1 ରାଜା ବେଲ୍‍ଶତ୍ସର୍‌ ରାଇଜ୍‌ତାନ୍‌ ଇମ୍‌ତାରାଃ ଆପି ବାରାଷ୍‌ ହବାଅଃ ତାଇକେନ୍‌ରେ, ଆଇଙ୍ଗ୍‌ ଦାନିୟେଲ୍‌ ମିଆଁଦ୍‌ ଦାର୍‌ଶାନ୍‌ ନେଲ୍‌କେଦ୍‌ ତାୟମ୍‌ତେ ଆଡଃମିଆଦ୍‌ ଦାର୍‌ଶାନ୍‌ ନେଲ୍‌କେଦାଇଙ୍ଗ୍‌। 2 ଆଇଙ୍ଗ୍‌ ଦାର୍‌ଶାନ୍‌ରେ ଆପାନ୍‌କେ ଏଲମ୍‌ ପାର୍‌ଗାନ୍‌ରେୟାଃ ଶୁଶନ୍‌ ଗୁମାଟ୍‌ରେ ମେନାଇଙ୍ଗ୍‌ ଲେକା ଆଟ୍‌କାର୍‌କେଦାଇଙ୍ଗ୍‌। ଓଡ଼ୋଃ ଏନ୍‌ ଦାର୍‌ଶାନ୍‌ରେଗି ଆଇଙ୍ଗ୍‌ ନେଲ୍‌କେଦାଇଙ୍ଗ୍‌ ଯେ, ଉଲାଇ ଗାଡ଼ା ଗେନାରେ ମେନାଇଙ୍ଗ୍‌ୟାଁ। 3 ଆଇଙ୍ଗ୍‌ ନେଲ୍‌କେଦାଇଙ୍ଗ୍‌, ଆଇଁୟାଃ ଆୟାର୍‌ରେ ମିଆଁଦ୍‌ ମିଣ୍ଡି, ଇନିଃ ଗାଡ଼ା ହେପାଦ୍‌ରେ ତିଙ୍ଗୁକାନ୍‌ ତାଇକେନା। ଆୟାଃ ବାରିୟା ଜିପିଲିଙ୍ଗ୍‌ଗି ଦିରିଙ୍ଗ୍‌ ତାଇକେନା। ମିଆଁଦ୍‌ ଦିରିଙ୍ଗ୍‌ ଆଡଃମିଆଦ୍‌ ଦିରିଙ୍ଗ୍‌ଏତେ ପୁରାଃଗି ଜିଲିଙ୍ଗ୍‌ ତାଇକେନା ଓଡ଼ୋଃ ଏନ୍‌ ଜିଲିଙ୍ଗ୍‌ ଦିରିଙ୍ଗ୍‌ ତାୟମ୍‌ତେ ହାରାକାନ୍‌ ତାଇକେନା। 4 ଆଇଙ୍ଗ୍‌ ନେଲ୍‌କେଦାଇଙ୍ଗ୍‌, ଏନ୍‌ ମିଣ୍ଡି ପାଶ୍ଚିମ୍‌, ଉତ୍ତାର୍‌ ଓଡ଼ୋଃ ଦାକ୍ଷିଣ୍‌ସାଃରେ ପୁରାଃଗି ଲାଡ଼ାଇ ରିକା ତାଇକେନାଏ, ଜେତା ଜାଁତୁ ଇନିୟାଃ ବିରୁଧ୍‌ରେ କାକ ତିଙ୍ଗୁ ଦାଡ଼ିୟାନା, ଚାଏ ଇନିଃତାଃଏତେ ଜେତାଏ କାକ ବାଞ୍ଚାଅ ଦାଡ଼ିୟାନା। ଇନିଃ ଆୟାଃ ଇଛା ସାନାଙ୍ଗ୍‌ ଲେକାଗି ରିକାକେଦା ଓଡ଼ୋଃ ମାରାଙ୍ଗ୍‌ ୟାନାଏ।

5 ନେ ବିଷାଏରେ ଆଇଙ୍ଗ୍‌ ଉଡ଼ୁଃତାନ୍‌ଲଃ ନେଲ୍‌କେଦାଇଙ୍ଗ୍‌, ଇମ୍‌ତାଗି ପାଶ୍ଚିମ୍‌ସାଃଏତେ ମିଆଁଦ୍‌ ମେରମ୍‌, ଆୟାଃ କାଟା ଅତେରେ କା ଟେକାଦ୍‌କେଦ୍‌ତେ ଗଟା ଅତେଦିଶୁମ୍‌ ପାରମ୍‌ୟାନ୍‌ଲଃ ହିଜୁଃୟାନା। ଏନ୍‌ ମେରମ୍‌ରାଃ ବାରାନ୍‌ ମେଦ୍‌ ଥାଲାରେ ମିଆଁଦ୍‌ ବିଶେଷ୍‌ ଦିରିଙ୍ଗ୍‌ ତାଇକେନା। 6 ଆଇଙ୍ଗ୍‌ ବାରିୟା ଦିରିଙ୍ଗ୍‌ ତାଇକାନ୍‌ ଅକ ମିଣ୍ଡିକେ ଗାଡ଼ା ଗେନାରେ ତିଙ୍ଗୁଆକାନ୍‌ ନେଲ୍‌କାଇ ତାଇକେନାଇଙ୍ଗ୍‌, ଇନିଃକେ ପୁରାଃଗି ଖିସ୍‌ୟାନ୍‌ଲଃ ଇନିଃ ପୁରାଃ ପେଡ଼େୟାନ୍‌ଗି ଟକଏଃ ନାଙ୍ଗ୍‌ ନିରାଉକେଦା। 7 ଓଡ଼ୋଃ ଆଇଙ୍ଗ୍‌ ନେଲ୍‌କେଦାଇଙ୍ଗ୍‌ ଯେ, ଇନିଃ ଏନ୍‌ ମିଣ୍ଡିକେ ପୁରାଃଗି ଜୋର୍‌ସେ ଟକଏଃକିୟା ଓଡ଼ୋଃ ଇନିୟାଃ ବାରାନ୍‌ ଦିରିଙ୍ଗ୍‌କେ ଟହେଦ୍‌କେଦା। ଏନ୍‌ ମେରମ୍‌ଆଃ ଆୟାର୍‌ରେ ତିଙ୍ଗୁନ୍‌ ନାଗେନ୍ତେ ମିଣ୍ଡିରାଃ ପେଡ଼େଃ କା ତାଇକେନା। ମେରମ୍‌ ଇନିଃକେ ଅତେରେ ଉୟୁଃକେଦ୍‌ତେ କାଟାଲଃ ତିକାକିୟାଏ ଓଡ଼ୋଃ ଏନ୍‌ ମିଣ୍ଡିକେ ଜେତାଏ ଇନିଃତାଃଏତେ କାକ ବାଞ୍ଚାଅ ଦାଡ଼ିକିୟା।

8 ଏନ୍‌ ମେରମ୍‌ ପୁରାଃଗି ମାରାଙ୍ଗ୍‌ ହବାୟାନାଏ ମେନ୍‌ଦ ଇନିଃ ପୁରାଃ ପେଡ଼େୟାନ୍‌ ହବାଅଃତାନ୍‌ ଇମ୍‌ତା ଆୟାଃ ମାରାଙ୍ଗ୍‌ ଦିରିଙ୍ଗ୍‌ ଟହେଦ୍‌ୟାନା ଓଡ଼ୋଃ ଏନ୍‌ ଠାୟାଦ୍‌ରେ ରିମିଲ୍‌ରାଃ ଚାରିଓସାଃତେ ଉପୁନିୟା ଦିରିଙ୍ଗ୍‌ ଅଡଙ୍ଗ୍‌ୟାନା। 9 ନେ ସବେନ୍‌ ଦିରିଙ୍ଗ୍‌ ଥାଲାରେ ଆଡଃମିଆଦ୍‌ ଦିରିଙ୍ଗ୍‌ ଅଡଙ୍ଗ୍‌ୟାନା, ପାହିଲା ଏନା ହୁଡିଙ୍ଗ୍‌ଗି ତାଇକେନ୍‌ରେୟ ପେଡ଼େଃତେ ହାରା ଇଦିୟାନ୍‌ଲଃ ଦାକ୍ଷିଣ୍‌ ଓଡ଼ୋଃ ପୁରାବ୍‌ସାଃ ଏନ୍‌ ସୁଗାଡ଼୍‌ ଦିଶୁମ୍‌ତେ ଆୟାଃ ଆକ୍‌ତେୟାର୍‌ ହାରା ଇଦିୟାନା। 10 ଏନ୍‌ ଦିରିଙ୍ଗ୍‌ ସିର୍ମାରେନ୍‌ ଫାଉଦ୍‌କଆଃ ଜାକେଦ୍‌ ହାରା ଇଦିୟାନା ଏନ୍ତେ ଏନ୍‌ ଫାଉଦ୍‌କଏତେ ଓଡ଼ୋଃ ଇପିଲ୍‌କଏତେ ଚିମିନ୍‌କକେ ଅତେରେ ହୁରାଙ୍ଗ୍‌କେଦ୍‌ତେ କାଟାଲଃ ତିକାକେଦ୍‌କଆଏ। 11 ଇନିଃ ସିର୍ମାରେନ୍‌ ଫାଉଦ୍‌କଆଃ ହାକିମ୍‌ ଲେକା ମାରାଙ୍ଗ୍‌ ହବାଅଃ ନାଗେନ୍ତେ ସାନାଙ୍ଗ୍‌କେଦା, ଏନ୍‌ ଗମ୍‌କେଆଃ ନୁତୁମ୍‌ରେ ସବେନ୍‌ ହୁଲାଙ୍ଗ୍‌ ରାକାବଃତାନ୍‌ ଦାଣେଁକେ ରେଃକ୍‌ ଇଦିକେଦା ଓଡ଼ୋଃ ପାବିତାର୍‌ ନାଗାର୍‌ ଜିୟନ୍‌ୟାନା। 12 ମାପାଃତୁପୁଇଙ୍ଗ୍‌ ହରାତେ ସବେନ୍‌ ହୁଲାଙ୍ଗ୍‌ ରାକାବଃତାନ୍‌ ଦାଣେଁଲଃ ଫାଉଦ୍‌କ ଆୟାଃ ତିଃଇରେ ଜିମାୟାନା। ଏନ୍‌ ହୁଡିଙ୍ଗ୍‌ ଦିରିଙ୍ଗ୍‌ ଅକଆଃ ରିକାକେଦାଏ ଏନାରେ ଜିତାଅୟାନା ଓଡ଼ୋଃ ସାନାର୍‌ତି ଅତେରେ ହୁରାଙ୍ଗ୍‌କେଦା।

13 ଏନ୍ତେ ଆଇଙ୍ଗ୍‌ ମିଆଁଦ୍‌ ପାବିତାର୍‌ ହଡ଼ ଜାଗାର୍‌ତାନ୍‌ ଆୟୁମ୍‌କେଦାଇଙ୍ଗ୍‌, ଆଡଃମିଆଦ୍‌ ପାବିତାର୍‌ ହଡ଼ ଇନିଃକେ କୁଲିକିୟା, "ନେ ଦାର୍‌ଶାନ୍‌ରେୟାଃ କାଜିକ, ସବେନ୍‌ ହୁଲାଙ୍ଗ୍‌ ରାକାବଃତାନ୍‌ ଦାଣେଁ, ମାପାଃତୁପୁଇଙ୍ଗ୍‌କେଦ୍‌ତେ ଜିୟନ୍‌ ରିକାନିଃ, ପାବିତାର୍‌ ନାଗାର୍‌ ଜିମାଃଅ ଓଡ଼ୋଃ ଫାଉଦ୍‌କକେ କାଟାଲଃ ତିକାଅଃ ବିଷାଏକରାଃ ଦାର୍‌ଶାନ୍‌ ପୁରାଅଃ ନାଗେନ୍ତେ ଚିମିନ୍‌ ଦିପିଲି ହବାଅଃଆ ?"

14 ଇନିଃ ଆଇଙ୍ଗ୍‌କେ କାଜିକେଦିୟାଁ, ୨,୩୦୦ ନିଦାସିଙ୍ଗି ଜାକେଦ୍‌ ହବାଅଃଆ, ଏନ୍ତେ ପାବିତାର୍‌ ଠାୟାଦ୍‌ ଆଡଃମିସା ଫାର୍‌ଚି ବୁଗିନ୍‌ ରିକାଅଃଆ।

15 ଆଇଙ୍ଗ୍‌ ଦାନିୟେଲ୍‌ ଏନ୍‌ ଦାର୍‌ଶାନ୍‌ ନେଲ୍‌ ତାୟମ୍‌ତେ ଏନାରାଃ ମୁଣ୍ଡି ଆଟ୍‌କାର୍‌ଉରୁମ୍‌ ନାଗେନ୍ତେଇଙ୍ଗ୍‌ ସାନାଙ୍ଗ୍‌କେଦା ଇମ୍‌ତା ଆଇଁୟାଃ ଆୟାର୍‌ରେ ହଡ଼ ଲେକା ମିହୁଡ଼୍‌ ତିଙ୍ଗୁୟାନାଏ। 16 ଇନିଃ ଉଲାଇ ଗାଡ଼ାଏତେ ମିଆଁଦ୍‌ ହଡ଼ରାଃ ଲାବ୍‌ଜାତେ ଜେତାଏ ମିହୁଡ଼୍‌ କେଡ଼ାତାନ୍‌ ଆୟୁମ୍‌କେଦାଇଙ୍ଗ୍‌, "ହେ ଗାବ୍ରିଏଲ୍‌, ନେ ହଡ଼କେ ଦାର୍‌ଶାନ୍‌ରେୟାଃ ମୁଣ୍ଡି ଆଟ୍‌କାର୍‌ଉରୁମ୍‌ ଇଚିମେ।" 17 ଆଇଙ୍ଗ୍‌ ତିଙ୍ଗୁଆକାନ୍‌ ଠାୟାଦ୍‌ତାଃ ଇନିଃ ହିଜୁଃୟାନ୍‌ ହରାତେ ଆଇଙ୍ଗ୍‌ ପୁରାଃଗି ବରକେଦ୍‌ଲଃ ଅତେରେଇଙ୍ଗ୍‌ ଉୟୁଃୟାନା,

ମେନ୍‌ଦ ଇନିଃ ଆଇଙ୍ଗ୍‌କେ କାଜିକିୟାଁ, "ହେ ମାନୱାହନ୍‌, ନେ କାଜିକେ ଆଟ୍‌କାର୍‌ଉରୁମ୍‌ ରିକାଏମେ ଯେ, ଏନା ଟୁଣ୍ଡୁ ଦିପିଲିରେୟାଃ ଦାର୍‌ଶାନ୍‌ କାଜିକ ତାନାଃ।" 18 ଇନିଃ ଆଇଙ୍ଗ୍‌କେ କାଜିତାଇକେନ୍‌ ଇମ୍‌ତା ଆଇଙ୍ଗ୍‌ ପୁରାଃ ଦୁଡ଼ୁମ୍‌ତେ ଅତେରେ ଉୟୁଃକେଦ୍‌ତେ ଦୁଡ଼ୁମ୍‌କାନ୍‌ ତାଇକେନାଇଙ୍ଗ୍‌, ମେନ୍‌ଦ ଇନିଃ ଆଇଙ୍ଗ୍‌କେ ଜୁଟିଦ୍‌କେଦ୍‌ତେ ବିରିଦ୍‌କେଦିୟାଁ। 19 ଇନିଃ କାଜିକିୟାଁଏ, "ଚିମ୍‌ତା ପାର୍‌ମେଶ୍ୱାର୍‌ଆଃ ପୁରାଃ ଖିସ୍‌ ହିଜୁଃଆ, ଏନ୍‌ ଦିପିଲିରେ ଚିନାଃ ହବାଅଃଆ, ଏନ୍‌ ବିଷାଏରେ ଆଇଙ୍ଗ୍‌ ଆମ୍‌କେଇଙ୍ଗ୍‌ କାଜିମେୟାଁ, ଚିୟାଃଚି ନେ ସବେନ୍‌ ଦାର୍‌ଶାନ୍‌ରେୟାଃ କାଜିକ ସାଲାକାନ୍‌ ଟୁଣ୍ଡୁ ଦିପିଲିକେ ଉଦୁବେତାନା।

20 "ଆମ୍‌ ଅକ ବାରିୟା ଦିରିଙ୍ଗ୍‌ ତାଇକେନ୍‌ ପେଡ଼େୟାନ୍‌ ମିଣ୍ଡି ନେଲ୍‌କିୟାମ୍‌, ଇନିଃ ମିଦିୟ ଓଡ଼ୋଃ ପାରସ୍ୟରେନ୍‌ ରାଜାକେ ଉଦୁବଃତାନା। 21 ଉବ୍‌ ତାଇକେନ୍‌ ମେରମ୍‌, ଗ୍ରୀସ୍‌ ଦିଶୁମ୍‌ରେନ୍‌ ରାଜାକେ ଉଦୁବଃତାନା ଓଡ଼ୋଃ ଇନିୟାଃ ବାରାନ୍‌ ମେଦ୍‌ ଥାଲାରେ ତାଇକେନ୍‌ ମାରାଙ୍ଗ୍‌ ଦିରିଙ୍ଗ୍‌, ଏନା ପାହିଲା ରାଜାକେ ଉଦୁବଃତାନା। 22 ଏନ୍‌ ଦିରିଙ୍ଗ୍‌ ଟହେଦ୍‌କେଦ୍‌ତେ ଏନ୍ତାଃରେ ଉପୁନିୟା ଦିରିଙ୍ଗ୍‌ ଅଡଙ୍ଗ୍‌ୟାନା, ଏନା ଉପୁନିୟା ରାଇଜ୍‌କକେ ଉଦୁବଃତାନା, ନେଆଁ ଆୟାଃ କିଲିଏତେଗି ଅଡଙ୍ଗ୍‌ଅଃଆ, ମେନ୍‌ଦ ପେଡ଼େଃତେ ଇନିଃ ଲେକା କାକ ହବା ଦାଡ଼ିୟଃଆ।

23 "ଇନ୍‌କୁଆଃ ରାଇଜ୍‌ ଟୁଣ୍ଡୁଃତାନ୍‌ ଦିପିଲିରେ, ଗୁହ୍ନାଁ ରିକାତାନ୍‌ ହଡ଼କଆଃ ପୁରାଃଗି ଏତ୍‌କାନ୍‌ ହବାଅଃଆ ଇମ୍‌ତା ମିଆଁଦ୍ ବରୱାନ୍‌ଗି ନେଲଃତାନ୍‌, ପୁରାଃ ହସଡ଼ ରାଜା ଅଡଙ୍ଗ୍‌ଅଃଆଏ। 24 ଇନିଃ ପୁରାଃଗି ପେଡ଼େୟାନ୍‌ ହବାଅଃଆଏ, ମେନ୍‌ଦ ଆୟାଃ ଆପ୍‌ନାଃ ପେଡ଼େଃତେ କାହାଗି। ଇନିଃ ପୁରାଃ ବରୱାନ୍‌ଗି ଜିୟନ୍‌ ରିକାଏୟାଏ ଓଡ଼ୋଃ ଅକ୍‌ନାଃ ରିକାଏୟାଏ, ଏନାରେ ଜିତାଅଃଆଏ। ଇନିଃ ପେଡ଼େୟାନ୍‌ ହଡ଼କକେ ଓଡ଼ୋଃ ପାବିତାର୍‌ ହଡ଼କକେ ଜିୟନ୍‌ ରିକାକଆଏ। 25 ଇନିଃ ଆୟାଃ ହସଡ଼ରେୟାଃ କାଜିକାମିକ ହରାତେ ପୁରାଃଗି ସବେନ୍‌ ବିଷାଏରେ ହାରାଇଦିୟଃଆ ଓଡ଼ୋଃ ଇନିଃ ଆପାନ୍‌କେ ମାରାଙ୍ଗ୍‌ ସାହେବ୍‌ ମେନ୍ତେ କାଜିନାଃ। ବେଗାର୍‌ ବରତେ ତାଇନ୍‌ତାନ୍‌ ଇମ୍‌ତା ପୁରାଃ ହଡ଼କକେ ଜିୟନ୍‌କଆ ଓଡ଼ୋଃ ରାଜାକଆଃ ରାଜାରାଃ ବିରୁଧ୍‌ରେ ବିରିଦାଃ। ଏନ୍‌ରେୟ ଇନିଃ ଜିୟନଃଆଏ, ମେନ୍‌ଦ ହଡ଼ରାଃ ପେଡ଼େଃତେ କାହାଗି। 26 ସିଙ୍ଗି ହାସୁର୍‌ ଓଡ଼ୋଃ ସେତାଃ ଇଦାନ୍ ବିଷାଏରେ ଅକ ଦାର୍‌ଶାନ୍‌ ଆମ୍‌କେ ଏମାକାନା, ଏନା ସାର୍‌ତି ତାନାଃ। ମେନ୍‌ଦ ନେ ଦାର୍‌ଶାନ୍‌ରେୟାଃ କାଜିକେ ଉକୁକେଦ୍‌ତେ ଦହଏମେ। ଚିୟାଃଚି ଏନ୍‌ ବିଷାଏକ ପୁରାଃ ତାୟମ୍‌ତେ ହବାଅଃ ବିଷାଏକେ ଉଦୁବ୍‌ତାନା।"

27 ଏନ୍ତେ ଆଇଙ୍ଗ୍‌ ଦାନିୟେଲ୍‌, ପୁରାଃଗିଇଙ୍ଗ୍‌ ଲାଗାୟାନା ଓଡ଼ୋଃ ଚିମିନ୍‌ ମାହା ଜାକେଦ୍‌ ନାରାଦୁରାକେଦ୍‌ତେ ତାଇନ୍‌ ୟାନାଇଙ୍ଗ୍‌। ଏନ୍ତେ ଆଇଙ୍ଗ୍‌ ବିରିଦ୍‌କେଦ୍‌ତେ ରାଜାରାଃ କାମିକ ରିକାକେଦାଇଙ୍ଗ୍‌। ଏନ୍‌ ଦାର୍‌ଶାନ୍‌ ହରାତେ ଆକ୍‌ଚାକାଅୟାନାଇଙ୍ଗ୍‌ ଓଡ଼ୋଃ ଏନା କାଇଙ୍ଗ୍‌ ଆଟ୍‌କାର୍‌ଉରୁମ୍‌ ଦାଡ଼ିକେଦା।