ಮಿಕ್ 1

ಸಮಾರ್ಯಾ ಅನಿ ಜರುಜಲೆಮಾಕ್ ಹೊತಲೆ ಹೊತ್ತ್ಯಾ ಆಕ್ರಿಚೆ ಪರ್ಗಟ್

1 ಜುದಾ ಪ್ರಾಂತ್ಯಾಚೆ ರಾಜಾ, ಜೊತಾಮ್, ಆಹಾಜ್ ಅನಿ ಹೆಜೆಕಿಯಾ ಹೆಂಚ್ಯಾ ಕಾಲಾತ್, ಸಾಮಾರ್ಯಾಚ್ಯಾ ಅನಿ ಜರುಜಲೆಮಾಚ್ಯಾ ವಿಶಯಾತ್ ಮೊರೆಶೆತ್ಯಾಚ್ಯಾ ಮಿಕಾಕ್ ಸರ್ವೆಸ್ಪರ್ ದೆವಾಚಿ ಗೊಸ್ಟ್ ಆಯ್ಕೊ ಯೆಲಿ. 2 ಸಗ್ಳ್ಯಾ ಲೊಕಾನು ಆಯ್ಕಾ, ಜಗಾ ಅನಿ ತ್ಯಾತುರ್ ಹೊತ್ತ್ಯಾ ಸಗ್ಳ್ಯಾನು, ಆಯ್ಕಾ! ಸರ್ವೆಸ್ಪರ್ ಅಪ್ನಾಚ್ಯಾ ಗುಡಿತ್ನಾ ತುಮ್ಕಾ ವಿರೊಧ್ ಹೊವ್ನ್ ಸಾಕ್ಷಿ ದಿತಾ. 3 ಅಬಕ್, ಸರ್ವೆಸ್ಪರ್ ಅಪ್ನಾಚ್ಯಾ ನಿತಳ್ ಜಾಗ್ಯಾತ್ನಾ ಖಾಲ್ತಿ ಉತ್ರುನ್ ಯೆವ್ಲಾ, ಜಿಮ್ನಿಚ್ಯಾ ಎಗ್ದಮ್ ಉಪ್ಪರ್ಲ್ಯಾ ಜಾಗ್ಯಾ ವಯ್ನಿ ಚಲ್ತಾ. 4 ಆಗಿಕ್ ಕರ್ಗುನ್ ಜಾತಲ್ಯಾ ಮ್ಹೆನಾ ಸಾರ್ಕೆ ಅನಿ ಉತ್ರನಿಚ್ಯಾ ಜಾಗ್ಯಾರ್ ಹಂವ್ತಲ್ಯಾ ಪಾನಿಯಾ ಸಾರ್ಕೆ, ಕೊಳ್ಳಾ ಅನಿ ಮಡ್ಡಿಯಾ ತೆಚ್ಯಾ ಇದ್ರಾಕ್ ವಾಟೊ ಹೊವ್ನ್ ಕರ್ಗುನ್ ಹಂವಾರ್ಯಾ ಗತಿನ್ ಜಾವ್ಲಾತ್. 5 ಹೆಕಾ ಸಗ್ಳೆ ಕಾರನ್ ಜಾಕೊಬಾಚೊ ಘಾತ್ ಅನಿ ಇಜ್ರಾಯೆಲಾಚೊ ಕುಳಿಚೊ ಪಾಪ್, ಜಾಕೊಬಾಚೊ ಘಾತ್ ಮಟ್ಲ್ಯಾರ್ ಕಾಯ್? ಸಮಾರ್ಯ ನ್ಹಯ್ ಕಾಯ್! ಜುದಾಚೆ ಉಪ್ಪರ್ಲೆ ಜಾಗೆ ಖಲೆ? ಜೆರುಜಲೆಮ್ ನ್ಹಯ್ ಕಾಯ್! 6 ತಸೆ ಹೊವ್ನ್ ಮಿಯಾ ಸಮಾರ್ಯಾಕ್ ಶೆತಾತ್ಲೊ ಹಾಳ್ ಪಡಲ್ಲೊ ಡಿಬ್ಬ್ ಸರ್ಕೆ ಅನಿ ದರಾಕ್ಷಿಚ್ಯಾ ಮ್ಹಳ್ಯಾತ್ಲಿ ಮಡಿಯಾ ಗತಿನ್ ಕರ್ತಾ, ತೆಚೆ ಗುಂಡೆ ಖಡ್ಡ್ಯಾತ್ ವೊತುನ್, ತೆಚಿ ಪಾಯಾ ಮಾಳ್ ಜಾಗೆ ಕರ್ತಾ. 7 ತೆಚಿ ಮುರ್ತಿಯಾ ಫುಡ್ ಫುಡ್ ಕರ್ತಾ, ತೆನಿ ಘೊಳಲ್ಲೆ ಸಗ್ಳೆ ಜಳುನ್ ಜಾತಾ, ತೆಚಿ ಸಗ್ಳಿ ಮುರ್ತಿಯಾ ಹಾಳ್ ಕರ್ತಾ, ಅನಿ ವ್ಯಬಿಚಾರಾಚೊ ಪಗಾರ್ ದುಸ್ರ್ಯಾಂಚೊ ವಾಟೊ ಹೊತಾ, ಕಶ್ಯಾಕ್ ಮಟ್ಲ್ಯಾರ್, ಮಾಕಾ ಸಮಾರ್ಯಾ ವಿಶ್ವಾಸ್ ಘಾತ್ಕಿ ಸಾರ್ಕೆ ಹೊವ್ನ್ ಸಾವ್ಕಾರ್ ಹೊಲಾ, ಮಾಕಾ ವಿರೊದ್ ಹೊಲ್ಲಿ ಲೊಕಾ ತಿಚ್ಯಾಕ್ನಾ ತೆ ಸಗ್ಳೆ ಕಾಡುನ್ ಘೆತಾತ್. 8 ಹೆಚ್ಯಾ ಸಾಟ್ನಿ ಮಿಯಾ ಅಳಾಪ್ ಕರುನ್ ರಡ್ತಾ, ಖಾಲಿ ಪಾಂಯಾನ್ ಅನಿ ನಾಗ್ಡೊ ಫಿರುನ್ ಖೆಳ್ತಾ, ಝುಲ್ ಕುತ್ರ್ಯಾಚ್ಯಾ ಸಾರ್ಕೆ ಅರಡ್ತಾ, ಉಸ್ಟ್ರ ಪಕ್ಷಿ ಗತಿನ್ ಚಿರಡ್ತಾ. 9 ಸಮಾರ್ಯಾಕ್ ಪಡಲ್ಲೊ ಮಾರ್ ಗುನ್ ಕರುನ್ ಹೊಯ್ನಾ, ಕಶ್ಯಾಕ್ ಮಟ್ಲ್ಯಾರ್ ತೆ ಜುದಾಕ್ಬಿ ಲಾಗ್ಲಾ, ಮಾಜ್ಯಾ ಲೊಕಾಂಚೊ ಶಾರ್ ಹೊಲ್ಲ್ಯಾ ಜೆರುಜಲೆಮ್ ಪತರ್ ಪಗಳ್ಳಾ.

ಜರುಜಲೆಮಾಕ್ ವಿರೊಧಿಯಾನಿ ಜಗ್ಗೊಳ್ ಕರಲ್ಲೆ

10 ಹೆ ಗತ್ ಮನ್ತಲ್ಯಾ ಗಾಂವಾತ್ ಸಾಂಗುನಕಾಸಿ, ಅನಿ ರಡುನಕಾಶಿ, ಬೆತ್ -ಲೆ-ಆಪ್ರಾಂತ್ ಧುಳಿತ್ ಲೊಳಾ. 11 ಶಾಫಿರಾಚ್ಯಾ ಲೊಕಾನು, ನಾಗ್ಡೆ ರಾವ್ನ್ ಅವ್ಮಾನಾಕ್ ಗುರಿ ಹೊವಾ, ಝನಾನಾಚಿ ಲೊಕಾ ಭಾಯ್ರ್ ಜಾಯ್ನಾತ್, ಬೆತ್ -ಎಝೆಲ್ ಲೊಕಾಂಚ್ಯಾ ಅಳಾಪಾ ವಯ್ನಾ ತುಮ್ಕಾ ಹೊತ್ತಿ ಮಜ್ಜತ್ ಚುಕುನ್ ಜಾತಾ. 12 ಸರ್ವೆಸ್ಪರಾಕ್ನಾ ಬುರ್ಸೆಪಾನ್ ಯೆವ್ನ್ ಜೆರುಜಲೆಮಾಚ್ಯಾ ದಡ್ಪ್ಯಾಕ್ ಲಾಗಲ್ಲ್ಯಾ ವಯ್ನಾ, ಮಾರೊತಾಚಿ ಲೊಕಾ ಭಿಂಯಾನ್ ಬರ್ಯಾಕ್ ಸಾಟ್ನಿ ರಾಕಿತ್ ಹಾತ್. 13 ಲಾಕಿಶಿಚ್ಯಾ ಲೊಕಾನು, ರಥಾಕ್ನಿ ಘೊಡ್ಕಿಯಾ ಭಾಂದಾ, ಸಿಯೊನ್ ಶಾರಾಚ್ಯಾ ಲೆಕಿಚ್ಯಾ ಪಾಪಾಚೊ ಆರಂಬ್ ಹೊ, ಕಶ್ಯಾಕ್ ಮಟ್ಲ್ಯಾರ್, ಇಜ್ರಾಯೆಲಾಚಿ ಪಾಪಾ ಅನಿ ಅಪ್ರಾದಾ ತುಮ್ಚ್ಯಾಕ್ನಾಚ್ ಉಪ್ಜುನ್ ಯೆಲಾತ್. 14 ತಸೆ ಹೊವ್ನ್ ತುಮಿ ಮಾರೊತ್ಯಾಚ್ಯಾ ಗತ್ ಮನ್ತಲ್ಯಾ ಗಾಂವಾತ್ ಹೊತ್ತ್ಯಾಕ್ನಿ ಆಯಾರಾ ದಿತಲೆ ಹೊಯ್ಲ್, ಅಕ್ಜಿಬಿಚ್ಯಾ ಘರಾಕ್ನಾ ಇಜ್ರಾಯೆಲಾಚ್ಯಾ ರಾಜಾಕ್ನಿ ಪಸ್ವುನ್ ಹೊತಾ. 15 ಮಾರೊತ್ಯಾಚ್ಯಾ ಲೊಕಾನು, ತುಮ್ಕಾ ತಾಬೆತ್ ಕೆರುನ್ ಘೆತಲ್ಯಾಕ್ ಅತ್ತಾ ತುಮ್ಚೆಕ್ಡೆ ಯೆಯ್ ಸಾರ್ಕೆ ಕರ್ತಾ, ಇಜ್ರಾಯೆಲಾಚಿ ವಯ್ಬವ್ ಅದುಲ್ಲಾಮ್ ಶಾರಾಕ್ ಮಿಳ್ತ್ಯಾತ್. 16 ಜುದಾ, ತುಜ್ಯಾಕ್ನಾ ಕಾಡುನ್ಗೆವ್ನ್ ಗುಲಾಮ್ ಗಿರಿಕ್ ನ್ಹೆಲ್ಲ್ಯಾ ಪೊರಾಂಚ್ಯಾ ಸಾಟ್ನಿ ತುಜ್ಯಾ ಟಕ್ಲ್ಯಾಚಿ ಕೆಸಾ ತಾಸುನ್ ಘೆ, ಅನಿ ತುಜೆ ಬೊಳ್ ಟಕ್ಲೆ ಹಳಿ ಹದ್ದಾ ಗತಿನ್ ಪಗ್ಳುನ್ ಘೆ.