1 ತುಜೆ ಜೆವಾನ್ ಪಾನ್ಯಾಚ್ಯಾ ವರ್‍ತಿ ಟಾಕ್ ಲೈ ದಿಸಾ ಹೊಲ್ಲ್ಯಾ ಮಾನಾ ತೆ ತುಕಾ ಗಾವ್ತಾ. 2 ತುಜೆ ದೆನೆ ಸಾತ್ ನಾತರ್ ಆಟ್ ಲೊಕಾಕ್ನಿ ವಾಟುನ್ ದಿ, ಕಶ್ಯಾಕ್ ಮಟ್ಲ್ಯಾರ್, ಜಗಾತ್ ಫಿಡೆ ಕಾಯ್ ಅವ್ಗಡ್ ಘಡಿಲ್ ಮನುನ್ ತುಕಾ ಗೊತ್ತ್ ನಾ. 3 ಝಾಡಾ ಉತ್ತರಾಕ್ ನಾತರ್, ದಕ್ಷಿನಾಕ್ ಖಲ್ಯಾ ಭಾಜುಕ್ ಪಡಲ್ಲಿ ರಾಲ್ಯಾರ್ಬಿ ತೆ ಇಸಬ್ ಕರುನ್ ಹೊಯ್ನಾ, ಮೊಡಾ ಭರಲ್ಲ್ಯಾ ತನ್ನಾ ಪಾವ್ಸ್ ಯೆತಾ; 4 ತಿಯಾ ಮೊಡಾಕ್ನಿ ಬಗುನ್ಗೆತ್ ರಾಲ್ಯಾರ್ ಕಾತ್ರನ್ ಕರಿನೆ, ಅನಿ ವ್ಹಾರ್ಯಾಕ್ ಬಗುನ್ಗೆತ್ ರಾಲ್ಯಾರ್ ಪೆರಿನೆ. 5 ಆವ್ಸಿಚ್ಯಾ ಪೊಟಾತ್ ಪೊರ್ ಹೊವ್ನ್ ವಾಡ್ತಲ್ಯಾ ಹಡ್ಡಾತ್ನಿ ಜಿವಾಚೊ ಶ್ವಾಸ್ ಕಸೊ ಯೆಲೊ ಮನ್ತಲೆ ತುಕಾ ಕಳಿನಸಲ್ಲ್ಯಾ ಸಾರ್ಕೆಚ್, ದೆವಾನ್ ಕರಲ್ಲ್ಯಾ ಕಾಮಾಂಚ್ಯಾ ವಿಶಯಾತ್ ತುಕಾ ಕಳಿನಾ. 6 ಸಕ್ಕಾಳಾಕ್ ಬಿಂಯ್ ಪೆರ್, ಸಕ್ಕಾಳಾಕ್ನಾ ಸಾಂಜ್ ಪತರ್ಬಿ ಕಾಮ್ ಕರ್, ತ್ಯಾತುರ್ ಕವ್ಡೆ ಉಪ್ಜುನ್ ಯೆವ್ನ್ ಬರೆ ವಾಡ್ತಾ ಅನಿ ಕವ್ಡೆ ಹಾಳ್ ಹೊತಾ ಮನುನ್ ತುಕಾ ಗೊತ್ತುಚ್ ನಾ. 7 ದಿಸಾಚೊ ಉಜ್ವೊಡ್ ಖರೆಚ್ ಬರೊ ಹಾಯ್, ದಿಸಾಚ್ಯಾ ಉಜ್ವೊಡಾತ್ ಖುಸಿನ್ ರ್‍ಹಾತಲೆ ಲೈ ಬರೆ. 8 ತಿಯಾ ಝಿತ್ತೆ ಹೊತ್ತ್ಯಾ ಹರ್ ಎಕ್ ವರಿಸ್ಬಿ ಖುಶಿನ್ ರಾ, ತಿಯಾ ಕವ್ಡೆ ದಿಸ್ ಝಿತ್ತೊ ಹಾಸ್ ಮನ್ತಲೆ ಕಾಯ್ ಮೊಟೆ ನ್ಹಯ್, ಮರ್ನಾಚಿ ದಿಸಾ ದುರ್ ನಾತ್ ಮನ್ತಲೆ ಯಾದ್ ಥವ್ನ್ ಘೆ. ಅನಿ ಹೆಚ್ಯಾನ್ ಫಿಡೆ ಹೊತಲೆ ಕಾಯ್ಬಿ ಫಾಯ್ದ್ಯಾಚೆ ನ್ಹಯ್.

9 ದಾಂಡ್ಗ್ಯಾನೊ ತುಮ್ಚ್ಯಾ ದಾಂಡ್ಗ್ಯಾಪಾನಾತ್ ಖುಸಿನ್ ರಾವಾ, ಅಜುನ್ ಪತರ್ ತುಮಿ ದಾಂಡ್ಗೆ ಹೊತ್ತ್ಯಾ ಸಾಟ್ನಿ ಖುಶಿ ಹೊವಾ, ಮನಾಕ್ ಬರೆ ಲಾಗಿ ಸಾರ್ಕೆ ಅನಿ ಡೊಳ್ಯಾಕ್ನಿ ಬರೆ ದಿಸಿ ಸಾರ್ಕೆ ಚಲಾ. ಖರೆ ತುಮಿ ಕರಲ್ಲ್ಯಾ ಹರ್ ಎಕಾಕ್ ದೆವ್ ಝಡ್ತಿ ಕರ್ತಾ ಮನ್ತಲೆ ಯಾದ್ ಥವ್ನ್ ಘೆವಾ. 10 ತುಜ್ಯಾ ಮನಾಚ್ಯಾ ದುಕ್ಕೆಚ್ಯಾ ವಿಶಯಾತ್ ಚಿಂತುನಕ್ಕೊ, ತಿಯಾ ಲೈ ದಿಸಾಂಚ್ಯಾ ಪತರ್ ಅಸೊಚ್ ದಾಂಡ್ಗೊ ರಾಯ್ ನ್ಹಯ್.