ହଡ଼କଆଃ ପାପ୍ ହେୟାତିଙ୍ଗ୍
1 ଏନ୍ ମାହିଁନାରାଃ ମିଦ୍ହିସି ଉପୁନିୟା ହୁଲାଙ୍ଗ୍ରେ ଇସ୍ରାଏଲ୍ ହଡ଼କ ହୁଣ୍ଡିୟାନ୍ଲଃ କାଟାବ୍କେଦ୍ତେ ବସ୍ତା ତୁସିଙ୍ଗ୍ୟାନାକ ଓଡ଼ୋଃ ବହଃରେ ଧୁଡ଼ି ହିର୍ଚିୟାନାକ। 2 ଇସ୍ରାଏଲ୍ କିଲିରେନ୍ ସବେନ୍ ହଡ଼କ ଏଟାଃ ଦିଶୁମ୍ରେନ୍ ହଡ଼କତାଃଏତେ ଆପାନ୍ୟାନାକ, ଓଡ଼ୋଃ ଇନ୍କୁ ଆପ୍ନାଃ ଆପ୍ନାଃ ଠାୟାଦ୍ରେ ତିଙ୍ଗୁୟାନ୍ଲଃ ଆପ୍ନାଃ ପାପ୍ ଓଡ଼ୋଃ ପୁର୍ଖାହାଡ଼ାମ୍କଆଃ ପାପ୍କ ରିକାକାଦାଲେ ମେନ୍ତେ ହେୟାତିଙ୍ଗ୍ତାନ୍ଲଃ ମାନାତିଙ୍ଗ୍କେଦାକ। 3 ଇନ୍କୁ ଆକ ତିଙ୍ଗୁକାନ୍ତାଃରେଗି ତାଇନ୍କେଦ୍ତେ ମୁସିଙ୍ଗ୍ରାଃ ଉପୁନ୍ହିସା ଜାକେଦ୍ ଆକଆଃ ପ୍ରାଭୁ ପାର୍ମେଶ୍ୱାର୍ଆଃ ଆନ୍ଚୁ ପୁଥି ପାଢ଼ାଅକେଦାକ ଓଡ଼ୋଃ ମୁସିଙ୍ଗ୍ରାଃ ଏଟାଃ ଉପୁନ୍ହିସା ଜାକେଦ୍ ପାପ୍ ହେୟାତିଙ୍ଗ୍କେଦାକ ମେନ୍ତେ ମାନାତିଙ୍ଗ୍ ଓଡ଼ୋଃ ପ୍ରାଭୁ ପାର୍ମେଶ୍ୱାର୍ଆଃ ସୁନୁସାର୍ ରିକାକେଦାକ।
4 ଯେଶୁୟ, ବାନି, କଦ୍ମିୟେଲ୍, ଶବ୍ନିୟ, ବୁନ୍ନି, ଶେରେବିୟ, ବାନି, ଓଡ଼ୋଃ କନାନି ମୁଖ୍ୟା ଲେବୀ ହଡ଼କ ନାଙ୍ଗ୍ ବାଇକାନ୍ ମାଚେନ୍ ଚେତାନ୍ରେ ତିଙ୍ଗୁକେଦ୍ତେ ପ୍ରାଭୁ ପାର୍ମେଶ୍ୱାର୍ତାଃରେ କାଉରିକେଦ୍ତେ ବିନ୍ତିକେଦାକ।
5 ଏନ୍ତେ ଯେଶୁୟ, କଦ୍ମିୟେଲ୍, ବାନି, ହଶ୍ବନିୟ, ଶେରେବିୟ, ହୋଦିୟ, ଶବ୍ନିୟ, ପେଥାହିୟ ଓଡ଼ୋଃ ଲେବୀ ହଡ଼କ କାଜିକେଦାକ, "ବିରିଦ୍ପେ, ଆପେୟାଃ ଜାନାଅ ଜାନାଅରେନ୍ ପ୍ରାଭୁ ପାର୍ମେଶ୍ୱାର୍ଆଃ ସାହାରାଅ ରିକାଏପେ।"
"ହେ ପ୍ରାଭୁ, ଆମାଃ ମାନାରାଙ୍ଗ୍ ନୁତୁମ୍ ସବେନ୍କ ମାଇନେକା ଓଡ଼ୋଃ ସବେନ୍କଆଃଏତେ ଚେତାନ୍ ଆମାଃ ସାହାରାଅ ହବାଅଃକା।" 6 ଆମ୍ ଏସ୍କାର୍ ପ୍ରାଭୁ ତାନ୍ମେ। ଆମ୍ ସିର୍ମା, ସିର୍ମା ଚେତାନ୍ ସିର୍ମା ଓଡ଼ୋଃ ଏନାରେ ତାଇନଃ ସବେନାଃମ୍ ବାଇକେଦା, ଅତେ ଓଡ଼ୋଃ ଏନାରେୟାଃ ସବେନାଃମ୍ ବାଇକେଦା, ଦରେୟା ଓଡ଼ୋଃ ଏନାରେୟାଃ ସବେନାଃମ୍ ବାଇକେଦା। ଆମ୍ଗି ସବେନ୍କକେ ଜୀଉ ଏମାକାଦ୍କଆମ୍ ଓଡ଼ୋଃ ସିର୍ମାରେନ୍ ଫାଉଦ୍କ ଆମ୍କେ ଜହାର୍ମେତାନାକ। 7 ଆମ୍ଗି ପ୍ରାଭୁ ପାର୍ମେଶ୍ୱାର୍ ତାନ୍ମେ। ଆମ୍ ଆବ୍ରାମ୍କେ ସାଲାକିୟାମ୍ ଓଡ଼ୋଃ କଲ୍ଦିୟ ହଡ଼କଆଃ ଉର୍ ଦିଶୁମ୍ଏତେ ଇନିଃକେ ଅଡଙ୍ଗ୍ ଆଉକେଦ୍ତେ ଆବ୍ରାହାମ୍ ନୁତୁମ୍କିୟାମ୍। 8 ଆମ୍ ଆମାଃ ନାଜେର୍ରେ ଆୟାଃ ମନ୍ସୁରୁଦ୍ ପାତିୟାର୍ରଃ ଲେକା ନେଲ୍କେଦାମ୍ ଓଡ଼ୋଃ ଆୟାଃଲଃ ରାଜିନାମା ବାଇକେଦାମ୍। ଏନ୍ ରାଜିନାମା ଲେକାତେ କିନାନିୟ, ହିତ୍ତିୟ, ଇମୋରିୟ, ପିରିଷିୟ, ଯିବୁଷିୟ ଓଡ଼ୋଃ ଗିର୍ଗାଶୀୟ ହଡ଼କଆଃ ଦିଶୁମ୍କେ ଆୟାଃ କିଲିକକେ ଏମାକ ନାଗେନ୍ତେ ବାନାର୍ସା ଏମ୍କିୟାମ୍। ଆମ୍ ଆମାଃ ବାନାର୍ସା ପୁରାକାଦାମ୍, ଚିଆଃଚି ଆମ୍ ଧାର୍ମାନ୍ନିଃ ତାନ୍ମେ। 9 ଆମ୍ ମିସାର୍ ଦିଶୁମ୍ରେ ଆଲେୟାଃ ପୁର୍ଖାହଡ଼କଆଃ ସାସାତି ନେଲ୍କେଦାମ୍ ଓଡ଼ୋଃ ଲାଲ୍ ଦରେୟା ହେପାଦ୍ତାଃରେ ଇନ୍କୁଆଃ ରାନାଃ ଆୟୁମ୍କେଦାମ୍। 10 ଆମ୍ ଫାରୋ, ଆୟାଃ ସବେନ୍ ଦାସି ଓଡ଼ୋଃ ଆୟାଃ ଦିଶୁମ୍ରେନ୍ ସବେନ୍ ହଡ଼କତାଃରେ ଆକ୍ଦାନ୍ଦାଅକାମି ଓଡ଼ୋଃ ଚିହ୍ନାଁକମ୍ ଉଦୁବ୍କେଦା। ଚିଆଃଚି ଇସ୍ରାଏଲ୍ ହଡ଼କଆଃ ବିରୁଧ୍ରେ ମିସାର୍ରେନ୍ ହଡ଼କଆଃ ସିଗିଦ୍ ବିଷାଏରେ ଆମ୍ ସାରିକେଦାମ୍, ଏନାତେ ଆମାଃ ନୁତୁମ୍ ତିସିଙ୍ଗ୍ ଜାକେଦ୍ ନୁତୁମଃତାନା। 11 ଆମ୍ ଇନ୍କୁଆଃ ସାମ୍ନାଙ୍ଗ୍ରେ ଦରେୟାରାଃ ଦାଆଃ ବିନ୍ଗାଅକେଦାମ୍ ଓଡ଼ୋଃ ଇନ୍କୁ ରହଡ଼୍ ଅତେରେ ସେନ୍ତାନ୍ ଲେକା ଦରେୟାରେ ସେସେନ୍ୟାନାକ। ମେନ୍ଦ ଇନ୍କୁଆଃ ତାୟମ୍ ତାୟମ୍ କୁଦାଅତାନ୍ ହଡ଼କକେ ଇକିର୍ ଦରେୟାରେମ୍ ଡୁବିଗ୍ ଗଏଃକେଦ୍କଆ। 12 ଆମ୍ ସିଙ୍ଗି ଇମ୍ତା ରିମିଲ୍ରାଃ ଖୁଣ୍ଟୁଲଃ ଓଡ଼ୋଃ ନୁବାଃ ଇମ୍ତା ଇନ୍କୁଆଃ ସେନ୍ହରାରେ ମାସ୍କାଲେ ନାଙ୍ଗ୍ ସେଙ୍ଗେଲ୍ ଖୁଣ୍ଟୁଲଃ ଇନ୍କୁକେ ସୁତୁଃ ଆଉକେଦ୍କଆମେ। 13 ଆମ୍ ସିନାଇ ବୁରୁ ଚେତାନ୍ରେ ଆଡ଼୍ଗୁୟାନ୍ଲଃ ସିର୍ମାଏତେ ଇନ୍କୁଲଃ ଜାଗାର୍କେଦାମ୍ ଓଡ଼ୋଃ ଇନ୍କୁକେ ଅକ୍ନାଃ ବୁଗିନ୍ ଓଡ଼ୋଃ ଠାଉକାନ୍ ତାନାଃ, ଏନ୍ ନିୟାମ୍ ଓଡ଼ୋଃ ସାନାର୍ତି ଆନ୍ଚୁ ଏମାଦ୍କଆମ୍। 14 ଆମ୍ ଇନ୍କୁକେ ଆମାଃ ପାବିତାର୍ ରୁଡ଼ୁନ୍ ହୁଲାଙ୍ଗ୍ରାଃ ବିଷାଏରେ ଉଦୁବ୍କେଦ୍କଆମ୍ ଓଡ଼ୋଃ ଆମାଃ ଦାସି ମୁଶାରାଃ ହରାତେ ଆମାଃ ଆନ୍ଚୁ, ବିଧିବିଧାନ୍ ଓଡ଼ୋଃ ନିୟାମ୍ ଏମ୍କେଦାମ୍। 15 ଇନ୍କୁଆଃ ରେଙ୍ଗେଃ ମେଟାଅ ନାଙ୍ଗ୍ ସିର୍ମାଏତେ ଜମେୟାଁଃ କୁଲ୍କେଦାମ୍ ଓଡ଼ୋଃ ତେତାଙ୍ଗ୍ ମେଟାଅ ନାଙ୍ଗ୍ ସେରେଙ୍ଗ୍ଏତେ ଦାଆଃ ଅଡଙ୍ଗ୍କେଦାମ୍। ଆମ୍ ଇନ୍କୁକେ ଅକ ଦିଶୁମ୍ ଏମ୍ ନାଙ୍ଗ୍ ତିଃଇ ଚୁଣ୍ଡୁଲ୍କାଦ୍ ତାଇକେନାମ୍, ଏନ୍ ଦିଶୁମ୍କେ ଆକ୍ତେୟାର୍ ରିକା ନାଙ୍ଗ୍ ହୁକୁମ୍ ଏମ୍କେଦାମ୍। 16 ମେନ୍ଦ ଆଲେୟାଃ ପୁର୍ଖାହାଡ଼ାମ୍କ ଆପାନ୍କେ ମାରାଙ୍ଗ୍ ମେନ୍ତେ କାଜିତାନ୍ଲଃ ଆକଆଃ ମନ୍ କେଟେଃକେଦାକ ଓଡ଼ୋଃ ଆମାଃ ଆନ୍ଚୁ କାକ ଆୟୁମ୍କେଦା। 17 ଆମ୍ ଇନ୍କୁ ନାଗେନ୍ତେ ଅକ ଆକ୍ଦାନ୍ଦାଅକାମି ରିକାକାଦ୍ ତାଇକେନାମ୍, ଏନା ଇନ୍କୁ କାକ ପାହାମ୍କେଦା, ଚାଏ ଆମାଃ ଆନାଚୁ କାକ ଆୟୁମ୍କେଦା। ଇନ୍କୁ ମନ୍ କେଟେଃକେଦାକ ଓଡ଼ୋଃ ଆମାଃ ବିରୁଧ୍ରେ କାଜିକେଦ୍ତେ ମିସାର୍ ଦିଶୁମ୍ରେନ୍ ଦାସି ହବାଅଃତେ ସେନଃ ରୁହାଡ଼୍ ନାଙ୍ଗ୍ ଆଗୁଆଇ ସାଲାକେଦ୍କଆକ। ମେନ୍ଦ ଆମ୍ ଛାମା ଏମଃନିଃ, ମାନାରାଙ୍ଗ୍ନିଃ ଓଡ଼ୋଃ ଦୁଲାଡ଼୍ ଏମଃନିଃ ତାନ୍ମେ, ଆମ୍ ସୁଆଏତେ ଖିସ୍ଅଃନିଃ, ଦାୟା ଓଡ଼ୋଃ ଦୁଲାଡ଼୍ତେ ପେରେୟାକାନ୍ ପାର୍ମେଶ୍ୱାର୍ ତାନ୍ମେ। ଏନାମେନ୍ତେ ଆମ୍ ଇନ୍କୁକେ କାମ୍ ବାଗିକେଦ୍କଆ। 18 ଇନ୍କୁ ମିଆଁଦ୍ ଦାମୁର୍ରାଃ ମୁରୁତ୍ ବାଇକେଦ୍ତେ କାଜିକେଦାକ, "ଅକ ମାହାପୁରୁ ଆଲେକେ ମିସାର୍ ଦିଶୁମ୍ଏତେ ଅଡଙ୍ଗ୍ ଆଉକେଦ୍ଲେୟା, ଇନିଃ ନିଃ’ଗି ତାନିଃ," ମେନ୍ତେ କାଜିକେଦ୍ତେ ପାର୍ମେଶ୍ୱାର୍କେ ନିନ୍ଦାକିୟାକ। 19 ଏନ୍ରେୟ ଆମାଃ ମାରାଙ୍ଗ୍ ଦାୟା ହରାତେ ଆମ୍ ଇନ୍କୁକେ ବିର୍ରେ କାମ୍ ବାଗିକେଦ୍କଆ। ସିଙ୍ଗିରେ ରିମିଲ୍ରାଃ ଖୁଣ୍ଟୁ ଓଡ଼ୋଃ ନୁବାଃ ଇମ୍ତା ସେଙ୍ଗେଲ୍ରାଃ ଖୁଣ୍ଟୁଲଃ ଇନ୍କୁକେ ହରା ଉଦୁବ୍ ନାଙ୍ଗ୍ କାମ୍ ରୁଡ଼ୁୟାନା। 20 ଆମ୍ ଇନ୍କୁ ଇତୁନ୍ ନାଙ୍ଗ୍ ଆମାଃ ବୁଗିନ୍ ଆତ୍ମାକେ ଏମ୍କେଦ୍କଆମ୍। ଇନ୍କୁ ରେଙ୍ଗେଃରେ ଆଲକାକ ତାଇନଃ ମେନ୍ତେ ଆମ୍ ଜମ୍ ନାଙ୍ଗ୍ ମାନ୍ନା ଓଡ଼ୋଃ ତେତାଙ୍ଗ୍ ନିର୍ ନାଙ୍ଗ୍ ଦାଆଃ ଏମାଦ୍କଆମ୍। 21 ବାର୍ହିସି ବାରାଷ୍ ଜାକେଦ୍ ଆମ୍ ଇନ୍କୁକେ ବିର୍ରେ ଆସୁଲ୍କେଦ୍କଆମ୍। ଇନ୍କୁଆଃ ଜେତ୍ନାଃ କା ଜାଞ୍ଜିୟାନା, ଇନ୍କୁଆଃ ଲିଜାଃ କା ମାରିୟାନା ଓଡ଼ୋଃ କାଟା କା ମଁ’ୟାନା।
22 ଆମ୍ ଇନ୍କୁକେ ପୁରାଃ ରାଇଜ୍ ଓଡ଼ୋଃ ଜାତି ଚେତାନ୍ରେ ଜିତାଅ ନାଙ୍ଗ୍ ଦେଙ୍ଗାକେଦ୍କଆମେ। ଏନ୍ତେ ଆକ ଆକ୍ତେୟାର୍କାଦ୍ ଅତେ ହାଟିଙ୍ଗ୍ ନାଙ୍ଗ୍ ହଗି ଦେଙ୍ଗାକେଦ୍କଆମେ। ଇନ୍କୁ ହିଷ୍ବୋନ୍ ରାଜାରାଃ ସିହୋନ୍ ଦିଶୁମ୍ ଓଡ଼ୋଃ ଓଗ୍ ରାଜାରାଃ ବାଶନ୍ ଦିଶୁମ୍ ଆକ୍ତେୟାର୍କେଦାକ। 23 ଆମ୍ ଇନ୍କୁଆଃ ହନ୍କକେ ସିର୍ମାରେନ୍ କା ଲେକା ଦାଡ଼ିୟଃ ଇପିଲ୍କ ଲେକା ପୁରାଃଗିମ୍ ପସାକେଦ୍କଆ ଓଡ଼ୋଃ ଅକ ଦିଶୁମ୍ ଆକଆଃ ପୁର୍ଖା ହାଡ଼ାମ୍କକେ କାଜିକାଦ୍କ ତାଇକେନାମ୍, ଏନାକେ ଆକ୍ତେୟାର୍ ନାଙ୍ଗ୍ ଏନ୍ ଦିଶୁମ୍ତେ ଇନ୍କୁକେ ଆଉ ସେଟେର୍କେଦ୍କଆମ୍। 24 ନେ’ଲେକାତେ ଇନ୍କୁଆଃ ହନ୍କ ଏନ୍ ଦିଶୁମ୍ରେ ବଲକେଦ୍ତେ ଆକ୍ତେୟାର୍କେଦାକ। ଆମ୍ ଏନ୍ ଦିଶୁମ୍ରେ ତାଇନ୍ତାନ୍ କିନାନ୍ରେନ୍ ହଡ଼କକେ ହାରାଅକେଦ୍କଆମେ ଓଡ଼ୋଃ ଇନ୍କୁଆଃ ରାଜାକଲଃ କିନାନ୍ରେନ୍ ହଡ଼କକେ ଇସ୍ରାଏଲ୍ ହଡ଼କଆଃ ତିଃଇରେମ୍ ଜିମାକେଦ୍କଆ। ଜେ’ଲେକାଚି ଇସ୍ରାଏଲ୍ ହଡ଼କ ଇନ୍କୁକେ ଆକଆଃ ଇଛାସାନାଙ୍ଗ୍ ଲେକା ରିକାକଆକ। 25 ଇନ୍କୁ ପାଚ୍ରିକାନ୍ ନାଗାର୍ ଓଡ଼ୋଃ ବୁଗିନ୍ ଅତେ ଆକ୍ତେୟାର୍କେଦାକ। ରାକାମ୍ ରାକାମ୍ ବୁଗିନ୍ ବିଷାଏରେ ପେରେଜାକାନ୍ ଅଡ଼ାଃ, ଉରାକାନ୍ କୁଆଁ, ଦାଖ୍ବାକ୍ଡ଼ି, ଅଲିଭ୍ ବାଗାଇଚା ଓଡ଼ୋଃ ପୁରାଃଗି ଜଅଃତାନ୍ ଦାରୁକ ଆକ୍ତେୟାର୍କେଦା। ଇନ୍କୁ ଜମ୍କେଦ୍ତେ ବି’ୟାନ୍ଲଃ ଆସ୍ଦିୟାନାକ ଓଡ଼ୋଃ ହଡ଼୍ମରେ ପେଡ଼େଃ ନାମ୍କେଦାକ। ଆମ୍ ଇନ୍କୁକେ ଏମ୍କେଦ୍କ ସବେନ୍ ବୁଗିନ୍ ବିଷାଏରେ ରାସ୍କାୟାନାକ। 26 ମେନ୍ଦ ଇନ୍କୁ ଆମାଃ କାଜି କା ମାନାତିଙ୍ଗ୍କେଦ୍ତେ ଆମାଃ ବିରୁଧ୍ରେ କାଜିକେଦାକ ଓଡ଼ୋଃ ଆମାଃ ଆନ୍ଚୁକେ କାକ ଖାତିର୍କେଦା। ଅକ ନାବୀକ ଇନ୍କୁକେ ଆମାଃସାଃ ରୁହାଡ଼୍ ନାଙ୍ଗ୍ ଚିର୍ଗାଲ୍କ ତାଇକେନାକ, ଇନ୍କୁକେ ଗଏଃକେଦ୍କଆକ ଓଡ଼ୋଃ କା ଲାଗାତିଙ୍ଗ୍କାମିକ କାମିକେଦା। 27 ଏନାମେନ୍ତେ ଆମ୍ ଇନ୍କୁକେ ବାଇରିକଆଃ ତିଃଇରେମ୍ ଜିମାକେଦ୍କଆ। ଇନ୍କୁ ସାସାତି ନାମ୍କେଦ୍ ଇମ୍ତା ଆମାଃତାଃରେ ରାଆଃକେଦ୍ ହରାତେ ଆମ୍ ସିର୍ମାଏତେ ଇନ୍କୁଆଃ ରାନାଃ ଆୟୁମ୍କେଦାମ୍ ଓଡ଼ୋଃ ଆମାଃ ପୁରାଃ ଲିନିବୁଇ ତାଇନ୍ ହରାତେ ଆମ୍ ଇନ୍କୁକେ ଆକଆଃ ବାଇରିକଆଃ ତିଃଇଏତେ ବାଞ୍ଚାଅକେଦ୍କଆମ୍। 28 ମେନ୍ଦ ଇନ୍କୁ ଜୀଉସୁକୁରେ ତାଇନ୍ ଇମ୍ତା, ଆମାଃ ନେପେଲ୍ରେ ଅକ୍ନାଃ ଏତ୍କାନାଃ ତାନାଃ, ଏନା ଆଡଃମିସା ରିକାକେଦାକ। ଏନ୍ତେ ଆମ୍ ଇନ୍କୁକେ ଆକଆଃ ବାଇରିକଆଃ ତିଃଇରେମ୍ ଜିମାକେଦ୍କଆ ଓଡ଼ୋଃ ଏନ୍ ବାଇରିକ ଇନ୍କୁଆଃ ଚେତାନ୍ରେ ଆକ୍ତେୟାର୍କେଦାକ। ଇମ୍ତା ହଗି ଇନ୍କୁ ଆମାଃସାଃ ରୁହାଡ଼୍କେଦ୍ତେ ଆମ୍ତାଃରେ ରାଆଃକେଦ୍ ହରାତେ ଆମ୍ ସିର୍ମାଏତେ ଆୟୁମ୍କେଦାମ୍ ଓଡ଼ୋଃ ପୁରାଃ ଲିନିବୁଇତେ ପେରେଃୟାନ୍ଲଃ ଇନ୍କୁକେ ପୁରାଃସାଃ ବାଞ୍ଚାଅକେଦ୍କଆମେ। 29 ଆମାଃ ଆନ୍ଚୁ ମାନାତିଙ୍ଗ୍ ହରାତେ ମାନୱା ବାଞ୍ଚାଅଃଆ, ଓଡ଼ୋଃ ଏନା ଆନ୍ଚୁ ମାନାତିଙ୍ଗ୍ ରିକା ବିଷାଏରେ ଆମ୍ ଇନ୍କୁକେ ଚେତାଅକେଦ୍କଆମ୍, ଏନ୍ରେୟ, ଇନ୍କୁ ଆପାନ୍କେ ମାରାଙ୍ଗ୍ୟେଁନ୍ କାଜିନ୍ତାନ୍ଲଃ ଆମାଃ ଆନ୍ଚୁ କାକ ମାନାତିଙ୍ଗ୍କେନା। ଇନ୍କୁ ଆମାଃ କାଜି କା ମାନାତିଙ୍ଗ୍କେଦ୍ତେ ଆମାଃ ବିରୁଧ୍ରେ ପାପ୍କେଦାକ ଓଡ଼ୋଃ ମନ୍ ତାକଆଃ କେଟେଃକେଦାକ ଏନ୍ତେ ଆମାଃ କାଜି ଆୟୁମ୍ ନାଙ୍ଗ୍ କା ସାନାଙ୍ଗ୍କେଦ୍କଆ। 30 ଏନ୍ରେୟ ଆମ୍ ପୁରାଃ ବାରାଷ୍ ଜାକେଦ୍ ଇନ୍କୁକେ ସାହାତିଙ୍ଗ୍ କେଦ୍କଆମେ ଓଡ଼ୋଃ ଆମାଃ ଆତ୍ମାଲଃ ଆମାଃ ନାବୀକଆଃ ହରାତେ ଇନ୍କୁକେ ଚେତାଅକେଦ୍କଆମେ। ମେନ୍ଦ ଇନ୍କୁକେ ଆୟୁମ୍ ନାଙ୍ଗ୍ କା ସାନାଙ୍ଗ୍କେଦ୍କଆ, ଏନାତେ ଆମ୍ ଇନ୍କୁକେ ଏଟାଃ ଦିଶୁମ୍ରେନ୍ ହଡ଼କଆଃ ତିଃଇରେମ୍ ଜିମାକେଦ୍କଆ। 31 ଏନ୍ରେୟ ଆମ୍ ଆମାଃ ପୁରାଃ ଲିନିବୁଇତେ ଇନ୍କୁକେ କାମ୍ ବାଗିକେଦ୍କଆ ଚାଏ କାମ୍ ଜିୟନ୍କେଦ୍କଆ। ଚିଆଃଚି ଆମ୍ ଦାୟାଲୁ ଓଡ଼ୋଃ ଲିନିବୁଇରେନ୍ ପାର୍ମେଶ୍ୱାର୍ ତାନ୍ମେ। 32 ଏନାତେ ହେ ଆଲେୟାଃ ପାର୍ମେଶ୍ୱାର୍, ଆମ୍ ବରୱାନ୍, ପୁରାଃ ମାରାଙ୍ଗ୍ ଓଡ଼ୋଃ ପେଡ଼େୟାନ୍ ପାର୍ମେଶ୍ୱାର୍ ତାନ୍ମେ, ଆମ୍ ଆମାଃ ଦୁଲାଡ଼୍ତେ ବାଇୟାକାନ୍ ନିୟାମ୍ ଓଡ଼ୋଃ ବାନାର୍ସା ଦହନିଃ ତାନ୍ମେ। ଆସେରିୟା ରାଜାକଆଃ ଦିପିଲିଏତେ ତିସିଙ୍ଗ୍ ଜାକେଦ୍ ଆଲେୟାଃ ଚେତାନ୍ରେ, ଆଲେୟାଃ ରାଜାକଆଃ ଚେତାନ୍ରେ, ଆଲେୟାଃ ଆଗୁଆଇକଆଃ ଚେତାନ୍ରେ, ଆଲେୟାଃ ଯାଜାକ୍କଆଃ ଚେତାନ୍ରେ, ଆଲେୟାଃ ନାବୀକଆଃ ଚେତାନ୍ରେ ଓଡ଼ୋଃ ଆଲେୟାଃ ପୁର୍ଖା ଆପୁକଆଃ ଚେତାନ୍ରେ, ନେ’ଲେକାଚି ଆମାଃ ହଡ଼କଆଃ ଚେତାନ୍ରେ ଅକ ସବେନ୍ ସାଙ୍କାଟ୍ ହିଜୁଃକାନା, ଏନା ଆମାଃ ନେପେଲ୍ରେ ହୁଡିଙ୍ଗ୍ ଆଲକା ନେଲଃକା। 33 ଆଲେ ଏତ୍କାନ୍ ଓଡ଼ୋଃ କା ଧାର୍ମାନ୍ କାମିକ କାମିକାଦାଲେ, ଏନାତେ ଆଲେ ନାଗେନ୍ତେ ହବାକାନ୍ ଆମାଃ ସାଜାଇ ଠାଉକାଗିୟା ଓଡ଼ୋଃ ସାର୍ତି ତାନାଃ, ଚିଆଃଚି ଆମ୍ ଧାର୍ମାନ୍ନିଃ ତାନ୍ମେ। 34 ଆଲେୟାଃ ରାଜାକ, ଆଗୁଆଇକ, ଯାଜାକ୍କ ଓଡ଼ୋଃ ପୁର୍ଖାହାଡ଼ାମ୍କ ଆମାଃ ଆନ୍ଚୁ କାକ ମାନାତିଙ୍ଗ୍କେଦା ଚାଏ ଇନ୍କୁ ଆମ୍ ଆଚୁକାଦ୍ କାଜି ଓଡ଼ୋଃ ଚେତାୱାନ୍ କାଜି କାକ ଆୟୁମ୍କେଦା। 35 ଆମ୍ ଏମାକାଦ୍କ ଜିଲିଙ୍ଗ୍ ଚାକାର୍ ବୁଗିନ୍ ଅତେରାଃ ଦିଶୁମ୍ରେ ତାଇକେଦ୍ତେ ଆମାଃ ପୁରାଃ ସୁକୁ ରାସ୍କାରେ ତାଇକେନ୍ ଇମ୍ତା ହଗି ଇନ୍କୁ ଆମାଃ ସେୱା ସୁନୁସାର୍ କାକ ରିକାକେଦା ଚାଏ ଆକଆଃ ଏତ୍କାନ୍ ହରାଏତେ କାକ ରୁହାଡ଼୍ୟାନା। 36 ଏନାମେନ୍ତେ ଆମ୍ ଆଲେୟାଃ ପୁର୍ଖାହାଡ଼ାମ୍କକେ ଅକ ଦିଶୁମ୍ରାଃ ଜ ଓଡ଼ୋଃ ବୁଗିନ୍ ଜିନିଷ୍କ ଜମ୍ ନାଙ୍ଗ୍ ଏମାକାଦ୍ଲେ ତାଇକେନାମ୍, ଏନ୍ ଦିଶୁମ୍ରେ ନାହାଁଃ ଆଲେ ଏଟାଃକଆଃ ଦାସି ହବାକାନାଲେ।
37 ଆଲେୟାଃ ପାପ୍ ହାରାତେ ଆମ୍ ଅକ ରାଜାକକେ ଆଲେୟାଃ ଚେତାନ୍ରେ ରାଇଜ୍ ରିକା ନାଙ୍ଗ୍ ଏମାକାଦ୍କଆମ୍, ଇନ୍କୁ ନେ ଦିଶୁମ୍ରେ ହବାକାନ୍ ପୁରାଃ ଜ’କ ଜମେତାନା। ଆଲେୟାଃ ହଡ଼୍ମ ଓଡ଼ୋଃ ଆଲେୟାଃ ଆସୁଲ୍ ଜାଁତୁ ଚେତାନ୍ରେ ଆକଆଃ ଇଛାସାନାଙ୍ଗ୍ ଲେକା ରିକାତାନାକ। ଆଲେ ପୁରାଃଗି ସାଙ୍କାଟ୍ରେ ମେନାଲେୟା। 38 ନେ’ସବେନ୍ ହବାଅଃତାନ୍ ହରାତେ ଆଲେ ମିଆଁଦ୍ ଅନଲ୍ରାଃ ଚୁକ୍ତି ରିକାତାନାଲେ, ଏନା ଆଲେୟାଃ ଆଗୁଆଇକ, ଲେବୀକ ଓଡ଼ୋଃ ଯାଜାକ୍କ ଏନାକେ ମୋହର୍ ଏମାକାଦାକ। ଏନ୍ ଅନଲ୍ ଚୁକ୍ତିକେ ମାନାତିଙ୍ଗ୍ ଲାଗାତିୟାଁଃ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)