Daniel 11

1 "दारा नाव को मादी राजा को राज को पहेलो साल मिकाइल ला फारस को सरगदूत को बिरोध मा वोला हिम्मत अना ताकत देवन काजी मी उभो भयी गयो सेऊ।"

मिसर अना सीरीया को राज

2 अखीन अब मी तोला सही गोस्टी सांगासू। आयक! फारस को राज मा अबा तीन अखीन राजा उभो होहेत, अखीन चवथो राजा उन सब लक लगत धनी होहेत अखीन जब उ धन को कारन लक ताकतवर भयी जाहेत ता सब लोख हुनला यूनान को राज को बिरोध मा उकसाहेत। 3 वोको बाद एक बीर राजा उठेत अखीन अपरो राज ला लगत बढायेत, अखीन अपरो मनसा को अनुसार च काम करहेत। 4 अखीन जब वय मोठो होहेत ता वोको राज टूट जायेत। अखीन चारी कन बट के बेगरो-बेगरो भयी जाहेत अखीन वोको राज को ताकत जसो को वसो नही रहेत। ना त वोको बंस ला काही भेंटेत।

5 तबा मिसर देस को राजा ताकतवर भयी जाहेत, पर वोको मघा वोको हाकीम वोको लक जादा ताकतवर भयी जाहेत। उ हाकीम सासन करन लगहेत, अना लगत ताकतवर भयी जाहेत। 6 मंग काही साल को बाद मिसर को राजा सीरीया को राजा लक समजोता भयी जाहेत अखीन आपरी टूरी को सादी करा देहेत, पर यो समजोता लम्बो बेरा तकन नही चलहेत, अना वोकी बेटी वोको नवरा अना वोको लेकरा अना वोको सेवक जोन धन वोको संग मा गयो होतो सबला मार डाकेत। 7 एको झट बादमा वोको एक रिस्तेदार राजा बन जाहेत। उ सिरिया को राजा को सेना पर हमला करहेत, उनको किला मा धसेत, अना उनला हरा देहेत। 8 तबा उ उनको देव को मूरती अखीन सोन्नो-खूरो को साजरो मन ला भावन वालो भान्डो ला हिसक के मिसर ले जाहेत। मंग उ काही साल तकन सीरीया देस को राजा को बिरोध मा हात नही उठाहेत। 9 तबा उ राजा सिरिया देस को राजा को देस मा आहेत, मंग उ आपरो देस मिसर ला लवट जाहेत। 10 सिरिया को राज को टूरा हुन लड़ाई को लाय एक लगत मोठो दल जमा करहेत अखीन, पूरा-पानी को जसो दुस्मन ला झाक लेहेत, अना वोको मा चलतो हुयो किला तकन चले जाहेत। 11 तबा गुस्सा मा आयके मिसर देस को राजा सिरिया देस को राजा को बिरोध मा लडाई करहेत अना वोको मोठो सेना पर कब्जा कर लेहेत । 12 जब दक्सिन देस को राजा वोको सेना ला हरा देहेत। तबा वोको दिल घमन्ड लक भर जाहेत। उ लगत दहा हजार लोख गिनला मार डाकेत, पर उ वोको लक हरमेसा नही जितेत। 13 काहेका सिरिया देस को राजा लवटके पहेलो लक भी मोठो गरदी जमा करेत, अना लगत दिवस बरना साल को बीतनो पर उ पक्को तैयारी को संग मोठो सेना अना धन लियो हुयो आहेत। 14 वोना बेरा मा मिसर देस को राजा को बिरोध मा लगत लहान जमिनदार गीन बिदरोह करहेत। खुद तोरो लोग हिन्सा करहेत। कोनी दरसन ला पूरो करन को आस लक बिदरोह करहेत पर तोरो लोख पर यो हिन्सा करन वालो मानूस आपरो काम मा सफल नही होहेत। 15 तबा उ सिरीया देस को राजा चघाई करहेत अखीन घेरा बन्‍दी करेत अखीन एक पक्को नगर मा कब्‍जा कर लेहेत। मिसर देस को सेना वोको पूढा टीक नही पाहेत। अखीन वोको निवाड़ो गयो बीर को दल मा एतरो ताकत नहात का वोको समोर उभो रव्ह सकेत। 16 एकोलाय सिरिया देस को हमला करन वालो राजा आपरो मनसा को अनुसार सब राज लक बरताव करहेत, वोको सामना करन वालो कोनी नही होहेत। उ वादा कियो गयो सुन्दर देस मा आपरो हक जमा लेहेत। अखीन सब देस मा वोको हक होहेत। 17 तब उ आपरो राज को पूरो ताकत समेत, लगत सीध्दो लोख ला संग लियो हुयो आवन लगहेत, अना आपरो मनसा को अनुसार काम कियो जाहेत। उ वोको एक टूरी ला बायको बनन लाय एकोलाय देहेत, का वोको राज्य बिगाड़ो जाहेत, पर वो एक मजबूत नही रहेत ना तो वोको राज रहेत। 18 तब उ संमुदर द्वीप गिनको कन तोन्ड करके लगत लोख ला ले लेहेत। पर एक सेनापति वोको घमन्ड ला मिटाहेत*11:18 मूल में, बंद करेगा ; बरना वोको घमन्ड को अनुसार वोला बदला देहेत, मंग वोको साजीस सफल नही भयो अखीन वोको लक वोला काही फायदा नही होहेत। 19 सिरिया देस को राजा आपरो देस को किला कन लवटन को लाय मुरक जाहेत। पर उ रस्ता मा खोद्दा खायके पड़ जाहेत। अखीन वोको कही च पता नही चलहेत। 20 "तबा वोको बाद एक अखीन राजा आहेत, जोन आपरो राज को धन बढावन काजी लोख गिन पर बरगन लगाय के एक अधिकारी धाड़ेत काही बेरा मा वा राजा ला मर डाको जा हेत , पर जनता को मोहरा नही अखीन नातो लडाई मा।"

सीरीया देस को दुस्ट राजा

21 "वोको जघा मा एक नीच मानूस उठेत, जोनको राज मान पहेले जसो नही होहेत, तौभी उ चयन को बेरा आयके चिकनो-चुपड़ो गोस्टि लक राज ला भेटेत। वोको जघा मा एक नीच मानूस गद्दी मा बसेत। जोन राज को मान को जोग नही पर चापलूसी लक करके राज करहेत। परजा को कोनी सुदी नही रव्हेत उ बिना सांगयो गद्दी मा बस जाहेत।" 22 सेना वोको समोर पूरो नास अखीन बिखर जाहेत। आमरो विधान को परधान भी वोको पूरा मा बोहाय जाहेत। 23 जोन देस वोको संग मेल करहेत, अना वोको संग ढोग को बरताव करहेत। उ काही लोख को ताकत लक ताकतवर भयी जाहेत। 24 सान्ती को बेरा पिरान्त को साजरो लक साजरो हिस्सा मा हमला करहेत । उ असो-असो बुरो काम करहेत जोन योको आजा-बाबा ना भी नही करयो होतीन। उ लूट को माल अखीन धन-माया आपरो लोख हुनमा बाट देहेत। उ काही बेरा तकन मजबूत नगर ला लेवन को कलपना करतो रहेत। 25 मंग वोको बादमा उ आपरो ताकत अखीन आपरो हिम्मत को कारन लक एतरो भड़क जाहेत मंग एक मोठो सेना को दल धरके मिसर देस मा लड़ाई करहेत। मंग मिसर देस को राजा भी आपरो मोठो सेना दल को संग लड़ाई करहेत पर वोको समोर वा हार जाहेत। काहेका खुद वोको देस मा वोको बिरोध मा साजीस होहेत। 26 यहाँन तकन का वय लोख जोन पतरी मा जेवासेत वोमाच भोक करहेत। वोको सेना नास भयी जाहेत। लगत सेना मर जाहेत। 27 तबा दूई राजा गीनको मन खोट काम करन को लाय उतारू भई जाहेत। वय एक च टेवील मा बसके एकमेक लक खोटो सांगेत। पर एकोलक काही फायदा नही होहेत। काहेका पक्को कियो गयो आखरी बेरा अब तकन पूरो नही भयो से। 28 तबा सिरीया देस को राजा मिसर देस को लगत लूट धरयो हुयो आपरो देस लवटेत। पर वोको मन पवितर करार को बिरोध मा होहेत। उ आपरो मन को अनुसार पवितर नगर मा काम करहेत मंग आपरो देस मा लवट जाहेत। 29 पक्को कियो गयो बेरा मा उ मंग मिसर देसमा हमला करहेत येना गन को दसा पुढा को दसा लक उलट होहेत। 30 सागर को किनार मा को रव्हन वारो कित्ती रोमनगिन को पानी जहाज को दल उनको बिरोध मा मिसर देस मा आहेत। अखीन उ बिचार के भेव खायके लवट जाहेत। उनको लवटन को बेरा मा आपरो गुस्सा पवीतर करार पर पूरो करहेत। उ पवितर करार ला तोड़न वालो को सूद लहेत। 31 उनको लक धड़यो गयो सेना दल पवितर-जघा अखीन किला ला असुद कर देहेत, वय हरामेसा को स्तो बली ला बंद कर देहेत। वय बिना घिरन वालो चीजला उभो करहेत जोन वोला बरबाद कर देवासेत।✝11:31 मत्ती 24:15 32 जोन पापी मानूस कानून ला तोड़ेत वोला उ मीठ्ठो-मीठ्ठो गोस्टि मा बेहका देहेत। पर जोन लोख ला परमेस्वर को गियान होहे वय वोको बिरोध करेत। 33 जोन लोख अक्कलवर अगुवा सेत, वय परजा को लगत लोख गिनला समजाहेत, पर आपरो यो काम को कारन लक उनला मर जावनो पड़ेत, वय तरवार लक मार डाकयो जाहेत। वय स्तो मा फेक दियो जाहेत अखीन उनको धन-माया लूट लियो जाहेत। अना उनला जेल मा डाक दियो जाहेत, यो दूख काही दिवस को लाय होहेत। 34 जब उनको पर दुख आहेत ता उनला काही सायता भेटेत पर उनमा लक काही अक्कलवर अगुवा मार दियो जाहेत जोन ईमानदार नहात वोच चापलूसी मा बहेक के उनलक मिल जाहेत। 35 काही अक्कलवर लोक हुन भी कानून लक पड़ जाहेत, वय एकोलाय पड़ जाहेत का वय आपरो को जाच करहेत अखीन परखो जाय वय आपरो मा सुद्ध अखीन साफ कियो जाय यो दसा आखरी बेरा तकन बनयो रहेत। काहेका यो सप्पा गोस्टि को आखीर ठयरायो गयो बेरा मा होहेत। 36 अखीन सिरिया को राजा आपरो मनसा को अनुसार काम करहेत। उ खुद ला परमेस्वर को वरता राखेत अखीन अपरो आपला उन लक मोठो सांगेत। उ सब देव गिनको परमेस्वर को बिरोध मा काम करहेत अना गोस्टि सागेत। उ तबा तकन सफल होतो रव्हेत जब तकन वोको पर परमेसवर को कोप ना भड़क जाय काहेका जोन पक्को सेत वा ता होहेत।✝11:36 2 थिस्सलुनीकियो 2:4; यहेजकेल 28:2; परकासित वाक्य 13:5-6 37 उ आपरो आजा-पुरखा को देवहुन को कोनी परवा नही करहेत, अना ना तो आईमाई गिनला नही मानहेत याहान तकन कि सबरी देव गिनला नही मानहेत काहेका उ आपरो बिचार लक आपला सब लक वरता ठयराहेत। 38 उ इन देव को जघा किला को देव को पूजा करहेत। यो देव वोको आजा-बाबा नही जानत होतीन। उ सोन्नो-खुरो किमती मनी अखीन किमती मन माफीक चघावा आपरो किला को देव ला चघायो। 39 उ एक परदेसी देव को सायता लक सप्पा मजबूत किला मा हमला करहेत। उ उन लोख हुनला मान देहेत जोनला उ लगत पसन्द करासेत। उ लगत सो लोख हुनला उनको अधिन कर देहेत, अना उनला ईनाम मा जघा ला बाट देहेत। 40 "आखरी बेरा मा मिसर देस को राजा वोको पर हमला करहेत, पर सिरिया देस को राजा रथ, घोड़ा सवार अखीन पानी जहाज को दल को संग आन्धड़ जसो वोको पर हमला करहेत। उ लगत सो देस मा धस जाहेत। उ उनला उलटो-पुलटो कर देहेत अखीन उन मा लक पूढा बढते जाहेत।" 41 उ वाचा को देस मा भी हमला करहेत, अना वोय उजड़ जाहेत। पर एदोम, अखीन मोआब अखीन अमोन देस के मुख्य हिस्सा को नेतागिन वोको नास लक बच जाहेत। 42 वा लगत सो देस मा आपरो ताकत बगराहेत, अखीन मिसर देस वोको हात लक नही बच सकासेत। 43 उ मिसर देस को सोन्नो-खूरो अखीन दूसरो कीमती*11:43 यो लोख नील नद्दी को उपरोती हिस्सा को लोख सेत। चीज को मालिक बन जाहेत। लीबिया अखीन कूसी देस को रव्हनवालो वोको अधिन भयी जाहेत। 44 पर दिन उगती अखीन उत्तर लक खबर आहेत। जोनला आयक के उ बिकल भयी जाहेत अखीन हीजड़ के लगत लोख हुनको नास करन को लाय हिटेत। 45 उ सागर अखीन तेज वालो पवितर पहाड़ को बीच मा वाचा को देसमा आपरो राज को तम्बू उभो करहेत। एतरो करन को बाद मा वोको आखीर होहेत अखीन वोला बचान वालो कोनी नही होहेत।