1 ରାଜା ନେବୁଖଦ୍‌ନେଜର୍‌ ଆପି ହିସି ତିଃଇ ସାଲାଙ୍ଗି ଓଡ଼ୋଃ ତୁରିୟା ତିଃଇ ଚାକାର୍‌ରେୟାଃ ମିଆଁଦ୍ ମୁରୁତ୍‌ ବାଇକିୟାଏ ଓଡ଼ୋଃ ବାବିଲୋନ୍‌ ପାର୍‌ଗାନ୍‌ରେୟାଃ ଦୁରା ନୁତୁମ୍‌ ପିଡ଼ିରେ ଇନିଃକେ ଦହକିୟା। 2 ଏନ୍ତେ ରାଜା ନେବୁଖଦ୍‌ନେଜର୍‌ ଏନ୍‌ ବାଇୟାକାଦ୍‌ ମୁରୁତ୍‌ରାଃ ସାଂସ୍‌କାର୍‌ ରିକା ନାଗେନ୍ତେ ଆୟାଃ ପାର୍‌ଗାନ୍‌ରେନ୍‌ ରାଇଜ୍‌ତାନ୍‌କ, ଲାଟ୍‌ସାହେବ୍‌କ, ଦିଶୁମ୍‌ ରାଇଜ୍‌ତାନ୍‌କ, ସେଣାଁ ଉଦୁବ୍‌କ, ଖୁର୍ଜି ହିସାବ୍‌କ, ବିଚାର୍‌ତାନ୍‌କ, ମାରାଙ୍ଗ୍‌ ଲାଟ୍‌ସାହେବ୍‌କ ଓଡ଼ୋଃ ଏଟାଃ ଏଟାଃ ପାର୍‌ଗାନ୍‌ରେନ୍‌ ମୁଖିଆ ହଡ଼କକେ ହିଜୁଃନାଙ୍ଗ୍‌ ନେଅଁତାକେଦ୍‌କଆଏ। 3 ଏନାତେ ରାଜା ନେବୁଖଦ୍‌ନେଜର୍‌ ବାଇୟାକାଦ୍‌ ମୁରୁତ୍‌କେ ସାଂସ୍‌କାର୍‌ ରିକା ନାଙ୍ଗ୍‌ ରାଇଜ୍‌ତାନ୍‌କ, ଲାଟ୍‌ସାହେବ୍‌କ, ଦିଶୁମ୍‌ ରାଇଜ୍‌ତାନ୍‌କ, ସେଣାଁ ଉଦୁବ୍‌କ, ଖୁର୍ଜି ହିସାବ୍‌କ, ବିଚାର୍‌ତାନ୍‌କ, ମାରାଙ୍ଗ୍‌ ଲାଟ୍‌ସାହେବ୍‌କ ଓଡ଼ୋଃ ଏଟାଃ ଏଟାଃ ପାର୍‌ଗାନ୍‌ରେନ୍‌ ମୁଖିଆ ହଡ଼କ ହିଜୁଃକେଦ୍‌ତେ ଏନ୍‌ ମୁରୁତ୍‌ରାଃ ଆୟାର୍‌ରେ ତିଙ୍ଗୁୟାନାକ। 4 ଏନ୍ତେ ହାତୁରେନ୍‌ ଚାପ୍‌ରାସି କାଉରିକେଦ୍‌ତେ କାଜିକେଦା, "ହେ ସବେନ୍‌ କିଲିକ, ସବେନ୍‌ ଝୁଣ୍ଡ୍‌କ ଓଡ଼ୋଃ ଏଟାଃ ଏଟାଃ ଜାଗାର୍‌ତେ ଜାଗାର୍‌ତାନ୍‌ ସବେନ୍‌ ହଡ଼କ ଆପେକେ ହୁକୁମ୍‌ ଏମଃତାନା ଯେ, 5 ଚିମ୍‌ତା ଆପେ ବିଙ୍ଗୁଲ୍‌ବାଜା, ମୁର୍‌ଲି, ବାନାମ୍‌, କେନ୍ଦ୍‌ରା, ମୁର୍‌ଦୁଙ୍ଗ୍‌, ଢଲ୍‌କି ଓଡ଼ୋଃ ଦୁମାଙ୍ଗ୍‌ ଓଡ଼ୋଃ ସବେନ୍‌ ଲେକାନ୍‌ ବାଜାରାଃ ସାଡ଼ି ଆୟୁମେୟାଁପେ ଇମ୍‌ତା, ରାଜା ନେବୁଖଦ୍‌ନେଜର୍‌ ବାଇୟାକାଦ୍‌ ମୁରୁତ୍‌କେ ଅତେରେ ଅମ୍ବାକେଦ୍‌ତେ ଜହାରିପେ। 6 ଓଡ଼ୋଃ ଜେତାଏ ଇନିଃକେ ଅତେରେ ଅମ୍ବାକେଦ୍‌ତେ କାଏ ଜହାର୍‌ରିୟା, ଇନିଃକେ ଇମ୍‌ତାଗି ଜୁଲ୍‌ତାନ୍‌ ସେଙ୍ଗେଲ୍‌ ଭାଟିରେ ହୁରାଙ୍ଗ୍‌ଅଃଆ।" 7 ଏନାମେନ୍ତେ ବିଙ୍ଗୁଲ୍‌ବାଜା, ମୁର୍‌ଲି, ବାନାମ୍‌, କେନ୍ଦ୍‌ରା, ମୁର୍‌ଦୁଙ୍ଗ୍‌, ଢଲ୍‌କି, ଦୁମାଙ୍ଗ୍‌ ଓଡ଼ୋଃ ସବେନ୍‌ ଲେକାନ୍‌ ବାଜାରାଃ ସାଡ଼ି ଆୟୁମେୟାଁପେ ଇମ୍‌ତା, ସବେନ୍‌ କିଲିକ, ସବେନ୍‌ ଝୁଣ୍ଡ୍‌ରେନ୍‌ ହଡ଼କ ଓଡ଼ୋଃ ଏଟାଃ ଏଟାଃ ଜାଗାର୍‌ତେ ଜାଗାର୍‌ତାନ୍‌ ସବେନ୍‌ ହଡ଼କ, ରାଜା ନେବୁଖଦ୍‌ନେଜର୍‌ ବାଇୟାକାଦ୍ ମୁରୁତ୍‌କେ ଅତେରେ ଅମ୍ବାକେଦ୍‌ତେ ଜହାର୍‌କିୟାକ।

8 ଏନ୍‌ ଦିପିଲିରେ ଚିମିନ୍‌ କଲ୍‌ଦିୟ ହଡ଼କ ଆୟାର୍‌ତେ ହିଜୁଃକେଦ୍‌ତେ ଯିହୁଦି ହଡ଼କଆଃ ବିରୁଧ୍‌ରେ ହସଡ଼ କାଜିକ ଆଉକେଦା। 9 ଇନ୍‌କୁ ରାଜା ନେବୁଖଦ୍‌ନେଜର୍‌କେ କାଜିକିୟାକ, "ହେ ରାଜା, ଆମ୍‌ ଜାନାଅଗି ତାଇନଃମେଁ ! 10 ହେ ରାଜା, ଆମ୍‌ ହୁକୁମ୍‌ ଜାରିକାଦ୍‌ ତାଇକେନାମ୍‌ ଯେ, ବିଙ୍ଗୁଲ୍‌ବାଜା, ମୁର୍‌ଲି, ବାନାମ୍‌, କେନ୍ଦ୍‌ରା, ମୁର୍‌ଦୁଙ୍ଗ୍‌, ଢଲ୍‌କି, ଦୁମାଙ୍ଗ୍‌ ଓଡ଼ୋଃ ସବେନ୍‌ ଲେକାନ୍‌ ବାଜାରାଃ ସାଡ଼ି ଆୟୁମେୟାଁପେ ଇମ୍‌ତା ସବେନ୍‌କ ଅତେରେ ଅମ୍ବାକେଦ୍‌ତେ ଏନ୍‌ ସୋନାରାଃ ମୁରୁତ୍‌କେ ଜହାରିପେ। 11 ଓଡ଼ୋଃ ଜେତାଏ ମୁରୁତ୍‌କେ ଅତେରେ ଅମ୍ବାକେଦ୍‌ତେ କାଏ ଜହାରିୟା, ଇନିଃକେ ସେଙ୍ଗେଲ୍‌ ଜୁଲ୍‌ତାନ୍‌ ଭାଟିରେ ହୁରାଙ୍ଗ୍‌ଅଃଆ। 12 ମେନ୍‌ଦ ନେତାଃରେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ ନୁତୁମ୍‌ ଚିମିନ୍‌ ଯିହୁଦି ହଡ଼କ ମେନାକଆ, ଅକନ୍‌କକେ ଆମ୍‌ ବାବିଲୋନ୍‌ ପାର୍‌ଗାନ୍‌ରେ କାମିରାଃ ବାହାରମ୍‌ ଏମାକାଦ୍‌କଆମ୍‌, ହେ ରାଜା, ଏନ୍‌ ହଡ଼କ ଆମାଃ ଜାରିକାଦ୍‌ ହୁକୁମ୍‌କେ କାକ ମାନାତିଙ୍ଗ୍‌କେଦା। ଇନ୍‌କୁ ଆମ୍‌ ବାଇୟାକାଦ୍‌ ସୋନାରାଃ ମୁରୁତ୍‌କେ କାକ ସେୱାଇ ତାନା ଚାଏ କାକ ଜହାରି ତାନା।"

13 ରାଜା ନେବୁଖଦ୍‌ନେଜର୍‌ ପୁରାଃଗି ଖିସ୍‌ୟାନା ଏନ୍ତେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋକେ କେଡ଼ାଆଉ ନାଗେନ୍ତେ ହୁକୁମ୍‌ ଏମ୍‌କେଦାଏ। ଏନ୍ତେ ଆପି ହଡ଼କକେ ରାଜାରାଃ ହେପାଦ୍‌ତେ ଆଉକେଦ୍‌କଆକ। 14 ରାଜା ନେବୁଖଦ୍‌ନେଜର୍‌ ଇନ୍‌କୁକେ କାଜିକେଦ୍‌କଆ, "ହେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ, ଆପେ ଆଇଁୟାଃ ବାଇୟାକାନ୍ ସୋନାରେୟାଃ ମୁରୁତ୍‌କେ କାପେ ସେୱାଇ ତାନା ଚାଏ କାପେ ଜହାରି ତାନା, ନେ କାଜି ସାର୍‌ତିତାନାଃଚି ? 15 ନାହାଁଃ ବିଙ୍ଗୁଲ୍‌ବାଜା, ମୁର୍‌ଲି, ବାନାମ୍‌, କେନ୍ଦ୍‌ରା, ମୁର୍‌ଦୁଙ୍ଗ୍‌, ଢଲ୍‌କି, ଦୁମାଙ୍ଗ୍‌ ଓଡ଼ୋଃ ସବେନ୍‌ ଲେକାନ୍‌ ବାଜାରାଃ ସାଡ଼ି ଆୟୁମେୟାଁପେ ଇମ୍‌ତା, ଆଇଁୟାଃ ବାଇୟାକାନ୍ ସୋନାରେୟାଃ ମୁରୁତ୍‌କେ ଅତେରେ ଅମ୍ବାକେଦ୍‌ତେ ଜହାରି ନାଙ୍ଗ୍‌ ସେକାଡ଼େନ୍‌ ରେଦପେ ବୁଗିନ୍‌ କାଜି। ମେନ୍‌ଦ କାପେ ଜହାରି ରେଦ, ଇମ୍‌ତାଗି ଆପେକେ ଜୁଲ୍‌ତାନ୍‌ ସେଙ୍ଗେଲ୍‌ ଭାଟିରେ ହୁରାଙ୍ଗ୍‌ଅଃଆ, ଇମ୍‌ତା ଅକନ୍‌ ମାହାପୁରୁ ଆପେକେ ଆଇଁୟାଃ ତିଃଇଏତେ ବାଞ୍ଚାଅ ଦାଡ଼ିୟାପେୟାଏ ?"

16 ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ ରାଜାକେ କାଜିରୁହାଡ଼୍‌କିୟାକ, "ହେ ରାଜା ନେବୁଖଦ୍‌ନେଜର୍‌, ନେ ବିଷାଏରେ ଆମ୍‌କେ ଜେତ୍‌ନାଃ କାଜିରୁହାଡ଼୍‌ ନାଙ୍ଗ୍‌ ଆଲେୟାଃ ଜେତାନ୍‌ କାଜି ବାନଃଆ। 17 ହେ ରାଜା, ଆଲେକେ ଜୁଲ୍‌ତାନ୍‌ ସେଙ୍ଗେଲ୍‌ ଭାଟିରେ ହୁରାଙ୍ଗ୍‌ଅଃ ରେଦ, ଆଲେ ଅକ ଜୀନିଦ୍‌ ପାର୍‌ମେଶ୍ୱାର୍‌ଆଃ ସେୱା ରିକାତାନାଲେ, ଇନିଃ ଆଲେକେ ଏନ୍‌ ଜୁଲ୍‌ତାନ୍‌ ସେଙ୍ଗେଲ୍‌ ଭାଟିଏତେ ବାଞ୍ଚାଅ ଦାଡ଼ିନିଃ ତାନିଃ। ଓଡ଼ୋଃ ଇନିଃ ଆଲେକେ ଆମାଃ ତିଃଇଏତେ ହଗି ବାଞ୍ଚାଅ ଦାଡ଼ିୟାଏ। 18 ମେନ୍‌ଦ ଆଲେ ଆମ୍‌କେ ଉଦୁବ୍‌ ନାଙ୍ଗ୍‌ ସାନାଙ୍ଗ୍‌ତାନାଲେ ଯେ, ଇନିଃ ଆଲେକେ କାଏ ବାଞ୍ଚାଅଲେରେୟଗି, ଆଲେ ଆମାଃ ସୋନାରେନ୍‌ ମୁରୁତ୍‌କେ କାଲେ ସେୱାଇୟା ଓଡ଼ୋଃ ଅତେରେ ଅମ୍ବାକେଦ୍‌ତେ କାଲେ ଜହାର୍‌ରିୟା, ଏନା ଆମ୍‌ ସାରିମେ।"

19 ଏନ୍ତେ ରାଜା ନେବୁଖଦ୍‌ନେଜର୍‌ ପୁରାଃଗି ଖିସ୍‌ତେ ପେରେଃୟାନା ଏନ୍ତେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ ନାଗେନ୍ତେ ଆୟାଃ ମନ୍‌ରେ ଅକ ଉଡ଼ୁଃ ତାଇକେନା, ଏନା ବାଦ୍‌ଲାଅୟାନା। ଏନାତେ ଜୁଲ୍‌ତାନ୍‌ ସେଙ୍ଗେଲ୍‌ ଭାଟି ଚିମିନାଙ୍ଗ୍‌ ଜୁଲଃରାଃକାଜି ଏନାଏତେ ଏୟା ଗୁନ୍‌ ଆଦ୍‌କା ଜୁଲ୍‌ ନାଗେନ୍ତେ ଇନିଃ ହୁକୁମ୍‌ ଏମାଦ୍‌କଆଏ। 20 ଓଡ଼ୋଃ ଇନିଃ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ, ନେ ଆପି ହଡ଼କକେ ତଲ୍‌କେଦ୍‌ତେ ଜୁଲ୍‌ତାନ୍‌ ସେଙ୍ଗେଲ୍‌ ଭାଟିରେ ହୁରାଙ୍ଗ୍‌ ନାଙ୍ଗ୍‌ ଆୟାଃ ସିପାଇକଏତେ ପୁରାଃ କେଟେୟାନ୍‌ ସିପାଇକକେ ହୁକୁମ୍‌କେଦ୍‌କଆ। 21 ଏନ୍‌ ଆପି ହଡ଼କକେ ଆକଆଃ ପାଏଜାମା, କୁର୍ତ୍ତା, ପାଗ୍‌ଡ଼ି ଓଡ଼ୋଃ ଏଟାଃ ଲିଜାଃ ତୁସିଙ୍ଗ୍‌କାନ୍‌ ତାଇନ୍‌କେଦ୍‌ତେଗି ଜୁଲ୍‌ତାନ୍‌ ସେଙ୍ଗେଲ୍‌ରେ ହୁରାଙ୍ଗ୍‌ କେଦ୍‌କଆକ। 22 ରାଜା ପୁରାଃଗି କେଟେଦ୍‌ ହୁକୁମ୍‌ ଏମାକାଦ୍‌ ତାଇନ୍‌କେନାଏ, ଓଡ଼ୋଃ ଜୁଲ୍‌ତାନ୍‌ ସେଙ୍ଗେଲ୍‌ ଭାଟିହଁ ପୁରାଃଗି ଏଲାଙ୍ଗ୍‌ ତାଇକେନା। ଅକନ୍‌ ହଡ଼କ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋକେ ଉଠାଅକେଦ୍‌ତେ ହୁରାଙ୍ଗ୍‌କେଦ୍‌କଆକ, ଇନ୍‌କୁ ଏଲାଙ୍ଗ୍‌ତେ ଗଏଃୟାନାକ। 23 ଏନ୍ତେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ, ନେ ଆପି ହଡ଼କକେ ତଲ୍‌କେଦ୍‌ତେଗି ଜୁଲ୍‌ତାନ୍‌ ସେଙ୍ଗେଲ୍‌ ଭାଟିରେ ହୁରାଙ୍ଗ୍‌କେଦ୍‌କଆକ।

24 ଏନ୍ତେ ରାଜା ନେବୁଖଦ୍‌ନେଜର୍‌ ଆକ୍‌ଦାନ୍ଦାଅୟାନ୍‌ଲଃ ଆୟାଃ ଦୁବାକାନ୍‌ତାଃଏତେ ଇମ୍‌ତାଗି ବିରିଦ୍‌ୟାନା ଓଡ଼ୋଃ ଆୟାଃ କାମିତାନ୍‌ ମାପ୍‌ରାଙ୍ଗ୍‌ ହଡ଼କକେ କୁଲିକେଦ୍‌କଆ, "ଆବୁ ଚିନାଃ ଆପି ହଡ଼କକେ ତଲ୍‌କେଦ୍‌ତେ ସେଙ୍ଗେଲ୍‌ରେ କାବୁ ହୁରାଙ୍ଗ୍‌ ?"

ଇନ୍‌କୁ ରାଜାକେ କାଜିରୁହାଡ଼୍‌କିୟାକ, "ହେ ରାଜା, ସାର୍‌ତି କାଜି।"

25 ରାଜା କାଜିରୁହାଡ଼୍‌କେଦ୍‌କଆଏ, "ନେଲେପେ, ଆଇଙ୍ଗ୍‌ ଜୁଲ୍‌ତାନ୍‌ ସେଙ୍ଗେଲ୍‌ରେୟାଃ ଥାଲାରେ ଉପୁନିୟା ହଡ଼କକେ ହନର୍‌ବାଡ଼ାତାନ୍‌ ନେଲ୍‌କତାନାଇଙ୍ଗ୍‌। ଇନ୍‌କୁଆଃ ତନଲ୍‌ ରାଡ଼ାକାନା ଓଡ଼ୋଃ ଜେତ୍‌ନାଃ କା ହବାକାନା। ଉପୁନିୟା ହଡ଼ରାଃ ମୁରୁତ୍‌ ପାର୍‌ମେଶ୍ୱାର୍‌ଆଃ ହନ୍‌ ଲେକା ନେଲଃତାନା।"

26 ଇମ୍‌ତା ନେବୁଖଦ୍‌ନେଜର୍‌ ଜୁଲଃତାନ୍‌ ସେଙ୍ଗେଲ୍‌ରେୟାଃ ଦୁହାର୍‌ ହେପାଦ୍‌ ସେନ୍‌କେଦ୍‌ତେ କାଉରିକେଦ୍‌ଲଃ କାଜିକେଦାଏ, "ହେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ, ସବେନାଃଏତେ ପେଡ଼େୟାନ୍‌ ପାର୍‌ମେଶ୍ୱାର୍‌ଆଃ ଦାସିକ ଅଡଙ୍ଗ୍‌କେଦ୍‌ତେ ନେତାଃତେ ହିଜୁଃପେ।" ଏନ୍ତେ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ ଏନ୍‌ ଜୁଲଃତାନ୍‌ ସେଙ୍ଗେଲ୍‌ରେୟାଃ ଭାଟିଏତେ ବାହାରି ଅଡଙ୍ଗ୍‌ୟାନାକ। 27 ଏନ୍ତେ ରାଇଜ୍‌ ଚାଲାଅତାନ୍‌କ, ଲାଟ୍‌ସାହେବ୍‌, ମାରାଙ୍ଗ୍‌ ଲାଟ୍‌ସାହେବ୍‌ ଓଡ଼ୋଃ ରାଜାରାଃ କାମିତାନ୍‌ ମାପ୍‌ରାଙ୍ଗ୍‌ ହଡ଼କ ମିଦ୍‌ତାଃରେ ହୁଣ୍ଡିକେଦ୍‌ତେ ଏନ୍‌ ଆପି ହଡ଼କକେ ନେଲ୍‌କେଦ୍‌କଆକ ଯେ, ସେଙ୍ଗେଲ୍‌ରେ ଇନ୍‌କୁଆଃ ହଡ଼୍‌ମ ଜେତ୍‌ନାଃ ନକ୍‌ସାନ୍‌ କା ହବାକାନା। ଇନ୍‌କୁଆଃ ବହଃରାଃ ଉବ୍‌ହଗି କା ଅଣ୍ଡର୍‌କାନା ଚାଏ ଇନ୍‌କୁଆଃ ତୁସିଙ୍ଗ୍‌ ଲିଜାଃ ଜେତ୍‌ନାଃ କା ହବାକାନା ଓଡ଼ୋଃ ସୁକୁଲ୍‌ରାଃ ସହାନ୍‌ ହଗି ଇନ୍‌କୁତାଃରେ କା ଆଟ୍‌କାର୍‌ୟାନା।

28 ରାଜା ନେବୁଖଦ୍‌ନେଜର୍‌ କାଜିକେଦାଏ, "ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋରାଃ ପାର୍‌ମେଶ୍ୱାର୍‌ ଧାଇନ୍‌ ହବାଅଃକାଏ। ଇନିଃ ଆୟାଃ ଦୁଁତ୍‌କକେ କୁଲ୍‌କେଦ୍‌ତେ ଆଇଃକ୍‌କେ ବିଶ୍ୱାସ୍‌ତାନ୍‌ ଦାସିକକେ ବାଞ୍ଚାଅକେଦ୍‌କଆ। ଇନ୍‌କୁ ପାର୍‌ମେଶ୍ୱାର୍‌ତାଃରେ ବିଶ୍ୱାସ୍‌କେଦ୍‌ତେ ରାଜା ଜାରିକାଦ୍‌ ହୁକୁମ୍‌କେ କାକ ମାନାତିଙ୍ଗ୍‌କେଦା ଓଡ଼ୋଃ ଆକଆଃ ପାର୍‌ମେଶ୍ୱାର୍‌ ବାଗିକେଦ୍‌ତେ ଏଟାଃ ଜେତାନ୍‌ ମୁରୁତ୍‌କେ ଜହାର୍‌ ଚାଏ ସେୱା କା ରିକାକେଦ୍‌ ହରାତେ ଇନ୍‌କୁ ଆକଆଃ ଜୀଉ ଏମ୍‌ ନାଗେନ୍ତେ ହଗି ସେକାଡ଼ାକାନ୍‌ ତାଇକେନାକ।"

29 ଏନାମେନ୍ତେ ଆଇଙ୍ଗ୍‌ ହୁକୁମ୍‌ ଏମେତାନାଇଙ୍ଗ୍‌, "ସବେନ୍‌ କିଲିକ, ସବେନ୍‌ ଝୁଣ୍ଡ୍‌ରେନ୍‌ ହଡ଼କ ଓଡ଼ୋଃ ଏଟାଃ ଏଟାଃ ଜାଗାର୍‌ତେ ଜାଗାର୍‌ତାନ୍‌ ସବେନ୍‌ ହଡ଼କ, ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋରାଃ ପାର୍‌ମେଶ୍ୱାର୍‌ଆଃ ବିରୁଧ୍‌ରେ ଜେତାଏ ଜେତ୍‌ନାଃ କାଜିୟାକ ରେଦ, ଇନ୍‌କୁକେ ଟୁକ୍‌ଡ଼ା ଟୁକ୍‌ଡ଼ା ମାଗଃଆ ଓଡ଼ୋଃ ଇନ୍‌କୁଆଃ ଅଡ଼ାଃ ଗୁରିଃକ୍‌ ଗାଡା ଲେକା ହବାଅଃଆ। ଚିୟାଃଚି ନେ'ଲେକା ବାଞ୍ଚାଅ ରିକାନାଙ୍ଗ୍‌ ଜେତାନ୍‌ ମାହାପୁରୁ ବାଙ୍ଗ୍‌କଆ।"

30 ଏନ୍ତେ ରାଜା ନେବୁଖଦ୍‌ନେଜର୍‌ ଶଦ୍ରକ୍‍, ମୈଶକ୍‍ ଓଡ଼ୋଃ ଅବେଦ୍‍ନଗୋ, ନେ ଆପି ହଡ଼କକେ ବାବିଲୋନ୍‌ ପାର୍‌ଗାନ୍‌ରେ ଆଡଃଗି ମାରାଙ୍ଗ୍‌ ଆକ୍‌ତେୟାର୍‌ ଏମାଦ୍‌କଆଏ।