1 तबा परमेस्वर ना नूह अखीन उनको टूरा गिनला यो आसीस दियो अना कह्यो, लगत सो लेकरा पैदा करो, जोनलक तुमरो खानदान पूरी धरती मा बसेत। 2 धरती को हरेक जनावर अखीन बादल को पक्सी, अना धरती मा रेंगन वालो जनावर जीव-जन्तू, सागर को मसरी अना पानी को जीव सब पर तुमरो भेव बनयो रहेत। यो सबच को वरता तुमरो हात मा से। 3 सबच चलनवालो जन्‍तु जोन जीन्दो से, ऊ तुमरो जेवन आय। जसा मी तुमला हिवरी-हिवरी लहान झाड़ दियो होतो, वसोच अब तुम्हीला सब काही देवासू। 4 पर मांस ला पिरान समेत मजे खून समेत नोको जेवने। 5 अना मी पक्को तुमरो खून मजे परान को बदला लेहू। जनावर अखीन मानूस दूई लक बदला लेहू। मानूस को परान को बदला मी एक-एक भाऊ गिनलक लेहू। 6 जोन कोनी मानूस को रकत बोहायेत वोको रकत मानूस लक बोहायो जाहे। काहेका परमेस्वर ना मानूस ला आपरो रूप मा बनायो सेत। 7 तुमरी लगत सन्तान होये अखीन सन्तान लक धरती ला भर देव।

8 मंग परमेस्वर ना नूह अना वोको टूरा गिनलक कह्यो, 9 आयको मी तुमरो संग अना तुमरो खानदान को संग करार करासू, 10 अखीन सब जित्तो जीव लक भी जोन तुमरो संग सेत, का पक्सी का मवेसी का धरती को सब जंगली जनावर धरती को जितरो पिरानी जोन जहाज लक हीटयो सेत। 11 अखीन मी तुमरो संग अपरो यो करार करासू का सब पिरानी मंग पानी पूरा लक नास नही होहेत। नाच धरती ला नास करन को लाय दुबारा परलय होहेत। 12 मंग परमेस्वर ना कह्यो "जोन करार मी तुमरो संग अखीन जितरो जिन्दो पिरानी तुमरो संग सेत उन सबको संग जूग-जूग को पीढ़ी को लाय करयो सेऊ वोको यो निसान से।" 13 का मीना बादल मा एक धनुस राखी सेऊ। उ मोरो अना धरती को बीचमा करार को हिदान से। 14 जब मी धरती को वरता बदली आनीन अना वोको बीच धनूस चोहेत तबा मी आपरो वादा ला हेत करहीन। 15 जोन मोरो अना तुमरो बीच मा करार से। का अब कदी पानी परलय लक पूरो धरती को नास नही करहीन। 16 जब मी यहोवा परमेस्वर यो धनूस ला चोहीन ता धरती मा रव्हन वारो हरेक पिरानी को बीच कियो करार ला हेत करहीन। 17 यहोवा परमेस्वर ना नूह लक कह्यो, जोन वादा मीना अपरो अखीन धरती को हरेक पिरानी लक कियो सेऊ वोको यो निसान सेत।

18 जहाज लक नूह को संग वोको टूरा सेम, हाम अना याफत बहार हीटयो। अना हाम कनान को अजी भयो। 19 यो नूह को तीन टुरा भयो अना योच तीन लक धरती मा मानूस गिनको जलम भयो। 20 नूह ना किसानी को सूरू कियो वोना एक अंगूर को बाग लगायो। 21 एक दिवस नूह अंगूर को रस ला पीयके नसा मा सराबी भयी गयो अखिन आपरो तम्बू मा बिना कपरा को पड़यो होतो। 22 कनान को अजी हाम ना आपरो अजी को असो हाल चोवके आपरो दूई भाऊ ला बुलायो। 23 तबा सेम अना याफत ना एक कपरा लेयके अखीन दूई उलटो पाय चलतो जायके आपरो अजी को बदन ला ढाक देयीन। एना बेरा मा उनको तोड उलटो कन होतो एको लाय उ ना आपरो अजी ला बिना कपरा को नही चोयीन। 24 जब नूह को नसा कम भयो तबा वोला पता चलयो का लहानो टूरा ना वोको संग काजक करयो से? 25 नूह ना कह्यो "सापित से कनान" उ आपरो भाऊ को दास को दास होहेत। 26 नूह ना यो भि कह्यो "धन्य से पिरभू परमेस्वर, सेम को परमेस्वर कनान सेम को दास भय जाहेत। 27 यहोवा परमेस्वर याफत को खानदान ला बढायेत उ सेम को तम्बू मा रहेत, अना कनान वोको दास भयी जाहेत।" 28 परलय को बाद नूह 350 साल अखिन जिन्दो रहयो। 29 जब नूह 950 साल को भयो तबा उ मर गयो।