1 यहोवा परमेस्वर ना जेतरा जंगली जनावर बनायो होतो, उन सब मा सरप सब लक चलाक होतो। ओना आईमाई लक कह्यो, का खरो मा परमेस्वर ना कह्यो सेस, "तुमी यो बगीचा को कोनी झाड़ को फर नोको खावनो?" 2 आईमाई ना सरप लक कह्यो, "ऐना बगीचा को झाड़ गीन को फर आमि खाय सकासेजन; 3 पर जो झाड़ बगीचा को बीच मा से ओको फर को बारे मा परमेस्वर ना कह्यो सेस का ना ता तुमी ओला खावनो अना ना ओला छिवने नही ता मर जाहो।" 4 तबा सरप ना बायका लक कह्यो, "तुमी पिक्को नही मरोह। 5 बलकि परमेस्वर खुद जानासे का जेने दिवस तुमी ओको फर खाहो ओनो दिवस तुमरी डोरा उघड़ जाहेति, अना भलो बुरो को तुमी गियान पायके परमेस्वर को बरोबर होय जाहो।" 6 ऐना रिती लक जबा बायका ना चोईस का ओनो झाड़ को फर खावन को साठी साजरो, अना चोवन मा मनभाउ, अना बुध्दि देवन साठी चाव्हन काबिल भी सेत; तबा ओना ओमा लक तोड़के खायो, अना आपरो नौरा ला भी देइस, अना ओना भी खाईस। 7 तबा उन दुही की डोरा उघड़ गईन, अना उनला अहसास होयो कि वय बिन कपरा को सेत, एकोलाय उनना अँजीर को पान जोड़ जोड़के लंगोट बनाय लेईन। 8 तबा यहोवा परमेस्वर, जो दिवस को थन्डो बेरा बगीचा मा फिरत होतो, अना आवाज आयकु आयो तबा आदम अना ओकी बायको बगीचा को झाड़गीन को बीचमा यहोवा परमेस्वर लक लुक गईन। 9 तबा यहोवा परमेस्वर ना पुकार के आदम लक पुछिस, "तु कहान सेस?" 10 ओना कह्यो, "मि तोरो आवाज बारी मा आयक के डर गयो, काहेकि मि बिन कपरा को होतो; एकोलाय लुक गयो।" 11 ओना कह्यो, "कोन ना तोला सांगीस का तु बिन कपरा को सेस? जेने झाड़ को फर खावन ला मीना तोला नही कह्यो होतो, का तु ना ओको फर खाईसेस?" 12 आदम ना कह्यो, "जोना बायका ला तु ना मोरो संग रव्हन ला देईसेस ओनाच उ झाड़ को फर मोला देईसेस, अना मीना खायो।" 13 तबा यहोवा परमेस्वर ना बायका लक कह्यो, "तू ना यो काजक करीसेस?" बायका ना कह्यो, "सरप ना मोला बहकाय देइस, तबा मीना खायो।"

14 तबा यहोवा परमेस्वर ना सरप लक कहियो, "तुना जोन यो करीसेस एकोलाय तू सब घरेलु जनावर गीन, अना सब जंगली जनावर गीन लक लगत सापित सेस; तु पोट को बल लक चलजोस, अना जिंदगी भर माटी चाटत रव्हजोस। 15 अना मि तोरो अना येने बायका को खानदान को बीच मा ईरसा पैदा करुंहू, उ तोरो डोस्की ला कुचल डाकेह अना तु ओकी कुरूच ला डसजोस।" 16 मंग बायका लक ओना कह्यो, "मि तोरी दरद अना तोरो जचकी को दुख ला लगत बढ़ाऊ, तु दरद मा रव्हके लेकरा बारा ला पैदा करजोस, अना तोरी लालसा तोरो नौरा को कना होव्हे, अना उ तोरो पर हक जताहे।" 17 अना आदम लक ओना कह्यो, "तुना जोन आपरी बायका को गोस्टी ला आयकयो, अना जेने झाड़ को फर को बारे मा मीना तोला हुकुम दियो होतो का तु ओला नही खावना ओला तुना खायोस एकोलाय भुई तोरो कारन सापित से। तू ओको उपज जिंदगी भर दुख को संगा खावजोस; 18 अना उ तोरो लाई कांटा अना जड़ी जंकड उगाहे, अना तु खेत को उपज खावजोस; 19 अना आपरो मस्तक को पसीना को भाकर खावजोस, अना आखीर मा माटी मा मिल जाजोस काहेकि तु ओमा लक हिटीसेस। तु माटी ता सेस अना माटी च मंग मिल जाजोस।" 20 आदम ना आपरी बायको को नाव हव्वा राखिस, काहेकि जेतरो मानूस जिन्दो सेत उन सब को आदि माय वाच भयी। 21 अना यहोवा परमेस्वर ना आदम अना ओको बायको को लाई चमड़ा को अँगरखा* बनायके उनला पहिना दियो । 22 मंग यहोवा परमेस्वर ना कह्यो, "मानूस भलो बुरो को गियान पायके आमरो मा लक एक को जसो भय गयो से। एकोलाय अबा असो नही होय का उ हात बढायके जिंदगी को झाड़ को फर ला तोड़ के खाय लेहे अना हमेसा जिंदो रव्हे।" 23 एकोलाय यहोवा परमेस्वर ना उनला अदन को बगीचा मा लक हेड़ देयो का उ भुई पर खेती करेत, जोनमा लक उ बनायो गयो होतो। 24 एकोलाय आदम ला ओना हेड़ देयो अना जिंदगी को झाड़ को रास्ता को पहरा देवन साठी अदन को बगीचा को दिन उगती को कना सरगदूत ला, अना चारी कना घूमनवालो धगाड़ जसो तरवार ला भी ठयराय देइस।