1 Ábameti hariñagun houn híbirigu:

«Lumutuniña Bungiu»,

hariñagame houn hítunu:

«Gudemewatiña».

2 Lariñahare Aburemei:

«Ru humá tidurun húguchu,

ru humá tidurun,

lugundun mámaaru númari,

mámaadina giñe túmari!

Hebé tarufudagun tungua keisi horu!

Gidataña tubúaligu taniguagugiñe!

3 Anhein madügün tan ítara,

nígiruboun surusu le gumuti:

Nígiruboun kei weyu le tagaraüdün,

nadügüboun ábanme fulasu mageirawati,

múa le mábeiti,

ábame nadügün lun láfarunu mágürabu.

4 Magudemehabubadina houn tirahüñü,

ladüga lirahüñüna lan tahoruhan.

5 Deregeguatu háguchu tungua lun ahoruhani;

"féridi tumuti tinebese dan le tariñagunbei:

Néibuga hárigi nubúaligu ha íchugubalin neigin

luma nuniñe duna nun, liyu mudún, linu, garaba tuma nuniñe diwéin".

6 «Ligía nadourubei lubéi témeri lau hiiyu,

níchuguba aban baríeiru geyegua tau lun madaritani témeri,

7 téibuguba hárigi tubúaligu gama lumoun márügüdüntubaña

táluahabaña gama lumoun madaritubaña.

Ábameti tariñagun:

"Nagiribuda lun furumiñeti númari,

buítimati meha dan nun luma luéi oura le".

8 «Gama lumoun máhatu buga tasubudiruni

luagu au lan íchugubei türigu, diwéin luma garaba tun,

au aganwoundagüdei pülata luma golu tun

le aubei tadaaguaña tubungiutegu.

9 Nagiribuduba lubeiti,

ábame nanügüni nitürigun tuma nuniñe diwéin

lidan lidaani alubahani,

barünéime nani liyu mudún tuma nani linu

to yebe níchuguboun tun lun tadouragun taugua.

10 Nasurusugüdüboun hagibugiñe tubúaligu.

Úabei ni aban esefurutu núhaburugugiñe!

11 Nagumuchaguagüdübei tugundan,

tefeduhan le irumuauti, le lánina sagü hati

luma burí luéyuri emeraaguni.

Sun tufedun nagumuchaguagüdübei.

12 Nagünrinchagubei tinadürigu beibei tuma igu,

to buga uáguboun tariñaga:

"Anihán fáyeiti le híchugubei nubúaligu nun".

Nadügübei ábame dabíara,

ábame héigini animaalugu áraabuna.

13 Nabeichaaru luagu dan le tásügürübei

águdaha kupali houn guáriuagu,

dan burí meha tewendedun lau burí bagü luma iñari,

lun tafalaruniña tubúaligu, lun tabulieidunina.

Au, le Aburemei ariñagubalin.

14 «Ligía nadarihaboun lubéi,

nanügüboun lidoun fulasu mageirawati

ábame nadimurehan tidoun tanigi.

15 Lárigiñe ábame náguyugüdüni tubeibein-agei tun,

ábame nadügüni fulasu wayati le lani asufuriruni

lubenarime emenigini tun.

Ñeinba tóunabana kei dan le meha nibureingiru,

kei lidan weyu le táfuridunbei Ehiptugiñe.

16 Ábameti tariñagun nun "Númari",

lubaragiñe tariñagun nun "Nabureme»".

Au, le Aburemei ariñagubalin.

17 Nagidarubei hiri búngiugu tiyumulugugiñe,

miridúnwadigiaañame.

18 «Lídanme dan ligía,

nadügüba aban daradu hama animaalugu áraabuna

luagu lufulesein Ísüraeli hama dunuru luma hama hewe;

nagidaruboun gimara, eféin luma wuribu lídangiñe ageiraü le,

lun haganóun numutuniña darangilu.

19 Ísüraeli, nadügübadibu númarime lun sun dan

buguyaba númari to tímatimaatu

keisi lariñaguni lúrudu,

ladüga wéiriti bínsiñe nun.

20 Nadügübadibu númarime ani nagunfuliruba buma,

ábameti basubudirunina keisi Babureme.

21 Nariñahare au, le Aburemei:

Lídanme dan ligía, nóunabubei sielu,

lóunabeime sielu múa;

22 lóunabeime múa türigu,

diwéin luma garaba,

lóunabeimeti sun katei le, Hesüreeli.

23 Nábunagubaña ninadürigume nábugua;

gudemehabubadina tun Lo-ruama,

nariñaguba lun Lo-amí:

"Nánigu buguya", lariñagame nun:

"Nubungiute buguya" ».