1 अबराहम ममरे को पवितर झाड़ गिनको बीच तेज ऊन को बेरा तम्बू को बेसकुड़ मा बस्यो हुयो होतो, तबा परमेस्वर ना ओला दरसन दियो। 2 ✝अबराहम ना डोरा वरता उठाय के चोवयो कि ओको पूढा तीन मानूस ऊभो सेत। जब अबराहम न उनला चोयो तबा उ उन लक भेंट करन लायी तम्बू को बेसकुड़ लक धावतो आयो, अखीन जमीन मा नव के उनला परनाम करयो, 3 अखीन अबराहम ना कह्यो, "ओ पीरभू, यदि मोरो पर तोरी दया को नजर से ता मी बिनती करूसू, कि अपरो दास को जवर लक नोको जाजो। 4 मी जरासो पानी आनासू अखीन तू अपरो पाय धोय के यो झाड़ को खाल्या आराम कर। 5 तबा मी जेवन आना सू, अखीन तू वोला जेव अना अपरो जीव ला सन्तोस कर तबा ओको बाद तू पूढा चलयो जाजो, काहेका तू अपरो दास को जवर आयो सेत।" उनना कह्यो, "जसो तू कह्योसे वसोच कर।" 6 तबा अबराहम लवकर तम्बू मा सारा को जवर गयो अखीन कह्यो, "लवकर च दहा किलो मैदा लेय के सान अखीन ओकी भाकर बनाय लेवो।" 7 तबा अबराहम जनावर को करप मा गयो, अखीन एक कवलो अना साजरो जनावर लेयके अपरो दास ला दियो, अखीन ओना वोला लवकर पकायो। 8 तबा अबराहम ना दूध, अखीन दही, अखिन जनावर को मटन मानूस गिनको पूढा परोस दियो; तबा तकन यो जेवन करतो रह्यो, अना अबराहम उनको जवर झाड़ को खाल्या ऊभो रह्यो।

9 उनना अबराहम लक पुसयो, "तोरी बायको सारा किता से?" अबराहम ना जवाब दियो, "वा तम्बू मा से।" 10 ✝उनमा लक एक न कह्यो, "मी अब लक नव महीना बाद वापस आऊ, अखीन तोरी बायको सारा लक एक टूरा पैदा होयेत।" सारा जोन अबराहम को पिच्छू उभी होती, तम्बू को दरवाजा लक उनको गोस्टी आयकत होती 11 अबराहम अना सारा लगत बूड़गा-बुड़गी भय गयो होतो, अखीन सारा को मासिक धरम बंद भय गयो होतो। 12 ✝ एकोलाय सारा अपनो मन मा हस के बोली, "मी बूड़गी भयी गयी सेऊ, अखीन मालीक मोरो नवरा भी बूड़गा से, का एको मघानी का मोला सूक मिल्हेत?" 13 जब यहोवा ना अबराहम लक कह्यो, "सारा कायको लाय हसी? वा काहे कही का मी बूड़गी, कसी एक लेकरा ला जलम देहीन?" 14 ✝का यहोवा लायी कोनी काम कठीन से? जसो कि मी ना कह्यो, "अब लक नव महीना बाद मंग मी तोरो जवर आऊ, अखीन सारा ला एक टूरा होहेत।" 15 तबा सारा डर को मारे यो कह्य के मुकर गयी, "मी नहीं हसी।" यहोवा न कह्यो, नहीं, "तू जरूर हसी होती।"

16 तबा वय मानूसगीन वहांन लक चली गयो, उता लक सदोम को कन चोव सकत होतो; अखीन अबराहम उनको संग उनला सार करन लायी संगमा गयो। 17 अखीन यहोवा ना अपरो आप लक कह्यो, "मी अबराहम लक नहीं लुकाऊ का मी काजक करन जाय रह्यो सेऊ? 18 अबराहम लक त पक्को एक महान अखीन ताकतवर रास्ट बनहेत। अखीन धरती को पूरो रास्ट ओको लक मोरो कन लक आसीस पायेत। 19 काहेका मी जानासू, का ऊ अपरो टूरा अना खानदान ला जोन ओको पिच्छू रह्य जाहेत, उनला हुकुम देहेत का वय परमेस्वर को रस्ता मा चलतो रव्हे, अना जोन सच्चो अखीन न्याय को काम करतो रव्हे, जोन लक जो कही परमेस्वर ना अबराहम को बारे मा कह्यो से वोला पूरो करे।" 20 तबा परमेस्वर ना कह्यो, "सदोम अना गोमेरा नगर को खिलाप भयानक आरोप से, अना उनको पाप बहोत भारी होय गयो से। 21 एकोलायी मी खाल्या उतर के चोहीन, का जसो भयानक आरोप मोरो कान तक पहुंच्यो से, वोना सहि सेत का नही, अखीन नही करयो होहेत त मी ओला जान लेऊ।"

22 तबा उ मानूस उता लक मुरक के सदोम को कन जावन लगयो, लग्यो, पर अबराहम परमेस्वर को पूढा उभो रह्य गयो। 23 तबा अबराहम ना परमेस्वर को जवर आय के कह्यो, "का तू सचमुच मा दुस्ट को संग निरदोस ला भी नास करजोस? 24 अगर ऊ नगर मा पन्नास निरदोस लोग सेत, त का तू सचमुच पूरो नगर ला नास कर देवजोस, अना पन्नास निरदोस को कारन ओला माफ नहीं करजोस, जोन ओको मा सेत? 25 असो काम करनो तोरो लक दूहुर रव्हे का दुस्ट को संग निरदोस ला भी मार डाके अना निरदोस अना दुस्ट दोयी की एकच दसा होय। यो तोरो लक दूहुर रव्हे। का तू सप्पा धरती को सच्चो न्याय नहीं करजोस?" 26 परमेस्वर ना कह्यो, "यदि मोला सदोम नगर मा पन्नास निरदोस लोग मिलेत ता उनको कारन लक मी पूरो नगर ला सोड़ देऊ।" 27 तबा अबराहम न कह्यो, " ओ परमेस्वर आयक! मी ता माती अखीन राखड़ सेऊ, तबा भी मी ना इतरो हिम्मत करीसेऊ का तोरो लक गोस्टी करू। 28 पर साईद उन पन्नास निरदोस लक पाँच कम होय जाये, त का तू पाँच को कम होय जानो को कारन लक पूरो नगर ला नास कर देजोस?" वोना जवाब दियो, "यदि मी पैंतालीस निरदोस लोक ला तपासा सेऊ, तबा मी नगर ला नास नहीं करू।" 29 अबराहम ना मंग कह्यो, "साईद उता चाड़ीस मिले।" तबा वोना जवाब दियो, "अगर चाड़ीस सेत त मी ओला नास नहीं करू।" 30 अबराहम ना मंग कह्यो," ओ मालीक गुस्सा नोको होजोस, त मी दुबारा कव्हासू अदि तीस होयेत ता काजक होहेत?" वोना जवाब दियो, "यदि मोला तीस भी मिलेत तबा भी मी असो नहीं करू।" 31 तबा अबराहम न कह्यो, "ओ मालीक आयक, मी इतरो हिम्मत ता कर सका सेऊ का मी तोरो लक गोस्टी करुँ। मान लेव का ओको मा बीस च निरदोस मिले।" वोना कह्यो "बीस भी मिल जाहेत ता मी नास नही करहीन।" 32 अबराहम ना कह्यो, " परमेस्वर गुस्सा नोको होय, अखीन मी एकच बार कहीन, यदि सीरप दहा होहेत ता " वोना जवाब दियो , "अगर दहा सेत ता मी वोना नगर ला नास नही करहीन।" 33 अबराहम को संग बोलन को बाद, परमेस्वर चली गयो, अखीन अबराहम अपरो घर लवट गयो।