1 ಬರ್ಯಾ ವಾಸೆಚ್ಯಾ ತೆಲಾಕಿಂತಾ ಬರೆ ನಾವ್ ಘೆತಲೆ ಕವ್ಡೆಕಿ ಬರೆ, ಅನಿ ತಿಯಾ ಉಪಾಜ್ತಲ್ಯಾ ದಿಸಾಕಿಂತಾ ಮರ್ನಾಚೊ ದಿಸ್ ಕವ್ಡೊಕಿ ಬರೊ. 2 ಅನಿ ಖುಶಿಚೆ ಜೆವಾನ್ ಹೊತ್ತ್ಯಾ ಘರಾಕ್ ಜಾತಲ್ಯಾಕಿಂತಾ ಅಳಾಪ್ ಹೊತ್ತ್ಯಾ ಘರಾಕ್ ಜಾತಲೆ ಕವ್ಡೆಕಿ ಬರೆ, ಕಶ್ಯಾಕ್ ಮಟ್ಲ್ಯಾರ್, ಝಿತ್ತೊ ಹೊತ್ತ್ಯಾ ಹರ್ ಎಕ್ಲ್ಯಾಕ್ ಸಗ್ಳ್ಯಾ ಮಾನ್ಸಾಕ್ನಿಬಿ ಆಕ್ರಿಕ್ ಮರಾನುಚ್ ಗತ್ ಮನ್ತಲೆ ಯಾದ್ ಕರುನ್ ಘೆವ್ಚೆ. 3 ಹಾಸ್ತಲ್ಯಾಕಿಂತಾ ಬೆಜಾರಾನ್ ರ್‍ಹಾತಲೆಚ್ ಬರೆ; ಕಶ್ಯಾಕ್ ಮಟ್ಲ್ಯಾರ್, ತೊಂಡ್ ಬೆಜಾರಾತ್ ರ್‍ಹಾತಲೆ ಮನಾಕ್ ಬರೆ. 4 ಕೊನ್ ತರ್ಬಿ ಎಕ್ಲೊ ಕನ್ನಾಬಿ ಖುಶಿಚ್ಯಾ ವಿಶಯಾತ್ ಚಿಂತುನ್ಗೆತ್ ರಾಲ್ಯಾರ್ ತೊ ಪಿಸೊ, ಅನಿ ಶಾನೊ ಮಾನುಸ್ ಮರ್ನಾಚ್ಯಾ ವಿಶಯಾತ್ ಚಿಂತುನ್ಗೆತ್ ರ್‍ಹಾತಾ. 5 ಪಿಶ್ಯಾ ಮಾನ್ಸಾಚಿ ಗಿತ್ ಆಯಿಕ್ತಲ್ಯಾಕಿಂತಾ, ಶಾನ್ಯಾ ಮಾನ್ಸಾನ್ ಝೊರ್ ಕರ್‍ತಲೆ ಆಯಿಕ್ತಲೆ ಲೈ ಬರೆ. 6 ಅನಿ ಪಿಶ್ಯಾಚೊ ಹಾಸೊ ಢೆರ್ಯಾಚ್ಯಾ ಬುಡಿ ಆಗಿತ್ ಮಿಳ್ವಲ್ಲ್ಯಾ ಚಿರ್ಪುಟಾಂಚ್ಯಾ ಕಾಟ್ಯಾಂಚ್ಯಾ ಆವಾಜಾ ಸಾರ್ಕೊ ಹಾಯ್, ಹೆ ಬಿ ವ್ಯರ್ಥುಚ್. 7 ತಿಯಾ ಶಾನೊ ಹೊವ್ಕ್ ಫಿರೆ, ಖರೆ ಕೊನಾಕ್ ತರ್ಬಿ ಪಶ್ವಲ್ಲೊ ಹೊಲ್ಯಾರ್, ತಿಯಾ ಪಿಸೊ ಸಾರ್ಕೊ ನಾಟಕ್ ಕರುಲ್ಲೆ, ತಿಯಾ ಲಂಚ್ ಘೆಟಲ್ಲೊ ಹೊಲ್ಯಾರ್ ತೆಜ್ಯಾ ವಯ್ನಾ ತುಜಿ ಚಾಲ್ ನಾಶ್ ಹೊತಾ. 8 ಹರ್ ಎಕಾಚಿ ಆಕ್ರಿ ಆರಂಬಾಕಿಂತಾ ಬರಿ ರ್‍ಹಾತಾ, ಗದ್ದಲ್ ರ್‍ಹಾತಲ್ಯಾಚ್ಯಾಕ್ನಿ ಶಾಂತ್ಪಾನಾನ್ ರ್‍ಹಾತಲೆಚ್ ಬರೆ.

9 ರಾಗಾಕ್ ತುಜ್ಯಾ ತಾಬೆತ್ ಥವ್ನ್ ಘೆ, ಕಶ್ಯಾಕ್ ಮಟ್ಲ್ಯಾರ್, ರಾಗ್ ಪಿಶ್ಯಾಚ್ಯಾ ಮನಾತ್ ವಸ್ತಿ ರ್‍ಹಾತಾ.

10 ಅತ್ತ್ಯಾಚ್ಯಾಕಿಂತಾ, ಜುನ್ನಿ ದಿಸಾ ಬರಿ ಹೊತ್ತಿ ನ್ಹಯ್ ಕಶ್ಯಾಕ್? ಮನು ನಕಾಸಿ, ಕಶ್ಯಾಕ್ ಮಟ್ಲ್ಯಾರ್ ತುಮಿ ಹೆ ಶಾನೆಪಾನಾನ್ ಇಚಾರಿನಾ ಹೊಲ್ಯಾಸಿ.

11 ಶಾನೆಪಾನ್ ಆಸ್ತಿ ಸಾರ್ಕೆ ಫಾಯ್ದ್ಯಾಚೆ ಹೊವ್ನ್ ಹಾಯ್; ಹೊಯ್, ಶಾನೊ ಮಾನುಸ್ ಅಪ್ನಾಚಿ ಆಸ್ತಿ ಸರಳ್ ರಿತಿನ್ ಖಮ್ವುನ್ ಘೆತಾ. 12 ಪಯ್ಸೆ ತುಕಾ ರಾಕ್ವನ್ ದಿತಾ, ಶಾನೆಪಾನ್ ತುಕಾ ಬರ್ಯಾನ್ ಥವ್ತಾ, ಹೆ ಸಗ್ಳೆ ಬುದ್ದಿಚೆ ವಾಪ್ರುಪ್ ಹೊವ್ನ್ ಹಾಯ್. 13 ಖರೆ ದೆವಾಚಿ ಸಗ್ಳಿ ಕಾಮಾ ಚಿಂತುನ್ ಬಗ್; ತೆನಿ ವ್ಹಾಂಕ್ಡೆ ಕರಲ್ಲೆ ಕೊನ್ ತರ್ಬಿ ಎಕ್ಲ್ಯಾನ್ ಕಸೆ ನಿಟ್ಟ್ ಕರುಕ್ ಹೊತಾ? 14 ತುಜ್ಯಾ ಸಾಟ್ನಿ ಬರಿ ದಿಸಾ ಯೆವ್ನ್ಗೆತ್ ರ್‍ಹಾತಾನಾ ಖುಸಿನ್ ರಾ; ಅನಿ ತರಾಸಾ ಯೆತಾನಾ ಖುಸಿ ಅನಿ ದುಕ್ಕ್ ದೊನಿಬಿ ಧಾಡಲ್ಲೆ ದೆವಾನುಚ್ ಮನುನ್ ಉಲ್ಲೆ ಚಿಂತುನ್ ಬಗ್, ಫಿಡೆ ಕಾಯ್ ಹೊತಲೆ ಹಾಯ್ ಮನ್ತಲೆ ತುಜೆನ್ ಕನ್ನಾ ಬಿ ಕಳ್ವುನ್ ಘೆವ್ಕ್ ಹೊಯ್ನಾ.

15 ಹೆ ಸಗ್ಳೆ ಮಿಯಾ ಮಾಜ್ಯಾ ವ್ಯರ್ಥ್ ಜಿವನಾತ್ ಬಗಟ್ಲಾ, ಪ್ರಾಮಾನಿಕ್ ಮಾನುಸ್ ಅಪ್ನಾಚ್ಯಾ ಪ್ರಾಮಾನಿಕ್ ಪಾನಾತ್ ನಾಶ್ ಹೊವ್ನ್ ಜಾತಾ, ಅನಿ ಬುರ್ಸೊ ಮಾನುಸ್ ಅಪ್ನಾಚ್ಯಾ ಬುರ್ಸೆಪಾನಾತುಚ್ ಲೈ ದಿಸಾ ಪತರ್ ಝಿತ್ತೊ ರ್‍ಹಾತಾ. 16 ಬಗ್ ಲೈ ಪ್ರಾಮಾನಿಕ್ ಹೊವ್ಕ್ ಬಿ ಜಾವ್ ನಕ್ಕೊ, ಅನಿ ಲೈ ಶಾನೊ ಹೊವ್ ನಕ್ಕೊ, ಹೆಜ್ಯಾ ವಯ್ನಾ ತುಕಾಚ್ ತಿಯಾ ಕಶ್ಯಾಕ್ ನಾಶ್ ಕರುನ್ ಘೆತೆಯ್? 17 ಖರೆ ಲೈ ಕಮ್ಮಿಚೊ ಅನಿ ಲೈ ಪಿಶೊಬಿ ಹೊವ್ನ್ ನಕ್ಕೊ, ಎಳ್ ಭರುಚ್ಯಾ ಅದ್ದಿಚ್ ಕಶ್ಯಾಕ್ ಮರುನ್ ಜಾತೆ? 18 ತಿಯಾ ಹೆ ದೊನಿಬಿ ಸೊಡುನ್ ದಿ, ತಿಯಾ ದೆವಾಕ್ನಾ ಭಿಂಯಾನ್ ಹೊತ್ತೊ ಹೊಲ್ಯಾರ್ ಸಗ್ಳ್ಯಾ ಎಳಾರ್ಬಿ ಪಾರ್ ಹೊವ್ನ್ ಜಾತೆ. 19 ಶಾನ್ಯಾ ಮಾನ್ಸಾಕ್ ಶಾನೆಪಾನ್ ಶಾರ್‍ಹಾತ್ಲ್ಯಾ ಧಾ ಬುದ್ವಂತಾಚ್ಯಾಕ್ನಿ ಬಲಿಸ್ಟ್ ಕರ್ತಾ. 20 ಕನ್ನಾಬಿ ಪಾಪ್ ಕರಿ ನಸ್ತಾನಾ ಬರೆ ಥವ್ಡೆಚ್ ಕರುಕ್ ಹೊತಲೊ ಮಾನುಸ್ ಹ್ಯಾ ಜಗಾತ್ ಕೊನುಚ್ ನಾ. 21 ತಿಯಾ ಲೊಕಾಚ್ಯಾ ಬೊಲ್ನ್ಯಾ ವರ್‍ತಿ ಧ್ಯಾನ್ ದಿವ್ ನಕ್ಕೊ; ತೆಚೆ ವಯ್ನಾ ತುಜ್ಯಾ ಸೆವಕಾನ್ ತುಕಾ ಶರಾಪ್ ಘಾಟಲ್ಲೆ ಆಯಿಕ್ಸಿಲ್. 22 ಕಶ್ಯಾಕ್ ಮಟ್ಲ್ಯಾರ್, ತಿಯಾ ಲೈದಾ ದುಶ್ರ್ಯಾ ಲೊಕಾಂಚ್ಯಾ ವಿಶಯಾತ್ ಬೊಲಲ್ಲೆ ತುಕಾಚ್ ಗೊತ್ತ್ ಹಾಯ್. 23 ಮಿಯಾ ಹೆ ಸಗ್ಳೆ ಪರಿಕ್ಷಾ ಕರುನ್ ಬಗುಕ್ ಸಾಟ್ನಿ ಮಾಜಿ ಬುದ್ದ್ ವಾಪರ್ಲೊ ಮಿಯಾ ಲೈ ಶಾನೊ ಹೊವ್ಕ್ ಬಗ್ಲೊ, ಖರೆ ತೆ ಮಾಜ್ಯಾಕ್ನಾ ಲೈ ಧುರ್ ಗೆಲೊ. 24 ಕೊನ್ ತರ್ ಎಕ್ಲ್ಯಾನ್ ಜಿವನಾಚೊ ಅರ್ಥ್ ಕಾಯ್ ಮನುನ್ ಕಸೆ ಹುಡ್ಕುಕ್ ಹೊತಾ? ಹೆ ಅಮ್ಕಾ ಲೈ ಖೊಲಾತ್ಲೆ ಹೊವ್ನ್ ಹಾಯ್, ಹೆ ಅರ್ಥ್ ಕರುನ್ ಘೆವ್ಕ್ ಲೈ ಘಟ್ ಹಾಯ್. 25 ಖರೆ ಮಿಯಾ ಮಾಜ್ಯಾ ತವ್ಡ್ಯಾಕುಚ್ ಧ್ಯಾನ್ ಕರುನ್ ಬುದ್ದಿನ್ ಅದ್ಯಾಯನ್ ಕರ್ಲೊ, ಅನಿ ಮಿಯಾ ಬುದ್ದ್ ಅನಿ ಮಾಜ್ಯಾ ಪ್ರಶ್ನ್ಯಾಕ್ನಿ ಜವಾಬ್ ಘೆಟ್ಲೊ, ಅನಿ ಕಮ್ಮಿಪಾನ್ ಅನಿ ಬುದ್ಗೆಡಿಪಾನ್ ಕವ್ಡೆ ಪಿಶೆ ಮನುನ್ ಒಳ್ಕುನ್ ಘೆಟ್ಲೊ. 26 ತನ್ನಾ ಮಿಯಾ ಮರ್ನಾಕಿಂತಾಬಿ ಲೈ ಕೊಡುಲಿ ಎಕ್ ವಿಶಯ್ ಕಳ್ವುನ್ ಘೆಟ್ಲೊ, ಕಶ್ಯಾಕ್ ಮಟ್ಲ್ಯಾರ್, ಬುರ್ಶಿ ಬಾಯ್ಕೊ ಮಾನುಸ್ ಪಂಜರಾ ಗತಿನ್ ಹಾಯ್, ತಿ ತುಕಾ ದಾಕ್ವುತಲೆ ಪ್ರೆಮ್ ಜಾಳ್ಯಾ ಗತಿನ್ ತುಕಾ ಧರುನ್ ಘೆತಾ, ಅನಿ ಪಾಪ್ ಕರ್ತಲೊ ತಿಚ್ಯಾ ತೆಕ್ಕ್ಯಾತ್ ಸರ್ಪೊಳಿಚ್ಯಾ ಪಾಶ್ಯಾತ್ ಸಾರ್ಕೊ ಗಾವುನ್ ಪಡ್ತಾ. ಜೆ ಕೊನ್ ದೆವಾಕ್ನಾ ಬರೊ ರ್‍ಹಾತಾ ತೊ ತಿಚ್ಯಾಕ್ನಾ ಚುಕ್ವುನ್ ಘೆತಾ, ಖರೆ ಪಾಪಿಕ್ ತಿ ಧರುನ್ ಘೆತಾ. 27 ತನ್ನಾ ಉಪದೆಸ್ ಕಾರಾನ್, ಹೊಯ್, ಮಿಯಾ ಹೆ ಉಲ್ಲೆ ಉಲ್ಲೆ ಇಚಾರ್ನಿ ಕರುನ್ ಕಳ್ವುನ್ ಘೆವ್ಚೆ ಮನುನ್ ಜವಾಬ್ ಹುಡಕ್ಲೊ. 28 ತನ್ನಾ ಮಾಕಾ ದುಸ್ರಿ ಜವಾಬಾ ಗಾವ್ಲಿ, ಖರೆ ಮಾಕಾ ಎಕ್ ಕಳ್ಳೆ, ಹಜಾರ್ ಘೊಮಾನ್ಸಾತ್ನಿ ಎಕ್ಲೊ ತರ್ ಪ್ರಾಮಾನಿಕ್ ಮಾನುಸ್ ರಾವ್ಕ್ ಫಿರೆ; ಖರೆ ಎಕ್ಬಿ ಬಾಯ್ಕೊ ಮಾನುಸ್ ಗಾವ್ಕ್ ನಾ. 29 ಮಿಯಾ ಹೆ ಸಗ್ಳೆ ಶಿಕ್ಲೊ, ದೆವಾನ್ ಮಾನ್ಸಾಕ್ ಪ್ರಾಮಾನಿಕ್ ಕರುನ್ ರಚ್ಲಾ, ಖರೆ ಮಾನ್ಸಾನ್ ಅಪ್ನಾ ಯೆವ್ಡ್ಯಾಕುಚ್ ಕಠಿನ್ ಕರುನ್ ಘೆಟ್ಲಾ.