1 ✝तबा परमेस्वर ना याकूब लक कह्यो, "इता लक हीटके बेतेल नगर मा जाय, अना उतच रह्यजोस अना उता परमेस्वर को लाय एक वेदी बना, जोन ना तोला वोना बेरा दरसन दियो जब तू आपरो भाऊ एसाव को भेव लक परात होतो।" 2 तबा याकूब ना अपरो घराना लक अना उन सब लक भी कह्यो जोन ओको संग होतो, "तुमरो बीचमा जोन परायो देव से, उनला हेड़ के फेको अना अपरो-आप ला पवीतर करो अना आपरो कपरा बदल डालो 3 अना आवो, हम इता लक हीट के बेतेल नगर ला जाबीन उता मी परमेस्वर को लाय एक वेदी बनाहिन। अना जोनना संकट को बेरा मा मोरी आयक लियो अना जोन रस्ता लक मी चलत होतो, ओको मा मोरो संग रह्यो।" 4 जितरो दूसरो देव की मूरती उनको जवर होती, अना जितरो कुन्डल उनको कान मा होतो, वा पूरो ला उनना याकूब ला दे दियो। अना याकूब ना उनला सेकेम नगर को जवर बांज झाड़ को खाल्या गाड़ दियो। 5 तबा याकूब अना ओको टुरागिन ना पूढा बढीन तबा उनको चारो कन को नगर निवासी गिनको मनमा परमेस्वर को असो भेव समाय गयो का उन ना याकूब अना वोको टूरा गिनको मघा जावन को कोसीस नही करीन। 6 याकूब उन पूरो को संग जोन ओको संग होतो, कनान देस को लूज नगर मा आयो। वा नगर बेतेल भी कहलावा से। 7 उता याकूब ना एक वेदी बनायी, अना वोना जघा को नाव एल बेतेल रख्यो। काहेका जब उ अपरो भाऊ लक परात होतो तबा परमेस्वर ना खूदच वोको पर परगट कियो गयो होतो। 8 अना रिबका की दूध पिलान वाली दाई दबोरा मर गयी, अना बेतेल* नगर को बांज झाड़ को खाल्या को हिस्सा मा वोला माती दियो गयो। अना वा अल्लोन *झाड़ को नाव अल्लोनबक्कूत* रख्यो गयो। 9 तबा याकूब को पद्दनराम लक आवन को मघानी परमेस्वर ना दूसरी बार ओला दरसन देयके आसीस दियो। 10 ✝अना परमेस्वर ना ओको लक कह्यो, "अब तकन तोरो नाव याकूब रह्यो से, पर अबा तोरो नाम याकूब नहीं रहेत पर तू इसराइल कहलाजोस।" एकोलाय परमेस्वर ना याकूब को नाव इसराइल रख्यो। 11 ✝तबा परमेस्वर ना वोला सांगयो, "मि सर्वसक्तीमान परमेस्वर सेऊ, तोरो लगत सन्तान होहेत अना लगत रास्ट बनहेत अना तोरो खानदान मा राजा जलम लेहेत। 12 अना जोन जघा मा अबराहम इसहाक ला दियो सेऊ। वाच जघा मी तोला देवासू अना तोरो मघानी तोरो खानदान ला भी देहीन।" 13 तबा यहोवा जघा मा जितरो ओना याकूब लक गोस्टी करयो, अना वोको जवर लक वरता चघ गयो। 14 अना जोन जघा मा याकूब लक गोस्टी करयो उता वोना एक गोटा को खम्भा उभो करयो, अना ओको पर अंगूर रस अना जैतून को तेल डाक दियो। 15 जिता यहोवा ना याकूब लक गोस्टी कियो वोना जघा को नाव ओना बेतेल रख्यो।

16 तबा याकूब अना ओको परिवार बेतेल नगर लक जान लग्यो। अना एपरात नगर थोड़ो च दूहुर रह्य गयो होतो, का राहेल ला जचकी को लगत दरद उठन लगी। 17 जब ओला लगत दरद होवन लगयो ता सुईन न ओको लक कही, "नोको डराव अब की बार तोला टुराच होयेत।" 18 तबा असो भयो का वा मर गयी, अना जीव हिटतो बेरा एक लेकरा ला जलम देइस अना टूरा को नाव ओना बेनोनी रख्यो; पर ओको अजी ना ओको नाम बिन्यामीन रख्यो। 19 राहेल त मर गयी, अना एपरात मजे बैतलहम की रस्ता मा वोला माती दीयो गयो। 20 याकूब ना ओकी कबर मा एक खम्भा ऊभो करयो राहेल की कबर को वा खम्भा अज तकन उभो अना बन्यो से। 21 तबा इसराइल पूढा बड़तो गयो, अना एदेर नाव की मीनार को पूढा बढ़ के अपरो तम्बू उभो करयो।

22 जब इसराइल वा देमा रव्हत होतो, तबा एक दिन असो भयो। कि रूबेन ना जायके अपरो अजी की रखेल बिल्हा को संग कुकरम करयो, अना यो गोस्टी इसराइल ला मालूम भय गयी। याकूब को बारा टुरा भयो। 23 उनमा लक लिआ, को टूरा यो होतो, रूबेन, याकूब को मोठो टुरा, सीमोन, लेवी, यहूदा, इस्साकार, अना जबूलून। 24 अना राहेल को टुरा यो होतिन, मजे यूसूफ अना बिन्यामीन। 25 अना राहेल की दासी बिल्हा को टुरा यो होतो, मजे दान अना नप्ताली। 26 अना लिआ की दासी जिल्पा को टुरा यो होतो, मतलब गाद, अना आसेर। याकूब को योच टुरा भयो, जोन ओको लक पद्दनराम छेतर मा पैदा भयो।

27 ✝याकूब ममरे मा जोन कीरयतरबा मजे हेबरोन से, जिता अबराहम अना इसहाक परदेसी होयके रह्यो होतो, अपरो बाप इसहाक को जवर आयो। 28 इसहाक की उमर एक सौ अस्सी साल की भयी। 29 अना इसहाक को जीव छूट गयो, अना उ मर गयो, अना उ बुड़गा होय के आपरो पूरी उमर को होय के अपरो लोक हुनमा जाय मिल्यो, अना ओको टुरा एसाव अना याकूब ना ओला माती दीयो।