1 ରାଜା ନେବୁଖଦ୍‌ନେଜର୍‌ ଅତେଦିଶୁମ୍‌ରେନ୍‌ ସବେନ୍‌ କିଲିକତାଃ, ସବେନ୍‌ ହଡ଼କତାଃ ଓଡ଼ୋଃ ରାକାମ୍‌ ରାକାମ୍‌ ଜାଗାର୍‌ତାନ୍ ହଡ଼କତାଃ ଆୟାଃ କାନାଜି କାଜିକୁଲଃତାନା,

ଆପେୟାଃ ପୁରାଃଗି ଜୀଉସୁକୁ ହବାଅଃକା। 2 ସବେନାଃତେ ପେଡ଼େୟାନ୍‌ ପାର୍‌ମେଶ୍ୱାର୍‌ ଆଇଁୟାଃତାଃରେ ଅକ ଚିହ୍ନାଁ ଓଡ଼ୋଃ ଆକ୍‌ଦାନ୍ଦାଅ କାମିକ ଉଦୁବାକାଦାଏ, ଏନ୍‌ ସବେନାଃ ଆପେତାଃରେ ଉଦୁବ୍‌ ନାଗେନ୍ତେ ସାନାଙ୍ଗ୍‌ ତାନାଇଙ୍ଗ୍‌।

3 ପାର୍‌ମେଶ୍ୱାର୍‌ଆଃ ଚିହ୍ନାଁକ ଚିମିନ୍‌ ମାପ୍‌ରାଙ୍ଗ୍‌ଆଃ

ଓଡ଼ୋଃ ଆୟାଃ ଆକ୍‌ଦାନ୍ଦାଅ କାମିକ ଚିମିନ୍‌ ପେଡ଼େୟାନ୍‌ଗିୟା

ଓଡ଼ୋଃ ଆୟାଃ ରାଇଜ୍‌ ଜାନାଅ ଜାନାଅରେୟାଃ ତାନାଃ, ଆୟାଃ ଆକ୍‌ତେୟାର୍‌ ପିଢ଼ି ପିଢ଼ି ଜାକେଦ୍‌ ତାଇନାଃ।

4 ଆଇଙ୍ଗ୍‌ ନେବୁଖଦ୍‌ନେଜର୍‌, ଆଇଁୟାଃ ଅଡ଼ାଃ ଓଡ଼ୋଃ ରାଜ୍‌ମାହାଲ୍‌ରେ ଜୀଉସୁକୁତେ ରାସ୍‌କାରେ ତାଇକେନାଇଙ୍ଗ୍‌। 5 ଆଇଙ୍ଗ୍‌ ଗିତିଜାକାନ୍‌ ଇମ୍‌ତା ମିଆଁଦ୍ କୁମୁ ନେଲ୍‌କେଦାଇଙ୍ଗ୍‌, ଏନା ନେଲ୍‌କେଦ୍‌ତେ ବରକେଦାଇଙ୍ଗ୍‌। ଆଇଁୟାଃ ଉଡ଼ୁଃ ଓଡ଼ୋଃ ମନ୍‌ରାଃ ଦାର୍‌ଶାନ୍‌ ଆଇଙ୍ଗ୍‌କେ ବରତେ ଆକ୍‌ଚାକାଅ କେଦିୟାଁ। 6 ଏନାତେ କୁମୁରାଃ ମୁଣ୍ଡି ଆଇଙ୍ଗ୍‌କେ ଉଦୁବ୍‌ ନାଗେନ୍ତେ ଆଇଙ୍ଗ୍‌ ବାବିଲୋନ୍‌ରେନ୍‌ ସବେନ୍‌ ପାଣ୍ଡିତ୍‌କକେ ଆଇଁୟାଃତାଃ ଆଉକ ନାଙ୍ଗ୍‌ ହୁକୁମ୍‌ ଏମ୍‌କେଦାଇଙ୍ଗ୍‌। 7 ଏନ୍ତେ ସବେନ୍‌ ପାଞ୍ଜିଖାଡ଼ି ନେଲ୍‌ତାନ୍‌କ, ଯାଦୁବାଲାକ, ଦେଅଁଣାକ ଓଡ଼ୋଃ କଲ୍‌ଦିୟ ହଡ଼କ ଆଇଙ୍ଗ୍‌ତାଃତେକ ହିଜୁଃୟାନା। ଇନ୍‌କୁକେ ଆଇଁୟାଃ କୁମୁ ଉଦୁବାଦ୍‌କଆଇଙ୍ଗ୍‌, ମେନ୍‌ଦ ଏନାରାଃ ମୁଣ୍ଡି ଜେତାଏ କାକ କାଜି ଦାଡ଼ିୟାନା। 8 ଏନ୍ତେ ଟୁଣ୍ଡୁରେ ଆଇଁୟାଃ ମାହାପୁରୁରାଃ ନୁତୁମ୍‌ ଲେକାତେ ବେଲ୍‌ଟ୍‌ଶତ୍ସର୍‌ ନୁତୁମାକାନ୍‌ ଦାନିୟେଲ୍‌ ଆଇଁୟାଃତାଃ ହିଜୁଃୟାନାଏ। ଇନିୟାଃ ମନ୍‌ସୁରୁଦ୍‌ରେ ପାବିତାର୍‌ ପାର୍‌ମେଶ୍ୱାର୍‌ଆଃ ଆତ୍ମା ମେନାଇୟା, ଏନାତେ ଆଇଙ୍ଗ୍‌ କୁମୁ ନେଲାକାଦ୍‌ତେୟାଃ ଉଦୁବ୍‌କେଦ୍‌ତେ କାଜିକିୟାଇଙ୍ଗ୍‌, 9 ହେ ପାଞ୍ଜିଖାଡ଼ି ନେଲ୍‌ତାନ୍‌କଆଃ ଗମ୍‌କେ ବେଲ୍‌ଟ୍‌ଶତ୍ସର୍‌, ଆଇଙ୍ଗ୍‌ ସାରିତାନାଇଙ୍ଗ୍‌, ଆମାଃତାଃରେ ପାବିତାର୍‌ ପାର୍‌ମେଶ୍ୱାର୍‌ଆଃ ଆତ୍ମା ମେନାଇୟା ଓଡ଼ୋଃ ସବେନ୍‌ ଉକୁଆକାନ୍‌ କାଜିରାଃ ମୁଣ୍ଡି ଉଦୁବ୍‌ ଦାଡ଼ିନିଃ ତାନ୍‌ମେ। ଏନାମେନ୍ତେ ଆଇଙ୍ଗ୍‌ ଅକ କୁମୁ ନେଲାକାଦାଇଙ୍ଗ୍‌ ଏନା ଓଡ଼ୋଃ ଏନାରାଃ ମୁଣ୍ଡି ଉଦୁବାଇଙ୍ଗ୍‌ମେଁ।

10 ଆଇଁୟାଃ କୁମୁ ନେ'ଲେକା ତାଇକେନା, ଆଇଙ୍ଗ୍‌ ଗିତିଜାକାନ୍‌ ତାଇକେନାଇଙ୍ଗ୍‌ ଇମ୍‌ତା ଅତେଦିଶୁମ୍‌ରେୟାଃ ଥାଲାରେ ମିଆଁଦ୍‌ ମାରାଙ୍ଗ୍‌ ଦାରୁ ଓଡ଼ୋଃ ଏନା ପୁରାଃଗି ସାଲାଙ୍ଗି ତାଇକେନା। 11 ଏନା ହାରାୟାନ୍‌ଲଃ ପୁରାଃଗି ମାରାଙ୍ଗ୍‌ ହବାକେଦ୍‌ତେ ଏନାରାଃ ସାଲାଙ୍ଗି ସିର୍ମା ଜାକେଦ୍‌ ସେଟେର୍‌ୟାନା ଓଡ଼ୋଃ ଅତେଦିଶୁମ୍‌ରେୟାଃ ଗଟାସାଃରେ ନେଲ୍‌ୟାନା। 12 ଏନାରେୟାଃ ସାକାମ୍‌କ ସୁଗାଡ଼ାନ୍‌ଗି ଓଡ଼ୋଃ ଜ'କ ପୁରାଃଗି ତାଇକେନା। ଏନାରେୟାଃ ଜ' ସବେନ୍‌କ ଜମ୍‌ ତାଇକେନା। ଏନ୍‌ ଦାରୁରାଃ ଉମ୍ବୁଲ୍‌ରେ ବିର୍‌ରେନ୍‌ ଜାଁତୁକ ରୁଡ଼ୁନ୍‌ ତାଇକେନା, ଚେଣେଁକ ଏନ୍‌ ଦାରୁରାଃ କତରେ ଥକା ବାଇକେଦାକ ଓଡ଼ୋଃ ସବେନ୍‌ ଜୀନିଦ୍‌ ଜାଁତୁକ ଏନାରାଃ ଜ' ଜମ୍‌କେଦାକ।

13 "ଆଇଙ୍ଗ୍‌ ଗିତିଜ୍‌କେଦ୍‌ତେ କୁମୁ ନେଲ୍‌ ତାଇକେନ୍‌ ଇମ୍‌ତା, ଦାର୍‌ଶାନ୍‌ରେ ମିଆଁଦ୍‌ ଦୁଁତ୍‌ ଓଡ଼ୋଃ ପାବିତାର୍‌ ମାନୱାକେ ସିର୍ମାଏତେ ଆଡ଼୍‌ଗୁନ୍‌ତାନ୍‌ ନେଲ୍‌କିୟାଇଙ୍ଗ୍‌। 14 ଇନିଃ କାଉରିକେଦ୍‌ତେ କାଜିକେଦାଏ, ନେ ଦାରୁକେ ମାଆଃ ବାଟିତାପେ, ସବେନ୍‌ କତକକେ ମାଆଃ ଖାଣ୍ଡାଅ ତାପେ, ସବେନ୍‌ ସାକାମ୍‌ କଟାକେଦ୍‌ତେ ଉୟୁଃତାପେ ଓଡ଼ୋଃ ଏନାରାଃ ସବେନ୍‌ ଜ' ଛିତିବିତି ତାପେ। ଏନ୍‌ ଦାରୁ ଉମ୍ବୁଲ୍‌ରେନ୍‌ ଜାଁତୁକ ଓଡ଼ୋଃ ଏନାରାଃ କତରେନ୍‌ ଚେଣେଁକ ନିର୍‌କାକ। 15 ମେନ୍‌ଦ ଅତେରେ ଏନ୍‌ ଦାରୁରାଃ ବୁଟା ଓଡ଼ୋଃ ରେହେଦ୍‌ ସବେନାଃ ମେଡ଼େଦ୍‌, ପିତ୍ତାଲ୍‌ରାଃ ସିକିଡ଼ିତେ ତଲ୍‌କେଦ୍‌ତେ ପିଡ଼ିରେୟାଃ ତାସାଦ୍‌ ଥାଲାରେ ତାଇନଃକା।

"ଏନା ରିମିଲ୍‌ରାଃ ଅସ୍‌ଦାଆଃରେ ତାଇନ୍‌କା ଓଡ଼ୋଃ ଜାଁତୁକଲଃ ପିଡ଼ିରେୟାଃ ତାସାଦ୍‌ ଥାଲାରେ ଜୀହୁଦଃକା। 16 ଇନିୟାଃ ମାନୱା ମନ୍‌ ବାଦ୍‌ଲାଅଃକା ଓଡ଼ୋଃ ଇନିଃକେ ଜାଁତୁରାଃ ମନ୍‌ ଏମଃକା, ନେ'ଲେକା ଇନିୟାଃ ନାଙ୍ଗ୍‌ ଏୟା ବାରାଷ୍‌ ଜାକେଦ୍‌ ହବାଅଃକା। 17 ଦୁଁତ୍‌କଆଃ ହରାତେ ନେ କାଜି କାଜିୟଃତାନା ଓଡ଼ୋଃ ପାବିତାର୍‌ ହଡ଼କ ନେ କାଜିକେ ଉଦୁବେତାନାକ। ନେଆଁ ହରାତେ ଜୀନିଦ୍‌ ହଡ଼କ ସାରି ଦାଡ଼ିୟାଃକ ଯେ, ହଡ଼କ ରାଇଜ୍‌ତାନ୍‌ ଚେତାନ୍‌ରେ ସବେନାଃଏତେ ପେଡ଼େୟାନ୍‌ନିଃ ଆକ୍‌ତେୟାର୍‌ ରିକାଃଏ ଓଡ଼ୋଃ ଅକଏକେ ସାନାଙ୍ଗ୍‌ଆଃଏ, ଇନିଃକେ ରାଇଜ୍‌ ନାଗେନ୍ତେ ଏମାଃଏ ଓଡ଼ୋଃ ଲେବେଃମନ୍‌ ହଡ଼କେ ରାଇଜ୍‌ ଚାଲାଅ ନାଙ୍ଗ୍‌ ସାଲାଃଏ।

18 "ଆଇଙ୍ଗ୍‌ ରାଜା ନେବୁଖଦ୍‌ନେଜର୍‌, ନେ କୁମୁ ନେଲ୍‌କାଦାଇଙ୍ଗ୍‌, ହେ ବେଲ୍‌ଟ୍‌ଶତ୍ସର୍‌, ନାହାଁଃଦ ଆମ୍‌ ନେଆଁରାଃ ମୁଣ୍ଡି ଉଦୁବାଇଙ୍ଗ୍‌ମେଁ। ଚିୟାଃଚି ଆଇଁୟାଃ ରାଇଜ୍‌ରେନ୍‌ ଜେତାନ୍‌ ପାଣ୍ଡିତ୍‌କ ନେ କୁମୁରେୟାଃ ମୁଣ୍ଡି କାକ ଉଦୁବ୍‌ ଦାଡ଼ିକେଦା, ମେନ୍‌ଦ ଆମ୍‌ ଉଦୁବ୍‌ ଦାଡ଼ିୟାମ୍‌, ଚିୟାଃଚି ଆମାଃତାଃରେ ପାବିତାର୍‌ ପାର୍‌ମେଶ୍ୱାର୍‌ଆଃ ଆତ୍ମା ତାଇନ୍‌ ତାନାଏ।"

19 ଏନ୍ତେ ବେଲ୍‌ଟ୍‌ଶତ୍ସର୍‌ ନୁତୁମାକାନ୍‌ ଦାନିୟେଲ୍‌ ଘାଡ଼ିକାଦ୍‌ ନାଗେନ୍ତେ ଆକ୍‌ଚାକାଅୟାନା ଓଡ଼ୋଃ ଆୟାଃ ଉଡ଼ୁଃ ଆଇଃକ୍‌କେଗି ଆକ୍‌ଦାନ୍ଦାଅକିୟା। ଏନାତେ ରାଜା କାଜିକିୟା, "ହେ ବେଲ୍‌ଟ୍‌ଶତ୍ସର୍‌, ଏନ୍‌ କୁମୁ ଚାଏ କୁମୁରାଃ ମୁଣ୍ଡି ଆମ୍‌କେ ଆଲକାଏ ଆକ୍‌ଦାନ୍ଦାଅମେକା।"

ବେଲ୍‌ଟ୍‌ଶତ୍ସର୍‌ ରାଜାକେ କାଜିରୁହାଡ଼୍‌କିୟା, "ହେ ଆଇଁୟାଃ ଗମ୍‌କେ, ନେ କୁମୁ ଆମାଃ ବାଇରିକ ନାଗେନ୍ତେ ଓଡ଼ୋଃ ନେଆଁରାଃ ମୁଣ୍ଡି ଆମ୍‌କେ ହିସିଙ୍ଗା ରିକାତାନ୍‌ ହଡ଼କ ନାଗେନ୍ତେ ହବାଅଃକା।" 20 ଆମ୍‌ ଅକ ଦାରୁ କୁମୁରେ ନେଲ୍‌ଲେଦାମ୍‌, ଏନା ହାରାୟାନ୍‌ଲଃ ପୁରାଃଗି ମାରାଙ୍ଗ୍‌ ହବାକେଦ୍‌ତେ ଏନାରାଃ ସାଲାଙ୍ଗି, ରିମିଲ୍‌ ଜାକେଦ୍‌ ସେଟେର୍‌ୟାନା ଓଡ଼ୋଃ ଅତେଦିଶୁମ୍‌ରେୟାଃ ଗଟାସାଃରେ ନେଲ୍‌ୟାନା। 21 ଏନାରେୟାଃ ସାକାମ୍‌କ ସୁଗାଡ଼ାନ୍‌ଗି ଓଡ଼ୋଃ ଜ'କ ପୁରାଃଗି ତାଇକେନା। ଏନାରେୟାଃ ଜ' ସବେନ୍‌କ ଜମ୍‌ ତାଇକେନା। ଏନ୍‌ ଦାରୁରାଃ ଉମ୍ବୁଲ୍‌ରେ ବିର୍‌ରେନ୍‌ ଜାଁତୁକ ରୁଡ଼ୁନ୍‌ ତାଇକେନା, ଚେଣେଁକ ଏନ୍‌ ଦାରୁରାଃ କତରେ ଥକା ବାଇକେଦାକ ଓଡ଼ୋଃ ସବେନ୍‌ ଜୀନିଦ୍‌ ଜାଁତୁକ ଏନାରାଃ ଜ' ଜମ୍‌କେଦାକ।

22 ହେ ଗମ୍‌କେ, ଏନ୍‌ ଦାରୁ ଆମ୍‌ଗି ତାନ୍‌ମେ, ଆମ୍‌ ମାରାଙ୍ଗ୍‌ ଓଡ଼ୋଃ ପେଡ଼େୟାନ୍‌ଗି ହବାକାନାମ୍‌, ଚିଆଃଚି ଆମାଃ ମାଇନାନ୍‌ ଚାରିଓସାଃରେ ପାସ୍‌ରାଅକେଦ୍‌ତେ ରିମିଲ୍‌ ଜୁଟିଦ୍‌ତାନାଏ ଓଡ଼ୋଃ ଆମାଃ ଆକ୍‌ତେୟାର୍‌ ଗଟା ଅତେଦିଶୁମ୍‌ରେ ପାସ୍‌ରାଅକାନା। 23 ହେ ରାଜା, ଆମ୍‌ ଆମାଃ କୁମୁରେ ନେଲ୍‌କାଦାମ୍‌ ଯେ, ମିଆଁଦ୍‌ ଦୁଁତ୍‌ ଓଡ଼ୋଃ ମିଆଁଦ୍‌ ପାବିତାର୍‌ ହଡ଼, ସିର୍ମାଏତେ ଆଡ଼୍‌ଗୁୟାନ୍‌ଲଃ କାଜିକେଦାଏ, "ନେ ଦାରୁକେ ମାଆଃକେଦ୍‌ତେ ଜିୟନ୍‌ତାପେ, ମେନ୍‌ଦ ଏନାରାଃ ବୁଟା ଏନ୍ତେ ସବେନ୍‌ ରେହେଦ୍‌କେ ମେଡ଼େଦ୍‌ ଓଡ଼ୋଃ ପିତ୍ତାଲ୍‌ତେ ବାଇୟାକାନ୍‌ ସିକ୍‌ଡ଼ିଲଃ ତଲ୍‌କେଦ୍‌ତେ ପିଡ଼ିରେୟାଃ ତାସାଦ୍‌ ଥାଲାରେ ତାଇନ୍‌କା ଓଡ଼ୋଃ ଏନା ରିମିଲ୍‌ରାଃ ଅସ୍‌ଦାଆଃରେ ତାଇନ୍‌କା ଓଡ଼ୋଃ ଏୟା ବାରାଷ୍‌ ହବାଅଃ ଜାକେଦ୍‌ ଇନିଃ ଜାଁତୁକଲଃ ଜୀହିଦ୍‌ଗି ତାଇନ୍‌କା।

24 "ହେ ରାଜା, ଏନାରାଃ ମୁଣ୍ଡିଦ ନେଆଁତାନାଃ, ଆଇଁୟାଃ ଗମ୍‌କେ ବିରୁଧ୍‌ରେ ସବେନାଃତେ ପେଡ଼େୟାନ୍‌ନିଃ ଅକଆଃ ସାଲାକାଦାଏ, ଏନା ନେଆଁ ହବାଅଃଆ; 25 ଆମ୍‌ ହଡ଼କତାଃଏତେ ସାଙ୍ଗିନଃଆମ୍‌ ଓଡ଼ୋଃ ବିର୍‌ରେ ଜାଁତୁକଲଃ ତାଇନାମ୍‌, ଆମ୍‌ ଉରିକ୍‌ ଲେକା ତାସାଦ୍‌ ଜମେୟାଃ ଓଡ଼ୋଃ ରିମିଲ୍‌ରାଃ ଅସ୍‌ଦାଆଃ ଆମାଃ ଚେତାନ୍‌ରେ ଉୟୁଗଃଆ। ନେ'ଲେକା ଏୟା ବାରାଷ୍‌ ସେନଃଆ। ଟୁଣ୍ଡୁରେ ଆମ୍‌ ମାନାତିଙ୍ଗ୍‌ ରିକାୟାମ୍‌ ଯେ, ସବେନାଃତେ ପେଡ଼େୟାନ୍‌ନିଃ ହଡ଼କଆଃ ରାଇଜ୍‌ତାନ୍‌ ଚେତାନ୍‌ରେ ଆକ୍‌ତେୟାର୍‌ ରିକାଃଏ ଓଡ଼ୋଃ ଆଇଃକ୍‌ ଅକଏକେ ସାନାଙ୍ଗ୍‌ଆଃଏ ଇନିଃକେ ରାଇଜ୍ ନାଙ୍ଗ୍‌ ଏମାଃଏ। 26 ଆଡଃଗି ଦାରୁରାଃ ବୁଟା ଓଡ଼ୋଃ ରେହେଦ୍‌କେ ବାଗିରେୟାଃ ବିଷାଏରେ, ଅକ ହୁକୁମ୍ ଏମ୍‌ୟାନା, ଏନାରାଃ ମୁଣ୍ଡି ହବାଅଃତାନା, ପାର୍‌ମେଶ୍ୱାର୍‌ ଗଟା ଅତେଦିଶୁମ୍‌କେ ରାଇଜ୍‌ ରିକାଃଏ ମେନ୍ତେ ଆମ୍‌ ମାନାତିଙ୍ଗ୍‌ ରିକାୟାମ୍‌ ଇମ୍‌ତା, ଆମାଃ ରାଇଜ୍‌ ଆମ୍‌କେ ଏମ୍‌ରୁହାଡ଼ଃଆ। 27 ଏନାମେନ୍ତେ ହେ ରାଜା, ଆଇଁୟାଃ ଉଦୁବାକାନ୍‌ କାଜିକେ ଆମ୍‌ ମାନାତିଙ୍ଗ୍‌ ରିକାଏମେ ଓଡ଼ୋଃ ଆମ୍‌ ପାପ୍ କାମିକେ ବାଗିକେଦ୍‌ତେ ବୁଗିନ୍‌ କାମି ରିକାଏମେ ଓଡ଼ୋଃ ନାରାଦୁରା ହଡ଼କଆଃ ଚେତାନ୍‌ରେ ଦାୟା ରିକାକେଦ୍‌ତେ କା ଧାର୍‌ମାନ୍‌ ବିଷାଏକ ବାଗି'ମେ। ତାବ୍‌ଦ ଆମ୍‌ ହବାସାକାଃଅ ଆମାଃ ରାଇଜ୍‌ ବୁଗିଲେକାମ୍‌ ଚାଲାଅ ଇଦି ଦାଡ଼ିୟା।"

28 ରାଜା ନେବୁଖଦ୍‌ନେଜର୍‌ ଚେତାନ୍‌ରେ ନେ ସବେନାଃ ହବାୟାନା। 29 ଗେଲ୍‌ବାର୍‌ ମାହିନା ତାୟମ୍‌ତେ ରାଜା ବାବିଲୋନ୍‌ ରାଜ୍‌ମାହାଲ୍‌ରାଃ ଛାତ୍‌ ଚେତାନ୍‌ରେ ହନର୍‌ ତାଇକେନା। 30 ଇନିଃ କାଜିକେଦାଏ, "ଆଇଙ୍ଗ୍‌ ଆଇଁୟାଃ ପେଡ଼େଃ ହରାତେ ଆଇଁୟାଃ ମାଇନାନ୍‌ ରିକାନାଙ୍ଗ୍‌ ରାଜ୍‌ଧାନୀ ଲେକା ଅକ୍‌ନାଃ ବାଇୟାକାଦାଇଙ୍ଗ୍‌, ଏନା ଚିନାଃ ଏନ୍‌ ମାରାଙ୍ଗ୍‌ ନାଗାର୍‌ ବାବିଲୋନ୍‌ ନାହାଁଲାଃ ?"

31 ଆୟାଃ ମଚାଏତେ କାଜି ଆଉରି ଚାବାଏ ସିଦାରେ ସିର୍ମାଏତେ ମିଆଁଦ୍ ଲାବ୍‌ଜା ହିଜୁଃୟାନା, "ହେ ରାଜା ନେବୁଖଦ୍‌ନେଜର୍‌, ଆମ୍‌କେ ନେ କାଜି କାଜିୟାକାନା, ଆମାଃତାଃଏତେ ଆମାଃ ରାଇଜ୍‌ ଇଦିୟାନା। 32 ଆମ୍‌ ହଡ଼କତାଃଏତେ ସାଙ୍ଗିନଃଆମ୍‌ ଓଡ଼ୋଃ ବିର୍‌ରେ ଜାଁତୁକଲଃ ତାଇନାମ୍‌, ଆମ୍‌ ଉରିକ୍‌ ଲେକା ତାସାଦ୍‌ ଜମେୟାଁମ୍‌। ନେ'ଲେକା ଏୟା ବାରାଷ୍‌ ସେନଃଆ। ଟୁଣ୍ଡୁରେ ଆମ୍‌ ମାନାତିଙ୍ଗ୍‌ ରିକାୟାମ୍‌ ଯେ, ସବେନାଃତେ ପେଡ଼େୟାନ୍‌ନିଃ ହଡ଼କଆଃ ରାଇଜ୍‌ତାନ୍‌ ଚେତାନ୍‌ରେ ଆକ୍‌ତେୟାର୍‌ ରିକାଃଏ ଓଡ଼ୋଃ ଆଇଃକ୍‌ ଅକଏକେ ସାନାଙ୍ଗ୍‌ଆଃଏ ଇନିଃକେ ରାଇଜ୍ ନାଗେନ୍ତେ ଏମାଃଏ।"

33 ଇମ୍‌ତାଗି ରାଜା ନେବୁଖଦ୍‌ନେଜର୍‌ ଚେତାନ୍‌ରେ କାଜିକାନ୍‌ ଆୟାର୍‌କାଜି ପୁରାୟାନା। ଇନିଃ ହଡ଼କତାଃଏତେ ସାଙ୍ଗିନ୍‌ୟାନା ଓଡ଼ୋଃ ଉରିକ୍‌ ଲେକା ତାସାଦ୍‌ ଜମ୍‌କେଦାଏ। ଆୟାଃ ହଡ଼୍‌ମରେ ରିମିଲ୍‌ରାଃ ଅସ୍‌ଦାଆଃ ଉୟୁଃୟାନା, ଟୁଣ୍ଡୁରେ ଆୟାଃ ଉବ୍‌ ବାଜ୍‌ ଚେଣେଁରାଃ ଉବ୍‌ ଲେକା ଓଡ଼ୋଃ ରାମା, ଚେଣେଁରାଃ ରାମା ଲେକା ହାରାୟାନା।

34 ଏୟା ବାରାଷ୍‌ ପୁରାୟାନ୍‌ ତାୟମ୍‌ତେ, ଆଇଙ୍ଗ୍‌ ନେବୁଖଦ୍‌ନେଜର୍‌ ସିର୍ମାସାଃତେ ସାଙ୍ଗିଲ୍‌କେଦାଇଙ୍ଗ୍‌ ଓଡ଼ୋଃ ଆଇଁୟାଃ ମନ୍‌ରେୟାଃ ସେଣାଁ ଆଇଁୟାଃତାଃତେ ହିଜୁଃ ରୁହାଡ଼୍‌ୟାନା। ଏନ୍ତେ ଆଇଙ୍ଗ୍‌ ସବେନାଃତେ ପେଡ଼େୟାନ୍‌ନିଃକେ ଧାନ୍ୟାବାଦ୍‌ ଏମ୍‌କିୟାଇଙ୍ଗ୍‌ ଓଡ଼ୋଃ ଜାନାଅ ଜାନାଅନିୟାଃ, ମାଇନାନ୍‌ ଓଡ଼ୋଃ ମାନାରାଙ୍ଗ୍‌ ରିକାକିୟାଇଙ୍ଗ୍‌,

ଚିଆଃଚି ଆୟାଃ ଆକ୍‌ତେୟାର୍‌ ଜାନାଅ ଜାନାଅ ତାନାଃ

ଓଡ଼ୋଃ ଆୟାଃ ରାଇଜ୍‌ ପିଢ଼ି ପିଢ଼ି ଜାକେଦ୍‌ ତାଇନାଃ।

35 ଅତେରେ ତାଇନ୍‌ତାନ୍‌ ହଡ଼କ ସାମା ତାନ୍‌କ।

ଇନିଃ ସିର୍ମାରେନ୍‌ ଫାଉଦ୍‌କଆଃ ଥାଲାରେ ଓଡ଼ୋଃ ଅତେରେ ତାଇନ୍‌ତାନ୍‌ ହଡ଼କଆଃ ଥାଲାରେ

ଆୟାଃ ଆପ୍‌ନାଃ ଇଛାସାନାଙ୍ଗ୍‌ ଲେକା ରିକାଃଏ।

ଜେତାଏ ଇନିୟାଃ ତିଃଇକେ କାଏ ଆଟ୍‌କାଅ ଦାଡ଼ିୟା,

ଚାଏ ଚିନାଃମ୍‌ ଚିକାତାନା ମେନ୍ତେ ଜେତାଏ ଇନିଃକେ କୁଲି କାଏ ଦାଡ଼ିୟା ?

36 ଚିମ୍‌ତା ଆଇଁୟାଃ ମନ୍‌ସୁରୁଦ୍‌ରେ ସେଣାଁ ବଲୟାନା, ଇମ୍‌ତାଗି ଆଇଁୟାଃ ରାଇଜ୍‌ରାଃ ମାନାରାଙ୍ଗ୍‌ ନାଗେନ୍ତେ ଆଇଁୟାଃ ମାଇନ୍‌ ଓଡ଼ୋଃ ମାନାରାଙ୍ଗ୍‌ ହଗି ରୁହାଡ଼୍‌ ହିଜୁଃୟାନା। ଆଇଙ୍ଗ୍‌କେ ଇନିତୁକାଜି ଉଦୁବ୍‌ତାନ୍‌କ ଓଡ଼ୋଃ ରାଇଜ୍‌ରେନ୍‌ ମାପ୍‌ରାଙ୍ଗ୍‌ ହଡ଼କ ଦାଣାଁ ନାମ୍‌କେଦିୟାଁକ। ଆଇଙ୍ଗ୍‌ ଆଇଁୟାଃ ରାଜ୍‌ଗାଦିରେ ଆଡଃମିସା ଦୁବ୍‌ୟାନାଇଙ୍ଗ୍‌ ଓଡ଼ୋଃ ଆଇଁୟାଃ ମାନାରାଙ୍ଗ୍‌ ସିଦାଏତେ ପୁରାଃଗି ମାରାଙ୍ଗ୍‌ ହବାୟାନା।

37 ନାହାଁଃ ଆଇଙ୍ଗ୍‌ ନେବୁଖଦ୍‌ନେଜର୍‌ ସିର୍ମାରେନ୍‌ ରାଜାରାଃ ସାହାରାଅ, ମାଇନାନ୍‌ ଓଡ଼ୋଃ ମାନାରାଙ୍ଗ୍‌ରେୟାଃ ଦୁରାଙ୍ଗ୍‌ ରିକାତାନାଇଙ୍ଗ୍‌। ଚିୟାଃଚି ଇନିୟାଃ ସବେନ୍‌ କାମି ଠାଉକାଗିୟା ଓଡ଼ୋଃ ଉଡ଼ୁଃ ପାହାମ୍‌ ସବେନାଃ ନ୍ୟାୟଗିୟା। ଓଡ଼ୋଃ ଅକନ୍‌କ ଆପାନ୍‌କେ ମାରାଙ୍ଗ୍‌ ମେନ୍ତେ କାଜିନାଃକ, ଇନ୍‌କୁକେ ହୁଡିଙ୍ଗ୍‌ ରିକା ଦାଡ଼ିନିଃ ତାନିଃ।