1 ନେବୁଖଦ୍‌ନେଜର୍‌ ରାଜା ରାଇଜ୍‌ତାନ୍‌ ବାର୍‌ ବାରାଷ୍‌ ଦିପିଲିରେ ଇନିଃ ମିଆଦ୍ କୁମୁ ନେଲ୍‌କେଦାଏ ଓଡ଼ୋଃ ଇନିୟାଃ ଆତ୍ମା ପୁରାଃଗି ଆକ୍‌ଦାନ୍ଦାଅୟାନ୍‌ ହରାତେ ଇନିଃ ଦୁଡ଼ୁମ୍‌ କାଏ ଦାଡ଼ିୟାନା। 2 ନେଆଁ ଚିଲ୍‌କାନ୍‌ କୁମୁତାନାଃ ଏନା ସାରିନାଙ୍ଗ୍‌ ରାଜା, ପାଞ୍ଜିଖାଡ଼ି ନେନେଲ୍‌ ହଡ଼କକେ, ଦେଅଁଣା, ଯାଦୁଟଣା ଓଡ଼ୋଃ କଲଦିୟ ହଡ଼କକେ ହିଜୁଃନାଙ୍ଗ୍‌ କାଜିକେଦ୍‌କଆଏ। ଇନ୍‌କୁ ହିଜୁଃକେଦ୍‌ତେ ରାଜାରାଃ ଆୟାର୍‌ରେ ତିଙ୍ଗୁୟାନାକ। 3 ଏନ୍ତେ ରାଜା ଇନ୍‌କୁକେ କାଜିୟାଦ୍‌କଆ, "ଆଇଙ୍ଗ୍‌ ମିଆଦ୍ କୁମୁ ନେଲାକାଦାଇଙ୍ଗ୍‌, ଏନା ଆଇଁୟାଃ ଆତ୍ମାକେ ଆକ୍‌ଦାନ୍ଦାଅକେଦା ଓଡ଼ୋଃ ଏନ୍‌ କୁମୁରାଃ ମୁଣ୍ଡି ଚିନାଃ ତାନାଃ, ଏନା ସାରି ନାଗେନ୍ତେଇଙ୍ଗ୍‌ ସାନାଙ୍ଗ୍‌ତାନା।"

4 ଏନ୍ତେ କଲଦିୟକ ଅରାମିୟ ଜାଗାର୍‌ତେ ରାଜାକେ କାଜିକିୟାକ, "ହେ ରାଜା, ଆମ୍‌ ଜାନାଅଗି ତାଇନ୍‌ମେଁ। ଆମାଃ ନେ ଦାସିକକେ କୁମୁତାମାଃ ଉଦୁବାଲେମେ ଓଡ଼ୋଃ ଆଲେ ଏନାରାଃ ମୁଣ୍ଡି କାଜିୟାଲେ।"

5 ରାଜା କଲ୍‌ଦିୟକକେ କାଜିକେଦ୍‌କଆ, "ଆଇଙ୍ଗ୍‌ କାଜି ଚାବାକେଦାଇଙ୍ଗ୍‌ ଓଡ଼ୋଃ ମନ୍‌ରେ ଉହାଟ୍‌କାଦାଇଙ୍ଗ୍‌, ଆପେ ଆଇଁୟାଃ କୁମୁ ଓଡ଼ୋଃ ଏନାରାଃ ମୁଣ୍ଡି କାପେ ଉଦୁବ୍‌ ଦାଡ଼ିରେଦ, ଆପେକେ ଟୁକ୍‌ଡ଼ା ଟୁକ୍‌ଡ଼ା ମାଗଃଆ ଓଡ଼ୋଃ ଆପେୟାଃ ଅଡ଼ାଃ ସାରାଗାଡା ଲେକା ହବାଅଃଆ। 6 ମେନ୍‌ଦ ଆପେ କୁମୁ ଓଡ଼ୋଃ ଏନାରାଃ ମୁଣ୍ଡିପେ ଉଦୁବ୍‌ ଦାଡ଼ିରେଦ, ଆପେ ଆଇଁୟାଃତାଃଏତେ ଦାନ୍‌, ନାଲା ଓଡ଼ୋଃ ପୁରାଃ ମାଇନ୍‌ପେ ନାମେୟା, ଏନାମେନ୍ତେ ଏନ୍ କୁମୁ ଓଡ଼ୋଃ ଏନାରାଃ ମୁଣ୍ଡି ଆଇଁୟାଃତାଃରେ ଉଦୁବେପେ।"

7 ଇନ୍‌କୁ ବାର୍‌ସାତେ କାଜିରୁହାଡ଼୍‌କିୟାକ, "ହେ ରାଜା, କୁମୁତାମାଃ ଉଦୁବାଲେମେ ଆଲେ ଏନାରାଃ ମୁଣ୍ଡିଲେ ଉଦୁବେୟା।"

8 ରାଜା କାଜିରୁହାଡ଼୍‌କେଦ୍‌କଆଏ, "ଆଇଁୟାଃ ମନ୍‌ରେ ଅକ୍‌ନାଃ ଉହାଟ୍‌କାଦାଇଙ୍ଗ୍‌ ଏନା ଆପେ ବୁଗିଲେକାପେ ସାରିତାନା, ଏନାତେ ଆପେ ବିଲାମେତାନା ଏନାଇଙ୍ଗ୍‌ ସାରି ଦାଡ଼ିତାନା। 9 ଆଇଁୟାଃ କୁମୁ କାପେ ଉଦୁବ୍‌ ଦାଡ଼ିରେଦ, ଆପେ ନାଗେନ୍ତେ ମିଆଦ୍‌ଗି ସାଜାଇ ମେନାଃ। ଆପେ ଆଇଙ୍ଗ୍‌କେ ବେଦା ଓଡ଼ୋଃ ହସଡ଼ କାଜିକ କାଜି ନାଗେନ୍ତେ ମନ୍‌ରେ ଉହାଟ୍‌କାଦାପେ, ନେଣ୍ଡା ବାଦ୍‌ଲାଅଃଆ ମେନ୍ତେପେ ପାହାମ୍‌ତାନା। ଏନାମେନ୍ତେ ଆଇଁୟାଃ କୁମୁ ଉଦୁବେପେ, ତାବ୍‌ଦ ଆଇଁୟାଃ କୁମୁରାଃ ମୁଣ୍ଡିପେ ଉଦୁବ୍‌ ଦାଡ଼ିୟା ମେନ୍ତେଇଙ୍ଗ୍‌ ସାରି ଦାଡ଼ିୟା।"

10 କଲ୍‌ଦିୟ ହଡ଼କ ରାଜାକେ କାଜିରୁହାଡ଼୍‌କିୟାକ, "ରାଜା ସାରି ନାଙ୍ଗ୍‌ ସାନାଙ୍ଗ୍‌ତାନ୍‌ ବିଷାଏକେ ଉଦୁବ୍‌ ନାଙ୍ଗ୍‌ ନେ ଅତେରେ ଜେତାଏ ହଡ଼ ବାଙ୍କଆ। ଚିଆଃଚି ଜେତା ରାଜା, ପାଞ୍ଜିଖାଡ଼ି ନେନେଲ୍‌ ହଡ଼କକେ, ଦେଅଁଣା, ଯାଦୁବାଲା ଓଡ଼ୋଃ କଲଦିୟ ହଡ଼କକେ ନେ ଲେକାନ୍‌ କାଜି ଚିଉଲା ହଗି କାକ କୁଲି। 11 ରାଜା ଅକଆଃ କୁଲିତାନାଏ, ଏନା କା କାଜିଦାଡ଼ିୟଃ କାଜିକ ତାନାଃ। ଅକନ୍‌କ ମାସ୍‌ରାଃ ହଡ଼୍‌ମରେ କାକ ତାଇନାଃ, ଏନ୍‌ ମାହାପୁରୁକକେ ବାଗିକେଦ୍‌ତେ ଜେତାଏ ରାଜାରାଃ ଆୟାର୍‌ରେ ଏନ୍‌ କାଜି କାକ ଉଦୁବ୍‌ ଦାଡ଼ିୟା।"

12 ଏନା ନାଗେନ୍ତେ ରାଜା ପୁରାଃଗି ଖିସ୍‌ତେ ପେରେଃୟାନା ଓଡ଼ୋଃ ବାବିଲୋନ୍‌ରେ ତାଇନ୍‌ତାନ୍‌ ସବେନ୍ ପାଣ୍ଡିତ୍‌କକେ ମାଆଃଗଏଃ ନାଙ୍ଗ୍‌ ହୁକୁମ୍‌ ଏମ୍‌କେଦାଏ। 13 ମାଆଃଗଏଃରେୟାଃ ହୁକୁମ୍‌ ଜାରିୟାନ୍‌ ହରାତେ ସବେନ୍‌ ପାଣ୍ଡିତ୍‌କକେ ମାଆଃଗଏଃ ରିକା ଲାଗାତିୟାଁଃ, ଏନାତେ ହଡ଼କ ଦାନିୟେଲ୍‌ ଓଡ଼ୋଃ ଆୟାଃ ଗାତିକକେ ମାଆଃଗଏଃ ନାଙ୍ଗ୍‌ ଦାଣାଁକେଦ୍‌କଆକ।

14 ଇମ୍‌ତା ଶାଅ ସିପାଇକଆଃ ଆଗୁଆଇ ଅରିୟୋକ୍‌କେ, ବାବିଲୋନ୍‌ରେନ୍‌ ପାଣ୍ଡିତ୍‌କକେ ମାଆଃ ଗଗଏଃ ନାଗେନ୍ତେ ହୁକୁମ୍‌ ଏମାକାନ୍‌ ତାଇକେନା। ଦାନିୟେଲ୍‌ ଇନିଃଲଃ ସେଣାଁନ୍‌ତେ ଓଡ଼ୋଃ ଆଟ୍‌କାର୍‌ଉରୁମ୍‌ ଦାଡ଼ି ଲେକା ଜାଗାର୍‌କେଦା। 15 ଦାନିୟେଲ୍‌ ଅରିୟୋକ୍‌କେ କାଜିକିୟା, "ରାଜା ଚିନାଃ ମେନ୍ତେ ନେ'ଲେକା ହୁକୁମ୍‌ ଏମ୍‌କେଦାଏ ?" ଏନ୍ତେ ଅରିୟୋକ୍‌ ଦାନିୟେଲ୍‌କେ ସବେନ୍‌ କାଜି ଉଦୁବ୍‌କିୟା।

16 ଦାନିୟେଲ୍‌ ରାଜାତାଃତେ ସେନଃୟାନା ଓଡ଼ୋଃ ଇନିଃ କୁମୁରାଃ ମୁଣ୍ଡି ଉଦୁବ୍‌ ଦାଡ଼ି ନାଙ୍ଗ୍‌ ଆଡଃମିସା ନେଣ୍ଡା ଆସିକିୟାଏ। 17 ଏନ୍ତେ ଦାନିୟେଲ୍‌ ଅଡ଼ାଃତେ ରୁହାଡ଼୍‌ୟାନା ଓଡ଼ୋଃ ଇନିଃ ଆୟାଃ ଗାତି ହନାନିୟ, ମିଶାୟେଲ୍‌ ଓଡ଼ୋଃ ଅସରିୟକେ ଏନ୍‌ ବିଷାୟରେ ଉଦୁବ୍‌କେଦ୍‌କଆ। 18 ଦାନିୟେଲ୍‌, ବାବିଲୋନ୍‌ରେ ତାଇନ୍‌ତାନ୍‌ ଆଡଃଗି ଏଟାଃ ପାଣ୍ଡିତ୍‌କ ଓଡ଼ୋଃ ଆୟାଃ ସବେନ୍‌ ଗାତିକ ଗନଏଃ ସାଜାଇ ଆଲକାକ ନାମେକା ମେନ୍ତେ ଏନ୍‌ ଉକୁଆକାନ୍‌ ସାର୍‌ତି ବିଷାଏରେ ସିର୍ମାରେନ୍‌ ପାର୍‌ମେଶ୍ୱାର୍‌ତାଃରେ ବିନ୍ତିପେ ମେନ୍ତେ ଇନ୍‌କୁକେ କାଜିକେଦ୍‌କଆ। 19 ଏନ୍‌ ନିଦାରେ ପାର୍‌ମେଶ୍ୱାର୍‌ ଦାର୍‌ଶାନ୍‌ ହରାତେ ଏନ୍‌ ଉକୁଆକାନ୍‌ ସାର୍‌ତି ବିଷାଏକ ଦାନିୟେଲ୍‌ତାଃରେ ଉଦୁବ୍‌କେଦା। ଏନ୍ତେ ଦାନିୟେଲ୍‌ ସିର୍ମାରେନ୍‌ ପାର୍‌ମେଶ୍ୱାର୍‌ଆଃ ମାନାରାଙ୍ଗ୍‌ ରିକାକେଦାଏ।

20 ଓଡ଼ୋଃ ଦାନିୟେଲ୍‌ କାଜିରୁହାଡ଼୍‌କେଦାଏ, "ପାର୍‌ମେଶ୍ୱାର୍‌ଆଃ ନୁତୁମ୍‌ ଜାନାଅ ଜାନାଅ ଧାଇନ୍‌ ହବାଅଃକା।

ଚିୟାଃଚି ସେଣାଁ ଓଡ଼ୋଃ ପେଡ଼େଃ ଆୟାଃଗି ଆକ୍‌ତେୟାର୍‌ରେ ମେନାଃ।

21 ଇନିଃ ନେଣ୍ଡା ଓଡ଼ୋଃ ସାହାକକେ ବାଦ୍‌ଲାଅ ରିକାଃଏ।

ଇନିଃ ରାଜାକକେ ରାଜ୍‌ଗାଦି ଏମଃନିଃ ଓଡ଼ୋଃ ରାଜ୍‌ଗାଦିଏତେ ଆତମ୍‌କନିଃ ତାନିଃ।

ଇନିଃ ସେଣାଁନ୍‌କକେ ସେଣାଁ ଓଡ଼ୋଃ ଆଟ୍‌କାର୍‌ଉରୁମ୍‌ ଦାଡ଼ିରେୟାଃ ପେଡ଼େଃ ଏମଃନିଃ ତାନିଃ।

22 ଇନିଃ ଇକିରାକାନ୍‌ତେୟାଃ ଓଡ଼ୋଃ ଦାନାଙ୍ଗ୍‌କାନ୍‌ତେୟାଃ ଉଦୁବ୍‌ନିଃ ତାନିଃ।

ନୁବାଃରେ ଅକଆଃ ମେନାଃ, ଏନା ଇନିଃ ସାରିୟାଃଏ

ଓଡ଼ୋଃ ଇନିଃତାଃରେ ମାସ୍କାଲ୍‌ ତାଇନଃ ତାନା।

23 ହେ ଆଇଁୟାଃ ପୁର୍‌ଖା ଆପୁକଆଃ ପାର୍‌ମେଶ୍ୱାର୍‌ ଆଇଙ୍ଗ୍‌ ଆମ୍‌କେ ଧାନ୍ୟାବାଦ୍‌ ଓଡ଼ୋଃ ମାନାରାଙ୍ଗ୍‌ ରିକାତାନାଇଙ୍ଗ୍‌

ଚିଆଃଚି ଆମ୍‌ ଆଇଙ୍ଗ୍‌କେ ସେଣାଁ ଓଡ଼ୋଃ ପେଡ଼େଃ ଏମାକାଦିୟାଁମ୍‌।

ଆମ୍‌ ଆଇଁୟାଃ ବିନ୍ତି ଆୟୁମ୍‌କେଦାମ୍‌,

ଓଡ଼ୋଃ ରାଜାତାଃରେ ଉଦୁବ୍‌ତେୟାଃ ଆଲେକେ କାଜିକାଦ୍‌ଲେୟାମ୍‌।"

24 ଏନ୍ତେ ବାବିଲୋନ୍‌ରେନ୍‌ ପାଣ୍ଡିତ୍‌କକେ ଜିୟନ୍‌ ରିକାନାଙ୍ଗ୍‌ ରାଜା ସାଲାକାଇ ଅରିୟୋକ୍‌ତାଃ ଦାନିୟେଲ୍‌ ସେନ୍‌କେଦ୍‌ତେ କାଜିକିୟା, "ବାବିଲୋନ୍‌ରେନ୍‌ ପାଣ୍ଡିତ୍‌କକେ ଆଲମ୍‌ ଗଏଃକଆ। ଆଇଙ୍ଗ୍‌କେ ରାଜାତାଃତେ ଇଦିଙ୍ଗ୍‌ମେ ଓଡ଼ୋଃ ଆଇଙ୍ଗ୍‌ ରାଜାକେ କୁମୁରେୟାଃ ମୁଣ୍ଡି କାଜିୟାଇଙ୍ଗ୍‌।"

25 ଅରିୟୋକ୍‌ କା ବିଲାମ୍‌କେଦ୍‌ତେ ଦାନିୟେଲ୍‌କେ ରାଜାତାଃ ଇଦି ସେଟେର୍‌କେଦ୍‌ତେ କାଜିକିୟା, "ଯିହୁଦା ଦିଶୁମ୍‌ଏତେ ହିଜାକାନ୍‌ ତନଲ୍‌ ଦାସିକଏତେ ମିଆଦ୍‌ ହଡ଼କେଇଙ୍ଗ୍‌ ନାମାକାଇଜା, ଇନିଃ ରାଜା ନେଲାକାଦ୍‌ କୁମୁରାଃ ମୁଣ୍ଡି ଉଦୁବ୍‌ ଦାଡ଼ିୟା।"

26 ରାଜା ଏନ୍‌ ଦାନିୟେଲ୍‌କେ, ଅକେୟାଃ ନୁତୁମ୍‌ ଚି ବେଲ୍‌ଟ୍‌ଶତ୍ସର୍‌ ତାଇକେନା, ଇନିଃକେ କାଜିକିୟା, "ଆଇଙ୍ଗ୍‌ ନେଲାକାଦ୍‌ କୁମୁ ଓଡ଼ୋଃ ଏନାରାଃ ମୁଣ୍ଡିକେ ଆମ୍‌ ଚିନାଃ ଉଦୁବ୍‌ ଦାଡ଼ିୟାମ୍‌ ?"

27 ଦାନିୟେଲ୍‌ କାଜିରୁହାଡ଼୍‌କିୟାଏ, "ହେ ରାଜା ଆମ୍‌ ଅକ ଉକୁଆକାନ୍‌ କାଜିକେ କୁଲିତାନାମ୍‌, ଏନାକେ ଜେତା ପାଞ୍ଜିଖାଡ଼ି ନେନେଲ୍‌ ହଡ଼କ, ଦେଅଁଣା, ଯାଦୁବାଲା ଓଡ଼ୋଃ କଲଦିୟ ହଡ଼କ କାକ ଉଦୁବ୍‌ ଦାଡ଼ିୟା। 28 ମେନ୍‌ଦ ସିର୍ମାରେନ୍‌ ପାର୍‌ମେଶ୍ୱାର୍‌, ଇନିଃ ଏସ୍‌କାର୍‌ ଉକୁଆକାନ୍‌ ସବେନ୍‌ ବିଷାଏକେ ଉଦୁବ୍‌ନିଃ ତାନିଃ। ହିଜୁଃ ଦିପିଲିରେ ଚିନାଃ ହବାଅଃଆ, ଏନ୍‌ ବିଷାଏ ରାଜା ନେବୁଖଦ୍‌ନେଜର୍‌କେ ଉଦୁବାକାନା। ଆମ୍‌ ଗିତିଜାକାନ୍‌ ଇମ୍‌ତା ଅକ କୁମୁ ଓଡ଼ୋଃ ଦାର୍ଶାନ୍‌ ନେଲ୍‌କେଦାମ୍‌, ଏନା ହବାଅଃ ତାନାଃ ନେଆଁ,

29 "ହେ ରାଜା, ଆମ୍‌ ଗିତିଜାକାନ୍‌ ତାଇକେନ୍‌ ଇମ୍‌ତା ହିଜୁଃ ଦିପିଲିରେୟାଃ ବିଷାଏକ ପାହାମ୍‌ ତାଇକେନାମ୍‌ ଓଡ଼ୋଃ ଅକଏ ଉକୁଆକାନ୍‌ ସବେନ୍‌ ବିଷାଏକ ଉଦୁବାଃଏ, ହିଜୁଃ ଦିପିଲିରେ ଚିନାଃ ହବାଅଃଆ, ଏନ୍‌ ବିଷାଏ ଆମ୍‌କେ ଉଦୁବାକାନା। 30 ମେନ୍‌ଦ ଏଟାଃ ଜୀନିଦ୍‌ ହଡ଼ରାଃ ସେଣାଁଏତେ ଆଇଁୟାଃ ସେଣାଁ ଆଦ୍‌କା ମେନାଃ ମେନ୍ତେ ନେ ଉକୁଆକାନ୍‌ ବିଷାଏ ଆଇଙ୍ଗ୍‌ତାଃରେ ଉଦୁବ୍‌କାନା ମେନ୍ତେଦ କାହାଗି, ମେନ୍‌ଦ ହେ ରାଜା, ଆମ୍‌ ଏନ୍‌ କୁମୁରାଃ ମୁଣ୍ଡି ସାରି ଦାଡ଼ିୟାମ୍‌ ଓଡ଼ୋଃ ଆମାଃ ମନ୍‌ରାଃ ଉଡ଼ୁଃରେ ଆଟ୍‌କାର୍‌ଉରୁମ୍‌ ଦାଡ଼ିୟାମ୍‌ ମେନ୍ତେ ନେଆଁ ଆଇଙ୍ଗ୍‌ତାଃରେ ଉଦୁବ୍‌କାନା।

31 "ହେ ରାଜା, ଆମ୍‌ କୁମୁରେ ମିଆଦ୍‌ ମାରାଙ୍ଗ୍‌ ମୁରୁତ୍‌ ଆମାଃ ଆୟାର୍‌ରେ ତିଙ୍ଗୁକାନ୍‌ ନେଲ୍‌କେଦାମ୍‌, ଏନା ପେଡ଼େୟାନ୍‌, ମାସ୍କାଲ୍‌ ଓଡ଼ୋଃ ନେଲଃରେ ବରୱାନ୍‌ଗି ତାଇକେନା। 32 ଏନ୍‌ ମୁରୁତ୍‌ରାଃ ବହଃ ଫାର୍‌ଚି ସୋନାରାଃ, ଆୟାଃ କୁଡ଼ାମ୍‌ ଓଡ଼ୋଃ ସୁପୁ ରୁପାରାଃ, ଲାହିଦ୍‌ ଓଡ଼ୋଃ ବୁଲୁ ପିତ୍ତାଲ୍‌ରାଃ ତାଇକେନା, 33 ଇନିୟାଃ କାଟା ମେଡ଼େଦ୍‌ରାଃ ଓଡ଼ୋଃ କାଟାତାଲ୍‌କାରାଃ ଚିମିନ୍‌ ହିସା ମେଡ଼େଦ୍‌ରାଃ ଓଡ଼ୋଃ ଚିମିନ୍‌ ହିସା ହାଁସାରାଃ ତାଇକେନା। 34 ଆମ୍ ଏନ୍‌ ମୁରୁତ୍‌କେ ନେଲ୍‌ତାନ୍‌ ଇମ୍‌ତାଗି, ମିଆଁଦ୍‌ ମାରାଙ୍ଗ୍‌ ଦିରି ହାଦ୍‌ୟାନ୍‌। ମେନ୍‌ଦ ଏନା ଜେତା ହଡ଼ରାଃ ତିଃଇତେ କା ହାଦାକାନ୍‌ ତାଇକେନା। ଏନା ମୁରୁତ୍‌ରାଃ ମେଡ଼େଦ୍‌ ହିସା ଓଡ଼ୋଃ ହାଁସାରାଃ କାଟାତାଲ୍‌କାରେ ଉୟୁଃୟାନା ଓଡ଼ୋଃ ମୁରୁତ୍‌ ରାପୁଦ୍‌କେଦ୍‌ତେ ଟୁକ୍‌ଡ଼ା ଟୁକ୍‌ଡ଼ାୟାନା। 35 ଏନ୍ତେ ମେଡ଼େଦ୍‌, ହାଁସା, ପିତ୍ତାଲ୍‌, ରୁପା ଓଡ଼ୋଃ ସୋନା ମିସାତେ ସବେନାଃ ଟୁକ୍‌ଡ଼ା ଟୁକ୍‌ଡ଼ାୟାନା। ଓଡ଼ୋଃ ସିତୁଙ୍ଗ୍‌ ସାହାରାଃ କଲମ୍‌ରେ ତାଇକାନ୍‌ ପେଟେଃ ଲେକା ହବାୟାନା ଓଡ଼ୋଃ ହୟ ଏନ୍‌ ସବେନାଃକେ ନେ'ଲେକା ଅଟାଙ୍ଗ୍‌ ଇଦିକେଦାଏ ଯେ, ଏନାରାଃ ଜେତାନ୍‌ ଚିହ୍ନାଁ କା ତାଇନ୍‌ୟାନା। ମେନ୍‌ଦ ମୁରୁତ୍‌ରେ ଅକ ଦିରି ଟୁକ୍‌ଡ଼ା ଉୟୁଃୟାନା, ଏନ୍‌ ଦିରି ମିଆଦ୍‌ ମାରାଙ୍ଗ୍‌ ବୁରୁ ଲେକା ହବାକେଦ୍‌ତେ ଗଟା ଅତେକେ ହାରୁବ୍‌କେଦା।

36 "ନେଆଁ ଆମାଃ କୁମୁ ତାଇକେନା, ନାହାଁଃଦ ରାଜାତାଃରେ ଏନ୍‌ କୁମୁରାଃ ମୁଣ୍ଡି ଉଦୁବଃଆ। 37 ହେ ରାଜା, ଆମ୍‌ ରାଜାକଆଃ ରାଜାତାନ୍‌ମେ। ସିର୍ମାରେନ୍‌ ପାର୍‌ମେଶ୍ୱାର୍‌ ଆମ୍‌କେ ରାଇଜ୍‌, ପେଡ଼େଃ, ଆକ୍‌ତେୟାର୍‌ ଓଡ଼ୋଃ ମାଇନାନ୍‌ ଏମାକାଦ୍‌ମାଏ। 38 ଇନିଃ ହଡ଼କକେ, ଜାଁତୁକକେ, ସିର୍ମା ଲାତାରେ ଆଫିର୍‌ତାନ୍‌ ଅଡ଼େ ଚେଣେଁକକେ ଆମାଃ ତିଃଇରେ ଏମାକାଦ୍‌କଆ। ଏନ୍‌ ସବେନ୍‌କଆଃ ଚେତାନ୍‌ରେ ଆମ୍‌କେ ପୁରା ଆକ୍‌ତେୟାର୍‌ ଏମାକାଦ୍‌ମେୟାଁଏ। ଆମ୍‌ଗି ହବାଅଃତାନାମ୍‌ ଏନ୍‌ ସୋନାରାଃ ବହଃ।" 39 ଆମାଃ ତାୟମ୍‌ତେ ଆମାଃଏତେ ହୁଡିଙ୍ଗ୍‌ ଆଡଃମିଆଦ୍‌ ରାଇଜ୍‌ ବିରିଦାଃ ଓଡ଼ୋଃ ଏନା ତାୟମ୍‌ତେ ଆପିତେୟାଃ ପିତ୍ତାଲ୍‌ରାଃ ରାଇଜ୍‌ ବିରିଦାଃ, ଏନ୍‌ ରାଇଜ୍‌ ଗଟା ଅତେଦିଶୁମ୍‌ ଚେତାନ୍‌ରେ ରାଇଜ୍‌ ରିକାୟା। 40 ଏନ୍ତେ ଉପୁନିୟାତେୟାଃ ମେଡ଼େଦ୍‌ରାଃ ରାଇଜ୍‌ ବିରିଦାଃ, ଏନା ମେଡ଼େଦ୍‌ ଲେକା କେଟେଦ୍‌ଗି ତାଇନାଃ, ଚିୟାଃଚି ମେଡ଼େଦ୍‌ ଚିମିନ୍‌ ଜିନିଷ୍‌କେ ଟୁକ୍‌ଡ଼ା ଟୁକ୍‌ଡ଼ା ରିକାଃଏ, ଏନ୍‌ ଲେକାଗି ନେ ରାଇଜ୍‌ ଟୁକ୍‌ଡ଼ା ଟୁକ୍‌ଡ଼ା ରାପୁଦ୍‌କେଦ୍‌ତେ ଜିୟନ୍‌ ରିକାୟା। 41 ଆଡଃଗି ଆମ୍‌ ନେଲ୍‌କେଦାମ୍‌, କାଟାତାଲ୍‌କା ଓଡ଼ୋଃ ଏନାରାଃ ସାର୍‌ସାର୍‌ ଚିମିନ୍‌ କୁମ୍ଭାର୍‌ଆଃ ହାଁସା ଲେକା ଓଡ଼ୋଃ ଚିମିନ୍‌ ମେଡ଼େଦ୍‌ ଲେକା ତାଇକେନା। ଏନ୍‌ ଲେକାଗି ଏନ୍‌ ରାଇଜ୍‌ ବାର୍‌ ହିସାରେ ହାଟିଙ୍ଗ୍‌କେନଃଆ, ମେନ୍‌ଦ ଏନାରାଃ ମେଡ଼େଦ୍‌ ହିସା କେଟେଦ୍‌ଗି ତାଇନାଃ। ଚିୟାଃଚି ହାଁସାରେ ମେଡ଼େଦ୍‌ ମେସାକେଦ୍‌ତେ ତାଇନ୍‌ତେୟାଃ ନେଲାକାଦ୍‌ ତାଇକେନାମ୍‌। 42 କାଟା ସାର୍‌ସାର୍‌, ଚିମିନ୍‌ ମେଡ଼େଦ୍‌ ଓଡ଼ୋଃ ଚିମିନ୍‌ ହାଁସାରାଃ ତାଇନ୍‌କେନା, ଏନ୍‌ ଲେକାଗି ନେ ରାଇଜ୍‌ରାଃ ମିଦ୍‌ ହିସା କେଟେୟାନ୍‌ ଓଡ଼ୋଃ ମିଦ୍‌ ହିସା ନାରାଦୁରା ହବାଅଃଆ। 43 ଓଡ଼ୋଃ ଆମ୍ ହାଁସାରେ ମେଡ଼େଦ୍‌ ମେସାକାନ୍‌ତେୟାଃ ନେଲ୍‌କେଦାମ୍‌, ଏନ୍‌ଲେକାଗି ଇନ୍‌କୁ ହଡ଼କଆଃ କିଲିକଲଃ ଆକଗି ମେସାନାଃକ, ମେନ୍‌ଦ ମେଡ଼େଦ୍‌ ଓଡ଼ୋଃ ହାଁସା ମିଦ୍‌ରେ ମେସାକେଦ୍‌ତେ କା ତାଇନ୍‌ ଦାଡ଼ିୟଃଆ, ଏନ୍‌ଲେକାଗି ଇନ୍‌କୁ ମିସାତେ ମିଦ୍‌ତାଃରେ କାକ ତାଇନ୍‌ ଦାଡ଼ିୟା। 44 ଏନ୍‌ ରାଜାକଆଃ ଦିପିଲିରେ ସିର୍ମାରେନ୍‌ ପାର୍‌ମେଶ୍ୱାର୍‌ ମିଆଦ୍‌ ରାଇଜ୍‌ ବାଇୟାଏ, ଏନା ଚିଉଲାଅ କା ଜିୟନଃଆ, ଚାଏ ଏନ୍‌ ରାଇଜ୍‌ରାଃ ଆକ୍‌ତେୟାର୍‌ନିଃ ଏଟାଃ କିଲିକଆଃ ତିଃଇରେ କାଏ ଜିମାଏୟା। ମେନ୍‌ଦ ଏନ୍‌ ରାଇଜ୍‌ ଏଟାଃ ରାଇଜ୍‌କକେ ଟୁକ୍‌ଡ଼ା ଟୁକ୍‌ଡ଼ାକେଦ୍‌ତେ ଓଡ଼ୋଃ ଜିୟନ୍‌କେଦ୍‌ତେ ଏନା ଆପାନ୍‌ତେଗି ମିଆଦ୍‌ ଜାନାଅ ଜାନାଅରାଃ ହବାଅଃଆ। 45 ଚିୟାଃଚି ନେଆଁଗି ହବାଅଃତାନା ଆମ୍‌ କୁମୁ ନେଲ୍‌ଲେଦ୍‌ ଟୁକ୍‌ଡ଼ା ଦିରିରାଃ ମୁଣ୍ଡି, ଅକଆଃଚି ହଡ଼ରାଃ ତିଃଇତେ କା ହାଦାକାନ୍‌ ଦିରି ବୁରୁଏତେ ଉୟୁଃୟାନା ଓଡ଼ୋଃ ଏନ୍‌ ମେଡ଼େଦ୍‌, ପିତ୍ତାଲ୍‌, ହାଁସା, ରୁପା ଓଡ଼ୋଃ ସୋନାକେ ରାପୁଦ୍‌କେଦ୍‌ତେ ଜିୟନ୍‌କେଦା। "ହିଜୁଃ ଦିପିଲିରେ ଚିନାଃ ହବାଅଃଆ, ଏନାକେ ପେଡ଼େୟାନ୍‌ ପାର୍‌ମେଶ୍ୱାର୍‌, ମାଇନାନ୍‌ ରାଜାକେ ଉଦୁବ୍‌କାଇଜା, ଓଡ଼ୋଃ ନେ କୁମୁ ସାର୍‌ତିଗି ଓଡ଼ୋଃ ନେ କୁମୁରାଃ ମୁଣ୍ଡି ପାତିୟାର୍‌ରେ ଲେକାନାଃ ତାନାଃ।"

46 ଏନ୍ତେ ରାଜା ନେବୁଖଦ୍‌ନେଜର୍‌ ଦାନିୟେଲ୍‌କେ ଅମ୍ବାକେଦ୍‌ତେ ଜହାର୍‌କିୟା। ହଡ଼କ ଦାନିୟେଲ୍‌କେ ମାଇନ୍‌କେଦ୍‌ତେ ଆୟାଃ ନୁତୁମ୍‌ରେ ଦାଣେଁ ଓଡ଼ୋଃ ବୁଗିନ୍‌ସହାନ୍‌ ଧୁଆନ୍‌ ରାକାବେକାକ ମେନ୍ତେ ଆଚୁକେଦ୍‌କଆ। 47 ରାଜା, ଦାନିୟେଲ୍‌କେ କାଜିକିୟା, "ସାର୍‌ତିଗି ଆମାଃ ପାର୍‌ମେଶ୍ୱାର୍‌ ମାହାପୁରୁକଆଃ ପାର୍‌ମେଶ୍ୱାର୍‌ ତାନିଃ, ରାଜାକଆଃ ପ୍ରାଭୁ ଓଡ଼ୋଃ ଉକୁଆକାନ୍‌ ବିଷାଏକକେ ଉଦୁବ୍‌ନିଃ ତାନିଃ। ଚିୟାଃଚି ଆମ୍‌ ନେ ଉକୁଆକାନ୍‌ କାଜିକେ ଉଦୁବ୍‌ ଦାଡ଼ିକେଦାମ୍‌।" 48 ଏନ୍ତେ ରାଜା, ଦାନିୟେଲ୍‌କେ ମାରାଙ୍ଗ୍‌ ଠାୟାଦ୍‌ ଏମ୍‌କିୟାଏ ଓଡ଼ୋଃ ପୁରାଃ ଗନଙ୍ଗ୍‌ଆଁନ୍‌ ଜିନିଷ୍‌କ ଏମ୍‌କିୟାଏ। ଇନିଃ ଦାନିୟେଲ୍‌କେ ଗଟା ବାବିଲୋନ୍‌ ପାର୍‌ଗାନ୍‌ରେୟାଃ ଲାଟ୍‌ସାହେବ୍‌ ବାଇକିୟାଏ ଓଡ଼ୋଃ ବାବିଲୋନ୍‌ରେନ୍‌ ସବେନ୍‌ ପାଣ୍ଡିତ୍‌କଆଃ ଚେତାନ୍‌ରେ ହୁକୁମ୍‌ ଏମ୍‌ନିଃ ଲେକାଏ ସାଲାକିୟା। 49 ଦାନିୟେଲ୍‌ ରାଜାକେ କାଜିଗହାର୍‌କିଃ ହରାତେ, ରାଜା, ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋକେ ବାବିଲୋନ୍‌ ପାର୍‌ଗାନ୍‌ରେ କାମିନାଙ୍ଗ୍‌ ଦହକେଦ୍‌କଆଏ। ମେନ୍‌ଦ ଦାନିୟେଲ୍‌ ରାଜ୍‌ମାହାଲ୍‌ରେ ତାଇନ୍‌ୟାନା।