1 «Fádirigu, aganba huméi katei le;

Ísüraelina, ru huméi harigei lun haganbun:

Huguyaba gadurun lidan guséi,

lugundun ítara hiña keisi aban sádara esetirútu Misüpá.

Aban seni to esetirútu luagu wübü Taworu,

2 kei aban fusu huliliti lidan lani Sitimü fulasu wayati.

Ligía nabeichubadün lubéi.

3 Subudi numuti Éfürain;

subudi numuti giñe Ísüraeli,

huduguaali Éfürain houn amu búngiugu; dáseihali Ísüraeli».

4 Mígirun lumutiña luriban hóuserun gürigia

lun hagiribudun lun Habungiute.

Le lueirin híchaagun houngua lun ahoruhani,

máhaaña lun Aburemei.

5 Arufuda lumuti hapantan Ísüraelina luagu gadurun hamá;

chugeguati Éfürain luagu luriban guánarügü,

ani íbini Hudá, lachugeraguba úara hama!

6 Hóudiba hau halügüniña bágasu hama halügüniña mudún

áluahei Aburemei gama lumoun madari habéi ladüga díreiha hawéi.

7 Múaraduntiña luma Aburemei,

ladüga garahüñütiña ha lirahüñü amu úguchili.

Ladüga magunfulin hamá,

lagumuchaguba hamúan lidan ábanrügü hati.

8 Win huméi ganchu le agúahabei lun wuribu uburugu Gibeá,

win humóun fidu uburugu Ramá!

Hawisaha uburugu Betü-awén!

Fúugüda humaña lílana Benhamín!

9 Nasubudiragüdüñein houn lani Ísüraeli türibu,

katei burí le lunbei lasuseredun lau achoururuni.

Lagünrinchawaguba Éfürain lidan luéyuri abeichúni.

10 Lariñahare Aburemei:

«Ítara haña lábutigu Hudá,

kei gürigia ha anaahabaña lanwoun hachari lídangiñe fadaguaü.

Gama lumoun nabuluchagüdübaña lau nigañi!

11 Libihiña Éfürain lidere dan dürüwaguati liricha,

ladüga rúguaali lungua lun hafalarún hagübüri búngiugu.

12 Ítara nuba kei hamutiri lun Éfürain,

kei añaladuni houn lánigu Hudá».

13 «Danme larihini Éfürain luagu sándiñein lan,

arihaleime Hudá biti burí le luágubei,

ábame lidin Éfürain Asiria amuriaha luma urúei lun líderaguni;

gama lumoun siñabei lareidaguagüdüni,

ni lagaranihan lun liwounun.

14 Kei aban liñún dan le lábürühan luagun lágani,

ítara luba nábürühan luagun Hudá luma Éfürain;

nagünrinchagubaña, lárigiñe ábame nidin;

nabayurubaña, ani úabei esefurutiña».

15 «Lárigiñe ábame nagiribudun lidoun nubara,

darime hánharun lun hafigoun ábame hayabin áluahana.

Háluahabadina lidan hadiheri!»