1 तबा इसहाक न याकूब ला बुलाय के आसीरवाद, अना हुकुम दीयो, "तू कोनी कनानी टूरी लक बिहाव नोको कर जोस। 2 उठ अना पद्दनराम* मा अपरो नाना बतूएल को घर जाय वहान, अपरो मामा लाबान की एक टूरी लक बिहाव कर लेवजो। 3 सर्वसक्तीमान परमेस्वर तोला आसीस दे, अना तोला लगत सन्तान देयके बढ़ाये, जोनलक तू लगत गोत को अजी बन जाजोस। 4 ✝उ तोला अना तोरो खानदान ला भी अबराहम को जसो, आसीस देहे का तु यो देस जोनमा तू परदेसी होय के रव्हासेत अना जेनला परमेस्वर ना अबराहम ला दियो होतो, ओमा तोरो कब्जा भयी जाये।" 5 असो परकार लक इसहाक ना याकूब ला बिदा करयो, अना उ पद्दनराम को अरामी बतूएल को टूरा लाबान को जवर चली गयो, जो याकूब अना एसाव की माय रिबका को भाऊ होतो।

6 जब एसाव ला पता चलयो कि इसहाक ना याकूब ला आसीरवाद दे के पद्दनराम छेतर धाड़ दियो, का उ वहांन लक बायको आने अना ओला आसीरवाद देवन को बेरा असो हुकुम भी दियो, "तू कोनी कनानी टूरी लक बिहाव मत कर लेवजो," 7 अना याकूब अपरो माय-अजी को हुकुम मानके पद्दनराम ला चली गयो। 8 तबा एसाव असो सब चोवके अना यो भी सोच के कनानी टूरी मोरो अजी इसहाक ला बुरी लगयो से, 9 एकोलायी उ अबराहम को टूरा एसाव इस्माएल को जवर गयो, अना इस्माएल की टूरी महलत ला जोन नबायोत की बहिन होती, ओको लक बिहाव कर अपरो बायको गिनमा मिलाय लियो।

10 याकूब बेरसेबा लक हीटके हारान नगर को तरफ चलयो। 11 अना ओना कोनी एक जघा मा पहुंच के रात उतच बितावन को बिचार करयो, काहेका दिन बुड़ गयो होतो, एकोलाय ओना जघा मा गिरयो गोटा मा लक डोस्का को खाल्या मुडेसा राख के वोच जघा मा सोय गयो । 12 ✝तबा याकूब ना सपना मा चोवयो, का एक नसेनी धरती मा उभो से, अना ओको छोर सरग तकन पहूच गयो। अना परमेस्वर को दूत ओको पर चघतो अना उतर रहयो से। 13 ✝अना यहोवा ओको पर उभो होय के कह्यो "मी यहोवा, तोरो बाबा अबराहम को परमेस्वर, अना इसहाक को भी परमेस्वर सेऊ। जोन जमीन मा तु सोयो , वोला मी तोला अना तोरो खानदान ला देऊ। 14 ✝अना तोरो खानदान जमीन की धूल को कन को जसो लगत सारो होयेत, अना दिन बुड़ती, दिन उगती, उत्तर, दक्सिन चारो कन फैलतो जायेत। अना तोरो अना तोरो खानदान को लक धरती को खानदान आसीस पाहेत। 15 ✝अना आयक मी तोरो संग रहू, अना जिता कहीं तू जाजोस उता मी तोरी रक्सा करू, अना तोला यो देस मा वापस लेके आऊ। जोन गोस्टी मी ना तोरो लक कह्यो सेऊ जब तकन उनला पूरी नहीं कर लेऊ तबा तकन तोला नहीं छोडू।" 16 तबा याकूब जप लक जग गयो, अना कव्हन लग्यो, "पक्को यो जघा मा यहोवा परमेस्वर से अना मी यो गोस्टी ला नही जानत होतो।" 17 अना वोना डर को मारे कह्यो, "या जघा कितरो भयानक से? यो परमेस्वर को भवन को अलावा अना काही नहीं होय सका से यो ता सरग को बेसकुड़ से।" 18 सक्कारी याकूब उठयो, अना वोना मुडेसा को गोटा ला उठायो, अना वोला मुन्डा जसो उभो करयो, अना वोको पर तेल डाक दियो। 19 अना वोना जघा को नाव बेतेल* रख्यो, पर ऊ नगर को नाम पहिले लूज होतो। 20 तबा याकूब न परमेस्वर लक एक मानता करयो, "यदि तू मोरो संग रह्य के मोरी यातरा ला सफल कर के मोरी रक्सा करजो, अना मोला जेवन लाय भाकर, अना घालन लाय कपरा देवजोस। 21 अना मी आपरो अजी को घर साजरो लक लवट आहीन ता यहोवा च मोरो परमेस्वर होवजोस। 22 अना यो गोटा जोनला मी निसान को लाय उभो करयो सेऊ, यो जघा परमेस्वर को घर कहलाहेत। अना जोन काही तू मोला देवजोस वोकोच दसवा हिस्सा मी जरूरच तोला दियो करू।"