पैदाइस 25

अबराहम को अखीन खानदान

1 तबा अबराहम एक अखीन बायको आनीस जोनको नाव कतूरा होतो। 2 ओना जिमरान योक्सान, मदना, मिद्यान, यिसबाक, अना सूह जलम लियो। 3 योक्सान लक सेबा अखीन ददान जलम लियो, अखीन ददान को खानदान मा अस्सूरी, लतूसी, अखीन लुम्मी लोक भयो। 4 मिद्यान को टूरा एपा, एपेर, हनोक, अबीदा, अखीन एल्दा भयो, यो सब कतूरा की सन्तान भयो। 5 इसहाक ला ता अबराहम ना अपरो सब काही दियो 6 पर अपरो रखेल गिन लक *25:6 हाजिरा अखीन कतूरा पैदा भयो टूरा गीनला सीरप उपहार देय के अपरो जीतो जी अपरो टूरा इसहाक को जवर लक दिन उगती कन को देस मा धाड़ दियो।

अबराहम को मरनो

7 तबा अबराहम की पूरी उमर एक सौ पचहत्तर साल की भयी 8 अबराहम को उमर भयी गयो अखीन आपरो बुड़गापन मा उ मर गयो अना आपरो आजा बाबा को संग मील गयो। 9 ओको टूरा इसहाक अना इस्माएल ना वोला ममरे को दिनउगती मा मकपेला को गूफा मा माती दियो। जोन हित्ति सोहर को टूरा एपरोन को जमीन होतो। 10 ✝25:10 पैदाइस 23:16या वाच जमीन आय, जेनला अबराहम ना हित्ति लक मोल ले लियो होतो, ओको मा अबराहम अना वोकी बायको सारा ला माती दियो गयो। 11 अबराहम को मरन को बाद परमेस्वर ना वोको टूरा इसहाक ला आसीस दियो, जोन लहैरोई नाव को बीहर को जवर रव्हत होतो।

इस्माएल को खानदान

12 अबराहम को टूरा इस्माएल जोन सारा को मिसरी दासी हाजीरा लक पैदा भयो होतो, ओकी खानदान असो परकार सेत। 13 इस्माएल को बेटा गीनको सूची असो परकार सेत। इस्माएल को मोटो टूरा को नाव नबायोत, केदार मंग अदबेल, मिबसाम, 14 मिस्मा, दूमा, मस्सा, 15 हदद, तेमा, यतूर, नापीस, अना केदमा। 16 इस्माएल को टूरा योच भयो, अना इनको च नाव को अनुसार इनको सहेर अना छावनी को नाव भयो। अना योच बारा राजकुमार अपरो-अपरो कुल को परधान भयो। 17 इस्माएल की पूरी उमर एक सौ सैतीस साल को हुयो, तबा ऊ मर गयो, अना ऊ अपनो मरयो हुयो पुरखा मा जायके मिल्यो। 18 अना ओको खानदान हवीला लक सूर तकन, जोन मिसर देस को दिन उगती अना अस्सुर को रस्ता मा से। अना उनको सब हिस्सा उनको भाऊ उनको जवर रहोसे।

इसहाक अना याकूब को जलम

19 अबराहम को टुरा इसहाक को खानदान यो से, अबराहम लक इसहाक पैदा भयो 20 अना इसहाक ना चालीस साल को होय के रिबका लक, जोन पद्दनराम को वासी, बतूएल की टूरी अना अरामी लाबान की बहिन होती, बिहाव कर लियो। 21 इसहाक ओ बायको रिबका वाखड़ होती, एकोलाय ओना रिबका लायी परमेस्वर लक बिनती करयो। अना परमेस्वर ना ओकी पिराथना आयकीस, असो परकार लक ओकी बायको पोट लक भयी। 22 ओको पोट मा लेकरा एकमेक लक लिपट के एक दूसरो लक लड़न लग्यो। तबा रिबका न कह्यो, "मोरी जो असीच दसा रहेत ता मी कसी जीन्दी रहू?" अना वा यहोवा परमेस्वर की इक्सा पूसन ला गयी। 23 ✝25:23 रोमियो 9:12तबा परमेस्वर ना रिबका लक कह्यो, "तोरो पोट मा दुई रास्ट सेत। अना तोरी कोख लक हीट के बेगरो होहेत। अना एक राज दुसरो लक ताकत वर होहेत। अना मोठयो लहान को सेवा करहेत।" 24 जब रिबका को जलम देवन को बेरा आयो, तबा मालूम भयो कि रिबका को पोट मा जोड़का लेकरा सेत। 25 पहलो जोन टूरा पैदा भयो ऊ लाल हिटयो, अना वोको पूरो तन चून्दी लक भरयो होतो। एकोलाय वोको नाव एसाव रख्यो गयो। 26 तबा ओको पिच्छू ओको भाऊ अपनो हात मा एसाव को कुरूच धरयो हुयो पैदा भयो, अना ओको नाम याकूब*25:26 अंड़गा मारन वालो रख्यो गयो। जब रिबका ना उनला जलम दियो तबा इसहाक साठ साल को होतो।

एसाव लक मोठो टूरा होन को अधिकार बिकनो

27 तबा वय टुरा बढ़न लगीन। अना एसाव त जंगल मा रव्हन वालो चतुर सीकारी भयी गयो, पर याकूब सीधो मानूस होतो अना उ तम्बु मा रव्हत होतो। 28 इसहाक एसाव लक लायो सीकार को मांस जेवत होतो। एकोलाय उ वोको लक माया करत होतो। पर रिबका याकूब लक माया करत होती।

29 एक दिन याकूब जेवन लायी काही दार रांधत होतो; अना एसाव जंगल लक थक्यो हुयो आयो। 30 तबा एसाव न याकूब लक कह्यो, "वा जोन लाल चीज से, ओको लक मोला काही जेवन लाय दे। काहे की मी थक्यो सेव।" योच कारन लक ओको नाम एदोम*25:30 मसूर को लाल दार भी पड़यो। 31 याकूब न कह्यो, "अपरो मोठो होवन को हक मोला बीक दे।" 32 एसाव न कह्यो, "चोव मी ता मरनो पर सेऊ, एकोलाय यो हक लक मोरो काजक भलो होहेत?" 33 याकूब✝25:33 इब्रानियो 12:16 ना कह्यो, "मोरो लक अबा कसम खाय" एकोलाय एसाव ना वोको लक कसम खायो अना आपरो मोठो होवन को हक ला याकूब को हात बीक दियो। 34 तबा याकूब ना एसाव ला भाकर अना पकायी हुयी मसूर की दार दी अना वोना जेय के चले गयो। असो परकार लक एसाव ना अपरो मोठो होन को हक ला बेकार जान्यो।