1 Adaaguagubeirügü wuribani leredera Ísüraeli,

sun weyu lau adaagua katei málati.

Gánwoungüda lumuti liyeeni luma lanarime,

adaaguati daradu luma Asiria

óunaha ligía edewehani le garaba lun Ehiptu».

2 Lageindaguña Aburemei luma Ísüraeli.

Labeichubaña Bungiu kei le ladünabei hóuserun.

3 Lubaragiñebei lágurahoun Hakobu,

ragǘ lumuti lubara líbugaña,

dan le wügürihali ageindaguati luma Bungiu.

4 Ageindaguati luma aban ánheli, aba lagañeiruni;

ayahuahati ayumuragua ligía lun, lun gudemehabu lan lun.

Dúnguati Bungiu luma Hakobu Beteli,

aba ladimurehan luma ñein.

5 Aburemei, Bungiu Suntigabafu,

ligía líribei!

6 Ítara liña lubeiti, Ísüraeli,

giribubá lun Bubungiute;

buadigimarida lau úarani,

hemenigibá luagu Bubungiute súnwandan.

7 Lariñahare Aburemei:

«Anihein balansu híweruti lúhaburugu Kanán,

ladüga hínsiñeti lun lun líweruhan.

8 Lariñahare Éfürain:

"Rísihadina, darihadina aban irisini;

gama lumoun úati ni aban gayaraati lariñagun

luagu lau lan marichaü nadarirei nirisin!"

9 Au le Aburemei, le Bubungiutebei lúmagiñe meha Ehiptugidibu lan,

nadügüba lunya baganóun tidan kianpu,

kei meha burí dan le lidaani wadunragun

lidan fulasu mageirawati.

10 «Adimurehatina houn profetagu

gánwoungüdanei hawenedü;

adimurehatina hádangiñe lau hénpulu.

11 Añahein búngiugu Galaadü,

gama lumoun búngiugu ha mama Bungiu hagía.

Afarúatiña bágasu Gilügáli lun adagaragüdüni;

ítara liña burí lani latarü

kei dübü óundarawaguti áraabu».

12 Anurahati meha Hakobu áraabun Aramü, nadagimeinti ñein óunigira mudún lun ladarirun lúmari. 13 Sagá lumutiña Aburemei Ísüraelina Ehiptugiñe lau aban profeta; góunigi lumutiña Bungiu lau profeta ligía.

14 Gáñigüda hamaali lánigu Éfürain Aburemei,

ligía lafayeiragüdübaña lubéi Aburemei luagu háfarahan,

lábürügüdübei hariban guánarügü hawagun.