1 ଦାରିୟାବସ୍‌ ସବେନ୍‌ ରାଇଜ୍‌ରେ ଆୟାଃ ରାଇଜ୍‌ ଚାଲାଅ ନାଗେନ୍ତେ ୧୨୦ ଝାନ୍‌ ଲାଟ୍‌ସାହେବ୍‌କକେ ସାଲାକେଦ୍‌କଆ। 2 ଏନ୍‌ ଲାଟ୍‌ସାହେବ୍‌କ ବୁଗିଲେକା ହିସାବ୍‌କ ଏମେୟା ଓଡ଼ୋଃ ରାଜାରାଃ ଜେତ୍‌ନାଃ ନକ୍‌ସାନ୍‌ କା ହବାଅଃଆ, ଏନାମେନ୍ତେ ଇନିଃ ଇନ୍‌କୁଆଃ ଚେତାନ୍‌ରେ ଆପି ଝାନ୍‌ ହାକିମ୍‌କକେ ହିସାବ୍‌କିତାବ୍‌ ନାଙ୍ଗ୍‌ ଦହକେଦ୍‌କଆଏ। ଏନ୍‌ ଆପି ହଡ଼କଏତେ ଦାନିୟେଲ୍‌ ହଗି ତାଇକେନାଏ। 3 ଏଟାଃ ହାକିମ୍‌କ ଓଡ଼ୋଃ ଲାଟ୍‌ସାହେବ୍‌କଆଃଏତେ ଦାନିୟେଲ୍‌ତାଃରେ ଆକ୍‌ଦାନ୍ଦାଅ କାମିରାଃ ଆତ୍ମା, ପୁରାଃଗି ବୁଦ୍ଧି, ସେଣାଁ ନେଲ୍‌କେଦ୍‌ତେ, ରାଜା ଇନିଃକେ ସବେନ୍‌ ରାଇଜ୍‌ ଚେତାନ୍‌ରେ ମାରାଙ୍ଗ୍‌ ଆକ୍‌ତେୟାର୍‌ ଏମ୍‌ ନାଙ୍ଗ୍‌ ଉହାଟ୍‌କେଦାଏ। 4 ଏନାମେନ୍ତେ ଏଟାଃ ହାକିମ୍‌କ ଓଡ଼ୋଃ ଲାଟ୍‌ସାହେବ୍‌କ ଦାନିୟେଲ୍‌ଆଃ ବିରୁଧ୍‌ରେ ହସଡ଼ କାଜି ଆଉକେଦ୍‌ତେ ଆୟାଃ ରାଇଜ୍‌ତାନ୍‌ କାମିରେ ଭୁଲ୍‌ ସାବ୍‌ ନାଗେନ୍ତେ ହରାକ ଦାଣାଁ ତାଇକେନା। ମେନ୍‌ଦ ଇନ୍‌କୁ ଦାନିୟେଲ୍‌ଆଃ ବିରୁଧ୍‌ରେ ଜେତାନ୍‌ ଏତ୍‌କାନ୍‌ ଚାଏ ଭୁଲ୍‌ କାକ ନାମ୍‌କେଦା। ଚିୟାଃଚି ଇନିଃ ପାତିୟାର୍‌ରଃ ଲେକାନିଃ ତାଇକେନାଏ ଓଡ଼ୋଃ ଆୟାଃ ଜେତାନ୍‌ ଭୁଲ୍‌ ଚାଏ ଗୁହ୍ନାଁ କାଏ ରିକା। 5 ଏନ୍ତେ ଟୁଣ୍ଡୁରେ ଏନ୍‌ ହଡ଼କ କାଜିକେଦା, "ଆବୁ ଦାନିୟେଲ୍‌ ସେୱାତାନ୍‌ ପାର୍‌ମେଶ୍ୱାର୍‌ଆଃ ଆନ୍‌ଚୁ ବିଷାଏ ବାଗିକେଦ୍‌ତେ ଏଟାଃ ଜେତାନ୍‌ ବିଷାଏରେ ଇନିଃକେ କାବୁ ଚିଟା ଦାଡ଼ିୟା।"

6 ହାକିମ୍‌କ ଓଡ଼ୋଃ ଲାଟ୍‌ସାହେବ୍‌କ ମିଦ୍‌ତାଃରେ ହୁଣ୍ଡିକେଦ୍‌ତେ ରାଜାତାଃ ସେନଃୟାନାକ ଓଡ଼ୋଃ କାଜିକିୟାକ, "ହେ ରାଜା ଦାରିୟାବସ୍‌, ଆମ୍‌ ଜାନାଅଗି ତାଇନ୍‌ମେ। 7 ରାଇଜ୍‌ରେନ୍‌ ହାକିମ୍‌କ, ପାଞ୍ଜିଖାଡ଼ି ନେଲ୍‌ ହଡ଼କ, ଇନିତୁ କାଜି ଉଦୁବ୍‌କ, ପାଣ୍ଡିତ୍‌କ, ସେଣାଁନ୍‌ ହଡ଼କ ଓଡ଼ୋଃ ଲାଟ୍‌ସାହେବ୍‌କ ସବେନ୍‌କ ମିଦ୍‌କେଦ୍‌ତେ ଜାଗାର୍‌କେଦାଲେ ଯେ, ରାଜା ମିଆଁଦ୍‌ ହୁକୁମ୍‌ ଜାରିକାଏ, ଏନ୍‌ ହୁକୁମ୍‌ ହବାଅଃତାନା, ମିଦ୍‌ହିସି ଗେଲେୟା ହୁଲାଙ୍ଗ୍‌ ଜାକେଦ୍‌ ଜେତାଏ ରାଜାକେ ବାଗିକେଦ୍‌ତେ ଏଟାଃ ମାହାପୁରୁ ଚାଏ ମାନୱାତାଃରେ ବିନ୍ତି ରେଦ, ଇନିଃକେ କୁଲା ଲେକାନ୍‌ ଜାଁତୁକେ ଦହକାନ୍‌ ଠାୟାଦ୍‌ତାଃରେ ହୁରାଙ୍ଗ୍‌ଅଃକା। 8 ହେ ମାଇନାନ୍‌, ନାହାଁଃଦ, ନେ ନିୟାମ୍‌କେ ଜାରି ରିକାଏମେ ଓଡ଼ୋଃ ଏନ୍‌ ନିୟାମ୍‌ରେୟାଃ ଅନଲ୍‌ରେ ଠେପା ଏମେମେ। ତାବ୍‌ଦ ଏନା କା ବାଦ୍‌ଲାଅଃଆ, ଚିୟାଃଚି ମିଦିୟ ଓଡ଼ୋଃ ପାରସିରେନ୍‌ ହଡ଼କଆଃ ନିୟାମ୍‌ କା ବାଦ୍‌ଲାଅ ଦାଡ଼ିୟଃଆ।" 9 ଏନାମେନ୍ତେ ରାଜା ଦାରିୟାବସ୍‌ ଏନ୍‌ ନିୟାମ୍‌ରେୟାଃ ଅନଲ୍‌ରେ ଠେପା ଏମ୍‌କେଦାଏ। 10 ଦାନିୟେଲ୍‌ ଏନ୍‌ ଅନଲ୍‌ରେୟାଃ ନିୟାମ୍‌ ଲେକାଗି ରାଜାରାଃ ହୁକୁମ୍‌ ଜାରିକାନା ମେନ୍ତେ ଆୟୁମ୍‌କେଦ୍‌ଚି, ଇନିଃ ଆୟାଃ ଅଡ଼ାଃତେ ସେନଃୟାନା ଓଡ଼ୋଃ ଚେତାନ୍‌ ମାହାଲା କୁଠାରାଃ ଅକ ଖିଡ଼୍‌କି ଯୀରୁଶାଲେମ୍‌ସାଃତେ ନିଜାକାନ୍‌ ତାଇକେନା, ଏନ୍ତାଃତେ ସେନଃୟାନା। ଇନିଃ ସିଦା ରିକା ତାଇକେନ୍‌ ଲେକାଗି ମୁସିଙ୍ଗ୍‌ରେ ଆପିସା ଇକ୍‌ଡ଼ୁମ୍‌କେଦ୍‌ତେ ବିନ୍ତିକେଦାଏ ଓଡ଼ୋଃ ପାର୍‌ମେଶ୍ୱାର୍‌କେ ଧାନ୍ୟାବାଦ୍‌ ଏମ୍‌କିୟାଏ।

11 ଏନ୍ତେ ଏନ୍‌ ହଡ଼କ ମିଦ୍‌ ଝୁଣ୍ଡ୍‌କେଦ୍‌ତେ ସେନ୍‌ୟାନାକ ଓଡ଼ୋଃ ଦାନିୟେଲ୍‌କେ ପାର୍‌ମେଶ୍ୱାର୍‌ଆଃ ଆୟାର୍‌ରେ ବିନ୍ତିତେୟାଃ ନେଲ୍‌କିୟାକ। 12 ଏନ୍ତେ ଇନ୍‌କୁ ରାଜାତାଃ ସେନ୍‌କେଦ୍‌ତେ ନିୟାମ୍‌ ରିକାକାଦ୍‌ କାଜିକେ ପାହାମ୍‌ ଇଚିକେଦ୍‌ତେ କାଜିକିୟାକ, "ହେ ମାଇନାନ୍‌, ଜେତାଏ ମିଦ୍‌ହିସି ଗେଲେୟା ହୁଲାଙ୍ଗ୍‌ ଜାକେଦ୍‌ ଆମ୍‌କେ ବାଗିକେଦ୍‌ତେ ଏଟାଃ ମାହାପୁରୁ ଚାଏ ହଡ଼ତାଃରେ ବିନ୍ତି ରେଦ, ଇନିଃ କୁଲା ଲେକାନ୍‌ ଜାଁତୁକେ ଦହକାନ୍‌ ଠାୟାଦ୍‌ତାଃରେ ହୁରାଙ୍ଗ୍‌ଅଃଆ ମେନ୍ତେ ମିଆଁଦ୍‌ ଅନଲ୍‌ ଚିଠାରେ ଆମ୍‌ ଚିନାଃ କାମ୍‌ ଠେପାକାଦ୍‌ ତାଇକେନା ?"

ରାଜା କାଜିରୁହାଡ଼୍‌କେଦ୍‌କଆଏ, "ମିଦିୟ ଓଡ଼ୋଃ ପାରସିରେନ୍‌ ହଡ଼କଆଃ ନିୟାମ୍‌ କା ବାଦ୍‌ଲାଅଃଆ, ରାଜା ହୁକୁମ୍‌ ଜାରିକାଦ୍‌ତେୟାଃ ହଗି କା ବାଦ୍‌ଲାଅଃଆ।"

13 ଏନ୍ତେ ଇନ୍‌କୁ ରାଜାକେ କାଜିକିୟାକ, "ରାଜା, ଯିହୁଦା ଦିଶୁମ୍ଏତେ ଦାସିୟଃ ନାଙ୍ଗ୍‌ ତଲ୍‌ଆଉକାନ୍‌ ହଡ଼କଏତେ ଦାନିୟେଲ୍‌ ନୁତୁମ୍‌ ମିଆଁଦ୍‌ ହଡ଼ ଆମ୍‌କେ ଚାଏ ଆମାଃ ଠେପା ରିକାକାଦ୍‌ ହୁକୁମ୍‌କେ କାଏ ମାନାତିଙ୍ଗ୍‌ତାନା, ମେନ୍‌ଦ ଇନିଃ ସିଙ୍ଗିସାଟୁବ୍‌ରେ ଆପିସା ବିନ୍ତିତାନାଏ।"

14 ନେ କାଜି ଆୟୁମ୍‌କେଦ୍‌ତେ ରାଜା ପୁରାଃଗି ଦୁକୁୟାନା। ଇନିଃ ଦାନିୟେଲ୍‌କେ ବାଞ୍ଚାଅ ନାଗେନ୍ତେ ସବେନ୍‌ ରାକାମ୍‌ରେୟାଃ ହରାକ ଦାଣାଁକେଦା ଓଡ଼ୋଃ ଇନିକେ ପୁରାଗି ବାଞ୍ଚାଅ ନାଙ୍ଗ୍‌ ସିଙ୍ଗିହାସୁରଃ ଜାକେଦ୍‌ ଚେଷ୍ଟାକେଦାଏ। 15 ଏନ୍ତେ ଏନ୍‌ ହଡ଼କ ହୁଣ୍ଡିକେଦ୍‌ତେ ରାଜାତାଃ ସେନ୍‌ୟାନ୍‌ଲଃ କାଜିକିୟାକ, "ହେ ମାଇନାନ୍‌ ରାଜା, ପାହାମେମେ, ମିଦିୟ ଓଡ଼ୋଃ ପାରସିକଆଃ ନିୟାମ୍‌ ଲେକାତେ ରାଜା ଜାରିକାଦ୍‌ ହୁକୁମ୍‌ ଜେତା ଲେକାତେ କା ବାଦ୍‌ଲାଅଃଆ।"

16 ଏନ୍ତେ ରାଜା ହୁକୁମ୍‌ ଏମ୍‌କେଦାଏ ଓଡ଼ୋଃ ଇନ୍‌କୁ ଦାନିୟେଲ୍‌କେ ଆଉକେଦ୍‌ତେ କୁଲା ଲେକାନ୍‌ ଜାଁତୁକେ ଦହକାନ୍‌ ଠାୟାଦ୍‌ତାଃରେ ହୁରାଙ୍ଗ୍‌କିୟାକ। ରାଜା ଦାନିୟେଲ୍‌କେ କାଜିକିୟା, "ଆମ୍‌ ଜାନାଅଗି ଅକ ପାର୍‌ମେଶ୍ୱାର୍‌ଆଃ ସେୱା ରିକାତାନାମ୍‌, ଇନିଃ ଆମ୍‌କେ ବାଞ୍ଚାଅମେକା।" 17 ମିଆଁଦ୍‌ ମାରାଙ୍ଗ୍‌ ଦିରି ଆଉକେଦ୍‌ତେ ଏନ୍‌ ଜାଁତୁ ଦହକାନ୍‌ ଠାୟାଦ୍‌ରେୟାଃ ଦୁହାର୍‌ତାଃରେ ଦହକେଦାକ। ଓଡ଼ୋଃ ଦାନିୟେଲ୍‌ରାଃ ବିଷାଏରେ ଜେ'ଲେକା ଜେତ୍‌ନାଃ କା ବାଦ୍‌ଲାଅଃଆ, ଏନାମେନ୍ତେ ରାଜା ଆୟାଃ ରାଜ୍‌ମାହାଲ୍‌ରାଃ ମୋହର୍‌ଲଃ ଠେପାକେଦାଏ ଓଡ଼ୋଃ ଆୟାଃ ସାଭାରେନ୍‌ ହଡ଼କଆଃ ମୋହର୍‌ଲଃ ହଗି ଠେପାକେଦା। 18 ଏନ୍ତେ ରାଜା ଆୟାଃ ମାହାଲ୍‌ତେ ରୁହାଡ଼୍‌ୟାନା, ରେଙ୍ଗେଃ କାଟାବ୍‌କେଦ୍‌ତେ ମିଦ୍‌ନୁବାଃ ତାଇନ୍‌ୟାନାଏ ଓଡ଼ୋଃ ଆୟାଃ ଆୟାର୍‌ରେ ଜେତାନ୍‌ ରିଜ୍‌ରାଙ୍ଗ୍‌ କା ହବାୟାନା। ଇନିଃକେ ଦୁଡ଼ୁମ୍‌ କା ହିଜୁଃୟାନା।

19 ରାଜା ସେତାଃ ଇଦାନ୍‌ରେ ବିରିଦ୍‌କେଦ୍‌ତେ କୁଲା ଲେକାନ୍‌ ଜାଁତୁକେ ଦହକାନ୍‌ ଠାୟାଦ୍‌ତେ ସେନଃୟାନା। 20 ଇନିଃ ଏନ୍ତାଃ ସେଟେର୍‌କେଦ୍‌ତେ ଏୟମ୍‌ତାନ୍‌ ଲାବ୍‌ଜାତେ ଦାନିୟେଲ୍‌କେ ହାକାଅକିୟା, "ହେ ଦାନିୟେଲ୍‌ ଆମ୍‌ ଜାନାଅଗି ଅକ ପାର୍‌ମେଶ୍ୱାର୍‌ଆଃ ସେୱା ରିକାତାନାମେ, ଇନିଃ ଆମ୍‌କେ କୁଲା ଲେକାନ୍‌ ଜାଁତୁକତାଃଏତେ ବାଞ୍ଚାଅ ଦାଡ଼ିକାଦ୍‌ମେୟାଁ ଚି ?"

21 ଦାନିୟେଲ୍‌ କାଜିରୁହାଡ଼୍‌କିୟା, "ହେ ରାଜା ଜାନାଅଗି ତାଇନ୍‌ମେଁ। 22 ଆଇଁୟାଃ ପାର୍‌ମେଶ୍ୱାର୍‌ ଆୟାଃ ଦୁଁତ୍‌କକେ କୁଲ୍‌କେଦ୍‌ତେ କୁଲା ଲେକାନ୍‌ ଜାଁତୁକଆଃ ମଚାକେ ହାରୁବ୍‌କେଦା। ଇନ୍‌କୁ ଆଇଁୟାଃ ଜେତ୍‌ନାଃ କାକ ନକ୍‌ସାନ୍‌ କାଦା, ଚିୟାଃଚି ଆଇଙ୍ଗ୍‌ ପାର୍‌ମେଶ୍ୱାର୍‌ଆଃ ଆୟାର୍‌ରେ ଏତ୍‌କାନାଃ କାଇଙ୍ଗ୍‌ ରିକା। ଓଡ଼ୋଃ ହେ ରାଜା, ଆମାଃ ଆୟାର୍‌ରେ ଆଇଙ୍ଗ୍‌ ଚିଉଲାହଗି ଜେତାନ୍‌ ନକ୍‌ସାନ୍‌ କାଇଙ୍ଗ୍‌ ରିକା।"

23 ରାଜା ରାସ୍‌କାତେ ପେରେଃୟାନା ଓଡ଼ୋଃ ଏନ୍‌ ଜାଁତୁ ତାଇନଃ ଠାୟାଦ୍‌ଏତେ ଦାନିୟେଲ୍‌କେ ବାହାରି ଅଡଙ୍ଗ୍‌ ଆଉ ନାଗେନ୍ତେ ହୁକୁମ୍‌କେଦ୍‌କଆ। ଦାନିୟେଲ୍‌କେ ଏନ୍‌ ଜାଁତୁ ତାଇନଃ ଠାୟାଦ୍‌ଏତେ ବାହାରି ଅଡଙ୍ଗ୍‌କିୟାକ, ଇନିୟାଃ ହଡ଼୍‌ମରେ ହାଦ୍‌ରେୟାଃ ଜେତାନ୍‌ ଘାଅ କା ନେଲ୍‌ୟାନା। ଚିୟାଃଚି ଇନିଃ ଆୟାଃ ପାର୍‌ମେଶ୍ୱାର୍‌ତାଃରେ ବିଶ୍ୱାସ୍‌କାଦ୍‌ ତାଇକେନା। 24 ଏନ୍ତେ ଅକନ୍‌କ ଦାନିୟେଲ୍‌ରାଃ ବିରୁଧ୍‌ରେ ହସଡ଼ ଗାୱାକ ଏମାକାଦ୍ ତାଇକେନା, ଇନ୍‌କୁକେ ଓଡ଼ୋଃ ଆକଆଃ କୁଡ଼ିକକେ, ହନ୍‌କକେ ସାବ୍‌ ଆଉକେଦ୍‌ତେ କୁଲା ଲେକାନ୍‌ ଜାଁତୁ ତାଇନଃ ଠାୟାଦ୍‌ରେ ଉୟୁଃକେଦ୍‌କଆକ। ଇନ୍‌କୁ ଏନ୍‌ ଠାୟାଦ୍‌ରାଃ ଲାତାର୍‌ରେ ସେଟେର୍‌ ସିଦାରେ ଏନ୍‌ ଜାଁତୁକ ଇନ୍‌କୁକେ ଚାଗାଡ଼୍‌ ପଙ୍ଗାଡ଼୍‌କେଦ୍‌ତେ ଆକଆଃ ସବେନ୍‌ ଜାଙ୍ଗ୍‌କ ଟହେଦ୍‌କେଦା।

25 ଏନ୍ତେ ରାଜା ଦାରିୟାବସ୍‌, ଅତେଦିଶୁମ୍‌ରେନ୍‌ ସବେନ୍‌ ହଡ଼କତାଃ, ସବେନ୍‌ କିଲିକତାଃରେ ଓଡ଼ୋଃ ଏଟାଃ ଏଟାଃ ଜାଗାର୍‌ତେ ଜାଗାର୍‌ତାନ୍‌ ସବେନ୍‌ ହଡ଼କତାଃ ଚିଠା ଅଲ୍‌କୁଲ୍‌କେଦାଏ,

"ଆପେୟାଃ ପୁରାଃଗି ଜୀଉସୁକୁ ହବାଅଃକା ! 26 ଆଇଙ୍ଗ୍‌ ହୁକୁମ୍‌ ଜାରିତାନାଇଙ୍ଗ୍‌ ଯେ, ଆଇଁୟାଃ ରାଇଜ୍‌ରେନ୍‌ ସବେନ୍‌ ପାର୍‌ଗାନ୍‌ରେନ୍‌ ହଡ଼କ ଦାନିୟେଲ୍‌ଆଃ ପାର୍‌ମେଶ୍ୱାର୍‌କେ ବର ଓଡ଼ୋଃ ଭାକ୍ତି ରିକାଇକାକ।

"ଚିୟାଃଚି ଇନିଃଗି ଜୀନିଦ୍‌ ପାର୍‌ମେଶ୍ୱାର୍‌

ଓଡ଼ୋଃ ଜାନାଅ ଜାନାଅନିଃ ତାନିଃ।

ଆୟାଃ ରାଇଜ୍‌ କା ଜିୟନଃଆ

ଓଡ଼ୋଃ ଆୟାଃ ଆକ୍‌ତେୟାର୍‌ ଚିଉଲାଅ କା ଟୁଣ୍ଡୁଃଆ।

27 ଇନିଃ ବାଞ୍ଚାଅ ରିକାଃଏ ଓଡ଼ୋଃ ଜୀଉବାଞ୍ଚାଅ ଏମାଃଏ।

ଇନିଃ ସିର୍ମା ଓଡ଼ୋଃ ଅତେରେ

ଆକ୍‌ଦାନ୍ଦାଅ କାମିକ ରିକାଃଏ।

ଇନିଃ ଦାନିୟେଲ୍‌କେ କୁଲା ଲେକାନ୍‌ ଜାଁତୁକତାଃଏତେ ବାଞ୍ଚାଅକିୟା।"

28 ଦାନିୟେଲ୍‌, ଦାରିୟାବସ୍‌ ରାଜାରାଃ ରାଇଜ୍‌ ଦିପିଲିରେ ଓଡ଼ୋଃ ପାରସିରେନ୍‌ ରାଜା ସାଇରସ୍‌ଆଃ ରାଇଜ୍‌ ରିକାତାନ୍‌ ଦିପିଲିରେ ସବେନ୍‌ ବିଷାଏରେ ହାରାଇଦିୟାନା।