ಮಿಕ್ 3

ಮಿಕಾನ್ ಇಜ್ರಾಯೆಲಾಂಚ್ಯಾ ಮುಖಂಡಾಕ್ನಿ ಖಂಡನ್ ಕರಲ್ಲೆ

1 ಜಾಕೊಬಾಚ್ಯಾ ಮುಖಂಡಾನು, ಇಜ್ರಾಯೆಲಾಂಚ್ಯಾ ಅಧಿಕಾರಿಯಾನಿ, ಮಾಜ್ಯಾ ಗೊಸ್ಟಿ‍ಯಾಕ್ನಿ ಕಾನ್ ದಿವಾ, ತುಮ್ಕಾ ಖರ್ಯಾಚೆ ಅರ್ಥ್ ಕಾಯ್ ಮನುನ್ ಕಳುಚೆ ಹೊಲ್ಲೆ ಹಾಯ್. 2 ತುಮಿ ಬರ್ಯಾಪಾನಾಕ್ ದ್ವೆಶ್ ಕರುನ್ ಬುರ್ಸ್ಯಾಪಾನಾಕ್ ಪ್ರೆಮ್ ಕರ್ತ್ಯಾಶಿ, ತುಮಿ ಲೊಕಾಂಚೆ ಚಮ್ಡೆ ಸೊಲುನ್ ತೆಂಚ್ಯಾ ಹಡ್ಡಾಂಚ್ಯಾ ವಯ್ಲೆ ಮಾಸ್ ಕಾಡ್ತ್ಯಾಸಿ. 3 ತುಮಿ ಮಾಜ್ಯಾ ಲೊಕಾಂಚ್ಯಾ ಆಂಗಾತ್ನಾ ಚಮ್ಡೆ ಕಾಡುನ್, ಹಡ್ಡಾಕ್ನಿ ತುಕ್ಡೆ ಕರುನ್ ತೆಂಕಾ ನಾಶ್ ಕರ್ತ್ಯಾಶಿ, ತುಮಿ ತೆಂಚಿ ಹಡ್ಡಾ ಗಾಡ್ಗ್ಯಾತ್ ಸಿಜ್ವುಕ್ ಘಾಲ್ತಲ್ಯಾ ಮಾಸಾಚ್ಯಾ ಗತಿನ್ ತುಕ್ಡೆ ತುಕ್ಡೆ ಕರುನ್ ಘಾಲ್ತ್ಯಾಸಿ. 4 ತುಮಿ ಸರ್ವೆಸ್ಪರಾಕ್ ಮಾಗ್ನಿ ಕರುಕ್ ಹೊತಾ, ಖರೆ ತೊ ತುಮ್ಕಾ ಜವಾಬ್ ದಿಯ್ನಾ, ತೊ ತುಮ್ಚ್ಯಾ ಬುರ್ಸ್ಯಾ ಪಾಪಾಚ್ಯಾ ವಯ್ನಾ ಅಪ್ನಾಚೆ ತೊಂಡ್ ನಿಪ್ವುನ್ ಘೆತಾ. 5 ಅಪ್ನಾಚ್ಯಾ ಲೊಕಾಕ್ನಿ ವ್ಹಾಂಕ್ಡ್ಯಾ ವಾಟೆಕ್ ಚಾಲ್ವುತಲ್ಯಾ ಅನಿ ಕಾಯ್ತರ್ಬಿ ಖಾವ್ಕ್ ಗಾವ್ಲ್ಯಾರ್ ಬರೆ ಬೊಲ್ತಲೆ ಅನಿ ಕಾಯ್ಬಿ ಖಾವ್ಕ್ ನಸ್ಲ್ಯಾರ್ ಲಡಾಯ್ ಪರ್ಗಟ್ತಲ್ಯಾ ಪ್ರವಾದ್ಯಾಚ್ಯಾ ವಿಶಯಾತ್ ವಿರೊಧ್ ಹೊವ್ನ್ ಸರ್ವೆಸ್ಪರ್ ಅಸೊ ಮನ್ತಾ. 6 ತಸೆ ಹೊವ್ನ್ ತುಮ್ಕಾ ಕನ್ನಾಬಿ ರ್‍ಹಾತ್ ಹೊಲ್ಲ್ಯಾ ಗತಿನ್ ರಾತಾ, ತುಮ್ಕಾ ದರ್ಶನಾ ದಿಸಿನಾತ್, ಫಿಡೆ ಹೊತಲೆ ಹೊತ್ತೆ ತುಮ್ಚ್ಯಾನ್ ಬಗುಕ್ ಹೊಯ್ನಾ, ತಸೆ ಹೊವ್ನ್ ತುಮ್ಕಾ ಕಾಳೊಕ್ ಹೊಲ್ಲೊ ರಾತಾ, ಅನಿ ಪರ್ವಾದಿಯಾಕ್ನಿ ದಿಸ್ ಬುಡಲ್ಲೊ ರಾತಾ, ರ್‍ಹಾತ್ ಅನಿ ದಿಸ್ ತೆಂಚ್ಯಾ ವರ್‍ತಿ ಮೊಟೊ ಕಾಳೊಕುಚ್ ಹೊಲ್ಲೊ ರಾತಾ. 7 ತಸೆ ಹೊವ್ನ್ ದರ್ಶನಾ ಬಗ್ತಲಿ ಲೊಕಾ ಲಜ್ಜಾಕ್ ಪಡ್ತಾತ್, ಫಿಡೆ ಹೊತಲೆ ಹೊತ್ತೆ ಸಾಂಗ್ತಲಿ ಲೊಕಾ ಗೊಂದಲಾತ್ ಸಿರ್ಕುನ್ ಪಡ್ತಾತ್, ತೆನಿ ಅಪ್ನಾಚಿ ತೊಂಡಾ ಧಾಪ್ತಾತ್, ಕಶ್ಯಾಕ್ ಮಟ್ಲ್ಯಾರ್, ತೆಂಕಾ ಸರ್ವೆಸ್ಪರಾಚಿ ಗೊಸ್ಟಿಯಾ ಗಾಯ್ನಾತ್. 8 ಮಿಯಾ ತರ್ ಸರ್ವೆಸ್ಪರಾಚ್ಯಾ ಆತ್ಮ್ಯಾಚ್ಯಾ ಅನಿ ಬಳೆಚ್ಯಾ ಖರೆಪಾನಾನ್ ಭರಲ್ಲೊ ಹೊವ್ನ್ ಜಾಕೊಬಾಕ್ ತೆಚಿ ಅಪ್ರಾದಾ ಅನಿ ಇಜ್ರಾಯೆಲಾಕ್ ತೆಜೊ ಪಾಪ್ ಪರ್ಗಟುನ್ ಸಾಂಗುನ್ ತಯಾರ್ ಹಾಯ್. 9 ಖರ್ಯಾಕ್ ಅಸಹ್ಯ್ ಕರುನ್ಗೆವ್ನ್ ನಿಟ್ ಹೊತ್ತೆ ವ್ಹಾಂಕ್ಡೆ ಕರ್‍ತಲ್ಯಾ ಜಾಕೊಬಾಚ್ಯಾ ಪಿಳ್ಗಿಚ್ಯಾ ಮುಖಂಡಾನು, ಇಜ್ರಾಯೆಲ್ ಘರಾನ್ಯಾಚ್ಯಾ ಅದಿಕಾರಿಯಾನು, ಸಮಾ ಅನಿ ಚುಕ್ ಕರ್‍ತಲ್ಯಾನೊ, ಮಾಜಿ ಗೊಸ್ಟ್ ಆಯ್ಕಾ. 10 ಸಿಯೊನಾಕ್ ಖುನಿಯಾನಿ ಅನಿ ಜರುಜಲೆಮಾಕ್ ಅನ್ಯಾಯಾನ್ ಭಾಂದ್ತಲೆ ತುಮಿ. 11 ಜರುಜಲೆಮಾಚಿ ಮುಖಂಡಾ ಲಂಚ್ ಘೆವ್ನ್ ಝಡ್ತಿ ಕರ್‍ತಾತ್, ಯಾಜಕಾ ಪಗಾರಾ ಸಾಟ್ನಿ ಶಿಕಾಪಾ ಕರ್‍ತಾತ್, ಪರ್ವಾದಿಯಾ ಪಯ್ಸ್ಯಾಚ್ಯಾ ಆಶ್ಯಾಕ್ ಫಿಡೆ ಹೊತಲೆ ಹೊತ್ತೆ ಸಾಂಗ್ತಾತ್, ಖರೆ ಸರ್ವೆಸ್ಪರಾ ವರ್‍ತಿ ವಜ್ಜೆ ಘಾಲುನ್, ಸರ್ವೆಸ್ಪರ್ ಅಮ್ಚ್ಯಾ ಮದ್ದಿ ಹಾಯ್, ಅಮ್ಕಾ ಕಾಯ್ಬಿ ಹಾನಿ ಹೊಯ್ನಾ ಮನ್ತಾತ್. 12 ಅಸೆ ರಾತಾನಾ, ತುಮ್ಚ್ಯಾ ವಯ್ನಾ ಸಿಯೊನ್ ಶಾರ್, ನಾಂಗ್ರಾನ್ ಜಿಪಲ್ಲ್ಯಾ ಜಿಮ್ನಿ ಸಾರ್ಕೆ ನಾಶ್ ಹೊತಾ, ಜರುಜಲೆಮ್ ಹಾಳ್ ಪಡಲ್ಲಿ ರಾಸ್ ಹೊತಾ, ಸರ್ವೆಸ್ಪರಾಚ್ಯಾ ಗುಡಿಚಿ ಮಡ್ಡಿ ಡಂಗ್ಳಿಚ್ಯಾ ಮಡ್ಡಿಯಾಂಚ್ಯಾ ಸಾರ್ಕೆ ಹೊತಾ.