1 ತನ್ನಾ, ಮಿಯಾ ಮಾಜ್ಯಾ ಮನಾತ್ ಖುಸಿ ಅನಿ ಆನಂದ್ ಹುಡ್ಕುಚೆ ಮನುನ್ ನಿರ್ದಾರ್ ಕರ್ಲೊ. ಖರೆ ಮಾಕಾ ಹೆಬಿ ವ್ಯರ್ಥುಚ್ ಮನುನ್ ಕಳ್ಳೆ. 2 ಮಾಕಾ ಹೊ ಹಾಸೊಬಿ ಪಿಸ್ಯಾ ಪಾನಾಚೊ ಮನುನ್ ಕಳ್ಳೆ, ತಿಯಾ ಖುಸಿ ಹೊವ್ಕ್ ಲಾಗಲ್ಲೆಬಿ ಬರ್ಯಾಚೆ ನ್ಹಯ್, 3 ಮಿಯಾ ಮಾಜ್ಯಾ ತವ್ಡ್ಯಾಕ್ ಹ್ಯಾ ಜಗಾತ್ ಮಾನ್ಸಾಕ್ನಿ ಹೊತ್ತ್ಯಾ ಉಲ್ಲ್ಯಾಸ್ಯಾ ವಯ್ಯಾತ್ನಿ ಕಾಮ್ ಕರ್‍ತಲೆ ಬರೆ ಮನುನ್ ಕಳ್ವುನ್ ಘೆವ್ಚೆ ಮನುನ್ ಮಾಜೊ ಮನ್ ಹುಶಾರ್ ರ್‍ಹಾತಾನಾಚ್ ಆಂಗಾಕ್ ವಯ್ನ್ ಫಿವ್ನ್ ಹುರ್ಗಿ ಭರಿ ಸಾರ್ಕೆ ಅನಿ ಬುದ್ಗೆಡಿಪಾನಾತ್ ಮಾಕಾ ಘಾಲುನ್ ಘೆವ್ಚೆ ಮನುನ್ ಮನಾತುಚ್ ಚಿಂತುನ್ ಘೆಟ್ಲೊ. 4 ಮಿಯಾ ಮೊಟಿ ಮೊಟಿ ಕಾಮಾ ಕರುಕ್ ಲಾಗ್ಲೊ, ಅನಿ ಮಾಜ್ಯಾ ಸಾಟ್ನಿ ಘರಾ ಭಾಂದುನ್ ಘೆಟ್ಲೊ. ಅನಿ ದರಾಕ್ಷಾಚೊ ಮ್ಹಳೊ ಲಾವ್ಲೊ; 5 ಮಿಯಾ ಮ್ಹಳೆ ಅನಿ ಫಳಾಂಚಿ ಝಾಡಾ ತಯಾರ್ ಕರಸ್ಲೊ, ಅನಿ ತ್ಯಾತುರ್ ಸಗ್ಳ್ಯಾ ನಮುನ್ಯಾಚಿ ಫಳಾಂಚಿ ಝಾಡಾ ಲಾವ್ಲೊ. 6 ಅನಿ ಉಗಾವ್ತಲ್ಯಾ ಝಾಡಾಕ್ನಿ ಪಾನಿ ಗಾಂವ್ದಿತ್ ಮನುನ್ ಕಾಲ್ಗಿಯಾ ಕಾಡಸ್ಲೊ, 7 ಮಿಯಾ ಲೈ ಗುಲಾಮಾಕ್ನಿ ಇಕಾತ್ ಘೆಟ್ಲೊ, ಅನಿ ತೆಂಚ್ಯಾ ವಯ್ನಾ ಘರ್‍ಹಾತ್ ಲೈ ಗುಲಾಮಾ ಉಪಜ್ಲಿ, ಅನಿ ಮಾಜ್ಯಾಕ್ಡೆ ಜರುಜಲೆಮಾತ್ ವಸ್ತಿ ರ್‍ಹಾತಲ್ಯಾಚ್ಯಾಕ್ನಿ ಮಿಯಾ ಲೈ ಗೊರಾ ಡೊರಾಂಚೊ ವಡಿಲ್ ಹೊಲೊ. 8 ಅನಿ ಮಿಯಾ ದುಸ್ರ್ಯಾ ದುಸ್ರ್ಯಾ ರಾಜ್ವಟ್ಕಿ ಕರ್‍ತಲ್ಯಾ ರಾಜಾಂಚ್ಯಾಕ್ನಾ ಕಾನಿಕ್ ಸ್ವಿಕಾರ್ ಕರುನ್ ಮಾಜ್ಯಾ ಪೆಟಿತ್ ಭರುನ್ ಘೆಟ್ಲೊ, ಅನಿ ಮಾಕಾ ಉಮ್ಮೆದ್ ಕರ್ತಲಿ ಗಿತಾ ಸಾಂಗುಕ್ ಘವ್ಮಾನ್ಸಾ ಅನಿ ಬಾಯ್ಕಾಮಾನ್ಸಾ ಹೊತ್ತಿ, ಅನಿ ಮಾನ್ಸಾಕ್ನಿ ಪಾಜೆ ಹೊತ್ತಿ ಲೈ ಬಾಯ್ಕಾಬಿ ಮಾಕಾ ಹೊತ್ತಿ. 9 ಹ್ಯೊ, ಮಿಯಾ ಜರುಜಲೆಮಾತ್ ವಸ್ತಿರಾತಲ್ಯಾ ಸಗ್ಳ್ಯಾಂಚ್ಯಾಕಿಂತಾಬಿ ಲೈ ಮೊಟೊ ಹೊಲೊ ಅನಿ ಮಾಜ್ಯಾ ಬುದ್ದಿನ್ ಮಾಕಾ ಪಡುಕ್ ದಿವ್ಕ್ ನಾ. 10 ಮಾಕಾ ಪಾಜೆ ಹೊಲ್ಲೆ ಸಗ್ಳೆ ಮಿಯಾ ಘೆಟ್ಲೊ, ಮಾಜ್ಯಾ ಮನಾಕ್ ಖುಸಿ ಹೊತಲ್ಯಾ ವಿಶಯಾಕ್ ಮಿಯಾ ಆಡ್ವುಕ್ ನಾ, ಮಿಯಾ ಕಾಮ್ ಕರಲ್ಲ್ಯಾ ಹರ್ ಎಕ್ ವಿಶಯಾತ್ ಶಬಾಸ್ಕಿ ಘೆತಾ, ಅನಿ ಹೆ ಸಗ್ಳೆ ಮಾಜ್ಯಾ ಕಾಮಾಕ್ನಿ ಗಾವಲ್ಲೆ ಪ್ರತಿಫಳ್ . 11 ತನ್ನಾ ಮಿಯಾ ಹಾತಿನ್ ಕರಲ್ಲ್ಯಾ ಸಗ್ಳ್ಯಾ ಕಾಮಾತ್ನಿ, ತರಾಸಾಚ್ಯಾ ಕಾಮಾಕ್ನಿ ಬಗಟ್ಲೊ, ವ್ಹಾರ್ಯಾಕ್ ಪಾಟ್ ಲಾಗುನ್ ಗೆಲ್ಲ್ಯಾ ಸಾರ್ಕೆ ಜಗಾತ್ ಸಗ್ಳೆಬಿ ವ್ಯರ್ಥ್, ಜಗಾತ್ ಕಾಯ್ಬಿ ಫಾಯ್ದೊ ದಿಸುಕ್ನಾ. 12 ಜ್ಞಾನ್ ಬಗುಕ್ ಮನುನ್ ಪರತ್ಲೊ, ಪಿಶೆಪಾನ್ ಅನಿ ಬುದ್ಗೆಡಿಪಾನ್ ಪರ್‍ತುನ್ ಬಗಟ್ಲೊ, ರಾಜಾಚಿ ಕಟ್ಪಟಾಚ್ ಅಸಿ ಹೊಲ್ಲ್ಯಾ ಮಾನಾ, ಅನಿ ಎಕ್ಲ್ಯಾಕ್ಡೆ ಕಾಯ್ ಕರುಕ್ ಹೊತಾ? ಸಾಂಗಲ್ಲೆಚ್ ಹೊತಾ ಮನುನ್ ಚಿಂತುನ್ಗೆಟ್ಲೊ. 13 ತನ್ನಾ ಉಜ್ವೊಡ್ ಕಾಳ್ಕಾಕಿಂತಾ ಶ್ರೆಶ್ಟ್ ಹೊವ್ನ್ ಹೊತ್ತ್ಯಾ ಸಾರ್ಕೆ ಜ್ಞಾನ್ಬಿ ಬುದ್ದ್ ನಸಲ್ಯಾಕ್ನಿ ಶ್ರೆಶ್ಟ್ ಹೊವ್ನ್ ಹಾಯ್ ಮನುನ್ ದಿಸುನ್ ಯೆಲೆ. 14 ಜ್ಞಾನ್ ಹೊತ್ತ್ಯಾಚೆ ಡೊಳೆ ಉಗ್ಡೆ ರ್‍ಹಾತಾತ್, ಅನಿ ಪಿಶೊ ಕಾಳ್ಕಾತ್ ಚಲ್ತಾ, ಖರೆ ತೆಂಕಾ ದೊಗಾಕ್ನಿಬಿ ಎಕುಚ್ ಗತ್ ರಾಕುನ್ಗೆತ್ ಹಾಯ್ ಮನುನ್ ಮಾಕಾ ಕಳ್ಳೆ. 15 ಮಿಯಾ ಯೆವ್ಡೆ ಲೈ ಶಾನೊ ಹೊವ್ನ್ ಬಿ ಕಾಯ್ ಫಾಯ್ದೊ? ಹ್ಯಾ ಬುದ್ಗೆಡ್ಯಾಕ್ನಿ ಯೆಲ್ಲಿ ಗತ್ ಮಾಕಾಬಿ ಯೆತಾ ಕಾಯ್ಕಿ ಮನುನ್ ಮಿಯಾಚ್ ಜವಾಬ್ ದಿವ್ನ್ ಘೆಟ್ಲೊ, ಹೆ ಸಗ್ಳೆ ವ್ಯರ್ಥ್, 16 ಕಶ್ಯಾಕ್ ಮಟ್ಲ್ಯಾರ್, ಪಿಶ್ಯಾಚ್ಯಾ ಸಾರ್ಕೊಚ್ ಶಾನೊಬಿ ಲೈ ದಿಸಾಂಚ್ಯಾ ಮಾನಾ ಇಸ್ರುನ್ ಘಾಲ್ತಾ, ಅನಿ ಅತ್ತಾ ಹೊತ್ತೆ ಸಗ್ಳೆ ಫಿಡೆ ಯೆತಲ್ಯಾ ಯೆಳಾಚ್ಯಾ ಅದ್ದಿಚ್ ಇಸ್ರುನ್ ಸೊಡ್ತಾತ್, ಅಬಕ್, ಪಿಶ್ಯಾಚ್ಯಾ ಸಾರ್ಕೊಚ್ ಶಾನೊಬಿ ಮರುನ್ ಜಾತಾ. 17 ಮಾಕಾ ಹ್ಯಾ ಜಗಾತ್ ಕಾಯ್ಬಿ ನಾ ಮನ್ತಲೆ ಕಳುನ್ ಯೆಲ್ಲ್ಯಾ ತನ್ನಾ ಹರ್ ಎಕಾನ್ ಮಾಕಾ ತರಾಸಾತ್ ಘಾಟ್ಲ್ಯಾನ್, ತನ್ನಾ ಮಿಯಾ ವ್ಹಾರ್ಯಾಕ್ ಫಾಟ್ ಲಾಗುನ್ ಗೆಲ್ಲ್ಯಾ ಸಾರ್ಕೆ ಸಗ್ಳೆಬಿ ವ್ಯರ್ಥ್ ಮನುನ್ ಕಳ್ವುನ್ ಘೆಟ್ಲೊ. 18 ಮಾಜ್ಯಾ ತರಾಸಾಚಿ ಪ್ರತಿಫಳ್ ಫಾಟ್ನಾ ಯೆತಲ್ಯಾಕ್ ಸೊಡುನ್ ದಿವ್ಚೆ ಮನುನ್ ಕಳಲ್ಲ್ಯಾ ತನ್ನಾ ಮಿಯಾ ಹ್ಯಾ ಜಗಾತ್ ಕರುನ್ ಘೆಟಲ್ಲ್ಯಾ ತರಾಸಾಂಚ್ಯಾ ವಿಶಯಾತ್ ಲೈ ಬೆಜಾರ್ ಹೊಲೊ. 19 ಅನಿ ತೊ ಶಾನೊಬಿ ರಾವ್ಕ್ ಫಿರೆ, ನಾತರ್ ಪಿಶೊಬಿ ರಾವ್ಕ್ ಫಿರೆ ಕೊನಾಕ್ ಗೊತ್ತ್? ತೊ ಕಸ್ಲೊ ರಾಲ್ಯಾರ್ಬಿ ಮಿಯಾ ಜಗಾತ್ ಖಲ್ಯಾ ವಿಶಯಾತ್ ಶಾನೆಪಾನ್ ಅನಿ ಕಟ್ಪಟ್ ಕರಲ್ಲೊ ತೆಜ್ಯಾ ವರ್‍ತಿ ರಾಜ್ವಟ್ಕಿ ಕರ್ತಾ, ಅನಿ ಹೆ ಸಗ್ಳೆ ವ್ಯರ್ಥ್. 20 ಅಸೆ ರ್‍ಹಾತಾನಾ, ಮಿಯಾ ಜಗಾತ್ ತರಾಸ್ ಕರಲ್ಲ್ಯಾ ಕಾಮಾಚ್ಯಾ ವಿಶಯಾತ್ ಬೆಜಾರ್ ಹೊಲೊ. 21 ಎಕ್ಲ್ಯಾನ್ ಅಪ್ನಾಚ್ಯಾ ಬುದ್ದಿನ್ ಅನಿ ಶಾನೆಪಾನಾನ್ ಎಕ್ ಸ್ಥಿತಿಕ್ ಹಾನಲ್ಲ್ಯಾ ಮನಾ ಅಪ್ಲ್ಯಾ ಕಾಮಾತ್ ಕಟ್ಪಟ್ ಕರುನಸಲ್ಲ್ಯಾ ಅನಿ ಎಕ್ಲ್ಯಾಕ್ ತೆಚೆ ಫಳ್ ಸೊಡುನ್ ದಿವ್ಚೆ, ಹೆ ವ್ಯರ್ಥಬಿ ಅನ್ಯಾಯ್ ಬಿ ಹೊವ್ನ್ ಹಾಯ್. 22 ಹ್ಯಾ ಜಗಾತ್ ಮಾನ್ಸಾನ್ ಪುರಾ ಮನಾನ್ ಕರ್‍ತಲ್ಯಾ ಖಮಾಯಿತ್ ಫಾಯ್ದೊ ಕಾಯ್? 23 ತೆಚ್ಯಾ ಸಗ್ಳ್ಯಾ ದಿಸಾತ್ನಿ ತೆಕಾ ಕಳ್ವಳೊ ಹಾಯ್, ತೆಚೆ ಸಗ್ಳೆ ಕಾಮ್ಬಿ ತರಾಸಾಚೆಚ್, ಅನಿ ರಾತ್ತಿನಿಬಿ ತೆಜ್ಯಾ ಮನಾತ್ ಸಮಾಧಾನ್ ನಾ, ಹೆಬಿ ವ್ಯರ್ಥುಚ್.

24 ಅನಿ ಖಾನ್ಯಾ ಫಿನ್ಯಾತ್ಬಿ ತರಾಸ್ ಕರುನ್ ಘೆವ್ನ್ ಸುಕಾನಿ ರ್‍ಹಾತಲ್ಯಾಚ್ಯಾಕ್ನಿ ಮಾನ್ಸಾಕ್ ಅನಿ ಕಾಯ್ ಮೊಟೆ ನ್ಹಯ್, ತನ್ನಾ ಹೆ ಸಗ್ಳೆ ಮಾಕಾ ದೆವಾನುಚ್ ಕರಲ್ಲೆ ಮನುನ್ ದಿಸುನ್ ಯೆಲೆ. 25 ದೆವ್ ನಸ್ತಾನಾ, ತುಮಿ ಖಾವ್ನ್ ಜೆವ್ನ್ ಮೊಜ್ ಮಸ್ತಿ ಕರುನ್ ರ್‍ಹಾತಲೆ ಕಸೆ? 26 ದೆವ್ ಅಪ್ನಾಕ್ ಬರೆ ದಿಸಲ್ಯಾಕ್ನಿ ಬುದ್ದ್, ಶಾನೆಪಾನ್, ಅನಿ ಖುಶಿ ದಿತಾ, ಅನಿ ಚುಕ್ ಕರಲ್ಯಾಕ್ನಿ ಅಪ್ನಾಚ್ಯಾ ಮನಾಕ್ ಯೆಲ್ಲ್ಯಾಕ್ನಿ ದಿಲ್ಲೆ ಗೊಳಾ ಕರುನ್ ಥವ್ತಲಿ ಕಟ್ಪಟಾ ಥವ್ತಾ, ಹೆಬಿ ವ್ಹಾರ್ಯಾಕ್ ಪಾಟ್ ಲಾಗುನ್ ಗೆಲ್ಲ್ಯಾ ಸಾರ್ಕೆ ವ್ಯರ್ಥ್.