तकलीफ, मेहनत अना मीत बनावनो
1 तबा मीना यो भी चोवयो का जोन काही दिन को खाल्या लोक हून को संग बूरो बरताव होवासे। मीना उनको आँसु ला चोवयो, अना यो भी का उन दुखी लोक हुन ला हिम्मत अना ताकत देवन वारो कोनी नहात। अन्धेर करन वारो को हात मा सक्ती होतो पर उनला सान्ति देनवारो कोनी नहात। 2 एकोलाय मी मरयो हुया को जोन मर चूकयो से, उनको जिन्दो गिन लक जबा अबा तकन जिन्दो से, लगत धन्य सांगयो। 3 उन दुई लगत साजरो वा से जोन अबा तकन जलम नही भयो से, अखीन ना यो बूरो काम चोवयो, जोन दिन को खाल्या होवा से। 4 तबा मीना सप्पा मेहनत को काम अना सप्पा सफल काम गीनला चोवयो जोन आपरो सेजारी लक जरन को कारन करासे वा भी बेकार च से, अना वारा ला धरनो जसो से। 5 मूरख छाती मा हात धरके रव्हासे, अना उ खुदच ला बरबाद करासे। 6 सुक को संग एक खोची उन दोन खोची लक साजरो से जोन मेहनत लक से पर यो भी जसो वारा ला धरनो से। 7 मंग मीना दिन को खाल्या या बेकार गोस्टी चोयो। 8 अदी मानूस एखलो से, वोको टूरा नहात अना कोनी भाऊ नहात अदी उ लगातार कमावासे, वोको मेहनत को कोनी आखीर नहात, वोको डोरा धन माया लक सन्तोस नही होवा से। वा आपरो खुद लक कभ्भू नही पुसासे, मीना यो मेहनत कोनको लाय करा सेऊ, अखीन काहे करासेऊ अना काहे खुद ला सूक चयन लक बेगरो करा सेऊ? यो भी बेकार से अना यो दूख को काम से।
9 एक लक साजरा दुई से, काहेकि उनको मेहनत को साजरो फर मिलासे। 10 अदी एक मानूस पड़ जाहेत ता दूसरो वोको मदत करहेत। पर कोनी मानूस को एखलो रव्हनो साजरो नहात काहेका जबा उ पड़हे ता वोको कोनी मदत करनवारो नही रव्हेत। 11 मंग दुही झन संग मा झोपेत ता वोय गरम रहेत, पर कोनी एखलो कसो गरम होय सकासे? 12 एखलो मानूस ला बैरी हरा देहेत, पर वोच बैरी दोन मानूस गिनला नही हरा सकेत। अना तीन बैरी पर लगत भारी भयी जाहेत जसो का तीन आट को दोरी ला तोड़नो लगत कठीन सेत। 13 एक गरीब अना अक्कलवर जुवान टुरा एक बुड़गा अना मूरख राजा लक लगत साजरो से। काहेका बुड़गा राजा चितावनो पर भी धियान नही देवासेत। 14 मंग चाहे जुवान जेल लक सीघांसन मा पोहोचो से चाहे उ वोको राज मा कंगाल पैदा भयो से। 15 मीना चोवयो का दिन को खाल्या रव्हन वालो अना चलन वारो सबच लोक राजा को वारीस जुवान को मघा करत होतीन जीव ला वोको मघानी चलतो चोयो सेऊ। 16 वोको मघा चलनवरो गिन बेगीनती होतीन। मंग आवनवालो पीढी वोला भी पंसद नही करहेत। एकोलाय सही मा यो भी बेकार से असो जसो वारा ला धरनो।