1 यो दाऊद को टूरा उपदेसक को सबद, सेत जोन यरुसलेम मा राजा होतो। 2 उपदेसक ना कह्यो, सांगयो, "बेकार से, बेकार से। बिल्कुल बेकार, सब काही बेकार से।" 3 मानूस हुनला उनको सप्पा मेहनत लक काजक हासिल भयो, जोन दिन को खाल्या मेहनत करासेत? 4 एक पीढ़ी जावासे अना दुसरी पीढ़ी आवासे, पर धरती हरामेसा बनी रव्हासे। 5 दिन उगासे अखिन बुड़ासे अना आपरो हिटन को कन गदने लवट जावासेत। 6 वारा दक्सिन को कन बोहासे अना उत्तर को कन मुरक जासेत, वा घुमतो अखीन बहेतो रव्हासे अखीन जिता कन लक आवासे उता कन लवट जासेत। 7 सबच नद्दीहुन समुंदर मा जायके मिलासे तबा भी समुंदर उतरोच भरयो रव्हासे अना जोन जघा लक नद्दीहुन हिटासे उतच मंग लवट जासे। 8 सबच गोस्टी मेहनत लक भरयो से, मानूस एको बारे मा नही सांग सकेत अना चोवनो लक वोको डोरा नही थकासे अना आयकन लक कान भरासेत। 9 जोन काही भयो होतो, वा मंग होहे, अना जोन काही बन गयी से, वा दुबारा बनायो जाहे। अना दिन को खाल्या कोनी गोस्टी नवतो नहात। 10 का असो काही से, जेको बारेमा कोनी कव्ह सकेत " चोवो यो काही नवतो से? यो यहान पहलेच लक से, लगत पहेले लक होतो अना यो आमरो बेरा लक पहले यहान होतो।" 11 मघा को पीढ़ी गिनको कोनी हेत नही रखासेत, अना यहान तकन कि आवन वालो पीढ़िगिन को भी, उन लोक हुन लक हेत नही कियो जाहेत जोन उनको को मघा चलासेत।

12 मी उपदेसक यरुसलेम मा इसराइल को राजा होतो। 13 मीना बिचारयो का जोन काही बादल खाल्या होवासे ओको राज डिमाक लक सोचके मालूम करहू। पर यो मोठो दुख को काम से, जोन परमेस्वर ना मानूस गीन को लाय राखिसेस का ओय ओको मा लगयो रव्होत। 14 मोला ओय सब काम चोइन जोन बादल को खाल्या होत होतिन; चोवो, सप्पा नासवान से जसो वारा ला धरनो जसो। 15 जोन तेड़गा से उ सीद्दो नही कियो जाय सकत, जोन कम सेत वोला मोजो नही जाय सकासेत। 16 मी ना मन मा कह्यो, चोवो, जोन मोरो लक पूढा यरुसलेम मा राज करत होतीन, उनमा लक मी लगत अक्कलवर भयी गयो सेऊ, मी ना लगत सो अक्कल अना गियान को अनुभव करयो सेऊ। 17 मीना अपरो मन लगयो का अक्कल को राज लेहू अना बवारोपन अना अठ्ठियापन ला भी समज लेहू, मोला मालूम भय गयो का यो भी वारा ला धरन जसो से। 18 काहेकि लगत अक्कल को संगा लगत दुख भी से, अना जोन अपरो अक्कल बढावासे उ अपरो दुख भी बढावसे।