1 अना बादल धरती पूरो दुनीया को सप्पा काही बनायो। 2 अना परमेस्वर ना आपरो काम जेला उ करत होतो सातवो रोज पूरो करयो, अना ओना आपरो करयो हुयो सप्पा काम लक सातवो दिवस आराम करयो। 3 अना परमेस्वर ना सातवो दिवस ला आसीस देयो अना पवितर ठहरायो, काहेकि ओमा ओना संसार को बनावनो को आपरो सप्पा काम लक आराम लेयो। 4 बादर अना धरती को सुरुवात को बखान यो से

जबा वोना दिवस यहोवा परमेस्वर ना धरती अना बादर ला बनाईस। 5 तबा बर्रा मा कोनी झाड़ नही होतो अना कोनी परकार को घासफुस नही होतो। काहेकी यहोवा परमेस्वर ना धरती मा पानी नही बरसायो होतो। अना धरती मा खेती करन साठी मानूस भी नही होतो । 6 ता भी धरती लक कोहरा उठत होतो अना सप्पा धरती ओदो भय जात होतो। 7 तबा यहोवा परमेस्वर ना मानूस ला भुई को माटी लक बनायो अना ओको नाक मा जिंदगी को सांस फुक दियो अना आदम जित्तो भय गयो । 8 यहोवा परमेस्वर ना दिन उगती मा एक बगीचा लगाईस अना ओको नाव अदन राखिस। अना उ बगीचा मा ओना जेनो आदम ला बनाईस होतीस राख देइस। 9 अना यहोवा परमेस्वर ना धरती मा सब किसम-किसम को झाड़ जो चोवन मा खबसुरत होतो अना खावनो मा साजरो फर होतो उगायो। अना बगीचा को बीचमबीच मा जिंदगानी को झाड़ अना भलो बुरो को गियान को झाड़ लगायो। 10 ओना बगीचा ला सीचन साठी एक मोठो नदी अदन लक हिटी अना वहान लक पुढ़ा बोहायके चार धारा मा बट गयो। 11 पहलो धारा को नाव पीसोन से यो वोच नदी से जो हवीला नाव को देस ला घेर लेईसे 12 अना वहान चोखो सोन्नो मिलासे। अखिन वहान मोती अना किमती गोटा सुलेमानी भी मिलासे। 13 दुसरी नदी को नाव गीहोन से यो नदी कुस देस ला घेर लैईसे। 14 अना तीसरी नदी को नाव हिदकैल से यो अस्सुर को दिन उगती कना बोहासे अना चवथो नदी को नाव फरात से। 15 तबा यहोवा परमेस्वर ना आदम ला लेयके अदन को बगीचा मा राख देयो। का उ ओमा काम करहे अना ओको रक्सा करहे। 16 अना यहोवा परमेस्वर ना आदम ला यो हुकुम देइस, "तु बगीचा को सब झाड़ गीन को फर बगैर संका को खाय सकासेस; 17 पर भलो अना बुरो को गियान को झाड़ को फर तु कभ्भूच नही खाजोस;काहेकि जेने दिवस तु ओको फर खाजोस ओनो दिवस जरुरच मर जाजोस।" 18 मंग यहोवा परमेस्वर ना सांगीस "आदम को एकलो रव्हनो बेस नही से; मि ओको साठी एक असो सहायक बनाऊ जो ओको लक मेल खाय सकेह।" 19 अना यहोवा परमेस्वर भुई मा लक सब जाति को जंगली जनावर गीन, अना बादर को सब परकार को पक्सी गीन ला बनायके आदम को कठा आनीस का चोहे का उनको काजक-काजक नाव राखासे;अना जेना-जेना जिंदो जिवगीन को जोन-जोन नाव आदम ना राखिस वाच ओको नाव भय गयो। 20 एने रिती लक आदम ना सब जनावर गीन , अना बादर को पक्सी गीन को नाव राखिन, पर आदम को साठी कोनी असो सहायक नही मिलयो जोन ओको लक मेल खाय सके। 21 तबा यहोवा परमेस्वर ना आदम ला गहरो जप मा डाक देइस, अना जबा उ सोय गयो तबा ओना ओको एक पसरी हेड़के ओको जघा मांस भर दियो। 22 अना यहोवा परमेस्वर ना ओनो पसरी ला जोन ओना आदम मा लक हेड़ी होतीस, आईमाई बनाय देइस;अना ओला आदम को कठा आनीस। 23 तबा आदम ना कह्यो, "अबा यो मोरी हडडी गीन मा की हडडी अना मोरो मांस को मांस से। एकोलाय एको नाव आईमाई होहे, काहेकि यो मरद मा लक हेड़ी गयी से।" 24 एकोलाय मानूस आपरो माय बाबूजी ला सोड़हेत अना आपरी बायको लक मिलयो रव्हे, अना वय एकच तन बनो रहेत। 25 आदम अना ओको घरवारी दुही बिन कपरा को होतीन, पर सरमात नही होतीन।