1 ବାବିଲୋନ୍‌ରେନ୍‌ ରାଜା ବେଲ୍‍ଶତ୍ସର୍‌ଆଃ ରାଇଜ୍‌ତାନ୍‌ ଦିପିଲିରେୟାଃ ପାହିଲା ବାରାଷ୍‌ରେ ଦାନିୟେଲ୍‌ ଗିତିଜାକାନ୍‌ ତାଇକେନ୍‌ ଇମ୍‌ତା ମିଆଁଦ୍ କୁମୁ ଓଡ଼ୋଃ ଦାର୍‌ଶାନ୍‌ ନେଲ୍‌କେଦାଏ। ଇନିଃ ଆୟାଃ କୁମୁକେ ଅଲ୍‌କେଦ୍‌ତେ ଦହକେଦା। 2 ଦାନିୟେଲ୍‌ କାଜିକେଦାଏ, "ଆଇଙ୍ଗ୍‌ ନୁବାଃ ଇମ୍‌ତା ଦାର୍‌ଶାନ୍‌ରେ ନେଲ୍‌କେଦାଇଙ୍ଗ୍‌ ଯେ,

"ରିମିଲ୍‌ରାଃ ଚାରିଓସାଃଏତେ ମାରାଙ୍ଗ୍‌ ଦରେୟା ଚେତାନ୍‌ରେ ପୁରାଃଗି ହୟ ହିଜୁଃୟାନା। 3 ଏନ୍ତେ ଏନ୍‌ ଦରେୟାଏତେ ଉପୁନିୟା ଜାଁତୁ ଅଡଙ୍ଗ୍‌ୟାନାକ, ଇନ୍‌କୁ ସବେନ୍ ଏଟାଃ ଏଟାଃ ଜାଁତୁ ତାଇକେନାକ। 4 ପାହିଲା ଜାଁତୁ ନେଲଃରେ କୁଲା ଲେକା ଓଡ଼ୋଃ ବାଜ୍‌ ଚେଣେଁ ଲେକା ଇନିୟାଃ ଆପ୍‌ରବ୍‌ ତାଇକେନା। ଆଇଙ୍ଗ୍‌ ଇନିଃକେ ନେଲ୍‌ ନେଲ୍‌ଲଃଗି ଆୟାଃ ଆପ୍‌ରବ୍‌ ତୁଦ୍‌ୟାନା ଓଡ଼ୋଃ ଇନିଃକେ ଅତେହେତେ ଉଠାଅୟାନା, ଏନାତେ ଇନିଃ ମାନୱା ଲେକା ବାରିୟା କାଟାଲଃ ତିଙ୍ଗୁୟାନା। ଏନ୍ତେ ଇନିଃକେ ହଡ଼ରାଃ ମନ୍‌ସୁରୁଦ୍‌ ଏମ୍‌ୟାନା।

5 "ଆଇଁୟାଃ ଆୟାର୍‌ରେ ଆଡଃମିଆଦ୍‌ ଜାଁତୁ ନେଲ୍‌ୟାନାଏ, ଇନିଃ ନେଲଃରେ ଭାଲୁ ଲେକାଏ ତାଇକେନା ଓଡ଼ୋଃ ଇନିଃକେ ମିଦ୍‌ସାଃଏତେ ଉଠାଅୟାନା। ଇନିୟାଃ ମଚାରାଃ ଡାଟା ଥାଲାରେ ଆପିୟା ସାଡ଼େଜାଙ୍ଗ୍‌ ତାଇକେନା। ଇନିଃକେ ନେ'କାଜି କାଜିୟାନା, ‘ବିରିଦ୍‌ମେ, ପୁରାଃଗି ମାସ୍‌ ଜମେମେ।’

6 "ଏନ୍ତେ ଆଇଙ୍ଗ୍‌ ଆପି ଜାଁତୁକେ ନେଲ୍‌କିୟାଇଙ୍ଗ୍‌, ଇନିଃ ନେଲଃରେ କାବ୍‌ରାଚିତ୍‌ରା କୁଲା ଲେକା ଓଡ଼ୋଃ ଇନିୟାଃ ଦୟାରେ ଚେଣେଁରାଃ ଆପ୍‌ରବ୍‌ ଲେକା ଉପୁନିୟାଃ ଆପ୍‌ରବ୍‌ ତାଇନ୍‌କେନା। ଏନ୍‌ ଜାଁତୁରାଃ ଉପୁନିୟା ବହଃ ତାଇନ୍‌କେନା ଓଡ଼ୋଃ ଇନିଃକେ ରାଇଜ୍‌ ରିକା ନାଗେନ୍ତେ ଆକ୍‌ତେୟାର୍‌ ଏମ୍‌ୟାନା।

7 "ଏନ୍ତେ ନୁବାଃ ଇମ୍‌ତା ଦାର୍‌ଶାନ୍‌ରେ ଉପୁନିୟା ଜାଁତୁକେ ନେଲ୍‌କିୟାଇଙ୍ଗ୍‌, ଇନିଃ ପୁରାଃଗି ବରୱାନ୍‌ନିଃ, ଆକ୍‌ତେୟାର୍‌ରେନିଃ, ପେଡ଼େୟାନ୍‌ନିଃ ଓଡ଼ୋଃ ଇନିୟାଃ ମାପ୍‌ରାଙ୍ଗ୍‌ଗି ମେଡ଼େଦ୍‌ରାଃ ଡାଟା ତାଇକେନା। ଇନିଃ ଆୟାଃ ଜଜମ୍‌ନିଃକେ ଟୁକ୍‌ଡ଼ା ଟୁକ୍‌ଡ଼ାକେଦ୍‌ତେ ଜିୟନ୍‌କିୟା ଓଡ଼ୋଃ ଅକଆଃ ତାଇନ୍‌ୟାନା ଏନାକେ କାଟା ଲାତାର୍‌ରେ ତିକାକେଦ୍‌ତେ ରେସେଦ୍‌କେଦା। ଇନିଃ ସିଦାରେନ୍‌ ଜାଁତୁକଏତେ ପୁରା ଏଟାଃଗି ତାଇକେନା ଓଡ଼ୋଃ ଇନିୟାଃ ଗେଲ୍‌ ଦିରିଙ୍ଗ୍‌ ତାଇନ୍‌କେନା। 8 ଆଇଙ୍ଗ୍‌ ଏନ୍‌ ଦିରିଙ୍ଗ୍‌ ବିଷାଏରେ ପାହାମ୍‌ ତାଇକେନ୍‌ ଇମ୍‌ତା, ଏନ୍‌ ଦିରିଙ୍ଗ୍‌ ଥାଲାଏତେ ଆଡଃମିଆଦ୍‌ ଦିରିଙ୍ଗ୍‌ ଅଡଙ୍ଗ୍‌ୟାନା, ଏନା ହୁଡିଙ୍ଗ୍‌ଗି ତାଇକେନା ଓଡ଼ୋଃ ଏନାକେ ଠାୟାଦ୍‌ ଏମ୍‌ ନାଗେନ୍ତେ ସିଦାରେୟାଃ ଆପିୟା ଦିରିଙ୍ଗ୍‌ ବୁଟାଏତେ ରୁବ୍‌ୟାନା। ଏନ୍‌ ହୁଡିଙ୍ଗ୍‌ ଦିରିଙ୍ଗ୍‌ରେ ହଡ଼ରାଃ ମେଦ୍‌ ଲେକା ମେଦ୍‌ ତାଇକେନା ଓଡ଼ୋଃ ହିସିଙ୍ଗା କାଜି କାଜିତାନ୍‌ ମିଆଁଦ୍‌ ମଚା ତାଇନ୍‌କେନା।

9 "ଆଇଙ୍ଗ୍‌ ନେଲ୍‌ ନେଲ୍‌ଲଃଗି ଚିମିନ୍‌ ରାଜ୍‌ଗାଦି ବାଇୟାନା। ମିହୁଡ଼୍‌ ନାଙ୍କ ପାରିୟାରେନ୍‌ ହାଡ଼ାମ୍‌ ଦୁବ୍‌ୟାନାଏ। ଇନିୟାଃ ଲିଜାଃ ବାରାଫ୍‌ ଲେକା ପୁଣ୍ଡି ଓଡ଼ୋଃ ଆୟାଃ ବହଃରେୟାଃ ଉବ୍‌ ଫାର୍‌ଚିଆକାନ୍‌ ମିଣ୍ଡିରାଃ ଉବ୍‌ ଲେକା ତାଇକେନା। ଇନିୟାଃ ରାଜ୍‌ଗାଦି ସେଙ୍ଗେଲ୍‌ ହୁଲା ଲେକା ଜୁଲଃ ତାଇକେନା ଓଡ଼ୋଃ ରାଜ୍‌ଗାଦିରାଃ ଚାକାକ ଜୁଲଃତାନ୍‌ ସେଙ୍ଗେଲ୍‌ ଲେକା ତାଇକେନା। 10 ଇନିୟାଃ ଆୟାର୍‌ଏତେ ସେଙ୍ଗେଲ୍‌ ଲିଙ୍ଗିୟଃତାନ୍‌ ତାଇକେନା। ହାଜାର୍‌ ହାଜାର୍‌ ଆୟାଃ ଦାସିକ ସେୱାଇ ତାଇକେନା ଓଡ଼ୋଃ ଲାଖ୍‌ ଲାଖ୍‌ ହଡ଼କ ଆୟାଃ ଆୟାର୍‌ରେ ତିଙ୍ଗୁକାନ୍‌ ତାଇକେନାକ। ବିଚାର୍‌ରେୟାଃ ପାଞ୍ଚେଟ୍‌ ଦୁବ୍‌ୟାନା ଓଡ଼ୋଃ ସବେନ୍‌ ପୁଥିକ ଅଟାଃୟାନା।

11 "ଏନ୍‌ ଦିରିଙ୍ଗ୍‌ ହିସିଙ୍ଗାରେୟାଃ କାଜିକ ଜାଗାର୍‌ ତାଇକେନ୍‌ ହରାତେ ଆଇଙ୍ଗ୍‌ ଇନିଃକେ ନେଲିତାନ୍‌ଲଃଗି, ଟୁଣ୍ଡୁରେ ଏନ୍‌ ଜାଁତୁ ମାଆଃ ଗଏଃକେଦ୍‌ତେ ଆୟାଃ ହଡ଼୍‌ମ ଜିୟନ୍‌ୟାନା ଓଡ଼ୋଃ ଜୁଲଃତାନ୍‌ ସେଙ୍ଗେଲ୍‌ରେ ଅଣ୍ଡରଃ ନାଗେନ୍ତେ ହୁରାଙ୍ଗ୍‌ୟାନା। 12 ଏଟାଃ ଜାଁତୁ କତାଃଏତେ ଆକଆଃ ଆକ୍‌ତେୟାର୍‌ ଇଦିୟାନା, ମେନ୍‌ଦ ଘାଡ଼ିକାଦ୍‌ ନେଣ୍ଡା ଜାକେଦ୍‌ ଇନ୍‌କୁକେ ଜୀହିଦ୍‌ଗି ତାଇନଃ ନାଗେନ୍ତେ ବାଗିୟାନା।

13 "ଆଇଙ୍ଗ୍‌ ନିଦାରେୟାଃ ଦାର୍‌ଶାନ୍‌ରେ, ଆଇଁୟାଃ ଆୟାର୍‌ରେ ମାନୱାହନ୍‌ ଲେକା ମିଆଦ୍‌ ହଡ଼କେଇଙ୍ଗ୍‌ ନେଲ୍‌କିୟା, ଇନିଃ ସିର୍ମାରାଃ ରିମିଲ୍‌ରେ ହିଜୁଃୟାନା। ଓଡ଼ୋଃ ଇନିଃ ଏନ୍‌ ନାଙ୍କ ପାରିୟାରେନ୍‌ ହାଡ଼ାମ୍ ହଡ଼ରାଃ ଆୟାର୍‌ତେ ସେନଃୟାନା, ଇନିଃକେ ଏନ୍‌ ହାଡ଼ାମ୍‌ ହଡ଼ତାଃତେ ଆଉୟାନା। 14 ଦିଶୁମ୍‌ରେନ୍‌ ସବେନ୍‌ କିଲିକ, ଦିଶୁମ୍‌ରେନ୍‌ ହଡ଼କ ଓଡ଼ୋଃ ଏଟାଃ ଏଟାଃ ଜାଗାର୍‌ତେ ଜାଗାର୍‌ତାନ୍‌ ସବେନ୍‌ ହଡ଼କ ଇନିଃକେକ ସେୱାଇ, ଏନାମେନ୍ତେ ଇନିଃକେ ରାଇଜ୍, ମାଇନାନ୍‌, ପେଡ଼େଃ ଓଡ଼ୋଃ ଆକ୍‌ତେୟାର୍‌ ଏମ୍‌ୟାନା। ଇନିୟାଃ ରାଇଜ୍‌ କା ଟୁଣ୍ଡୁଆଃ, କା ଜିୟନଃଆ ଓଡ଼ୋଃ ଆୟାଃ ରାଇଜ୍‌ ଜାନାଅ ଜାନାଅଗି ତାଇନାଃ।

15 "ଆଇଙ୍ଗ୍‌ ଦାନିୟେଲ୍‌ ଆତ୍ମାରେ ପୁରାଃଗିଇଙ୍ଗ୍‌ ଆକ୍‌ଚାକାଅୟାନା ଓଡ଼ୋଃ ଆଇଁୟାଃ ମନ୍‌ରାଃ ଦାର୍‌ଶାନ୍‌ ଆଇଙ୍ଗ୍‌କେ ପୁରାଃଗି ଆକ୍‌ବାକାଅକେଦିୟାଁ। 16 ଏନ୍ତାଃରେ ଅକନ୍‌କ ତିଙ୍ଗୁଆକାନ୍‌ ତାଇକେନା, ଇନ୍‌କୁଏତେ ମିହୁଡ଼୍‌ତାଃ ଆଇଙ୍ଗ୍‌ ସେନ୍‌କେଦ୍‌ତେ ଏନାରାଃ ସାର୍‌ତି ମୁଣ୍ଡି କୁଲିକିୟାଇଙ୍ଗ୍‌। ଏନ୍ତେ ଇନିଃ ଏନାରାଃ ସବେନ୍‌ ସାର୍‌ତି ମୁଣ୍ଡିକ ଉଦୁବ୍‌କେଦ୍‌ତେ କାଜିକିୟାଁ, 17 ‘ଏନ୍‌ ଉପୁନିୟା ମାପ୍‌ରାଙ୍ଗ୍‌ ଜାଁତୁକ ହବାଅଃତାନା, ଉପୁନିୟା ରାଜା, ଅତେଦିଶୁମ୍‌ଏତେ ଇନ୍‌କୁଆଃ ରାଇଜ୍‌ ଅଡଙ୍ଗ୍‌ଅଃଆ। 18 ମେନ୍‌ଦ ସବେନାଃଏତେ ପେଡ଼େୟାନ୍‌ ପାର୍‌ମେଶ୍ୱାର୍‌ଆଃ ପାବିତାର୍‌ ଦାସିକ ରାଇଜ୍‌ ନାମେୟାଁକ ଓଡ଼ୋଃ ଏନା ଜାନାଅ ଜୀଦାନ୍‌ ନାଗେନ୍ତେ ଇନ୍‌କୁ ରାଇଜ୍‌ ରିକାୟାକ।’

19 "ଏନ୍ତେ ଉପୁନିୟା ମାପ୍‌ରାଙ୍ଗ୍‌ ଜାଁତୁକଏତେ ମିଆଁଦ୍‌ ଜାଁତୁ ଏଟାଃଗି ତାଇକେନା ଓଡ଼ୋଃ ପୁରାଃ ବରୱାନ୍‌ଗି ତାଇକେନା। ଇନିୟାଃ ଡାଟା ମେଡ଼େଦ୍‌ରାଃ ଓଡ଼ୋଃ ରାମାକ ପିତ୍ତାଲ୍‌ରାଃ ତାଇକେନା। ଆୟାଃ ଜଜମ୍‌ ଜାଁତୁକକେ ଟୁକ୍‌ଡ଼ା ଟୁକ୍‌ଡ଼ାକେଦ୍‌ତେ ଜିୟନ୍‌କେଦ୍‌କଆ ଓଡ଼ୋଃ ଅକଆଃ ସାରେଃୟାନା, ଏନାକକେ କାଟାଲଃ ତିକା ସେରେଦ୍‌କେଦା। ନେଆଁରାଃ ସାର୍‌ତି ମୁଣ୍ଡି ସାରି ନାଗେନ୍ତେଇଙ୍ଗ୍‌ ସାନାଙ୍ଗ୍‌କେଦା। 20 ନେଆଁ ବାଗିକେଦ୍‌ତେ ଆଡଃଗି ଏନ୍‌ ଜାଁତୁରାଃ ବହଃରେ ଗେଲ୍‌ ଦିରିଙ୍ଗ୍‌ ନେଲାକାଦ୍‌ ତାଇକେନାଇଙ୍ଗ୍‌। ଏନ୍‌ ଦିରିଙ୍ଗ୍‌ ଥାଲାଏତେ ଆଡଃମିଆଦ୍‌ ହୁଡିଙ୍ଗ୍‌ଗି ଦିରିଙ୍ଗ୍‌ ଅଡଙ୍ଗ୍‌ୟାନ୍‌ରେ ସିଦାରାଃ ଆପିୟା ଦିରିଙ୍ଗ୍‌ ଉୟୁଃୟାନା। ଏନ୍‌ ହୁଡିଙ୍ଗ୍‌ ଦିରିଙ୍ଗ୍‌ରେ ମେଦ୍‌ ଓଡ଼ୋଃ ହିସିଙ୍ଗା କାଜିକ କାଜିତାନ୍‌ ମଚା ତାଇକେନା। ଏନା ଏଟାଃ ଦିରିଙ୍ଗ୍‌ କତାଃଏତେ ବରୱାନ୍‌ଗି ତାଇକେନା। ଏନାରେୟାଃ ମୁଣ୍ଡି ସାରି ନାଗେନ୍ତେଇଙ୍ଗ୍‌ ସାନାଙ୍ଗ୍‌କେଦା।

21 "ଆଇଙ୍ଗ୍‌ ନେଲ୍‌ ନେଲ୍‌ଲଃଗି, ଏନ୍‌ ଦିରିଙ୍ଗ୍‌, ପାବିତାର୍‌ ହଡ଼କଲଃ ଲାଡ଼ାଇକେଦ୍‌ତେ ଇନ୍‌କୁକେ ହାରାଅକେଦ୍‌କଆ। 22 ଏନ୍ତେ ଟୁଣ୍ଡୁରେ ଏନ୍‌ ନାଙ୍କ ପାରିୟାରେନ୍‌ ହାଡ଼ାମ୍ ହଡ଼ ହିଜୁଃୟାନାଏ ଓଡ଼ୋଃ ସବେନାଃଏତେ ପେଡ଼େୟାନ୍‌ ପାର୍‌ମେଶ୍ୱାର୍‌ଆଃ ପାବିତାର୍‌ ହଡ଼କକେ ବିଚାର୍‌ ରିକାରେୟାଃ ବାହାରମ୍‌ ଏମାଦ୍‌କଆଏ। ଏନ୍ତେ ପାର୍‌ମେଶ୍ୱାର୍‌ଆଃ ହଡ଼କଆଃ ରାଇଜ୍‌ ଆକ୍‌ତେୟାର୍‌ ରିକାରାଃ ନେଣ୍ଡା ସେଟେର୍‌ୟାନା।

23 "ଇନିଃ ଆଇଙ୍ଗ୍‌କେ ନେ' ଲେକାଏ କାଜିକେଦିୟାଁ, ‘ଏନ୍‌ ଉପୁନିୟା ଜାଁତୁକଏତେ ଉପୁନିୟାନିଃ ହବାଅଃତାନାଏ, ଉପୁନିୟା ରାଇଜ୍‌ରାଃ ଉପୁନିୟାତେୟାଃ। ଏନା ଏଟାଃ ରାଇଜ୍‌କଏତେ ଏଟାଃଲେକା ହବାଅଃଆ। ଏନା ଗଟା ଅତେକେ ଜିୟନେୟା ଓଡ଼ୋଃ ଟୁକ୍‌ଡ଼ା ଟୁକ୍‌ଡ଼ାକେଦ୍‌ତେ କାଟାଲଃ ତିକାଏୟାଏ। 24 ନେଆଁରାଃ ଗେଲ୍‌ ଦିରିଙ୍ଗ୍‌, ଏନ୍‌ ରାଇଜ୍‌ରେନ୍‌ ଗେଲ୍‌ ରାଜାକକେ ଉଦୁବାଃଏ। ନେ ରାଜାକଆଃ ତାୟମ୍‌ତେ ଆଡଃମିଆଦ୍‌ ରାଜା ହିଜୁଃଆଏ। ଇନିଃ ଏନ୍‌ ଗେଲ୍‌ ରାଜା କତାଃଏତେ ଏଟାଃଗି ହବାଅଃଆ ଓଡ଼ୋଃ ଆପିୟା ରାଜାକଆଃ ଚେତାନ୍‌ରେ ଆକ୍‌ତେୟାର୍‌ ରିକାୟା। 25 ଇନିଃ ସବେନାଃଏତେ ପେଡ଼େୟାନ୍‌ ପାର୍‌ମେଶ୍ୱାର୍‌ଆଃ ବିରୁଧ୍‌ରେ କାଜିୟା। ପାର୍‌ମେଶ୍ୱାର୍‌ଆଃ ହଡ଼କକେ ସିଗିଦ୍‌କଆ ଓଡ଼ୋଃ ବାଇୟାକାନ୍‌ ନିୟାମ୍‌ ଓଡ଼ୋଃ ନେଣ୍ଡାକକେ ବାଦ୍‌ଲାଅ ନାଙ୍ଗ୍‌ ବିଚାରେୟାଏ। ପାର୍‌ମେଶ୍ୱାର୍‌ଆଃ ହଡ଼କ ମିଦ୍‌ ବାରାଷ୍‌, ବାର୍‌ ବାରାଷ୍‌, ଓଡ଼ୋଃ ଆଧା ବାରାଷ୍‌ ଜାକେଦ୍‌ ଇନିୟାଃ ତିଃଇରେକ ଏମଃଆ। 26 ମେନ୍‌ଦ ମାରାଙ୍ଗ୍‌ ବିଚାର୍‌ ସାଭା ଦୁବାଃ ଓଡ଼ୋଃ ଇନିୟାଃ ଆକ୍‌ତେୟାର୍‌ ଇନିଃତାଃଏତେ ଇଦିକେଦ୍‌ତେ ଇନିଃକେ ସବେନ୍‌ ହୁଲାଙ୍ଗ୍‌ ନାଙ୍ଗ୍‌ ପୁରା ଜିୟନ୍‌ ରିକାଅଃଆ। 27 ଏନ୍ତେ ଅତେଦିଶୁମ୍‌ରେୟାଃ ରାଇଜ୍‌ରାଃ ଆକ୍‌ତେୟାର୍‌, ପେଡ଼େଃ, ଓଡ଼ୋଃ ପାର୍‌ମେଶ୍ୱାର୍‌ଆଃ ପାବିତାର୍‌ ହଡ଼କକେ ସବେନାଃ ଏମଃଆ। ପାର୍‌ମେଶ୍ୱାର୍‌ଆଃ ରାଇଜ୍‌ ଜାନାଅ ଜାନାଅଗି ତାଇନାଃ ଓଡ଼ୋଃ ସବେନ୍‌ ରାଇଜ୍‌ ଚାଲାଅକ ଇନିୟାଃ ସେୱା ରିକାୟାକ ଓଡ଼ୋଃ କାଜି ମାନାତିଙ୍ଗ୍‌ୟାଁଃକ।’

28 "କୁମୁରେୟାଃ ମୁଣ୍ଡି ନେତାଃରେ ଟୁଣ୍ଡୁୟାନା। ଆଇଙ୍ଗ୍‌ ଦାନିୟେଲ୍‌ ଆଇଁୟାଃ ଉଡ଼ୁଃ ପାହାମ୍‌ ହରାତେ ପୁରାଃଗି ବରତେ ଆକ୍‌ବାକାଅୟାନାଇଙ୍ଗ୍‌, ଆଇଁୟାଃ ମେଦ୍‌ମୁହାଁଡ଼୍‌ ଗସୟାନା, ମେନ୍‌ଦ ନେ ସବେନ୍‌ କାଜିକ ଆଇଁୟାଃ ମନ୍‌ରେ ଦହକେଦାଇଙ୍ଗ୍‌।"