1 ଏନ୍‌ ଦିପିଲିରେ ଆମାଃ ହଡ଼କକେ ଦେଙ୍ଗାତାନ୍‌ ମାରାଙ୍ଗ୍‌ ଗମ୍‌କେ ମିଖାୟେଲ୍‌ ବିରିଦାଏ ଓଡ଼ୋଃ ହଡ଼କଆଃ ଜାନାମ୍‌ ହୁଲାଙ୍ଗ୍‌ଏତେ ନାହାଁଃ ଜାକେଦ୍‌ ଚିଉଲାଅ କା ହବାକାନ୍‌ ଲେକା ପୁରାଃ ମାରାଙ୍ଗ୍‌ ସାଙ୍କାଟ୍‌ ହିଜୁଃଆ। ମେନ୍‌ଦ ଏନ୍‌ ଦିପିଲିରେ ଆପେୟାଃ ହଡ଼କ ଥାଲାଏତେ ଅକନ୍‌କଆଃ ନୁତୁମ୍‌ ପୁଥିରେ ଅଲାକାନ୍‌ ତାଇନାଃ, ଇନ୍‌କୁ ସବେନ୍‌କ ବାଞ୍ଚାଅଃଆ। 2 ଅତେଦିଶୁମ୍‌ରେୟାଃ ହାଁସାରେ ଅକ ପୁରାଃ ହଡ଼କ ଗୟାକାନା, ଇନ୍‌କୁ ବିରିଦାଃକ, ଚିମିନ୍‌କ ଜାନାଅ ଜୀଦାନ୍‌ ନାମେ ନାଗେନ୍ତେ ଓଡ଼ୋଃ ଚିମିନ୍‌କ ଜାନାଅ ଜାନାଅରେୟାଃ ଗିହୁଃ ଓଡ଼ୋଃ ଦୁକୁ ନାମେ ନାଗେନ୍ତେକ ବିରିଦାଃ। 3 ଅକନ୍‌କ ସେଣାଁନ୍‌ତାନ୍‌କ, ଇନ୍‌କୁ ସିର୍ମାରେ ମାସ୍କାଲ୍‌ ଏମ୍‌ତାନ୍‌ ଲେକା ମାସ୍କାଲ୍‌ଗିକ ହବାଅଃଆ ଓଡ଼ୋଃ ଅକନ୍‌କ ପୁରାଃ ହଡ଼କକେ ଧାର୍‌ମାନ୍‌ ହରାରେ ସୁତୁଃ ଇଦିକଆକ, ଇନ୍‌କୁ ଇପିଲ୍‌ ଲେକା ଜାନାଅଗି ମାସ୍କାଲ୍‌ ଏମ୍‌ତାନ୍‌କ ହବାଅଃଆ।

4 ମେନ୍‌ଦ ହେ ଦାନିୟେଲ୍‌, ଟୁଣ୍ଡୁ ଦିପିଲି ଜାକେଦ୍‌ ନେ ପୁଥିରେୟାଃ ଅନଲ୍‌କେ ହାରୁବ୍‌କେଦ୍‌ତେ ଓଡ଼ୋଃ ଏନ୍‌ ପୁଥିକେ ମୋହର୍‌ ଏମ୍‌କେଦ୍‌ତେ ଦହଏମେ। ଏନ୍‌ ଘାଡ଼ିରେ ପୁରାଃ ହଡ଼କ ନେତେହେନ୍ତେ ହନର୍‌ଆଃକ ଓଡ଼ୋଃ ସେଣାଁ ପସାଅଃଆ।

5 ଏନ୍ତେ ଆଇଙ୍ଗ୍‌ ଦାନିୟେଲ୍‌ ନେଲ୍‌କେଦାଇଙ୍ଗ୍‌ ଓଡ଼ୋଃ ଆଇଁୟାଃ ଆୟାର୍‌ରେ ଓଡ଼ୋଃ ବାର୍‌ହଡ଼୍‌ ତିଙ୍ଗୁଆକାନ୍‌ ତାଇକେନାକିନ୍‌, ମିହୁଡ଼୍‌ ଗାଡ଼ା ଗେନାରେୟାଃ ନେ ପାରମ୍‌ରେ ଆଡଃମିହୁଡ଼୍‌ ହାନ୍‌ ପାରମ୍‌ରେ। 6 ମିହୁଡ଼୍‌ ଉନ୍‌ରାଃ ଲିଜାଃ ତୁସିଙ୍ଗ୍‌କେଦ୍‌ତେ ଗାଡ଼ାରାଃ ଦାଆଃ ଚେତାନ୍‌ରେ ତିଙ୍ଗୁଆକାନ୍‌ ତାଇକେନା। ଇନ୍‌କିନ୍‌ଏତେ ମିହୁଡ଼୍‌ ଆଡଃମିହୁଡ଼୍‌କେ କୁଲିକିୟାଏ, "ନେ ସବେନ୍‌ ଆକ୍‌ଦାନ୍ଦାଅ କାଜିକ ପୁରାଅଃ ନାଗେନ୍ତେ ଚିମିନ୍‌ ଦିପିଲି ଲାଗାତିୟାଁଃ ?"

7 ଉନ୍‌ରାଃ ଲିଜାଃ ତୁସିଙ୍ଗ୍‌କେଦ୍‌ତେ ଗାଡ଼ାରାଃ ଦାଆଃ ଚେତାନ୍‌ରେ ତିଙ୍ଗୁଆକାନ୍‌ ତାଇକେନାଏ, ଇନିଃ ବାରାନ୍‌ ତିଃଇକେ ସିର୍ମାସାଃ ରିମ୍‌କେଦ୍‌ତେ ଜାନାଅ ଜାନାଅରେନ୍‌ ପାର୍‌ମେଶ୍ୱାର୍‌ଆଃ ନୁତୁମ୍‌ତେ କିରିୟାତାନ୍‌ଲଃ ନେ କାଜି କାଜିତାନ୍‌ତେୟାଃ ଆୟୁମ୍‌କିୟାଇଙ୍ଗ୍‌, "ନେଆଁ ମିଦ୍‌ ବାରାଷ୍‌, ବାର୍‌ ବାରାଷ୍‌ ଓଡ଼ୋଃ ତୁରିୟା ମାହିନା ଜାକେଦ୍‌ ହବାଅଃଆ। ପାବିତାର୍‌ ହଡ଼କଆଃ ପେଡ଼େଃ ଚିମ୍‌ତା ଟୁଣ୍ଡୁରେ ଜିୟନଃଆ, ଇମ୍‌ତା ନେ ସବେନାଃ ପୁରାଅଃଆ।"

8 ଆଇଙ୍ଗ୍‌ ଆୟୁମ୍‌କେଦାଇଙ୍ଗ୍‌, ମେନ୍‌ଦ କାଇଙ୍ଗ୍‌ ଆଟ୍‌କାର୍‌ଉରୁମ୍‌କେଦା। ଏନାମେନ୍ତେ ଆଇଙ୍ଗ୍‌ ଇନିଃକେ କୁଲିକିୟାଇଙ୍ଗ୍‌, "ହେ ଗମ୍‌କେ, ନେ ସବେନାଃରାଃ ଟୁଣ୍ଡୁ ଚିଲ୍‌କାତେ ହବାଅଃଆ ?"

9 ଇନିଃ କାଜିରୁହାଡ଼୍‌କେଦିୟାଁଏ, "ଦାନିୟେଲ୍‌, ଆମାଃ ହରାରେ ଆମ୍‌ ସେନଃମେଁ, ଚିୟାଃଚି ନେ'ସବେନ୍‌ କାଜି ଟୁଣ୍ଡୁ ଦିପିଲି ଜାକେଦ୍ ହାରୁବ୍‌ ଓଡ଼ୋଃ ମୋହର୍‌ ଏମ୍‌କେଦ୍‌ତେ ଦହକାନା। 10 ପୁରାଃ ହଡ଼କ ଆପାନ୍‌କେ ପାବିତାର୍‌, ବେଗାର୍‌ ଦାଗ୍‌ ଓଡ଼ୋଃ ଫାର୍‌ଚି ରିକାନାଃକ, ମେନ୍‌ଦ ଏତ୍‌କାନ୍‌ ହଡ଼କ ଏତ୍‌କାନ୍‌ କାମିକ ରିକାଏୟା, ଏନ୍‌ ସବେନ୍‌କ ନେ କାଜିକେ ଜେତାଏ କାକ ସାରିଉରୁମ୍‌ ଦାଡ଼ିୟା। ମେନ୍‌ଦ ଅକନ୍‌କ ସେଣାଁନ୍‌କ ତାନ୍‌କ, ଇନ୍‌କୁ ସାରିଉରୁମ୍‌ ଦାଡ଼ିୟାକ।"

11 ଅକ ଦିପିଲିଏତେ ସବେନ୍‌ ହୁଲାଙ୍ଗ୍‌ ରାକାବଃ ଦାଣେଁ ହକାକେନଃଆ ଓଡ଼ୋଃ ଏନ୍‌ ଜିୟନଃନିଃ, ହିଲାଙ୍ଗ୍‌ଅଃ ଜିନିଷ୍‌ ଏନ୍‌ ଠାୟାଦ୍‌ତେ ଆଉଃଆ, ଏନ୍‌ ହୁଲାଙ୍ଗ୍‌ଏତେ ଏନା ୧,୨୯୦ ହୁଲାଙ୍ଗ୍‌ ହବାଅଃଆ। 12 ଅକନ୍‌ ହଡ଼କ ୧,୩୩୫ ହୁଲାଙ୍ଗ୍‌ ଟୁଣ୍ଡୁ ହବାଅଃ ଜାକେଦ୍‌ ତାଙ୍ଗିୟାକ, ଇନ୍‌କୁ ଧାଇନ୍‌ ତାନ୍‌କ।

13 ମେନ୍‌ଦ ଆମ୍‌ ଟୁଣ୍ଡୁ ଜାକେଦ୍‌ ଆମାଃ ହରାରେ ସେନଃମେଁ। ଆମ୍‌ ରୁଡ଼ୁନ୍‌ ନାମେୟାଁମ୍‌ ଓଡ଼ୋଃ ଦିପିଲି ଟୁଣ୍ଡୁରେ ଆମାଃ ନାଗେନ୍ତେ ହିସା ଦହାକାନ୍‌ ଆକ୍‌ତେୟାର୍‌ ନାମେ ନାଗେନ୍ତେମ୍‌ ତିଙ୍ଗୁନାଃ।