1 Ísüraeli, buguya le ábürühabei ladüga bifigoun,

giribubá lun Bubungiute!

2 Giribu humá lun Aburemei ariñageina humeime furíeigi le:

«Ferudunabéi sun wariban,

resibibéi weremuhan bun lau bareini.

3 Siñati lasalbaruniwa Asiria,

ni lun wanurahan gabayuagu.

Manügünhadiwa ni kata le wadüga lau wáhabu keisi Wabungiute,

ladüga buguyarügüñein gudemehabu houn méteñuhaña, Aburemei».

4 Lariñahare Aburemei:

«Nagaraniha houn lídangiñe hariban;

hínsiñebaña nun lau sun madüna hamani,

ladüga díreiha nigañi hawéi.

5 Ítara nuba lun Ísüraeli kei hemereedu,

ábame lafulurihan kei liriu,

derebugubei lílagüle kei wübü Líwanu;

6 buíduburibei lilimun kei lilimun oliwu,

ítara luba líhemen kei hibúari le Líwanuna.

7 Haganóuayaba Ísüraelina lábugiñe nóunigirun;

ábameti haweinamudun kei türigu,

hegelewehaba kei tídibu beibei,

dísebei laganbahoun hawagu

kei diwéin to Líwanuna.

8 Lariñaguba Éfürain:

"Meberesegúntina hau guáriuagu"

Au etenirubei houn numutuniña!

Ítara niña kei aban lídibu gudi hilumañu súnwandan,

ani hadarirubei numutuniña nin súnwandan».

9 Gunfuranda haméi chu tau hama buidu tichügü uganu le:

Suruburiti lémeri Aburemei,

ani falá hamuti ha richaguabaña;

ánhañati ha wuribabaña chugeguatiña luagu.