीन। 23 मंग दान को टूरा हूसीम होतो। 24 नप्ताली को टूरा यहसेल, गूनी सेसेर अखीन सील्लेम होतीन। 25 बिल्हा जोनला लाबान ना अपरी टूरी राहेल ला दियो वोको टूरा नाती योच सेत। वोको कन लक याकूब को खानदान मा सात झन भयीन। 26 याकूब को खानदान मा लक जोन परानी मिसर लक आयो होतीन, उनला मिलाय के छियासठ परानी भयीन। 27 अखीन यूसूफ को टूरा गीन जोन मिसर मा वोको लक जलम लियो होतीन वय यो च होतीन असो परकार लक याकूब को खानदान मा सप्पा सत्तर झन भयीन। 28 मंग उनना यहूदा ला अपरो पूढा यूसूफ को जवर धाड़यो का उ उनला गोसेन को रस्ता चोवाय अखीन वय गोसेन छेतर मा आहेत।

29 तबा यूसूफ अपरो रथ जूप के आपरो अजी इसराइल लक मीलन को लाय गोसेन देस ला गयो। अखीन वोको लक गरो पकड़ के लगत बेरा लक भेटन लगयो। 30 तबा इसराइल ना यूसूफ लक कह्यो, मी अब मरनो लक खूसी सेऊ, काहेका तोला जिन्दो चोयो सेऊ। 31 तबा यूसूफ ना आपरो भाऊ गिन लक अखीन अपरो भाऊ लक अखीन अपरो अजी को खानदान लक कह्यो "मी जायके फराओ ला असो खबर देहीन का मोरो भाऊ अना मोरो अजी को खानदान को लोक हून जोन कनान मा रव्हासेत वय मोरो जवर आय गयो सेत। 32 अखीन वय जनावर चरान वालो सेत। काहेका वय जनावर पाला सेत एकोलाय वय आपरो सेरी-मेढा गाई-बईल करप अखीन उनको जवर जोन काही सेत सब आनी सेत। 33 जब फराओ तुम्‍हीला बुलाय के पूसेत, तुमरो काजक काम सेत? 34 तबा असो कव्हने तोरो दास बचपन लक अब तकन जनावर करप ला पालतो आयो सेजन। बल्‍कि आमरो आजा बाबा भी योच काम करत होतीन। एकोलाय तुम्हिला गोसेन देस मा रव्हन ला मिल्हेत। काहेका सप्पा जनावर चरान वालो लक मिसर को लोक हुन घीरना करासेत।"