1 ಮಾನಾ ಮಿಯಾ ಬರೆ ಕರುನ್ ಪರ್‍ತುನ್ ಜಗಾತ್ ಹೊತ್ತೊ ತರಾಸ್ ಸಗ್ಳೊ ಬಗಟ್ಲೊ; ಆಹಾ, ತೊ ತರಾಸ್ ಸೊಸುಕ್ ಹೊಯ್ ನಸ್ತಾನಾ ದುಕ್ಕೆತ್ ಹೊತ್ತ್ಯಾ ಲೊಕಾಂಚೊ ಘೊಳ್ ಕಾಯ್ ಸಾಂಗು! ತೆಂಕಾ ಸಮಾಧಾನ್ ಕರ್‍ತಲೆ ಕೊನ್ಬಿ ನತ್ತೆ; ಖರೆ ತರಾಸ್ ದಿತಲ್ಯಾ ಲೊಕಾಂಚೊ ತಾಕತ್ ಲೈ ಹೊತ್ತೊ; ಖರೆ ಸಮಾಧಾನ್ ಕರ್‍ತಲೆ ಕೊನ್ಬಿ ನತ್ತೆ. 2 ಹೆ ಸಗ್ಳೆ ಬಗುನ್, ಝಿತ್ತೆ ರ್‍ಹಾತಲ್ಯಾ ಲೊಕಾಂಚ್ಯಾಕಿಂತಾ, ಮರುನ್ ಗೆಲ್ಲ್ಯಾ ಲೊಕಾಂಚೆಚ್ ಬರೆ ಮನುನ್ ಹೊಗ್ಳಾಪ್ ಕರ್ಲೊ; 3 ಹೊಯ್, ಹ್ಯಾ ಜಗಾತ್ ಉಪಾಜ್ತಾನಾ ಮರುನ್ ಗೆಲ್ಲ್ಯಾಂಚೆಚ್ ಕವ್ಡೆಕಿ ಬರೆ, ಕಶ್ಯಾಕ್ ಮಟ್ಲ್ಯಾರ್, ಹ್ಯಾ ಜಗಾತ್ ಹೊತಲಿ ಬುರ್ಶಿ ಕಾಮಾ ತೆನಿ ಬಗಿನಸ್ತಾನಾಚ್ ಗೆಲ್ಲೆ ಬರೆ ಮನುನ್ ಕಳ್ವುನ್ ಘೆಟ್ಲೊ. 4 ಮಿಯಾ, ಲೊಕಾ ಯೆವ್ಡೆ ಲೈ ತರಾಸ್ ಕರುನ್ ಮೊಟ್ಯಾಪಾನಾ ಸಾಟ್ನಿ ಘೊಳ್ತಾತ್ ಮನುನ್ ಬಗ್ತಾನಾ, ಹೆ ಅಪ್ನಾಚ್ಯಾ ಅಜು ಭಾಜುಚ್ಯಾ ಲೊಕಾಂಚ್ಯಾಕಿಂತಾ ಸಾವ್ಕಾರ್ ಹೊವ್ಚೆ ಮನುನ್ ತೆನಿ ಘೊಳ್ತಾತ್, ಖರೆ ಹೆ ವ್ಹಾರ್ಯಾಕ್ ಪಾಟ್ ಲಾಗುನ್ ಗೆಲ್ಲ್ಯಾ ಸಾರ್ಕೆ ಸಗ್ಳೆ ವ್ಯರ್ಥ್ ಹೊವ್ನ್ ಹಾಯ್. 5 ಉಲ್ಲ್ಯಾ ಲೊಕಾನಿ ಸಾಂಗಲ್ಲ್ಯಾ ಸಾರ್ಕೆ; ಕಾಯ್ ಬಿ ಕಾಮ್ ಕರಿ ನಸ್ತಾನಾ ಹಾತ್ ಭಾಂದುನ್ ಘೆವ್ನ್ ಬಸುನ್ ರಾತಲೊ ಪಿಸೊ;ಕೊನ್ ತರ್ಬಿ ಎಕ್ಲೊ ಪಿಸೊ ಸಾರ್ಕೊ ಘೊಳಿ ನಸ್ತಾನಾ ಹಾತ್ ಭಾಂದುನ್ ಬಸಲ್ಲೊ ರಾಲ್ಯಾರ್ ತೊ ಅಪ್ನಾಕ್ ಅಪ್ನಿಚ್ ಭುಕೆನ್ ಮಾರುನ್ ಟಾಕ್ತಾ. 6 ವ್ಹಾರ್ಯಾಕ್ ಪಾಟ್ ಲಾಗುನ್ ದೊನಿ ಹಾತಿನ್ ಪೊಸೊ ಕರುನ್ ಧರ್ತಲ್ಯಾಕಿಂತಾ ಅಮ್ಚ್ಯಾಕ್ಡೆ ಹೊತ್ತ್ಯಾ ಉಲ್ಲ್ಯಾಸಾತುಚ್ ಖುಶಿನ್ ರ್‍ಹಾತಲೆ ಕವ್ಡೆಕಿ ಬರೆ. 7 ಮಿಯಾ ಜಗಾತ್ ಅನಿಬಿ ಎಕ್ ಪಾಯ್ದ್ಯಾಕ್ ಪಡಿನಸಲ್ಲಿ ವಿಶಯ್ ಬಗಟ್ಲೊ. 8 ದೊನ್ವೆಚೊ ನಸ್ತಾನಾ ಒಂಡ್ಕೊ ಎಕ್ಲೊ ಹಾಯ್; ತೆಕಾ ಭಾವ್ ಭೆನಿಯಾ ನಾತ್, ಅನಿ ಪೊರಾಬಿ ನಾತ್; ಖರೆ ತೊ ಲೈ ತರಾಸ್ ಕಾಮ್ ಕರ್ತಾ, ಆಸ್ತಿನ್ ತೆಚ್ಯಾ ಡೊಳ್ಯಾಕ್ನಿ ಸಮಾಧಾನ್ ನಾ, ಮಿಯಾ ಸುಖ್ ಸೊಡುನ್ ಕೊನಾ ಸಾಟ್ನಿ ಕಟ್ಪಟ್ ಕರುಲ್ಲಾ ಅನಿ ಮಿಯಾ ಕಶ್ಯಾಕ್ ಖುಶಿ ಕಳ್ದುನ್ ಘೆವ್ಕ್ ಲಾಗ್ಲಾ? ಮನುನ್ಗೆತ್ ಹಾಯ್, ಹೆಬಿ ವ್ಯರ್ಥ್ ಖಾಲಿ ಕಟ್ಪಟ್ ತವ್ಡೆಚ್ ಹೊವ್ಲಾ. 9 ಎಕ್ಲ್ಯಾಕಿಂತಾ ದೊನ್ ಲೊಕಾ ರಾಬ್ತಲೆ ಬರೆ, ತೆಚ್ಯಾ ಕಟ್ಪಟಾಕ್ ಬರೊ ಫಾಯ್ದೊ ಹಾಯ್. 10 ಎಕ್ಲೊ ಪಡ್ಲ್ಯಾರ್ ತೆಕಾ ಅನಿ ಎಕ್ಲೊ ಉಕಲ್ತಾ; ಖರೆ ತೊ ಪಡಲ್ಲ್ಯಾ ತನ್ನಾ ಎಕ್ಲೊಚ್ ಹೊತ್ತೊ ರಾಲ್ಯಾರ್ ಉಕ್ಲುಕ್ ಕೊನ್ಬಿ ರ್‍ಹಾಯ್ನಾತ್; ಕೊನ್ಬಿ ನಸ್ಲ್ಯಾರ್ ತೆಚಿ ಗತ್ ಕಾಯ್ ಸಾಂಗು. 11 ಎಕ್ಲ್ಯಾಚ್ಯಾ ಭಾಜುಕ್ ಅನಿ ಎಕ್ಲೊ ನಿಜ್ಲ್ಯಾರ್ ದೊಗ್ಯಾಕ್ನಿಬಿ ಹುನ್ನ್ ಹೊತಾ, ಎಕ್ಲೊಚ್ ರಾಲ್ಯಾರ್ ಕಸೆ ಹುನ್ನ್ ಹೊತಾ? 12 ಎಕ್ ಮಾನ್ಸಾಕ್ ಅನಿ ಎಕ್ ಮಾನ್ಸಾನ್ ಜಿಕುಕ್ ಹೊತಾ, ಖರೆ ಜಿಕಲ್ಲ್ಯಾಕ್ ದೊಗ್ಯಾನಿ ಹಾರ್ವುಕ್ ಹೊತಾ, ತಿನ್ ಎಳ್ಯಾಚಿ ದೊರಿ ತುಟ್ವುತಲಿ ಲೈ ತರಾಸ್. 13 ತಸೆ ಹುಶಾರ್ಕಿಚ್ಯಾ ಗೊಸ್ಟಿಯಾಕ್ನಿ ಕಾನ್ ದಿನಸಲ್ಯಾ ಪಿಶ್ಯಾ ಮ್ಹಾತಾರ್ಯಾ ರಾಜಾಕಿಂತಾ, ಶಾನೊ ಗರಿಬ್ ದಾಂಡ್ಗೊ ಮಾನುಸುಚ್ ಬರೊ. 14 ಅಸ್ಲ್ಯಾ ಎಕ್ ದಾಂಡ್ಗ್ಯಾ ಮಾನ್ಸಾಕ್ ರಾಜಾ ಹೊವ್ಕ್ ಬಂಧಿಖಾನ್ಯಾತ್ನಾ ಹಾನುನ್ ಹೊಲೆ, ತೊ ಅಪ್ನಾಚ್ಯಾ ರಾಜ್ವಾಡ್ಯಾತ್ ಗರಿಬ್ ಮಾನುಸ್ ಹೊವ್ನ್ ಉಪಜ್ಲೊ. 15 ಜಗಾತ್ ಫಿರುನ್ ಚಲ್ತಲಿ ಮಾನ್ಸಾ ರಾಜಾಚ್ಯಾ ಮಾನಾಚೊ ಅಧಿಕಾರ್ ಘೆಟಲ್ಲ್ಯಾ ದಾಂಡ್ಗ್ಯಾ ಮಾನ್ಸಾಚ್ಯಾ ಪಕ್ಷಾಕ್ ಯೆತಲೆ ಬಗಟ್ಲೊ. 16 ಲೈ ಲೊಕಾ ತ್ಯಾ ದಾಂಡ್ಗ್ಯಾ ಮಾನ್ಸಾಕ್ ಉಮ್ಮೆದ್ ಭರ್ತಾತ್, ಖರೆ ತೆಜ್ಯಾ ಆಕ್ರಿಚ್ಯಾ ರಾಜ್ವಟ್ಕಿಚ್ಯಾ ಎಳಾರ್ ಕೊನ್ಬಿ ತೆಜ್ಯಾ ವಿಶಯಾತ್ ಖುಶಿ ಹೊವ್ಕ್ ನಾತ್, ಹೆಬಿ ವ್ಹಾರ್ಯಾಕ್ ಪಾಟ್ ಲಾಗುನ್ ಜಾತಲ್ಯಾ ಸಾರ್ಕೆ ಸಗ್ಳೆ ವ್ಯರ್ಥ್ ಹೊವ್ನ್ ಹಾಯ್.