ଦାନିୟେଲ୍ ଆୟାଃ ହଡ଼କ ନାଗେନ୍ତେ ବିନ୍ତି
1 ମିଦିୟ କିଲିରେନ୍ ଅକ୍ଷଶ୍ୱେରଶ୍ଆଃ ହନ୍ତେକଡ଼ା ଦାରିୟାବସ୍ କଲ୍ଦିୟ ପାର୍ଗାନ୍ରେନ୍ ରାଜା ହବାୟାନ୍ ପାହିଲା ବାରାଷ୍ରେ ହବାକାନ୍ କାଜି। 2 ଇନିୟାଃ ରାଇଜ୍ରେୟାଃ ପାହିଲା ବାରାଷ୍ରେ ଆଇଙ୍ଗ୍ ଦାନିୟେଲ୍ ପୁଥିଏତେ ନେଆଁ ସାରିକେଦାଇଙ୍ଗ୍ ଯେ, ଯିରିମିୟ ନାବୀକେ ଉଦୁବାକାନ୍ ପ୍ରାଭୁଆଃ ବାଚାନ୍ ଲେକାତେ ଯୀରୁଶାଲେମ୍ ଜିୟନଃରେୟାଃ ଆପିହିସି ଗେଲ୍ ବାରାଷ୍ ଜାକେଦ୍ ତାଇନାଃ। 3 ଏନାମେନ୍ତେ ଆଇଙ୍ଗ୍ କାଟାବ୍କେଦାଇଙ୍ଗ୍, ବାସ୍ତା ତୁସିଙ୍ଗ୍ୟାଁନାଇଙ୍ଗ୍ ଓଡ଼ୋଃ ତରେକ୍ ଗସଃକେଦ୍ତେ ପ୍ରାଭୁ ପାର୍ମେଶ୍ୱାର୍ସାଃତେ ନେଲ୍କେଦାଇଙ୍ଗ୍ ଓଡ଼ୋଃ ବିନ୍ତିକେଦ୍ତେ କାଜିଗହାର୍ କିୟାଇଙ୍ଗ୍। 4 ଆଇଙ୍ଗ୍ ଆଇଁୟାଃ ପ୍ରାଭୁ ପାର୍ମେଶ୍ୱାର୍ତାଃରେ ବିନ୍ତିକେଦ୍ତେ ପାପ୍ ହେୟାତିଙ୍ଗ୍ କେଦାଇଙ୍ଗ୍।
"ହେ ପ୍ରାଭୁ ଆମ୍ ପୁରାଃ ମାରାଙ୍ଗ୍ ଓଡ଼ୋଃ ବରୱାନ୍ ପାର୍ମେଶ୍ୱାର୍ ତାନ୍ମେ, ଅକନ୍କ ଆମ୍କେ ଦୁଲାଡ଼୍ ରିକାଃକ ଓଡ଼ୋଃ ଆମାଃ ଆନ୍ଚୁ ମାନାତିଙ୍ଗ୍ୟାଁଃକ, ଇନ୍କୁଲଃ ଆମ୍ ଆମାଃ ଦୁଲାଡ଼୍ରାଃ ରାଜିନାମା ବାଞ୍ଚାଅ ରିକାଃମେ।
5 "ମେନ୍ଦ ଆଲେ ଆମାଃ ବିରୁଧ୍ରେ ପାପ୍ କାମିକ, ଭୁଲ୍ କାମିକ ଓଡ଼ୋଃ ଏତ୍କାନ୍ କାମିକ ରିକାକେଦ୍ତେ ମାପାଃତୁପୁଇଙ୍ଗ୍ ହଡ଼କ ହବାକାନାଲେ। ଆମ୍ ଆଲେକେ ଅକ୍ନାଃ ରିକା ନାଙ୍ଗ୍ ଆଚୁକାଦ୍ଲେ ତାଇକେନାମ୍, ଏନା କାଲେ ରିକା ଓଡ଼ୋଃ ଅକ୍ନାଃ ବୁଗିନାଃ ତାନାଃ ମେନ୍ତେ ଉଦୁବାକାଦ୍ଲେ ତାଇକେନାମ୍, ଏନା ବାଗିକାଦାଲେ। 6 ଆଡଃଗି ଆମାଃ ଦାସି ନାବୀକ, ଆଲେୟାଃ ରାଜାକକେ, ରାଇଜ୍ତାନ୍କକେ, ପୁର୍ଖାହାଡ଼ାମ୍କକେ ଓଡ଼ୋଃ ଦିଶୁମ୍ରେନ୍ ସବେନ୍ ହାକିମ୍କକେ ଆମାଃ ନୁତୁମ୍ତେ କାଜିକ ଜାଗାର୍କେଦା, ଆଲେ ଏନାକେ କାଲେ ଆୟୁମ୍କେଦା।" 7 "ହେ ପ୍ରାଭୁ, ଆମ୍ ଅକ୍ନାଃ ବୁଗିନାଃ ଏନା ରିକାଃମେ, ମେନ୍ଦ ଆଲେ ସବେନ୍ ଯିହୁଦାରେନ୍, ଯୀରୁଶାଲେମ୍ରେନ୍, ଇସ୍ରାଏଲ୍ରେନ୍ ଓଡ଼ୋଃ ଆମାଃଲଃ କା ପାତିୟାର୍ରଃ ଲେକା ତାଇନ୍ ହରାତେ ଆଲେ ହେପାଦ୍ ଓଡ଼ୋଃ ସାଙ୍ଗିନ୍ ଦିଶୁମ୍ରେ ନେତେହାନ୍ତେକାନ୍ ସବେନ୍ ହଡ଼କ ତିସିଙ୍ଗ୍ ଗିହୁଗାକାନାଲେ। 8 ହେ ପ୍ରାଭୁ, ଆଲେ, ଆଲେୟାଃ ରାଜା, ହାକିମ୍କ ଓଡ଼ୋଃ ପୁର୍ଖାହାଡ଼ାମ୍କ ଆମାଃ ବିରୁଧ୍ରେ ପାପ୍ କାମିକ ରିକାକେଦ୍ତେ ଗିହୁଗାକାନାଲେ।" 9 "ଆଲେ ଆଲେୟାଃ ପ୍ରାଭୁ ପାର୍ମେଶ୍ୱାର୍ଆଃ ବିରୁଧ୍ରେ ମାପାଃତୁପୁଇଙ୍ଗ୍ କାମି ରିକାକାଦ୍ରେୟ, ଇନିଃ ଦାୟା ରିକାତାନ୍ନିଃ ଓଡ଼ୋଃ ଛାମା ଏମଃନିଃ ତାନିଃ। 10 ଆଲେ ଆଲେୟାଃ ପ୍ରାଭୁ ପାର୍ମେଶ୍ୱାର୍ଆଃ କାଜି କାଲେ ମାନାତିଙ୍ଗ୍କାଦା, ଚାଏ ଇନିୟାଃ ଦାସି ନାବୀକଆଃ ହରାତେ ଆଲେକେ ଏମାକାନ୍ ଆନ୍ଚୁକେ କାଲେ ମାନାତିଙ୍ଗ୍କାଦା।" 11 ସବେନ୍ ଇସ୍ରାଏଲ୍ କିଲି ଆମାଃ ଆନ୍ଚୁକେ ଟଟାଃକାଦା ଓଡ଼ୋଃ ଆମାଃ କାଜି କା ମାନାତିଙ୍ଗ୍ ନାଙ୍ଗ୍ ଏଟାଃ ହରାରେ ସେନାକାଦା। ଏନାମେନ୍ତେ ପାର୍ମେଶ୍ୱାର୍ଆଃ ଦାସି ମୁଶାରାଃ ଆନ୍ଚୁରେ ଅଲାକାନ୍ ସାର୍ପାଅ ଓଡ଼ୋଃ କିରିୟାକେଦ୍ତେ କାଜିକାଦ୍ ସାଜାଇକ ଆଲେୟାଃ ଚେତାନ୍ରେ ହିଜୁଃକାନା। ଚିୟାଃଚି ଆଲେ ଆମାଃ ବିରୁଧ୍ରେ ପାପ୍ କାମି ରିକାକେଦାଲେ। 12 ଆଲେୟାଃ ଚେତାନ୍ରେ ପୁରାଃ ସାଙ୍କାଟ୍ ଆଉକେଦ୍ତେ ଆମ୍ ଆଲେୟାଃ ବିରୁଧ୍ରେ ଓଡ଼ୋଃ ଆଲେୟାଃ ରାଇଜ୍ ଚାଲାଅ ତାନ୍କଆଃ ବିରୁଧ୍ରେ କାଜିକାଦ୍ ଆମାଃ କାଜିକେ ପୁରାକାଦାମ୍। ଚିୟାଃଚି ଯୀରୁଶାଲେମ୍ ଚେତାନ୍ରେ ଅକ୍ନାଃ ରିକାକାନା, ଏନ୍ଲେକା ଗଟା ଅତେଦିଶୁମ୍ରେ କା ରିକାକାନା। 13 ମୁଶା ଅଲାକାଦ୍ ଆନ୍ଚୁରେ ଅଲାକାନ୍ ଲେକାଗି, ନେ ସବେନ୍ ସାଜାଇ ଆଲେ ଚେତାନ୍ରେ ହିଜାକାନା। ଏନ୍ରେୟ ଆଲେ ଆଲେୟାଃ ସେଣାଁତେ ପାପ୍ଏତେ କାଲେ ରୁହାଡ଼୍କାନା ଓଡ଼ୋଃ ଆମାଃ ସାନାର୍ତିକେ ଆଟ୍କାର୍ଉରୁମ୍ ନାଙ୍ଗ୍ ପ୍ରାଭୁ ପାର୍ମେଶ୍ୱାର୍ତାଃରେ କାଲେ ବିନ୍ତିକାଦା। 14 ଏନାମେନ୍ତେ ପ୍ରାଭୁ ଆଲେ ନାଗେନ୍ତେ ଅକ ସାଜାଇ ଦହକାଦ୍ ତାଇକେନାଏ, ଏନା ଆଲେୟାଃ ଚେତାନ୍ରେ ହବାକାନା। ଚିୟାଃଚି ପ୍ରାଭୁ ପାର୍ମେଶ୍ୱାର୍ ଆୟାଃ ସବେନ୍ କାମିରେ ଧାର୍ମାନ୍ନିଃ ତାନିଃ, ମେନ୍ଦ ଆଲେ ଇନିୟାଃ କାଜି କାଲେ ମାନାତିଙ୍ଗ୍କେଦା।
15 ହେ ପ୍ରାଭୁ, ଆଲେୟାଃ ପାର୍ମେଶ୍ୱାର୍, ଆମ୍ ଆମାଃ ପେଡ଼େୟାନ୍ ତିଃଇ ହରାତେ ଆମାଃ ହଡ଼କକେ ମିସାର୍ ଦିଶୁମ୍ଏତେ ଅଡଙ୍ଗ୍କେଦ୍ତେ ଆଉକେଦ୍କଆମ୍ ଓଡ଼ୋଃ ଆମାଃ ପେଡ଼େଃକେ ଉଦୁବ୍କେଦାମ୍, ଅକଆଃଚି ତିସିଙ୍ଗ୍ ଜାକେଦ୍ ପାହାମଃତାନା। ଆଲେଦ ପାପ୍ ରିକା କାଦାଲେ ଓଡ଼ୋଃ ଆମାଃ ବିରୁଧ୍ରେ ଏତ୍କାନ୍ କାମିକ ରିକା କାଦାଲେ। 16 ହେ ପ୍ରାଭୁ, ବିନ୍ତିମେତାନାଇଙ୍ଗ୍, ଆମାଃ ସବେନ୍ ଧାର୍ମାନ୍ ଲେକାତେ, ଆମାଃ ନାଗାର୍ ଯୀରୁଶାଲେମ୍ ଓଡ଼ୋଃ ଆମାଃ ପାବିତାର୍ ବୁରୁସାଃଏତେ ଆମାଃ ପୁରାଃ ଖିସ୍କେ ରୁହାଡ଼େମେ। ଚିୟାଃଚି ଆଲେୟାଃ ପାପ୍ ଓଡ଼ୋଃ ଆଲେୟାଃ ପୁର୍ଖାହାଡ଼ାମ୍କଆଃ କା ଧାର୍ମାନ୍ ହରାତେ ଯୀରୁଶାଲେମ୍ ଓଡ଼ୋଃ ଆମାଃ ହଡ଼କ, ଆଲେୟାଃ ଚାରିଓସାଃରେନ୍ ହଡ଼କଆଃ ନିନ୍ଦାଅଃ ଲେକାଲେ ହବାକାନା। 17 "ହେ ଆଲେୟାଃ ପାର୍ମେଶ୍ୱାର୍, ନାହାଁଃ ଆମାଃ ଦାସିରାଃ ବିନ୍ତି ଓଡ଼ୋଃ କାଜିଗହାର୍ ଆୟୁମେମେ। ହେ ପ୍ରାଭୁ ଆମାଃ ଅକ ପାବିତାର୍ ନାଗାର୍ ଜିୟନ୍କାନା, ଏନାକେ ବାଇରୁହାଡ଼େମେ ଜେ’ଲେକାଚି ସବେନ୍ ହଡ଼କ ସାରିୟା ଯେ, ଆମ୍ ପାର୍ମେଶ୍ୱାର୍ ତାନ୍ମେ। 18 ହେ ପାର୍ମେଶ୍ୱାର୍, ଆଲେୟାଃ କାଜିଗହାର୍ ଆୟୁମେମେ ଓଡ଼ୋଃ ଆଲେକେ ଆରିଦ୍ଲେମେ। ଆମାଃ ନୁତୁମ୍ତେ ସାରିୟଃତାନ୍ ନେ ମାରାଙ୍ଗ୍ ନାଗାର୍କେ ନେଲେମେ। ଆଲେୟାଃ ଧାର୍ମାନ୍ ନାଗେନ୍ତେ କାହାଗି ମେନ୍ଦ ଆମାଃ ମାରାଙ୍ଗ୍ ଦାୟା ନାଗେନ୍ତେ ବିନ୍ତିମେ ତାନାଲେ। 19 ହେ ପ୍ରାଭୁ, ଆୟୁମେମେ ଓଡ଼ୋଃ ଆଲେକେ ଛାମା ଏମାଲେମ୍। ହେ ପ୍ରାଭୁ ଆୟୁମେମେ ଓଡ଼ୋଃ ଆମାଃ କାମିକ ରିକାଏମେ। ହେ ଆଇଁୟାଃ ପାର୍ମେଶ୍ୱାର୍ ଆଲମ୍ ବିଲାମେୟା, ଆମାଃ ନୁତୁମ୍ ନାଗେନ୍ତେ କାମିକେ ରିକାଏମେ। ଚିୟାଃଚି ଆମାଃ ନାଗାର୍ ଓଡ଼ୋଃ ଆମାଃ ହଡ଼କ ଆମାଃ ନୁତୁମ୍ତେ ସାରିୟଃତାନାକ।"
ଗାବ୍ରିଏଲ୍ଆଃ କାନାଜି
20 ନେ’ଲେକାତେ ଆଇଙ୍ଗ୍ ଚିମ୍ତା ଜାଗାର୍ ଓଡ଼ୋଃ କାଜିଗହାର୍ ତାଇକେନାଇଙ୍ଗ୍, ଆଇଁୟାଃ ପାପ୍ ଓଡ଼ୋଃ ଇସ୍ରାଏଲ୍ରେନ୍ ଆଇଁୟାଃ ହଡ଼କ ପାପ୍ ରିକାକାଦାକ ମେନ୍ତେ ହେୟାତିଙ୍ଗ୍ ତାଇକେନାଇଙ୍ଗ୍, ଓଡ଼ୋଃ ଆଇଁୟାଃ ପ୍ରାଭୁ ପାର୍ମେଶ୍ୱାର୍ଆଃ ପାବିତାର୍ ବୁରୁ ନାଗେନ୍ତେ ଇନିଃତାଃରେ କାଜିଗହାର୍ତାନ୍ଲଃ ବିନ୍ତିକେଦାଇଙ୍ଗ୍, 21 ନେ’ଲେକାତେ ଆଇଙ୍ଗ୍ ବିନ୍ତି ତାଇକେନ୍ ଇମ୍ତାଗି, ଅକଏକେଚି ସିଦାରେ ଆଇଙ୍ଗ୍ ଦାର୍ଶାନ୍ ହରାତେ ନେଲାକାଇ ତାଇକେନାଇଙ୍ଗ୍, ଏନ୍ ଗାବ୍ରିଏଲ୍ ସିଙ୍ଗିହାସୁର୍ରେୟାଃ ଦାନ୍ ରାକାବ୍ତାନ୍ ଇମ୍ତା ଆଇଁୟାଃତାଃ ଆଫିର୍କେଦ୍ତେ ହିଜୁଃୟାନା। 22 ଇନିଃ ଆଇଙ୍ଗ୍କେ ଇତୁକେଦ୍ତେ କାଜିକିୟାଁ, "ଦାନିୟେଲ୍, ଆଇଙ୍ଗ୍ ନାହାଁଃ ଆମ୍କେ କାଜିଆୟାର୍କାନ୍ କାଜିକେ ଆଟ୍କାର୍ଉରୁମ୍ରେୟାଃ ବୁଦ୍ଧି ସେଣାଁ ଏମ୍ ନାଗେନ୍ତେଇଙ୍ଗ୍ ହିଜୁଃକାନା। 23 ଆମ୍ କାଜିଗହାର୍ ଏଟେଦ୍କେଦ୍ ଇମ୍ତାରେଗି ଉତ୍ତାର୍ ଏମ୍ୟାନା, ଏନା ଆମ୍କେ ଉଦୁବ୍ ନାଗେନ୍ତେଇଙ୍ଗ୍ ହିଜୁକାନା, ଚିୟାଃଚି ଇନିଃ ଆମ୍କେ ପୁରାଃଗି ଦୁଲାଡ଼୍ମେ ତାନା। ଏନାମେନ୍ତେ ଆଇଙ୍ଗ୍ ନେ ଦାର୍ଶାନ୍ ଉଦୁବ୍ମେତାନ୍ ଇମ୍ତା ବୁଗିଲେକା ଆୟୁମେମେ ଓଡ଼ୋଃ ଆଟ୍କାର୍ଉରୁମେମେ।"
24 ମାପାଃତୁପୁଇଙ୍ଗ୍ ଟୁଣ୍ଡୁ ରିକା ନାଙ୍ଗ୍, ପାପ୍ କାମିକ ଟୁଣ୍ଡୁ ନାଙ୍ଗ୍, ପାପ୍ରାଃ ହେୟାତିଙ୍ଗ୍ ନାଙ୍ଗ୍, ଜାନାଅ ଜାନାଅରେୟାଃ ଧାରାମ୍ ଆଉ ନାଙ୍ଗ୍, ଦାର୍ଶାନ୍ ଓଡ଼ୋଃ ନାବୀକ ମୋହର୍ ରିକା ନାଙ୍ଗ୍, ପାବିତାର୍ନିଃକେ ଆଭିଷେକ୍ ରିକା ନାଙ୍ଗ୍ ଆମାଃ ହଡ଼କ ନାଙ୍ଗ୍ ଓଡ଼ୋଃ ପାବିତାର୍ ନାଗାର୍ ନାଙ୍ଗ୍ ଆପିହିସି ଗେଲ୍ ହାପ୍ତା ସାଲାକାନା। 25 ଏନାମେନ୍ତେ, ଆମାଃ ସେଣାଁତେ ନେଆଁ ସାରିମେ ଓଡ଼ୋଃ ଆଟ୍କାର୍ଉରୁମେମେ ଯେ, ଯୀରୁଶାଲେମ୍କେ ଆଡଃମିସା ବାଇରୁହାଡ଼୍ ନାଙ୍ଗ୍ ହୁକୁମ୍ ଜାରି ହବାଅଃ ହୁଲାଙ୍ଗ୍ତାଃଏତେ ଆଭିଷେକ୍କାନ୍ ହଡ଼ ଚାଏ ମାରାଙ୍ଗ୍ ଆଗୁଆଇରାଃ ହିନିଜୁଃ ଜାକେଦ୍ ଏୟା ହାପ୍ତା ହବାଅଃଆ ଓଡ଼ୋଃ ଆପିହିସି ବାର୍ ହାପ୍ତା ହବାଅଃଆ। ନେଆଁ ନାଗାର୍ରେୟାଃ ହରା ଓଡ଼ୋଃ ପୁରାଃ ପେଡ଼େୟାନ୍ ବାଞ୍ଚାଅତେୟାଃକ ଆଡଃମିସା ବାଇରୁହାଡ଼ଃଆ, ମେନ୍ଦ ନେଆଁ ପୁରାଃ ସାଙ୍କାଟ୍ ଦିପିଲିରେ ହବାଅଃଆ। 26 ଆପିହିସି ବାର୍ ହାପ୍ତା ତାୟମ୍ତେ ଏନ୍ ଆଭିଷେକ୍କାନ୍ ହଡ଼କେ ମାଆଃ ଗଜଃଆ ଓଡ଼ୋଃ ଜେତ୍ନାଃ କା ତାଇନାଃ। ହିଜୁଃତାନ୍ ମାରାଙ୍ଗ୍ ଆଗୁଆଇନିୟାଃ ହଡ଼କ ନାଗାର୍କେ ଓଡ଼ୋଃ ପାବିତାର୍ ନାଗାର୍କେ ଜିୟନ୍ ରିକାଏୟାକ। ଟୁଣ୍ଡୁ ଦିପିଲି ହୟଗାମା ଲେକା ହିଜୁଃଆ, ଟୁଣ୍ଡୁ ହବାଅଃ ଜାକେଦ୍ ମାପାଃତୁପୁଇଙ୍ଗ୍ ଓଡ଼ୋଃ ଲାଡ଼ାଇ ହବାଅଃଆ। ପୁରାଃଗି ଜିନିଷ୍କ ଜିୟନଃଆ ମେନ୍ତେ ଠାହାରାଅକାନା। 27 ଇନିଃ ପୁରାଃ ହଡ଼କଲଃ ମିଦ୍ ହାପ୍ତା ନାଗେନ୍ତେ ମିଆଁଦ୍ ପକ୍ତା ରାଜିନାମା ରିକାଏୟାଏ। ମେନ୍ଦ ଏନ୍ ମିଦ୍ ହାପ୍ତାରେୟାଃ ଆଧା ହାପ୍ତା ହବାଅଃ ଇମ୍ତା ଇନିଃ ଦାଣେଁରାକାବ୍ ଓଡ଼ୋଃ ଦାନ୍ ରାକାବ୍ ହକାତାଃଏ। ଜିୟନଃନିଃରାଃ ଚେତାନ୍ରେ ଠାହାରାଅକାନ୍ ଟୁଣ୍ଡୁ ଦାସା କା ହବାଅଃ ଜାକେଦ୍, ଇନିଃ ମାନ୍ଦିର୍ ଅଡ଼ାଃରେୟାଃ ମିଦ୍ସାଃରେ ହିଲାଙ୍ଗ୍ଅଃ ବିଷାଏକ ଦହୟାଏ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)