1 उ देस मा गीरहानी पड़यो, यो पहलो गीरहानी लक अलग होतो। जोन अबराहम को दिवस मा पड़यो होतो। एकोलाय इसहाक पलिस्ती जाति को राजा अबीमेलेक को जवर गरार नगर गयो। 2 परमेस्वर ना इसहाक ला दरसन दे के कह्यो, "मिसर देस मत जा जोन देस को बारे मा मी तोरो लक कह्यो, ओको मा रव्ह। 3 ✝तू वोच देस मा रव्हजोस अना मी तोरो संग रहू, अना तोला आसीस देऊ मी तोला अना तोरो खानदान ला यो सब देस देहू। जोन कसम मी ना तोरो अजी अबराहम लक खायो होतो वोला मी पूरो करहु। 4 अना मी तोरो खानदान ला बादल को तारा गीनको जसो करू अना मी तोरो खानदान ला यो सब देस देहीन। अना धरती की पूरी रास्टगिन तोरो खानदान को कारन अपरो आपला धन्य मानेत। 5 काहेका अबराहम ना मोरी गोस्टी मानयो, अना जोन मी ना वोला सोपयो होतो वोला अना मोरो हुकूम गीन, विधि अना बेवस्ता ला पालन करयो" 6 एकोलाय इसहाक गरार नगर मा रह गयो। 7 ✝ जब उ जघा को लोक गीन ना वोको बायको रिबका को बारेमा पूसयो, तबा इसहाक ना असो सोच के कि यदि मी वोला अपरी बायको कहिन, त इता को लोग रिबका को कारन लक जोन गजब खोपसूरत होती मोला मार डाकेत एकोलाय भेव लक इसहाक ना जवाब दियो "वा त मोरी बहिन आय।" 8 जब इसहाक ला उता रह्यतो हुयो लगत बेरा बीत गयो, तबा एक दिवस पलिस्ती गीनको राजा अबीमेलेक ना खिड़की मा लक ढूक के चोवयो, इसहाक अपरो बायको रिबका को संग पिरेम कर रह्यो से। 9 तबा अबीमेलेक न इसहाक ला बुलाय के कह्यो, "वा बाई त पक्को तोरी बायको आय, तबा तू ना काहे ओला अपरी बहिन कह्यो?" तबा इसहाक ना जवाब दियो, "मी ना सोच्यो होतो, का कही असो नोको होय कि मोला वोको कारन लक अपरो जान खोनो पड़े।" 10 अबीमेलेक ना कह्यो, "तू ना आमरो लक असो कायलाय करयो?असो मा तो मोरो परजा को कोनी भी मानूस तोरो बायको को संग सोय सकत होतो, अना तू अमीला पाप मा फसातो।" 11 एकोलाय अबीमेलेक ना अपरो पूरी परजा ला हुकुम दियो, जोन कोनी उ मानूस ला या वा बाई ला छिहेत उ पक्को मार दियो जाहेत। 12 तबा इसहाक ना उ देस मा जमीन मा अनाज बोयो, अना वोच साल मा सौ गुना फसल हासिल करी अना परमेस्वर ना वोला आसीस दियो। 13 अना उ धनी भय गयो, ओकी उन्नती होतो गयो। अना उ लगत धनवान मानूस भय गयो। 14 जब ओको जनावर सेरी-मेंढी, गाय-बईल, को करप अना दास-दोसीगीन भयो, तबा पलिस्ती ओको लक जलन करन लग्यो। 15 जोन बेहेर ला इसहाक को अजी अबराहम को दास गीनना अबराहम को जीते जी खोन्दयो होतो, उनला पलिस्ती जाति को लोग न माती लक पूर के बंद कर देयीन। 16 तबा अबीमेलेक न इसहाक लक कह्यो, "आमरो जवर लक चलो जाय, काहेका तू आमरो लक लगत ताकतवर बन गयो सेत।" 17 यो कारन लक इसहाक उता लक चली गयो, अना गरार नगर की घाटी मा अपरो तम्बू उभो करके रव्हन लगयो। 18 तबा जोन बेहेर ओको अजी अबराहम को बेरा मा खन्दयो गयो होतो, अना अबराहम को मरन को मघानी पलिस्ती गीनना बेहेर ला पूर दियो होतिन, तबा इसहाक ना वोना बेहेर गिनला मंग दुबारा खन्दवायो अना उनको वाच नाव राख्यो जोन वोको अजी ना राख्यो होतो। 19 तबा इसहाक को दास गीनला बेहेर खन्दत बेरा एक पीझरा भेटयो। 20 तबा गरार को चरान वालो ना इसहाक को चरानवालो लक कज्या करयो, अना कह्यो, "यो पानी आमरो से।" एकोलाय इसहाक ना वोना बेहेर को नाव एसेक रख्यो। काहेका वय लोक इसहाक लक कज्या कियो होतीन। 21 तबा इसहाक को दास गिनना एक दूसरो बेहेर खन्दयो, अना उन ना वोको लाय भी कज्या करीन एकोलाय वोको नाव इसहाक ना सित्ना* को नाम दियो। 22 तबा इसहाक ना उता लक हीटके एक अखीन बेहेर खन्दवायो, अना वोको लायी काही कज्या नही भयो एकोलाय वोको नाव रेहोबात राखयो। इसहाक न कह्यो, "अब त परमेस्वर ना आमरो लाय लगत जघा दियो से अना यो देसमा अमी तरक्की करबीन।" 23 उता लक उ बेरसेबा गयो। 24 अना वोच दिवस परमेस्वर ना रात मा दरसन देके कह्यो, "मी तोरो अजी अबराहम को परमेस्वर सेऊ, तू नोको डराय काहेका मी तोरो संग सेऊ। अना अपरो दास अबराहम को कारन तोला आसीस देऊ, अना तोरो खानदान ला बढ़ाऊ।" 25 तबा इसहाक न वहांन एक वेदी बनायी, अना परमेस्वर लक आराधना करयो अना अपरो तम्बू वहांच ऊभो करयो । अना वहांन इसहाक को दास गीनना एक बेहेर खन्दयो।

26 ✝तबा राजा अबीमेलेक अपरो मन्तरी अहुज्जत, अना सेनापति पीकोल ला संग लेके गरार नगर लक इसहाक को जवर गयो। 27 इसहाक ना उनला कह्यो, तुमना मोरो संग बयर करके आपरो बीच लक हेड़ दियो होतो, अबा मोरो जवर कायलाय आयो सेव? 28 उनना कह्यो, "अमीना ता सफा चोयो सेजन, का यहोवा परमेस्वर तोरो संग सेत। एकोलाय अमीना सोचयो का तू ता यहोवा परमेस्वर को कन लक धन्य से, एकोलाय आमरो लक तू किरिया खाय। अना तू आमरो लक असो करार कर की 29 जसो मीना तोला नही छुयो, अना तोरो संग बस भलाई च कियो से, अना तोला सांती लक सार करयो, ओको अनुसार तू भी आमरो लक कोनी बुरो बरताव नोको करजोस। अब तू परमेस्वर को आसीस पायो हुयो मानूस सेत। 30 तबा इसहाक ना उनको लायी खास जेवन तैय्यार कियो अना जेवन करीन । 31 तबा च भुसांरे लवकर उठ के एकमेक लक कसम खायीन। तबा इसहाक ना उनला साजरो लक सार करयो, अना वय खुसी लक ओको जवर लक चली गयो। 32 वोच दिवस इसहाक को दास गिन आयके अपनो उ खन्दयो बीहर को बारेमा इसहाक ला सांगयो, का अमीला पानी मील गयो से।" 33 तबा इसहाक ना वोना बेहर को नाव सीबा* रख्यो; योच कारन लक अज तकन उ नगर को नाव बेरसेबा* पड़यो से।

34 जब एसाव चालीस साल को भयो, तबा ओना हित्ति जाति की दोय टुरीगिन सी बिहाव करयो, यहूदीत अऊर बासमत, यहूदीत को अजी को नाव बेरी अना बासमत को अजी को नाव एलोन होतो; 35 अना उनको कारन लक इसहाक अना रिबका को मन मा ठेस पहुची।