1 जब अबराम निन्यानबे साल को भय गयो, तबा पिरभू ना ओको दरसन देके कह्यो, "मी सर्वसक्तीमान यहोवा सेऊ मोरो हाजीर मा रव्ह अना निरदोस आचरन करन को कोसीस कर। 2 मी तोरो संग विधान बांधूसू अना तोरो खानदान ला लगत जादा बढ़ाऊ।" 3 तबा अबराम तोन्ड को बल पड़ गयो, अना परमेस्वर वोको लक गोस्टी करतो गयो। 4 "चोव, मोरी वादा तोरो संग बंधी रहेत, एकोलाय तू काही रास्ट गिनको बुजरूक बनजो। 5 ✝एकोलाय अब लक तोरो नाव अबराम नहीं रहेत पर तोरो नाव अबराहम होयेत। एकोलाय का मीना तोला लगत रास्ट गिनको अजी बनायो सेऊ। 6 मी तोला लगत जादा खानदान को लोक देहिन, अखिन वोको मा लक काही राजा होहेत। अखिन तोरो जवर इतरो खानदान को लोक होहेत का यो रास्ट बन जाहेत। 7 ✝ अना मी तोरो संग, अना तोरो मघानी तोरो खानदान को पीढी-पीढी लक हरामेसा लायी अपरो करार स्थापित करूसू। का मी तोरो अना तोरो मघानी तोरो खानदान को परमेस्वर रव्हू। 8 ✝अना मी तोला, अना तोरो बाद तोरो खानदान ला भी यो पूरो कनान देस जोन मा तू परदेसी होय के रव्हे रहयो से उनला हरामेसा को लाय दे देऊ, अना मी उनको परमेस्वर रहू।"

9 तबा परमेस्वर ना अबराहम लक कह्यो, "तू भी मोरो संग बान्धयो गयो करार को पालन करजोस, तू अखीन तोरो मघानी तोरो खानदान भी आपरो-आपरो पीढ़ी मा वोको पालन करहेत। 10 ✝ मोरो संग बान्धी हुयी करार, जेको पालन तोला अना तोरो मघानी तोरो खानदान ला करनो पड़हेत। उ यो आय, तुमरो लक एक- एक मानूस को खतना होय। 11 तुम अपरो- अपरो टूरा को खतना कराय लेवो, जोन करार मोरो अना तुम्हरो बीच मा से, वोको योच निसान होहेत। 12 तुम्हरो हरेक टूरा को खतना ओको जलम को आठवो दिवस करयो जाये, हर एक पीढ़ी को मानूस को खतना होनो पाहिजे, चाहे उ तुम्हरो घर मा पैदा भयो दास होय, या परदेस लक धन देके लेयो गयो होय जोन तोरो खानदान को नहाय। 13 जो तोरो घर मा पैदा भयो दास से, अना जोन धन देके लियो गयो से इन दूई को खतना करायो जाय। असो परकार वोको खतना करयो जाये। असो परकार मोरी करार को निसान तुम्हरो देह पर होहेत। अना यो करार हरामेसा बनी रहेत। 14 जोन मानूस बिना खतना को रहेत, मजे जेनको टूरा को खतना नहीं करयो गयो से, वोच अपरो लोक हुन मा लक नास कियो जाहेत। काहेका ओना मोरो संग बान्धी हुयी करार ला तोड़ दियो।"

15 तबा यहोवा ना अबराहम लक कह्यो, "तोरी जोन बायको सारै से, ओला तू अब सारै नोको कव्हजोस, ओको नाम सारा* होयेत। 16 मी ओला आसीस देऊ, अना तोला ओको लक एक बेटा देऊ। अना मी वोला असी आसीस देऊ, का वा रास्ट गीन की माय बनेत, अना ओको खानदान मा राज्य- राज्य को राजा पैदा होयेत।" 17 तबा अबराहम तोन्ड को बल पड़यो अखिन हस्यो, अना मनमा च कव्हन लग्यो, "का सौ साल को होवनो पर भी सन्तान होय सकासेत? अखीन नवद साल की सारा पोटलक होय सकासे?" 18 अबराहम ना यहोवा लक कह्यो, "इस्माएल तोरी नजर मा बन्यो रव्हे, योच लगत से।" 19 तबा यहोवा ना कह्यो, "पक्को तोरी बायको सारा ला तोरो लक एक टूरा पैदा होयेत, अना तू ओको नाव इसहाक* रखजो, अना मी ओको संग असी करार बांधू जोन ओको मघा ओको खानदान लायी हमेसा- हमेसा को करार होयेत। 20 इस्माएल को बारेमा भी मी ना तोरी आयको सेऊ, मी वोला भी आसीस देऊ, अना वोला लगत लेकरा अना खानदान देऊ, अना उ बारा राजकुमार गीनको अजी होहेत, अना मी वोको खानदान लक एक मोठो रास्ट बनाहू। 21 पर मी आपरो करार इसहाक को संग च बांधू, जोन सारा लक अगलो साल योच ठहरायो हुयो बेरा मा पैदा होयेत।"

22 तबा परमेस्वर ना अबराहम लक गोस्टी करनो बंद करयो अखीन ओको जवर लक वरता चघ गयो। 23 तबा अबराहम ना अपरो टूरा इस्माएल ला लियो अखीन, अपरो घरमा जलम लियो दास गिनला अखिन जितरो ओको धन लक लियो गयो दासगीन समेत, मजे ओको घर मा जितरो मानूस होतो, उन पूरो ला लेय के वोच दिवस परमेस्वर को वचन को अनुसार उनको खतना करयो। 24 जब अबराहम को खतना करयो गयो तबा ऊ निन्यानबे साल को होतो 25 अऊर जब अबराहम को टूरा इस्माएल को खतना करयो गयो तबा ऊ तेरह साल को होतो। 26 अबराहम अना वोको टूरा इस्माएल को खतना एकच दिन भयो। 27 अना अबराहम को घर मा जितरो मानूस अखीन दास होतो जोन घरमा पैदा भयो होतो, अना जोन परदेसी गिनलक धन मा लेयो होतो, उन सब को खतना ओकोच हात लक भयो।