1 जब राहेल ना चोयीस का याकूब लायी मोरो लक कोनी सन्तान नहीं भयी तबा वा अपरी बहिन लक नफरत करन लगी अना याकूब लक कह्यो, "मोला भी सन्तान दे, नहीं ता मर जाऊ।" 2 तबा याकूब ना राहेल लक हिजड़ के कह्यो, " का मी परमेस्वर सेऊ? तोरी कोख ता ओना च बंद कर रख्यो से।" 3 राहेल न कह्यो, "चोव , मोरी दासी बिल्हा से ओकोच जवर जाय जोनलक वा मोरो लायी लेकरा पैदा कर सके, अना ओको लक मोरो भी घर बसेत।" 4 तबा राहेल ना अपरी दासी बिल्हा याकूब ला दी कि वा ओकी बायको होय, अना याकूब ओको जवर गयो। 5 अना बिल्हा पोटलक भयी अना याकूब लक ओको एक टुरा पैदा भयो। 6 तबा राहेल ना कह्यो, "परमेस्वर न मोरो न्याय चुकायो अना मोरी आयक के मोला एक टूरा दियो।" एकोलायी ओना ओको नाम दान* रख्यो। 7 राहेल की दासी बिल्हा मंग पोटलक भयी अना याकूब लक एक टुरा अखीन पैदा भयो। 8 तबा राहेल न कह्यो, "मी ना अपरी बहिन को संग बड़ी ताकत लक लड़ाई लड़ी सेऊ, पर मी परमेस्वर को किरपा लक जीत गयी। एकोलायी ओना ओको नाम नप्ताली* रख्यो।" 9 जब लिआ ना चोयो का ओकी सन्तान होनो बंद भयी गयो से, तबा ओना अपरी दासी जिल्पा ला लेके याकूब की बायको होन लायी दे दी। 10 अना लिआ की दासी जिल्पा ला भी याकूब लक एक टुरा पैदा भयो। 11 तबा लिआ न कह्यो, "धन्य भाग्य!" एकोलायी ओना ओको नाम* गाद रख्यो। 12 तबा लिआ की दासी जिल्पा ला याकूब लक अखीन एक टुरा पैदा भयो। 13 तबा लिआ ना कह्यो, "मी धन्य सेऊ, पक्को आइ-माई मोला धन्य कहेत।" एकोलायी ओना ओको नाव आसेर रख्यो। 14 गँहू कापन को बेरा मा रूबेन ला बर्रा मा दूदा फर* मिल्यो, अना उ वोला अपरी माय लिआ को जवर ले गयो। तबा राहेल ना लिआ लक कह्यो, "अपनो बेटा को दूदा फर मा लक काही मोला दे।" 15 लिआ ना ओको लक कह्यो, "तू ना जोन मोरो नवरा ला ले लियो से, का लहान गोस्टी से? अब का तू मोरो टूरा को दूदा फर भी लेवनो चाव्हासेत?" तबा राहेल न कह्यो, "ठीक ता तोरो टूरा को दूदा फर को बदला उ अज रात ला तोरो संग सोयेत।" 16 सन्जा को बेरा जब याकूब बर्रा लक आय रह्यो होतो, तबा लिआ ओको लक मिलन ला हीटी, अना कही , " अज तोला मोरोच जवर आनो से, काहेका मीना अपरो टूरा को दूदा फर देके तोला सचमुच ले, लियो।" तबा याकूब वा रात ला ओकोच संग सोयो। 17 तबा परमेस्वर ना लिआ की गोस्टी आयको, अना वा पोट लक भयी अना याकूब लक वोको पाँचवो टुरा पैदा भयो। 18 तबा लिआ न कह्यो, "मी ना जोन अपरो नवरा ला आपरो दासी दी, एकोलायी परमेस्वर ना मोला मोरी बनी देयीसेस। एकोलायी ओना ओको नाम इस्साकार रख्यो।" 19 लिआ मंग पोट लक भयी अना याकूब लक ओको छटवो टुरा पैदा भयो। 20 तबा लिआ न कह्यो, "परमेस्वर ना मोला साजरो दान दियो से। अब की बार मोरो नवरा मोरो संग बन्यो रहेत, काहेका मोरो ओको लक छय टुरा पैदा भयो सेत। एको लाय वोको नाव जबूलून रख्यो।" 21 एको मघानी ओकी एक टूरी भी भयी, अना ओना ओको नाव दीना रख्यो। 22 परमेस्वर ना राहेल की भी सुधि लीयो, अना ओकी पिराथना आयक के ओकी कोख खोली। 23 एकोलायी वा पोटलक भयी अना ओना एक टुरा ला जलम दियो, तबा वोना कह्यो, "परमेस्वर ना मोरी नामधरायी ला दुहुर कर दियो से।" 24 एकोलायी ओना असो कव्ह के ओको नाव यूसूफ रख्यो, "परमेस्वर मोला अखीन एक टूरा देहेत*।"

25 जब राहेल लक यूसूफ पैदा भयो, तबा याकूब न लाबान लक कह्यो, "मोला सार कर का मी आपरो देस अना घर लवट जाहीन। 26 मोला मोरी बायको गिन अना मोरो लेकरा गिनला दे । जेनको लाय मी तोरो सेवा करीसेऊ, का मी उनला लेयके जाऊ तोला यो मालूम सेत का मी ना तोरो कसो सेवा करीसेऊ।" 27 लाबान ना ओको लक कह्यो, "परमेस्वर को कन लक मोला तोरो कारन आसीस भेटयो से यो कारन लक तू यहान रूक जाय।" 28 अता "तू साजरो लक सांग मी तोला ओतरो बनी जरूर देऊ।" 29 याकूब ना ओको लक कह्यो, "तू जानासे, काम ई तोरो कसो सेवा करीसेऊ, अना तोरो जनावर मोरो जवर कसो परकार लक रह्यो। 30 मोरो आवन लक पहिले यो कितरो होतो, अना अब कितरो भय गयो सेत? अना यहोवा परमेस्वर ना मोरो आवनो पर तोला कितरो आसीस दियो सेत? पर मी अबा आपरो घरानो को बारेमा सोचासू।" 31 लाबान ना मंग कह्यो, "मी तोला काय देऊ?" याकूब ना कह्यो, "तू मोला काही नोको देव पर तू चाव्हासेत का मी तोरो जनावर को करप चरातो रव्हू ता 32 मी अज तोरी सब हेड़ सेरी-मेंढी अना पाठी को बीचमा लक होय के हीटहु, अना जोन सेरी मेंढी धब्बा वालो अखीन चितबहाड़ी होय, अना जोन मेंढी कारी होय, अना जोन सेरी धब्बा वाली अना उनला मी बेगरो कर के राखीन अना वोच मोरी बनी होहेत। 33 अना जब तू मोरी बनी देवन को लाय आवजोस ता न्याय को अनुसार एना सेरी-मेन्ढी ला जोन मी बेगरो करके राखीसेऊ, तुमी चोवने अखीन एना सेरी मेंढी लक कोनी चितबहाडी अना कबरी पाठी नही होयेत ता वा चोरी मानो जाहेत।" 34 तबा लाबान न कह्यो, "तोरो कव्हन को अनुसार होय।" 35 तबा लाबान ना वोच दिवस सब धारी वालो अना धब्बा वालो बोकरा पाठी अना सब धब्बा वाली चितबहाड़ी सेरी ला मजे जोनको मा पान्ढरो धब्बा होतो, उनला अना सब कारी मेंढी गिनला बेगरो करके आपरो टूरा गिनको हातमा सोप दियो। 36 अना उ आपरो अना उनको बीच मा तीन दिवस को रस्ता को फरक ठयरायो, अना याकूब लाबान की सेरी मेंढी को हेड़ ला चरान लग्यो। 37 तबा याकूब ना चिनार, अना बदाम, अना अरमोन को झाड़ को हिवरो-हिवरो डगालि ले के उनको छिलटा कहीं-कहीं छील के उनला धारीदार बनाय दियो, अना उन छड़ि गिनकी पांढरोपन दिखायी देन लगी। 38 तबा छीली हुयी छड़ि गिनला सेरी-मेंढी को पूढा उनको पानी पीवन को डोंगी मा उभो करयो, अना जब हेड़ पानी पिवन को लाई आई तबा वय गाभन भयी गयी। 39 छड़ि को पूढा गाभन होय के, सेरी मेंढी को हेड़ धारी वालो, धब्बा वालो अना चितबहाड़ी बच्चा जनी। 40 तबा याकूब न मेंढी को पाठी ला बेगरो-बेगरो करयो। अना लाबान की सेरी मेंढी को टोन्ड ला धब्बा वालो अना सब कारो बच्चा को तरफ कर दियो अना अपनो करप ला उनको करप लक बेगरो रखो। अना लाबान की सेरी मेंढी गिनलक मिलन नहीं दियो। 41 अना जब-जब ताकतवर सेरी-मेंढी हेड़ लक गाभन होत होतीन , तबा-तबा याकूब उन छड़ी ला उनको पूढा कोटना मा रख देत होतो लोन लक यो उ छड़ि ला चोवतो हुयो गाभन होत होती। 42 पर जब हेड़ लक कमजोर सेरी - मेंढी गाभन होतीन ता तबा ऊ छड़ि ला उनको पूढा नही राखत होतो। एकोलाय कमजोर-कमजोर सेरी मेंढी लाबान की भयी, अना ताकतवर सेरी मेंढी याकूब की भयी। 43 असो परकार याकूब लगत धनी बन गयो। अना ओको लगत सो सेरी-मेंढी, दासी अना दास, अना ऊंट अना गधा को करप भय गयो।