1 Ísüraelina, aganba huméi le lariñagubei Aburemei:

«Lagañiduña hama ha aganóubaña lidan fulasu le,

lugundun úaali inarüni hadan gürigia ha,

ni gúnfuli ni lisubudinwa Wabungiute.

2 Gama lumoun anihein saragu áfiñuruni le málati fulasurugu luma iyeeni,

áfarahani luma íweruhani,

agabarahani luma anarimeni,

anihein áfarahani gabügürügua.

3 Ligía lamuiseruña lubéi fulasu; méreeña gürigia

ha aganóubaña ñein;

hilaguatiña animaalugu áraabuna hama dunuru,

hilagua hagía úduraü ha baranahabaña úara hama».

4 Lariñahare Aburemei:

«Ualá ni aban íchuguti hadurun numutuniña,

madeinhan hagíame houn!

Húmarügüñein nawuribuha, huguya fádirigu.

5 Huguya hábürühaba wéyuagu,

hábürühaba giñe profetagu huma guñoun,

ánhañati húguchurunigu nagünrinchagubaña.

6 Günrinwaguatiña numutuniña,

ladüga lilouguan hasubudin.

Huguyati fádirigu ha amaharubaña lun subudi,

gidá numutün lídangiñe afadirihani,

kei bulíei hubalin larufudahan Habureme,

nabulieidubaña giñe hadügawagun».

7 «Dántima meha gibe hamá fádirigu ligíatima

lagibedun hafigouhan nigibugiñe;

nasansirubei lubeiti haweirigun luagu ǘnabuguni.

8 Lídangiñe hafigoun numutuniña hawinwanda;

ligía gunda habéi lun hafigouhan numutuniña.

9 Dandu numutuniña keisi fádirigu

nabeichubaña luagu luriban hóuserun.

10 Ígira hamutina fádirigu aban heseriwidun houn amu búngiugu.

Ligía héigiba lubéi lídangiñe adagaragüdüni le híchugubei numutuniña nun.

Gama lumoun makimuledunbaña;

Háhuduraguba houn búngiugu gama lumoun marahüñübaña».

11 «Ahoruhani luma latun diwéin,

féridigüda lumuti ichügü.

12 Álügüdahatiña numutuniña hama habungiutegu láutiña wewe,

aríaagüda hagía luma aban wewe,

lememe hórudua hamá falatiña lagübüri üma,

ahoruhatiña lau hadisedun luéi Habungiute.

13 Dagagüdatiña lábulugu burí wübü

ani águdahatiña kupali ligibuagu fulasu íñuti

luma giñe lábugiñe lubuidun lamuñadiri burí,

álamu, ensina luma burí lídibu wewe wéinamuti.

Ligía hahoruhanbei hirahüñü würiña,

agabaraha hamaña hídiñugu hirahüñü.

14 Gama lumoun mabeichun nubaña hirahüñü würiña danme hahoruhan,

ni hídiñugu danme hagabarahaniña hirahüñü,

lugundun huguya guánarügü ñǘdüntün hama horu;

lun hadügün adagaragüdüni gudawarügüti,

dáguatün hungua hamoun würiña ha adügübalin ahoruhani kei aban kultu.

Ítara liña heferidirun gürigia ha lóuguabaña isubudin!»

15 «Ánhabu ahoruha Ísüraeli,

mafigounhalá Hudá.

Midin humá Gilügáli,

mamudeira humá Betü-awén

máfiñurun huguyame luagu libagari Aburemei!

16 Mabuchahati Ísüraeli kei aban tiraüraü bágasu derenatu;

ítarati, lóunigirubaña san Aburemei lidan sagadi-agei buiti

kamá hamuga harahüñü mudún hagía?

17,18 Rúguaali Éfürain lungua lun áhuduraguni houn guáriuagu

ábürühaaña sun hagía kei bacharuatiña!

Ahoruhaaña saragu wéiyaasu,

himei hamuti busiganu luéi inebesei.

19 Lanügübei aban garabali larünarugu,

ábame hanügün busiganu luagu háhuduragun houn guáriuagu!»