1 ରାଜା ବେଲ୍‍ଶତ୍ସର୍‌ କେଡ଼ାକାନ୍‌ ମିଦ୍‌ ହାଜାର୍‌ ହଡ଼କ ନାଗେନ୍ତେ ମିଆଦ୍‌ ମାରାଙ୍ଗ୍‌ ଭୋଜି ବାଇକେଦାଏ ଓଡ଼ୋଃ ଇନିଃ ଇନ୍‌କୁଲଃ ଦାଖ୍‌ରାସି ନୁଁ'କେଦାଏ। 2 ଆୟାଃ ଆପୁତେ ନେବୁଖଦ୍‌ନେଜର୍‌ ଯୀରୁଶାଲେମ୍‌ ମାନ୍ଦିର୍‌ଏତେ ସୋନା ଓଡ଼ୋଃ ରୁପାରେୟାଃ ନୁଏଁ କାଟୋରା ରେଃକ୍‌ଇଦିକାଦ୍‌ ତାଇକେନାଏ, ଏନ୍‌ ସବେନାଃରେ ରାଜା, ଭୋଜିରେ କେଡ଼ାକାନ୍‌ ହଡ଼କ, ଆୟାଃ ଆଣ୍‌ଦିକାନ୍‌ କୁଡ଼ିକ ଓଡ଼ୋଃ ହିରୁମ୍‌କ ଦାଖ୍‌ରାସି ନୁଏଁକାକ ମେନ୍ତେ ବେଲ୍‍ଶତ୍ସର୍‌ ଏନ୍‌ କାଟୋରାକେ ଆଉ ନାଙ୍ଗ୍‌ ହୁକୁମ୍‌ ଏମ୍‌କେଦ୍‌କଆଏ। 3 ଏନ୍ତେ ଯୀରୁଶାଲେମ୍‌ରେ ତାଇକାନ୍‌ ପାର୍‌ମେଶ୍ୱାର୍‌ଆଃ ମାନ୍ଦିର୍‌ଏତେ ରେଃକ୍‌ଇଦିକାନ୍‌ ସୋନା ଓଡ଼ୋଃ ରୁପାରେୟାଃ ନୁଏଁ କାଟୋରାକକେ ହଡ଼କ ଆଉକେଦ୍‌ ତାୟମ୍‌ତେ ରାଜା, ଭୋଜିରେ କେଡ଼ାକାନ୍‌ ହଡ଼କ, ଆୟାଃ ଆଣ୍‌ଦିକାନ୍‌ କୁଡ଼ିକ ଓଡ଼ୋଃ ହିରୁମ୍‌କ ଏନ୍‌ କାଟୋରାରେ ଦାଖ୍‌ରାସି ନୁଁ'କେଦାକ। 4 ଇନ୍‌କୁ ଦାଖ୍‌ରାସି ନୁଁ' ତାନ୍‌ଲଃଗି ସୋନା, ରୁପା, ପିତ୍ତାଲ୍‌, ମେଡ଼େଦ୍‌, ସାହାନ୍‌ ଓଡ଼ୋଃ ଦିରିତେ ବାଇୟାକାନ୍‌ ମୁରୁତ୍‌କଆଃ ମାନାରାଙ୍ଗ୍‌ ରିକାକେଦାକ।

5 ଇମ୍‌ତାଗି ମିଆଁଦ୍‌ ମାନୱାରାଃ ତିଃଇ ସାର୍‌ସାର୍‌ ହିଜୁଃକେଦ୍‌ତେ ରାଜ୍‌ମାହାଲ୍‌ରାଃ ପାଲାସ୍ତାର୍‌କାନ୍‌ ଭିତ୍‌ରେ, ଦିଆଲଃ ମାସ୍କାଲ୍‌ ନେଲଃତାନ୍‌ ହେପାଦ୍‌ତାଃରେ ଅଲ୍‌ ଏଟେଦ୍‌ୟାନା। ତିଃଇଲଃ ଅଲ୍‌ୟାନ୍‌ ଠାୟାଦ୍‌କେ ରାଜା ନେଲ୍‌କେଦାଏ। 6 ଏନ୍ତେ ରାଜାରାଃ ମେଦ୍‌ମୁହାଁଡ଼୍‌ ଏଟାଃଗି ନେଲ୍‌ୟାନା ଓଡ଼ୋଃ ଇନିଃ ନିମିନ୍‌ ବରକେଦାଏ ଯେ, ଆୟାଃ ମୁକ୍‌ଡ଼ି ବରତେ ଥାର୍‌ଥାରାଅୟାନା ଓଡ଼ୋଃ କାଟାରାଃ ବାରାନ୍‌ ମୁକ୍‌ଡ଼ି ଥାର୍‌ଥାରାଅକେଦ୍‌ତେ ଠଗଃତାଇକେନା। 7 ରାଜା କାଉରିକେଦ୍‌ତେ ଦେଅଁଣା, କଲ୍‌ଦିୟ, ପାଞ୍ଜିଖାଡ଼ି ନେଲ୍‌ ହଡ଼ ଓଡ଼ୋଃ ଯାଦୁରିକା ହଡ଼କକେ କେଡ଼ାଆଉ ନାଙ୍ଗ୍‌ କାଜିକେଦ୍‌କଆଏ। ଇନିଃ ବାବିଲୋନ୍‌ରେନ୍‌ ଏନ୍‌ ପାଣ୍ଡିତ୍‌କକେ କାଜିକେଦ୍‌କଆ, "ଜେତାଏ ନେ ଅନଲ୍‌କେ ପାଢ଼ାଅ ଦାଡ଼ିୟାଏ ଓଡ଼ୋଃ ନେଆଁରାଃ ମୁଣ୍ଡି ଉଦୁବ୍‌ ଦାଡ଼ିୟାଏ, ଇନିଃକେ ବାଇଗିଣି ରାଙ୍ଗ୍‌ରାଃ ଲିଜାଃ ଓଡ଼ୋଃ ହଟଃରେ ସୋନାରେୟାଃ ଇସିର୍‌ ତୁସିଙ୍ଗ୍‌ ନାଗେନ୍ତେ ଏମଃଆ। ଓଡ଼ୋଃ ଇନିଃ ରାଇଜ୍ ଚାଲାଅକଆଃ ଥାଲାରେ ପେଡ଼େଃତେ ଆପି ଠାୟାଦ୍‌ରେ ହବାଅଃଆ।" 8 ରାଇଜ୍‌ରେନ୍‌ ସବେନ୍‌ ପାଣ୍ଡିତ୍‌କ ହିଜୁଃୟାନା, ମେନ୍‌ଦ ଇନ୍‌କୁ ଜେତାଏ ଏନାକେ ପାଢ଼ାଅ କାକ ଦାଡ଼ିକେଦା ଚାଏ ରାଜାକେ ଏନାରାଃ ମୁଣ୍ଡି କାକ ଉଦୁବ୍‌ ଦାଡ଼ିୟାନା। 9 ଏନାମେନ୍ତେ ରାଜା ବେଲ୍‍ଶତ୍ସର୍‌ ପୁରାଃଗି ଦୁକୁୟାନା ଓଡ଼ୋଃ ଆୟାଃ ମେଦ୍‌ମୁହାଁଡ଼୍‌ ପୁରାଃ ଗସଗି ନେଲ୍‌ୟାନା। ଆୟାଃ କେଡ଼ାକାନ୍‌ ହଡ଼କ ହାଏକାଟ୍‌ୟାନାକ।

10 ରାଜା ଓଡ଼ୋଃ ଆୟାଃ କେଡ଼ାକାନ୍‌ ହଡ଼କଆଃ ହାଲାଗୁଲା ଆୟୁମ୍‌କେଦ୍‌ତେ ରାନି ଜଜମ୍‌ ଅଡ଼ାଃତେ ହିଜୁଃୟାନା। ଓଡ଼ୋଃ କାଜିକେଦାଏ, "ହେ ରାଜା, ଜାନାଅଗି ତାଇନ୍‌ମେ। ଆଲମ୍‌ ବରୟା ! ଆମାଃ ମେଦ୍‌ମୁହାଁଡ଼୍‌ ଗସକାନ୍‌ଗି ଆଲକା ନେଲଃକା। 11 ଆମାଃ ରାଇଜ୍‌ରେ ମିହୁଡ଼୍‌ ମେନାଇୟା, ଇନିୟାଃ ମନ୍‌ସୁରୁଦ୍‌ରେ ପାବିତାର୍‌ ପାର୍‌ମେଶ୍ୱାର୍‌ଆଃ ଆତ୍ମା ତାଇନ୍‌ତାନା। ଆମାଃ ଆବା ରାଜା ତାଇକେନ୍‌ ପାରିୟାରେ, ନେ ହଡ଼ତାଃରେ ପାର୍‌ମେଶ୍ୱାର୍‌ଆଃ ଲେକାଗି ବୁଗିନ୍‌ ସେଣାଁ, ବୁଦ୍ଧି ଓଡ଼ୋଃ ମନ୍‌ରାଃ କାଜିକ ସାରି ଦାଡ଼ିତେୟାଃ ନେଲଃ ତାଇକେନା। ଆମାଃ ଆପୁ ରାଜା ନେବୁଖଦ୍‌ନେଜର୍‌ ଇନିଃକେ ପାଞ୍ଜିଖାଡ଼ି ନେଲ୍‌ ହଡ଼, ଯାଦୁଟଣା ରିକାହଡ଼, ଦେଅଁଣା ରିକାହଡ଼ ଓଡ଼ୋଃ କଲ୍‌ଦିୟ ହଡ଼କତାଃଏତେ ମାରାଙ୍ଗ୍‌ ଠାୟାଦ୍‌ରେ ଦହକାଇ ତାଇକେନା। 12 ରାଜା ନେ ଦାନିୟେଲ୍‌କେ ବେଲ୍‌ଟ୍‌ଶତ୍ସର୍‌ ନୁତୁମ୍‌ ଏମାକାଇ ତାଇକେନାଏ। ଚିଆଃଚି ଇନିୟାଃରେ ବୁଗିନ୍‌ ମନ୍‌ସୁରୁଦ୍‌, ପୁରାଃ ବୁଗିନ୍‌ ମନ୍‌, ସେଣାଁ, ବୁଦ୍ଧି, କୁମୁରାଃ ମୁଣ୍ଡି ଉଦୁବ୍‌ ଦାଡ଼ି, ଓଡ଼ୋଃ ଉକୁଆକାନ୍‌ କାଜିକ ଉଦୁବ୍‌ ଦାଡ଼ିରେୟାଃ ପେଡ଼େଃ ତାଇକେନା। ଏନାତେ ନାହାଁଃ ଦାନିୟେଲ୍‌କେ କେଡ଼ାଆଉଃକା, ଇନିଃ ନେ ଅନଲ୍‌ରେୟାଃ ମୁଣ୍ଡି ଉଦୁବ୍‌ ଦାଡ଼ିୟା।"

13 ଦାନିୟେଲ୍‌କେ ରାଜାରାଃ ଆୟାର୍‌ତେ ଆଉକିୟାକ ଓଡ଼ୋଃ ରାଜା ଦାନିୟେଲ୍‌କେ କାଜିକିୟା, "ଆଇଁୟାଃ ଆପୁ ରାଜା ତାଇକେନ୍‌ ଇମ୍‌ତା ଯିହୁଦା ଦିଶୁମ୍‌ଏତେ ଅକନ୍‌କକେ ଦାସିୟଃ ନାଙ୍ଗ୍‌ ତଲ୍‌ ଆଉକାଦ୍‌କ ତାଇକେନାଏ, ଇନ୍‌କୁ ଥାଲାରେ ଅକ ଦାନିୟେଲ୍‌ ତାଇକେନାଏ, ଇନିଃ ଆମ୍‌ ତାନ୍‌ମେଚି ? 14 ଆଇଙ୍ଗ୍‌ ଆୟୁମାକାଦାଇଙ୍ଗ୍‌ ଯେ, ଆମାଃତାଃରେ ପାବିତାର୍‌ ପାର୍‌ମେଶ୍ୱାର୍‌ଆଃ ଆତ୍ମା ମେନାଇୟା ଓଡ଼ୋଃ ମନ୍‌ରାଃ କାଜିକ ସାରି ନାଙ୍ଗ୍‌ ସେଣାଁ ଓଡ଼ୋଃ ବୁଦ୍ଧି ମେନାଃ। 15 ନେ ଅନଲ୍‌ରେୟାଃ କାଜିକେ ପାଢ଼ାଅ ନାଗେନ୍ତେ ଓଡ଼ୋଃ ଏନାରାଃ ମୁଣ୍ଡି ଉଦୁବ୍‌ ନାଗେନ୍ତେ ପାଣ୍ଡିତ୍‌କ ଓଡ଼ୋଃ ସେଣାଁନ୍‌ ହଡ଼କକେ ଆଇଁୟାଃତାଃ ଆଉୱାକାନାକ, ମେନ୍‌ଦ ଇନ୍‌କୁ ଜେତାଏ ଏନାରାଃ ମୁଣ୍ଡି କାକ ଉଦୁବ୍‌ ଦାଡ଼ିକେନା। 16 ମେନ୍‌ଦ ଆଇଙ୍ଗ୍‌ ଆୟୁମାକାଦାଇଙ୍ଗ୍‌ ଆମ୍‌ ଉକୁଆକାନ୍‌ କାଜିରାଃ ମୁଣ୍ଡି ଉଦୁବ୍‌ ଦାଡ଼ିୟାମ୍‌ ଓଡ଼ୋଃ ଆଡ଼ାଃଉଡ଼ୁଃ ସାଙ୍ଗିନ୍‌ ଦାଡ଼ିୟାମ୍‌। ଆମ୍ ନେ ଅନଲ୍ ପାଢ଼ାଅକେଦ୍‌ତେ ଏନାରାଃ ମୁଣ୍ଡି ଉଦୁବ୍‌ ଦାଡ଼ିରେଦ, ଆମ୍‌କେ ବାଇଗିଣି ରାଙ୍ଗ୍‌ରାଃ ଲିଜାଃ ଓଡ଼ୋଃ ହଟଃରେ ସୋନାରେୟାଃ ଇସିର୍‌ ତୁସିଙ୍ଗ୍‌ ନାଗେନ୍ତେ ଏମଃଆ, ଓଡ଼ୋଃ ଆମ୍‌ ରାଇଜ୍‌ତାନ୍‌ ହଡ଼କଆଃ ଥାଲାରେ ପେଡ଼େଃତେ ଆପି ଠାୟାଦ୍‌ରେମ୍‌ ହବାଅଃଆ।"

17 ଏନ୍ତେ ଦାନିୟେଲ୍‌ ରାଜାକେ କାଜିରୁହାଡ଼୍‌କିୟା, "ଆମାଃ ଏମଃ ଦାନ୍‌ ଆମାଃତାଃରେ ତାଇନ୍‌କା ଓଡ଼ୋଃ ଆମାଃ ନାଲା ଏଟାଃ ମିହୁଡ଼୍‌କେ ଏମଃକା। ଏନ୍‌ରେୟ ଆଇଙ୍ଗ୍‌ ରାଜା ନାଗେନ୍ତେ ଏନ୍‌ ଅନଲ୍‌କେ ପାଢ଼ାଅୟାଇଙ୍ଗ୍‌ ଓଡ଼ୋଃ ଏନାରାଃ ମୁଣ୍ଡି ଇନିଃକେ ଉଦୁବାଇୟାଇଙ୍ଗ୍‌।

18 "ହେ ମାଇନାନ୍‌, ସବେନାଃଏତେ ପେଡ଼େୟାନ୍ ପାର୍‌ମେଶ୍ୱାର୍‌ ଆମାଃ ଆପୁ ନେବୁଖଦ୍‌ନେଜର୍‌କେ ରାଇଜ୍‌, ମାନାରାଙ୍ଗ୍‌ ଓଡ଼ୋଃ ମାଇନାନ୍‌ ଏମ୍‌କିୟାଏ। 19 ଇନିଃ ଆମାଃ ଆପୁକେ ନେ'ଲେକା ପେଡ଼େଃ ଏମ୍‌କାଇ ତାଇକେନାଏ ଯେ, ସବେନ୍‌ କିଲିକ, ସବେନ୍‌ ଦିଶୁମ୍‌ ଓଡ଼ୋଃ ଏଟାଃ ଏଟାଃ ଜାଗାର୍‌ତେ ଜାଗାର୍‌ତାନ୍‌ ସବେନ୍‌ ହଡ଼କ ଆୟାଃ ଆୟାର୍‌ରେ ବରତେ ଥାର୍‌ଥାରାଅଃ ତାଇକେନାକ। ଆୟାଃ ସାନାଙ୍ଗ୍‌ ଲେକା ଅକଏକେ ଇଛା ଇନିଃକେ ମାଆଃ ଗଏଃକିୟା ଓଡ଼ୋଃ ଅକଏକେ ଇଛା ଇନିଃକେ ବାଞ୍ଚାଅକିୟା, ଅକଏକେ ଇଛା ଇନିଃକେ ମାରାଙ୍ଗ୍‌କିୟା ଓଡ଼ୋଃ ହୁଡିଙ୍ଗ୍‌କିୟା। 20 ମେନ୍‌ଦ ଆୟାଃ ମନ୍‌ସୁରୁଦ୍‌ରେ ଆପାନ୍‌କେ ମାରାଙ୍ଗ୍‌ ଲେକାଏ କାଜିୟାନ୍‌ରେ ଓଡ଼ୋଃ ଆୟାଃ ମନ୍‌ କେଟେଃୟାନ୍‌ ଇମ୍‌ତା, ରାଜ୍‌ଗାଦିଏତେ ସାଙ୍ଗିନ୍‌ୟାନା ଓଡ଼ୋଃ ଆୟାଃତାଃଏତେ ଆୟାଃ ମାନାରାଙ୍ଗ୍‌ ସାଙ୍ଗିନ୍‌ୟାନା। 21 ଇନିଃ ହଡ଼କତାଃଏତେ ସାଙ୍ଗିନ୍‌ୟାନା ଓଡ଼ୋଃ ଜାଁତୁକଆଃ ମନ୍‌ ଇନିଃକେ ଏମ୍‌ୟାନ। ଇନିଃ ବିର୍‌ରେ ଗାଧାକଲଃ ତାଇନ୍‌ୟାନାଏ ଓଡ଼ୋଃ ଉରିକ୍‌ ଲେକା ତାସାଦ୍‌ ଜମ୍‌କେଦାଏ ଏନ୍ତେ ଆୟାଃ ହଡ଼୍‌ମ ରିମିଲ୍‌ରାଃ ଅସ୍‌ଦାଆଃ ଉୟୁଃୟାନା। ଏନ୍ତେ ଟୁଣ୍ଡୁରେ ସାରିକେଦା ଯେ, ସବେନାଃଏତେ ପେଡ଼େୟାନ୍‌ ପାର୍‌ମେଶ୍ୱାର୍‌ ହଡ଼କଆଃ ରାଇଜ୍‌ ଚେତାନ୍‌ରେ ହଗି ଆକ୍‌ତେୟାର୍‌ ରିକାଃଏ ଓଡ଼ୋଃ ଆୟାଃ ଇଛାସାନାଙ୍ଗ୍‌ ଲେକା ରାଇଜ୍‌ ଏମାଃଏ।

22 "ମେନ୍‌ଦ ହେ ବେଲ୍‍ଶତ୍ସର୍‌, ଆମ୍‌ ଆୟାଃ ହନ୍‌କଡ଼ା, ନେ ସବେନାଃ ସାରିକେଦ୍‌ତେ ହଗି ଆମ୍‌ ଆପାନ୍‌କେ କାମ୍‌ ଲେବେଃକାନା। 23 ମେନ୍‌ଦ ଆମ୍‌ ସିର୍ମାରେନ୍‌ ପ୍ରାଭୁଆଃ ବିରୁଧ୍‌ରେମ୍‌ ବିରିଦ୍‌ ତାନା। ଆୟାଃ ମାନ୍ଦିର୍‌ରାଃ ସବେନ୍‌ କାଟୋରା ଆମାଃତାଃ ଆଉକେଦ୍‌ତେ ଆମ୍‌ ଓଡ଼ୋଃ ଭୋଜିରେ କେଡ଼ାକାନ୍‌ ହଡ଼କ ଏନ୍ତେ ଆମାଃ କୁଡ଼ି ଓଡ଼ୋଃ ହିରୁମ୍‌କ ଏନ୍‌ କାଟୋରାରେ ଦାଖ୍‌ରାସି ନୁଁ'କେଦାକ। ଓଡ଼ୋଃ ଅକନ୍‌କ ନେଲ୍‌ କାକ ଦାଡ଼ିୟା, ଆୟୁମ୍‌ କାକ ଦାଡ଼ିୟା ଚାଏ କାକ ଆଟ୍‌କାର୍‌ଉରୁମ୍‌ ଦାଡ଼ିୟା ଏନ୍‌ଲେକାନ୍‌ ସୋନା, ରୁପା, ପିତ୍ତାଲ୍‌, ମେଡ଼େଦ୍‌, ସାହାନ୍‌ ଓଡ଼ୋଃ ଦିରିତେ ବାଇୟାକାନ୍‌ ମୁରୁତ୍‌କକେ ଜହାର୍‌କତାନାକ। ମେନ୍‌ଦ ଅକ ପାର୍‌ମେଶ୍ୱାର୍‌ଆଃ ତିଃଇରେ ଆମାଃ ଜୀଉ ଓଡ଼ୋଃ ଗନଏଃ ମେନାଃ, ଇନିଃକେ ଆମ୍‌ କାମ୍‌ ମାଇନ୍‌ତାନା। 24 ଏନାମେନ୍ତେ ପାର୍‌ମେଶ୍ୱାର୍‌ ନେ'ସବେନାଃ ଅଲ୍‌ ନାଗେନ୍ତେ ତିଃଇ କୁଲ୍‌କେଦାଏ।

25 "ଏନାରେ ନେ'ଲେକା ଅଲାକାନା, ‘ମିନେ ମିନେ, ତକେଲ୍‌, ଉପାର୍‌ସିନ୍‌।’ 26 ନେ କାଜିରେୟାଃ ମୁଣ୍ଡି ହବାଅଃତାନା, ‘ମିନେ’ ମେନ୍‌ଲେରେ, ପାର୍‌ମେଶ୍ୱାର୍‌ ଆମାଃ ରାଇଜ୍‌ରେୟାଃ ହୁଲାଙ୍ଗ୍‌କ ଲେକା'କାଦା ଓଡ଼ୋଃ ଏନା ଟୁଣ୍ଡୁ କାନା। 27 ‘ତକେଲ୍‌’ ମେନ୍‌ଲେରେ, ତାରାଜୁରେ ଆମ୍‌କେ ଅଜାନ୍‌କାନା ଓଡ଼ୋଃ ଆମାଃ ଅଜାନ୍‌ ହୁଡିଙ୍ଗ୍‌ଗିୟା। 28 ‘ପେରସ୍‌’ ମେନ୍‌ଲେରେ, ଆମାଃ ରାଇଜ୍‌ ବିନ୍‌ଗାଅକେଦ୍‌ତେ ମିଦିୟ ଓଡ଼ୋଃ ପାରସି ହଡ଼କକେ ଏମାକାନା।"

29 ଏନ୍ତେ ବେଲ୍‍ଶତ୍ସର୍‌ ହୁକୁମ୍‌ ଏମ୍‌କେଦ୍‌ତେ, ଦାନିୟେଲ୍‌କେ ବାଇଗିଣି ରାଙ୍ଗ୍‌ରାଃ ଲିଜାଃ ଓଡ଼ୋଃ ହଟଃରେ ସୋନାରେୟାଃ ଇସିର୍‌ ତୁସିଙ୍ଗ୍‌କିୟାକ ଓଡ଼ୋଃ ଇନିଃ ରାଇଜ୍‌ତାନ୍‌କଏତେ ପେଡ଼େଃରେ ସବେନ୍‌କଆଃଏତେ ଚେତାନ୍‌ ଆପି ଠାୟାଦ୍‌ରେ ଦହଃକା ମେନ୍ତେ ହୁକୁମ୍‌କେଦା। 30 ଏନ୍ ନିଦାଗି କଲ୍‌ଦିୟରେନ୍‌ ରାଜା ବେଲ୍‍ଶତ୍ସର୍‌କେ ମାଆଃ ଗଏଃକିୟାକ। 31 ଓଡ଼ୋଃ ମିଦିୟରେନ୍‌ ଦାରିୟାବସ୍‌ ଆପିହିସି ବାର୍‌ ବାରାଷ୍‌ ହବାଅଃ ତାଇକେନ୍‌ ଇମ୍‌ତା ରାଇଜ୍‌ ଆକ୍‌ତେୟାର୍‌କେଦାଏ।