1 ମିଦିୟରେନ୍‌ ଦାରିୟାବସ୍‌ ରାଇଜ୍‌ତାନ୍‌ ଦିପିଲିରାଃ ପାହିଲା ବାରାଷ୍‌ରେ ଆଇଙ୍ଗ୍‌ ଇନିଃକେ ପେଡ଼େଃ ଓଡ଼ୋଃ ଦେଙ୍ଗା ଏମ୍‌ ନାଗେନ୍ତେଇଙ୍ଗ୍‌ ତିଙ୍ଗୁୟାନା। 2 ନାହାଁଃ ଆଇଙ୍ଗ୍‌ ଆମାଃତାଃରେ ସାର୍‌ତିତେୟାଃ ଉଦୁବେୟାଇଙ୍ଗ୍‌।

ପାରସ୍ୟରେ ଓଡ଼ୋଃ ଆପିୟା ରାଜା ରାଇଜ୍‌ ରିକାୟାକ, ଏନ୍ତେ ଅକ ଉପୁନିୟା ରାଜା ରାଇଜ୍‌ ରିକାୟାଏ, ଇନିଃ ଏଟାଃ ସବେନ୍‌ କତାଃଏତେ ପୁରାଃ କିସାଁଣ୍‌ ହବାଅଃଆଏ। ଇନିଃ ଆୟାଃ କିସାଁଣଃ ହରାତେ ପୁରାଃ ପେଡ଼େୟାନ୍‌ଗି ହବାଅଃଆଏ ଓଡ଼ୋଃ ଗ୍ରୀସ୍‌ ନୁତୁମ୍‌ ରାଇଜ୍‌ଲଃ ଲାଡ଼ାଇ ନାଗେନ୍ତେ ଏଟାଃକକେ ଉସ୍‌କୁର୍‌କଆ।

3 ଏନ୍ତେ ଗ୍ରୀସ୍‌ ରାଇଜ୍‌ରେ ମିହୁଡ଼୍‌ ପେଡ଼େୟାନ୍‌ ରାଜା ଅଡଙ୍ଗ୍‌ଅଃଆଏ। ଇନିଃ ପୁରାଃ ମାରାଙ୍ଗ୍‌ ରାଇଜ୍‌ରେ ରାଇଜେୟା ଓଡ଼ୋଃ ଆୟାଃ ଇଛାସାନାଙ୍ଗ୍‌ ଲେକା କାମି ରିକାୟାଏ। 4 ମେନ୍‌ଦ ଇନିଃ ପେଡ଼େଃରେ ମାରାଙ୍ଗ୍‌ଅଃ ତାୟମ୍‌ତେ, ଆୟାଃ ରାଇଜ୍‌ ଟୁକ୍‌ଡ଼ାକଆଃ ଓଡ଼ୋଃ ଉପୁନିୟା ସାଃରେୟାଃ ଉପୁନ୍‌ ହିସାରେ ବିନ୍‌ଗାଅଃଆ। ଆୟାଃ କିଲିକ ଏନା କାକ ନାମେୟା ଚାଏ ଆୟାଃ ଆକ୍‌ତେୟାର୍‌ ଲେକା ଆକ୍‌ତେୟାର୍‌ ଓଡ଼ୋଃ କା ତାଇନା, ଚିୟାଃଚି ଆୟାଃ ରାଇଜ୍‌ ରେଃକ୍‌କେଦ୍‌ତେ ଏଟାଃନିୟାଃ ତିଃଇରେ ଏମଃଆ।

5 ଦାକ୍ଷିଣ୍‌ସାଃରେୟାଃ ଦିଶୁମ୍‌ ମେନ୍‌ଲେରେ, ମିସାର୍‌ ଦିଶୁମ୍‌ରେନ୍‌ ରାଜା ପେଡ଼େୟାନ୍‌ନିଃ ହବାଅଃଆଏ। ମେନ୍‌ଦ ଆୟାଃ ସିପାଇକଆଃ ହାକିମ୍‌କଏତେ ମିହୁଡ଼୍‌ ପୁରାଃଗି ପେଡ଼େୟାନ୍‌ ହବାକେଦ୍‌ତେ ଆୟାଃ ଆପ୍‌ନାଃ ରାଇଜ୍‌କେ ପୁରାଃ ପେଡ଼େଃତେ ରାଇଜେୟା। 6 ଚିମିନ୍‌ ବାରାଷ୍‌ ତାୟମ୍‌ତେ ଇନ୍‌କୁଆଃ ଥାଲାରେ ସାଙ୍ଗାତି ହବାଅଃଆ ଓଡ଼ୋଃ ଦାକ୍ଷିଣ୍‌ସାଃରେୟାଃ ଦିଶୁମ୍‌ରେନ୍‌ ରାଜାରାଃ ହନ୍ତେକୁଡ଼ି, ଉତ୍ତାର୍‌ସାଃରେୟାଃ ଦିଶୁମ୍‌ ମେନ୍‌ଲେରେ, ସିରିୟାରେନ୍‌ ରାଜାତାଃ ହିଜୁଃକେଦ୍‌ତେ ନ୍ୟାୟ ରିକାଏୟାଏ। ମେନ୍‌ଦ ଏନ୍‌ କୁଡ଼ି ଆୟାଃ ଆକ୍‌ତେୟାର୍‌ କାଏ ଦହ ଦାଡ଼ିୟା ଓଡ଼ୋଃ ଏନ୍‌ ରାଜା ହଗି ଆୟାଃ ଆକ୍‌ତେୟାର୍‌ କାଏ ଦହ ଦାଡ଼ିୟା। ଏନ୍‌ ଦିପିଲିରେ ଏନ୍‌ କୁଡ଼ି ଓଡ଼ୋଃ ଅକନ୍‌କ ଆଇଃକ୍‌କେ ଆଉକାଇ ତାଇନାକ ଇନ୍‌କୁ, ଆୟାଃ ଆପୁତେ ଓଡ଼ୋଃ ଏନ୍‌ ଦିପିଲିରେ ଅକଏଚି ଆଇଃକ୍‌କେ ପେଡ଼େଃ ଏମାକାଇ ତାଇକେନାଏ ଇନିଃ, ସବେନ୍‌କ ଜିମାଅଃଆକ। 7 ମେନ୍‌ଦ ଏନ୍‌ କୁଡ଼ିରାଃ କିଲିଏତେ ମିହୁଡ଼୍‌ ରାଜା ହବାଅଃଆଏ ଓଡ଼ୋଃ ଏନ୍‌ କୁଡ଼ିରାଃ ଠାୟାଦ୍‌ ଆକ୍‌ତେୟାର୍‌ ରିକାଏୟାଏ। ଇନିଃ ଉତ୍ତାର୍‌ସାଃରେୟାଃ ରାଇଜ୍‌ରେନ୍‌ ରାଜାରାଃ ସିପାଇକଲଃ ଲାଡ଼ାଇକେଦ୍‌ତେ ଇନିୟାଃ ଗୁମାଟ୍‌ ଭିତାର୍‌ତେ ବଲଆ ଓଡ଼ୋଃ ଇନ୍‌କୁଲଃ ଲାଡ଼ାଇକେଦ୍‌ତେ ଜିତାଅୟାନ୍‌ଲଃ ରାଇଜେୟାଏ। 8 ଇନିଃ ଇନ୍‌କୁଆଃ ମାହାପୁରୁକକେ, ପିତ୍ତାଲ୍‌ ଓଡ଼ୋଃ ତାମ୍ବାତେ ବାଇୟାକାନ୍‌ ମୁରୁତ୍‌କକେ ଓଡ଼ୋଃ ଇନ୍‌କୁଆଃ ସୋନା ରୁପାତେ ବାଇୟାକାନ୍‌ ଗନଙ୍ଗ୍‌ଆଁନ୍‌ ଜିନିଷ୍‌କକେ ଆକ୍‌ତେୟାର୍‌କେଦ୍‌ଲଃ ସବେନାଃକେ ମିସାର୍‌ତେ ଇଦିୟା। ଚିମିନ୍‌ ବାରାଷ୍‌ ନାଗେନ୍ତେ ଇନିଃ ଉତ୍ତାର୍‌ସାଃରେୟାଃ ଦିଶୁମ୍‌ରେନ୍‌ ରାଜାଲଃ କାଏ ଲାପ୍‌ଡ଼ାଇୟାଃ। 9 ଏନ୍ତେ ଉତ୍ତାର୍‌ ଦିଶୁମ୍‌ରେନ୍‌ ରାଜା, ଦାକ୍ଷିଣ୍‌ସାଃରେନ୍‌ ରାଜାଲଃ ଲାଡ଼ାଇୟାଏ ମେନ୍‌ଦ ଆୟାଃ ଆପ୍‌ନାଃ ରାଇଜ୍‌ତେ ରୁହାଡ଼୍‌ ହିଜୁଃଆ।

10 ଆୟାଃ ହନ୍‌କ ଲାଡ଼ାଇ ନାଗେନ୍ତେ ସେକାଡ଼େନାକ ଓଡ଼ୋଃ ମିଆଁଦ୍‌ ମାରାଙ୍ଗ୍‌ ସିପାଇକଆଃ ଝୁଣ୍ଡ୍‌ ହବାଅଃଆକ। ଏନ୍ତେ ନେ ସିପାଇକ ଟୁଡାଦାଆଃ ଲେକା ପେରେଃୟାନ୍‌ଲଃ ଆତୁ ଇଦିୟଃଆକ ଓଡ଼ୋଃ ଇନିୟାଃ ଗୁମାଟ୍‌ ଜାକେଦ୍‌ ଲାଡ଼ାଇୟାକ। 11 ଏନ୍ତେ ଦାକ୍ଷିଣ୍‌ ଦିଶୁମ୍‌ରେନ୍‌ ରାଜା ଖିସ୍‌କେଦ୍‌ତେ ଅଡଙ୍ଗ୍‌ଅଃଆ ଓଡ଼ୋଃ ଉତ୍ତାର୍‌ସାଃରେନ୍‌ ରାଜାଲଃ ଲାଡ଼ାଇୟାଏ। ଉତ୍ତାର୍‌ସାଃରେନ୍‌ ରାଜା ପୁରାଃଗି ସିପାଇକ ହୁଣ୍ଡିକାଦ୍‌ କରେୟଗି, ଲାଡ଼ାଇରେ ହାରାଅକେନଃଆ। 12 ଦାକ୍ଷିଣ୍‌ସାଃରେନ୍‌ ରାଜା ଏନ୍‌ ସିପାଇକକେ ତଲ୍‌ ଇଦିକେଦ୍‌କ ହରାତେ, ଏନ୍‌ ରାଜା ଆଇଃଗି ଆପାନ୍‌କେ ସବେନ୍‌କଆଃଏତେ ମାରାଙ୍ଗ୍‌ ତାନିଙ୍ଗ୍‌ ମେନ୍ତେ କାଜିନାଃ ଓଡ଼ୋଃ ଇନିଃ ହାଜାର୍‌ ହାଜାର୍‌ ହଡ଼କକେ ମାଆଃକଆ। ଏନ୍‌ରେୟ କାଏ ଜିତାଅଃୱା।

13 ଚିୟାଃଚି ଉତ୍ତାର୍‌ ଦିଶୁମ୍‌ରେନ୍‌ ରାଜା ସିଦାଏତେ ଆଦ୍‌କା ପୁରାଃ ପେଡ଼େୟାନ୍‌ ସିପାଇକକେ ହୁଣ୍ଡିକଆ ଓଡ଼ୋଃ ପୁରା ସେକାଡ଼୍‌କେଦ୍‌ତେ ଲାଡ଼ାଇରାଃ ହାଁତେୟାର୍‌ ସାବ୍‌କେଦ୍‌ଲଃ ହିଜୁଃଆଏ। 14 ଏନ୍‌ ଦିପିଲିରେ ପୁରାଃ ରାଜାକ ଦାକ୍ଷିଣ୍‌ସାଃରେନ୍‌ ରାଜାରାଃ ବିରୁଧ୍‌ରେ ବିରିଦାଃକ। ଆମାଃ ଆପ୍‌ନାଃ ହଡ଼କଏତେ ଚିମିନ୍‌ ପୁରାଃ ଏତ୍‌କାନ୍‌ ହଡ଼କ ଅଡଙ୍ଗ୍‌ଅଃଆ, ନେ ଦାର୍‌ଶାନ୍‌ ପୁରାଅଃ ନାଗେନ୍ତେ ଆମ୍‌କେ ଉସ୍‌କୁର୍‌ମାଃକ, ମେନ୍‌ଦ ଇନ୍‌କୁ କାକ ଜିତାଅଃୱା। 15 ଉତ୍ତାର୍‌ସାଃରେନ୍‌ ରାଜା ହିଜୁଃୟାନ୍‌ଲଃ ମିଆଁଦ୍‌ କେଟେୟାନ୍‌ ଗୁମାଟ୍‌ ବାଇକେଦ୍‌ତେ ମିଆଁଦ୍‌ ପୁରାଃ ମାରାଙ୍ଗ୍‌ ନାଗାର୍‌ ଆକ୍‌ତେୟାର୍‌ ରିକାଏୟାଏ। ଦାକ୍ଷିଣ୍‌ସାଃରେନ୍‌ ସିପାଇକ ଆକ୍‌ତେୟାର୍‌ ରିକା ନାଗେନ୍ତେ କାକ ଦାଡ଼ିୟା, ଆକଆଃ ସାଲାକାନ୍‌ ପେଡ଼େୟାନ୍‌ ସିପାଇକଆଃ ହଗି ପେଡ଼େଃ ଓଡ଼ୋଃ କା ତାଇନାଃ। 16 ଲାଡ଼ାଇନିଃ ଆୟାଃ ଆପ୍‌ନାଃ ସୁକୁଃ ଲେକା ରିକାୟାଏ, ଜେତାଏ ଆୟାଃ ବିରୁଧ୍‌ରେ କାକ ତିଙ୍ଗୁ ଦାଡ଼ିୟା। ଏନ୍‌ ସୁଗାଡ଼ାନ୍‌ ଦିଶୁମ୍‌ରେ ଇନିଃ ଆପାନ୍‌କେ ପୁରାଃ କେଟେୟାନ୍‌ ଓଡ଼ୋଃ ପେଡ଼େୟାନ୍‌ଗି ବାଇୟେନା, ଆୟାଃ ତିଃଇରେ ପୁରାଃ ଜିୟନ୍‌ ରିକାରାଃ ଆକ୍‌ତେୟାର୍‌ ତାଇନାଃ।

17 ଇନିଃ ଆୟାଃ ଆପ୍‌ନାଃ ଗଟା ରାଇଜ୍‌ରେୟାଃ ପେଡ଼େଃଲଃ ହିଜୁଃ ନାଗେନ୍ତେ ଇଛା ସାନାଙ୍ଗ୍‌ ରିକାୟାଏ ଓଡ଼ୋଃ ଆୟାଃଲଃ ସାଧାସିଧା ହଡ଼କ ହିଜୁଃଆକ। ଇନିଃ ଆୟାଃ ଇଛାସାନାଙ୍ଗ୍‌ ଲେକା ରିକାଏୟା। ରାଇଜ୍‌କେ ଜିୟନ୍‌ ରିକା ନାଗେନ୍ତେ ଇନିଃ ଆୟାଃ ହନ୍‌କୁଡ଼ିକେ ଇନିଃଲଃ ଆଣ୍‌ଦିୟାଏ, ମେନ୍‌ଦ ଆୟାଃ ଉହାଟ୍‌ କା ପୁରାଅଃଆ ଚାଏ ଆୟାଃ ଜେତ୍‌ନାଃରେ ଦେଙ୍ଗା କା ହିଜୁଃଆ। 18 ଏନ୍ତେ ଇନିଃ ଦରେୟାସାଃରେୟାଃ ଟାପୁରେନ୍‌ ହଡ଼କଆଃ ବିରୁଧ୍‌ରେ ଲାଡ଼ାଇ ରିକାଏୟାଏ ଓଡ଼ୋଃ ଇନ୍‌କୁକେ ହାରାଅକେଦ୍‌ତେ ଆକ୍‌ତେୟାର୍‌ ରିକାଏୟାଏ। ମେନ୍‌ଦ ମିଆଁଦ୍‌ ସିପାଇକଆଃ ଗମ୍‌କେ, ଇନିୟାଃ ବିରୁଧ୍‌ରେ ଲାଡ଼ାଇକେଦ୍‌ତେ ଜିତାଅଃଆଏ ଓଡ଼ୋଃ ଇନିୟାଃ ସିଗିଦ୍‌ କାମିକ ସାଙ୍ଗିନେୟାଁଏ, ଏନ୍ତେ ଇନିୟାଃ ସିଗିଦ୍‌ କାମି ଇନିୟାଃ ଚେତାନ୍‌ରେଗି ରିକାଏୟାଏ। 19 ଏନ୍ତେ ଇନିଃ ଆୟାଃ ଦିଶୁମ୍‌ରେୟାଃ ଗୁମାଟ୍‌ସାଃତେ ରୁହାଡ଼ା। ମେନ୍‌ଦ ଇନିଃ ତହଦ୍‌କେଦ୍‌ତେ ଜିୟନଃଆ ଓଡ଼ୋଃ ଇନିଃ କାଏ ନେଲଃଆ।

20 ଇନିୟାଃ ତାୟମ୍‌ତେ ଆଡଃମିହୁଡ଼୍‌ ରାଇଜ୍‌ ରିକାଏୟାଏ, ଓଡ଼ୋଃ ଇନିଃ ଆୟାଃ ରାଇଜ୍‌ରାଃ ଟାକା ପାଏସା ପସାଇଦିୟଃକା ମେନ୍ତେ ମାଲ୍‌ହାରମ୍‌ ନାଙ୍ଗ୍‌ ମିଆଁଦ୍‌ ମାଲ୍‌ହାରମ୍‌ନିଃକେ କୁଲିୟା। ମେନ୍‌ଦ ଇନିଃ ଜାଲ୍‌ଦିଗି ଜିୟନ୍‌କେନଃଆ। ମେନ୍‌ଦ ଖିସ୍‌ତେ ଚାଏ ଲାଡ଼ାଇ ହରାତେ କାଏ ଜିୟନଃଆ।

21 ରାଜା ଲେକା କା ମାନାତିଙ୍ଗ୍‌କାନ୍‌ ମିଆଁଦ୍‌ ଏତ୍‌କାନ୍‌ ହଡ଼ ଇନିୟାଃ ଠାୟାଦ୍‌ ଆକ୍‌ତେୟାର୍‌ ରିକାଏୟାଏ। ହଡ଼କ ସୁକୁରେ ମେନାଲେୟା ମେନ୍ତେ ଆଟ୍‌କାରେୟାକ, ଇମ୍‌ତା ଇନିଃ ରାଇଜ୍‌ ଚେତାନ୍‌ରେ ଆକ୍‌ଦାନ୍ଦାଅ କାମି ରିକାଏୟାଏ। ହସଡ଼ କାଜି କାଜିକେଦ୍‌ତେ ଏନ୍‌ ରାଇଜ୍‌କେ ଆକ୍‌ତେୟାର୍‌ ରିକାଏୟାଏ। 22 ଏନ୍ତେ ଟୁଡା ଦାଆଃରେ ଆତୁଃ ଲେକା ପୁରାଃ ମାରାଙ୍ଗ୍‌ ଆଗୁଆଇ ଇନିୟାଃ ଆୟାର୍‌ରେ ଛିତିବିତିକଆଃକ ଓଡ଼ୋଃ ରାଜିନାମା ରିକାକାଦ୍‌ ଗମ୍‌କେ ହଗି ଜିୟନ୍‌କଆଃ। 23 ଇନିଃଲଃ ମିଆଁଦ୍‌ ରାଜିନାମା ରିକାଏରେୟଗି, ଇନିଃ ହସଡ଼ ଲେକା କାମିକ ରିକାଏୟାଏ, ଓଡ଼ୋଃ ଥିମ୍ବା ହଡ଼ କାକ ତାଇନ୍‌ରେୟଗି ଇନିଃ ପେଡ଼େଃତେ ହାରାଇଦିୟଃଆ। 24 ଟାକା ପାଏସାତେ କିସାଁଣ୍‌କାନ୍‌ ପାର୍‌ଗାନ୍‌ରେନ୍‌ ହଡ଼କ ସୁକୁରେ ମେନାଲେୟା ମେନ୍ତେକ ଆଟ୍‌କାରେୟା ଇମ୍‌ତା ଇନିଃ ଇନ୍‌କୁଲଃ ଲାଡ଼ାଇ ରିକାଏୟାଏ ଓଡ଼ୋଃ ଆୟାଃ ଆପୁତେ, ପୁର୍‌ଖାହାଡ଼ାମ୍‌କ ଅକଆଃ କାକ ରିକା ଦାଡ଼ିକାଦ୍‌ ତାଇକେନା, ଏନା ଇନିଃ ରିକାୟାଏ। ଇନିଃ ଅକନ୍‌କଲଃ ରେଃକ୍‌ ଇଦିକାଦ୍‌, କୁମ୍ବୁଡ଼ୁ ଇଦିକାଦ୍‌, ଟାକାପାଏସା ଓଡ଼ୋଃ ଜିନିଷ୍‌କ, ଇନ୍‌କୁକେ ହାଟିଙ୍ଗ୍‌କଆ। ଇନିଃ କେଟେୟାନ୍‌ ଗୁମାଟ୍‌କକେ ଜିୟନ୍‌ ରିକା ନାଙ୍ଗ୍‌ ରଜୋଟ ରିକାଏୟାଏ, ମେନ୍‌ଦ ଏନା ଘାଡ଼ିକାଦ୍‌ ନାଙ୍ଗ୍‌ ହବାଅଃଆ।

25 ଇନିଃ ମିଆଁଦ୍‌ ପୁରାଃ ମାରାଙ୍ଗ୍‌ ସିପାଇକଆଃ ଝୁଣ୍ଡ୍‌ ଇଦିକେଦ୍‌ତେ ପୁରାଃ ପେଡ଼େଃ ଓଡ଼ୋଃ ଜୀଉ କେଟେଃକେଦ୍‌ତେ ଦାକ୍ଷିଣ୍‌ସାଃରେନ୍‌ ରାଜାରାଃ ବିରୁଧ୍‌ରେ ଲାଡ଼ାଇ ନାଗେନ୍ତେ ଅଡଙ୍ଗ୍‌ଅଃଆ। ଏନ୍ତେ ମିସାର୍‌ରେନ୍‌ ରାଜା ପୁରାଃଗି ମାରାଙ୍ଗ୍‌ ଓଡ଼ୋଃ ପେଡ଼େୟାନ୍‌ ସିପାଇକଆଃ ଝୁଣ୍ଡ୍‌ ଇଦିକେଦ୍‌ତେ ଲାଡ଼ାଇୟା। ମେନ୍‌ଦ ମିସାର୍‌ରେନ୍‌ ରାଜାରାଃ ବିରୁଧ୍‌ରେ ରଜୋଟ ରିକାକାନ୍‌ ହରାତେ ଇନିଃ ଇନ୍‌କୁଲଃ ଲାଡ଼ାଇ କାଏ ଦାଡ଼ିୟା। 26 ରାଜାଲଃ ତାଇନ୍‌ତାନ୍‌ ଜମ୍‌ତାନ୍‌ ହଡ଼କଗି ଇନିଃକେ ଜିୟନ୍‌ ରିକାଇୟାକ। ରାଜାରାଃ ସିପାଇକ ଟୁଡା ଦାଆଃରେ ଆତୁକେନଃ ଲେକା ଛିତିବିତିକଆଃକ ଓଡ଼ୋଃ ଲାଡ଼ାଇରେ ପୁରାଃ ସିପାଇକ ଗଜଃଆ। 27 ନେ ବାରାନ୍‌ ରାଜା ମିଦ୍‌ତାଃରେ ଜଜମ୍‌ ଦୁବାକିନ୍‌ ଓଡ଼ୋଃ ଜାଗାରେୟାକିନ୍‌, ମେନ୍‌ଦ ଆକିନାଃ ମନ୍‌ସୁରୁଦ୍‌ରେ ଏତ୍‌କାନ୍‌ ଉଡ଼ୁଃତାନ୍‌ଲଃ ମିହୁଡ଼୍‌ ଆଡଃମିହୁଡ଼୍‌କେ ବେଦା ଜାଗାର୍‌ ରିକାଏୟାକିନ୍‌। ମେନ୍‌ଦ ନେଆଁ କା ପୁରାଅଃଆ, ଚିୟାଃଚି ଟାହାରାଅକାନ୍‌ ହୁଲାଙ୍ଗ୍‌ଗି ଟୁଣ୍ଡୁ ଦିପିଲି ହବାଅଃଆ। 28 ଉତ୍ତାର୍‌ସାଃରେନ୍‌ ରାଜା ପୁରାଃଗି ଖୁର୍ଜିକ ସାବ୍‌କେଦ୍‌ଲଃ ଆୟାଃ ଦିଶୁମ୍‌ତେ ରୁହାଡ଼ା, ମେନ୍‌ଦ ଆୟାଃ ମନ୍‌ ପାବିତାର୍‌ ରାଜିନାମା ବିରୁଧ୍‌ରେ ତାଇନାଃ। ଇନିଃ ଏନାରାଃ ବିରୁଧ୍‌ରେ ଆୟାଃ ଇଛାସାନାଙ୍ଗ୍‌ ଲେକା ରିକାକେଦ୍‌ ତାୟମ୍‌ତେ ଆୟାଃ ଦିଶୁମ୍‌ତେ ସେନଃରୁହାଡ଼ା।

29 ଟାହାରାଅକାନ୍‌ ହୁଲାଙ୍ଗ୍‌ରେ ଇନିଃ ଆଡଃମିସା ଦାକ୍ଷିଣ୍‌ସାଃରେୟାଃ ରାଇଜ୍‌ଲଃ ଲାଡ଼ାଇୟାଏ। ମେନ୍‌ଦ ସିଦାଏତେ ନେସ୍‌କାନ୍‌ ଏଟାଃଗି ହବାଅଃଆ। 30 ଚିୟାଃଚି କିତ୍ତିମ୍‌ରେୟାଃ ଜାହାଜ୍‌କ ଇନିୟାଃ ବିରୁଧ୍‌ରେ ହିଜୁଃଆ, ଏନାମେନ୍ତେ ଇନିୟାଃ ମନ୍‌ ପୁରାଃଗି ଦୁକୁକଆଃ।

ଏନ୍ତେ ଇନିଃ ରୁହାଡ଼୍‌କେଦ୍‌ତେ ପାବିତାର୍‌ ରାଜିନାମାରେୟାଃ ବିରୁଧ୍‌ରେ ଖିସ୍‌କେଦ୍‌ତେ ଆୟାଃ ଇଛାସାନାଙ୍ଗ୍‌ ଲେକା କାମିକ ରିକାଏୟାଏ। ଏନ୍ତେ ଇନିଃ ହିଜୁଃରୁହାଡ଼୍‌କେଦ୍‌ତେ ପାବିତାର୍‌ ରାଜିନାମା ବାଗିକାଦ୍‌ ହଡ଼କକେ ଲିବୁଇକଆଏ। 31 ଇନିୟାଃ ଚିମିନ୍‌ ସିପାଇକ ମାନ୍ଦିର୍‌ ଅଡ଼ାଃରାଃ ଗୁମାଟ୍‌କେ ସତ୍‌ରା ରିକାୟାକ ଓଡ଼ୋଃ ସବେନ୍‌ ହୁଲାଙ୍ଗ୍‌ ଦାଣେଁରାକାବଃ କାମିକେ ବାଗିଇଚିକୟାକ। ଏନ୍ତେ ଇନ୍‌କୁ ଜିୟନଃନିଃ, ଅକ୍‌ନିଃଚି ହିଲାଙ୍ଗ୍‌ଅଃନିଃକେ ଦହଇୟାକ। 32 ଅକ ହଡ଼କ ରାଜିନାମାରାଃ ବିରୁଧ୍‌ରେ ଏତ୍‌କାନ୍‌ କାମି ରିକାଃକ, ଇନ୍‌କୁକେ ଇନିଃ ହସଡ଼ କାଜିକେଦ୍‌ତେ ଏତ୍‌କାନ୍‌ ହରାତେ ଇଦିକଆ। ମେନ୍‌ଦ ଅକନ୍‌କ ସାର୍‌ତି ପାର୍‌ମେଶ୍ୱାର୍‌କେ ସାରିୟାଃକ, ଇନ୍‌କୁ ପୁରାଃ ପେଡ଼େଃତେ ଇନିୟାଃ ବିରୁଧ୍‌ ରିକାଏୟାକ। 33 ଅକନ୍‌କ ସେଣାଁନ୍‌, ଇନ୍‌କୁ ପୁରାଃ ହଡ଼କକେ ଇତୁକଆକ। ଏନ୍‌ରେୟ ଚିମିନ୍‌ ମାହା ଜାକେଦ୍‌ ଇନ୍‌କୁକେ ତାରାଉଡ଼ିଲଃ ମାଆଃଗଏଃ, ସେଙ୍ଗେଲ୍‌ରେ ଅଣ୍ଡର୍‌ ଗଏଃକଆକ, ଚିମିନ୍‌କକେ ଜେହେଲ୍‌କଆକ ଚାଏ ରେଃକ୍‌କଆକ। 34 ଇନ୍‌କୁ ଜିୟନଃଆକ ଇମ୍‌ତା କାଟିଃଲେକା ଦେଙ୍ଗାକ ନାମେୟା ଓଡ଼ୋଃ ପୁରାଃଗି ବେଦା ହଡ଼କ ଇନ୍‌କୁଲଃ ମେସାନାକ। 35 ସେଣାଁନ୍‌ ହଡ଼କଏତେ ଚିମିନ୍‌କ ତହଦଃଆ, ମେନ୍‌ଦ ଇନ୍‌କୁ ଟୁଣ୍ଡୁ ଦିପିଲି ଜାକେଦ୍‌ ନିରାଲ୍‌, ଫାର୍‌ଚି ଓଡ଼ୋଃ ବେଗାର୍‌ ଦାଗ୍‌କେଦ୍‌ତେ ତାଇନାଃ। ଚିୟାଃଚି ନେଆଁ ସାଲାକାନ୍‌ ନେଣ୍ଡାରାଃ ଟୁଣ୍ଡୁ ଦିପିଲି ହିଜୁଃଆ।

36 ରାଜା ଆୟାଃ ଆପ୍‌ନାଃ ଇଛାସାନାଙ୍ଗ୍‌ ଲେକାତେ କାମିୟା। ଇନିଃ ସବେନ୍‌ ମାହାପୁରୁ କତାଃଏତେ ଆପାନ୍‌କେ ମାରାଙ୍ଗ୍‌ ଓଡ଼ୋଃ ମାଇନାନ୍‌ ରିକାନାଏ। ପାର୍‌ମେଶ୍ୱାର୍‌ଆଃ ବିରୁଧ୍‌ରେ କା ଲାଗାତିଙ୍ଗ୍‌ କାଜିକଏ କାଜିୟା। ଖିସ୍‌ରେୟାଃ କାଜି ପୁରାଅଃ ଜାକେଦ୍‌ ଇନିଃ ଜିତାଅଃଆଏ, ଚିୟାଃଚି ଏନା ସାଲାକାନା, ଏନା ହବାଅଃଗିୟା। 37 ଇନିଃ ଆୟାଃ ପୁର୍‌ଖାହାଡ଼ାମ୍‌କଆଃ ମାହାପୁରୁକକେ କାଏ ମାନାତିଙ୍ଗ୍‌କଆ ଚାଏ କୁଡ଼ିକ ଦୁଲାଡ଼୍‌ତାନ୍‌ ମାହାପୁରୁକକେ ଚାଏ ଜେତାନ୍‌ ମାହାପୁରୁକକେ କାଏ ମାନାତିଙ୍ଗ୍‌କଆ, ଓଡ଼ୋଃ ମନ୍‌ରେ କାଏ ଉଡ଼ୁଃ ପାହାମ୍‌କଆ। ମେନ୍‌ଦ ନେ ସବେନ୍‌କତାଃଏତେ ଆପାନ୍‌କେ ମାରାଙ୍ଗ୍‌ ରିକାନାଏ। 38 ଇନିଃ ନେ ସବେନ୍‌ ମାହାପୁରୁକକେ ବାଗିକେଦ୍‌ତେ ଏଟାଃ ମିଆଁଦ୍‌ ଗୁମାଟ୍‌ରେନ୍‌ ମାହାପୁରୁକେ ମାନାତିଙ୍ଗ୍‌ ରିକାଇୟାଏ। ଆୟାଃ ପୁର୍‌ଖାହାଡ଼ାମ୍‌କ କା ସାରିକାଇ ମାହାପୁରୁକେ ସୋନା, ରୁପା, ଗନଙ୍ଗ୍‌ଆଁନ୍‌ ଦିରି ଓଡ଼ୋଃ ସୁଗାଡ଼ାନ୍‌ ଜିନିଷ୍‌ ଏମ୍‌କେଦ୍‌ତେ ମାଇନ୍‌ ରିକାଇୟାଏ। 39 ଏଟାଃ ଦିଶୁମ୍‌ରେନ୍‌ ମାହାପୁରୁରାଃ ଦେଙ୍ଗାତେ ଇନିଃ କେଟେୟାନ୍‌ ଗୁମାଟ୍‌କକେ ଆକ୍‌ତେୟାର୍‌ ରିକାଏୟାଏ, ଓଡ଼ୋଃ ଆଇଃକ୍‌କେ ମାନାତିଙ୍ଗ୍‌ତାନ୍‌ ହଡ଼କକେ ପୁରାଃଗି ମାଇନ୍‌କଆ। ଇନିଃ ଇନ୍‌କୁକେ ପୁରାଃ ହଡ଼କଆଃ ଚେତାନ୍‌ରେ ରାଇଜ୍‌ ରିକାନାଙ୍ଗ୍‌ ଆକ୍‌ତେୟାର୍‌ ଏମାକଆଏ ଓଡ଼ୋଃ ଆକଆଃ ନାଲା ଲେକା ଅତେ ହାଟିଙ୍ଗ୍‌କଆ।

40 ଟୁଣ୍ଡୁରେ ଦାକ୍ଷିଣ୍‌ ଦିଶୁମ୍‌ରେନ୍‌ ରାଜା ଇନିଃଲଃ ଲାଡ଼ାଇନାଏ ଓଡ଼ୋଃ ଉତ୍ତାର୍‌ ଦିଶୁମ୍‌ରେନ୍‌ ରାଜା ସାଦମ୍‌ଗାଡ଼ି, ସାଦମ୍‌ରେ ଦୁବ୍‌କେଦ୍‌ତେ ଲାଡ଼ାଇନ୍‌ ସିପାଇକ ଓଡ଼ୋଃ ପୁରାଃ ମାରାଙ୍ଗ୍‌ ଦାଆଃଜାହାଜ୍‌ରେନ୍‌ ସିପାଇକ ଇନିୟାଃ ବିରୁଧ୍‌ରେ ହୟଗାମା ଲେକା ହିଜୁଃଆକ ଓଡ଼ୋଃ ଇନିଃ ପୁରାଃ ଦିଶୁମ୍‌କରେ ଟୁଡାଦାଆଃ ଲେକା ବଲକେଦ୍‌ତେ ଆକ୍‌ତେୟାର୍‌ ରିକାୟାଏ। 41 ଇନିଃ ସୁଗାଡ଼ାନ୍‌ ଦିଶୁମ୍‌କେ ହଗି ଆକ୍‌ତେୟାର୍‌ ରିକାୟାଏ। ପୁରାଃ ଦିଶୁମ୍‌କ ଜିୟନଃଆ ମେନ୍‌ଦ ଇଦୋମ୍‌, ମୋୟାବ୍‌ ଓଡ଼ୋଃ ଅମ୍ମୋନ୍‌ରେନ୍‌ ହଡ଼କଆଃ ଦିଶୁମ୍‌, ଇନିୟାଃ ତିଃଇଏତେ ବାଞ୍ଚାଅଃଆ। 42 ଇନିଃ ପୁରାଃ ଦିଶୁମ୍‌ ଚେତାନ୍‌ରେ ଆକ୍‌ତେୟାର୍‌ ରିକାକେଦ୍‌ତେ ପାସ୍‌ରାଅ ରିକାଏୟାଏ, ମିସାର୍‌ ଦିଶୁମ୍‌ ହଗି କା ବାଞ୍ଚାଅଃଆ। 43 ଇନିଃ ମିସାର୍‌ ଦିଶୁମ୍‌ରେୟାଃ ସୋନା, ରୁପାରାଃ ଭାଣ୍ଡାର୍‌କେ ଓଡ଼ୋଃ ପୁରାଃ ଗନଙ୍ଗ୍‌ଆଁନ୍‌ ଜିନିଷ୍‌କ ଆକ୍‌ତେୟାର୍‌ ରିକାଏୟାଏ। ଲିବିୟା ଓଡ଼ୋଃ କୁଶିୟରେନ୍‌ ହଡ଼କ ଇନିଃକେ ଅତଙ୍ଗ୍‌ଇୟାଁକ। 44 ମେନ୍‌ଦ ପୁରାବ୍‌ ଓଡ଼ୋଃ ଉତ୍ତାର୍‌ସାଃରେୟାଃ କାନାଜି ଇନିଃକେ ଆକ୍‌ଚାକାଅ ରିକାଇୟା ଓଡ଼ୋଃ ପୁରାଃ ଖିସ୍‌ତେ ଇନିଃ ପୁରାଃ ହଡ଼କକେ ମାଆଃଗଏଃକଆ ଓଡ଼ୋଃ ପୁରାଗି ଜିୟନ୍‌ ରିକା ନାଙ୍ଗ୍‌ ଅଡଙ୍ଗ୍‌ଆଁଏ। 45 ଇନିଃ ପାବିତାର୍‌ ସୁଗାଡ଼ାନ୍‌ ବୁରୁ ଓଡ଼ୋଃ ଦରେୟାରେୟାଃ ଥାଲା ଠାୟାଦ୍‌କରେ ଆୟାଃ ରାଇଜ୍‌ରେୟାଃ କୁମ୍ବା ବାଇୟାଏ। ଏନ୍‌ରେୟ ଇନିୟାଃ ଟୁଣ୍ଡୁ ଦିପିଲି ସେଟେରା ଓଡ଼ୋଃ ଜେତାଏ ଇନିଃକେ କାକ ଦେଙ୍ଗାଇୟା।