1 ✝इन गोस्टी को मघानी असो भयो का परमेस्वर ना अबराहम लक यो कह्य के ओकी परिक्सा लियो, "ओ अबराहम!" ओना कह्यो, "का हुकुम से?" 2 ✝ परमेस्वर ना कह्यो, "अपनो टूरा ला मजे आपरो एकच टूरा इसहाक ला जोन लक तू पिरेम करासेत ओला धरके मोरिय्याह देस मा जाय अना उता ओला एक पहाड़ी को पर जोन मी तोला सांगू अपरो टूरा ला होम बली करके मोला चघाने।" 3 दुसरो दिवस सक्कारी अबराहम ना होम बली को लाय काही लकड़ी कापो, अना अपरो गढव मा धरके अना इसहाक अना दुई दास ला धरके जोन जघा को बारे मा परमेस्वर ना सागयो होतो, उता जावन लगयो। 4 तीसरो दिवस अबराहम न डोरा उठाय के उ जघा ला दूहूर लक चोयो। 5 अना अबराहम ना अपरो दास गिनला कह्यो, "तुम इता गधा को जवर रुकयो रव्हो, मी अना इसहाक पूढा जाय के आराधना करबीन, तबा तुम्हरो जवर वापस आहीन।" 6 तबा अबराहम ना आपरो टूरा इसहाक ला होम बली की लकड़ी चघान लायी कह्यो, अना अपरो हात मा स्तो अना छुरी लियो। अना दूई एक संग चलयो। 7 इसहाक ना अपरो अजी अबराहम लक कह्यो, "अगो अजी" तबा वोना कह्यो, "काय? का कह्योसेगा," इसहाक न कह्यो, "चोव, स्तो अना लकड़ी त से पर होम बली लायी मेंढी को पाठी किता से?" 8 तबा अबराहम ना जवाब दियो, "ओ मोरो लेकरा आयक परमेस्वर खुदच होम बली को पाठी को इंतेजाम करेत।" अना दूई संग मा चलतो गयीन।

9 ✝वय जब वोना जघा मा गयीन जेनको बारे मा परमेस्वर ना अबराहम लक कह्यो होतो उता वोना वेदी बनाय के आपरो टूरा इसहाक ला बान्ध के वेदी मा काड़ी को वरता रख दियो। 10 तबा अबराहम ना अपरो टूरा ला बलि करन लायी हात बढ़ाय के छुरी उठायो। 11 तबा यहोवा को दूत ना सरग लक वोला हाकल के कह्यो, "हे अबराहम, हे अबराहम!" ओना जवाब दियो, "का हुकुम से।" 12 दूत न कह्यो, "उ लेकरा को कन अपरो हात नोको बढ़ाय अना ओला काही हानि नोको पहुंचा, अब मी जान गयो सेव, का तू परमेस्वर को भेव माना से, अना वोको हूकूम ला मानासे। काहेका तूना अपनो एकच टूरा ला भी नहीं रख छोड़यो से।" 13 ✝ तबा अबराहम न अपरो डोरा वरता उठायो, तबा चोयो का ओको पीछू एक मेंढा से, ऊ अपनो सींग लक एक झाड़ी मा फस्यो हुयो से। तबा अबराहम गयो, अना ऊ मेढा ला धरयो अना अपरो टूरा को जघा मा ओकी होम बली कर के चघायो। 14 अबराहम ना वा जघा को नाव "यहोवा इंतेजाम करासे रख्यो।" एकोलायी अज तकन लोग यो भी कव्हासेत का "यहोवा की पहाड़ी मा इंतेजाम करयो जायेत।"

15 तबा यहोवा को दूत ना दूबारा सरग लक अबराहम ला हाकल के कव्हयो, 16 "यहोवा आपरो च किरिया खाय के कव्हसे, का तूना यो काम करयो सेत, अना तूना मोरो लाय आपरो एकच टूरा ला मोला दे दियो, 17 यो कारन लक मी पक्को तोला आसीस देऊ, अना तोरो खानदान ला बादल को तारागिन, अना समुन्दर किनार को लगत रेतु को जसो बेगिनत करू, अना तोरो खानदान अपरो बयरी को नगर को अधिकारी होयेत। 18 अना धरती को पूरो रास्ट तोरो खानदान लक मोरो कन लक आसीस हासिल करेत, काहेका तूना मोरी हुकुम आयक के वोको पालन करयो से।" 19 एको बाद अबराहम अपरो दास गिनको जवर वापस आयो, अना वय सब उठ के ओको संग बेरसेबा गयो, अना अबराहम वहान रव्हन लगयो।

20 काही बेरा को मघानी, अबराहम ला यो सांगयो गयो। "मिल्का भी माय बन गयी से, ओना तोरो भाऊ नाहोर लायी आठ बेटा ला जलम दियो से।" 21 मोठो टूरा ऊस, अना ऊस को भाऊ बूज, अना कमूएल, जोन अराम को अजी भयो। 22 तबा केसेद, हजो, पिल्दास, यिद्लाप, अना ऊर बतूएल। 23 इन आठ टूरा ला मिल्का ना अबराहम को भाऊ नाहोर को लक जलम दियो। अना बतूएल लक रिबका पैदा भयी। 24 तबा नाहोर की रूमा नाम की एक रखेल भी होती; जेको लक तेबह, गहम, तहस, अना माका, पैदा भयो।