1 ಸಿಯೊನ್ ಶಾರಾ, ತುಜ್ಯಾ ಸಯ್ನಿಕಾಕ್ನಿ ಗೊಳಾ ಕರ್, ತೆನಿ ಅಮ್ಚ್ಯಾ ವಾಂಗ್ಡಾ ಝಗ್ಡೊ ಕರುಕ್ ಭೊತ್ಯಾನ್ ಆಕ್ರಮನ್ ಕರ್ಲಾ, ಇಜ್ರಾಯೆಲಾಂಚ್ಯಾ ಝಡ್ತಿ ಕರ್ನ್ಯಾರ್ಯಾಚ್ಯಾ ಗಾಲಾ ವರ್‍ತಿ ದಾಂಡ್ಯಾನ್ ಮಾರ್‍ತಾತ್.

2 ಬೆತ್ಲೆಹೆಮಾಚ್ಯಾ ಎಪ್ರಾತಾ, ತಿಯಾ ಜುದಾಚ್ಯಾ ಗಾಂವಾತ್ನಿ ಬಾರಿಕ್ ರಾಲ್ಯಾರ್ಬಿ, ತುಜ್ಯಾಕ್ನಾ ಇಜ್ರಾಯೆಲಾಕ್ ರಾಜ್ವಟ್ಕಿ ಕರ್ನಾರೊ ಯೆತಲೊ ಹಾಯ್, ತೊ ಯೆತಲ್ಯಾ ಜಾಗ್ಯಾಚೊ ಮುಳ್ ಜುನ್ನೊ ಅನಿ ಅದ್ದಿಕ್ನಾಚ್ ಯೆಲ್ಲೊ ಹಾಯ್. 3 ಅಸೆ ರಾತಾನಾ ಬಾನತ್ ಪಾನಾಚಿ ದುಕ್ ಖಾವ್ಕ್ ಲಾಗಲ್ಲಿಕ್ ಝಿಲ್ಗೊ ಉಪ್ಜು ಪತರ್ ಮಾಜಿ ಲೊಕಾ ವಿರೊಧಿಯಾಂಚ್ಯಾ ವಾಟೆಕ್ ಗಾಯ್ ಸಾರ್ಕೆ ಕರ್ತಾ, ಮಾನಾ ತ್ಯಾ ಲೊಕಾಂಚ್ಯಾ ಭಾವಾತ್ನಿ ಹುರಲ್ಲಿ ಲೊಕಾ ಇಜ್ರಾಯೆಲಾಂಚ್ಯಾ ವಾಂಗ್ಡಾ ಪರ್‍ತುನ್ ಯೆತಾತ್. 4 ತೊ ಸರ್ವೆಸ್ಪರಾಚಿ ಬಳ್ ಅನಿ ಅಪ್ನಾಚೊ ಸರ್ವೆಸ್ಪರಾಚ್ಯಾ ನಾವಾಚಿ ಮಹಿಮಾ ಘೆವ್ನ್ ಇಬೆ ರಾವ್ನ್ ಅಪ್ನಾಚ್ಯಾ ತಾಂಡ್ಯಾಕ್ ಚಾಲ್ವುತಾ, ತೊ ತಾಂಡೊ ಆರಾಮಾನ್ ವಸ್ತಿ ರಾತಾ, ತೊ ಜಿಮ್ನಿಚ್ಯಾ ಆಕ್ರಿ ಪತರ್ ಬಳಾನ್ ಭರಲ್ಲೊ ಹೊವ್ನ್ ರಾತಾ, ಅಮ್ಕಾ ತೊಚ್ ಸಮಾಧಾನ್ ದಿನಾರೊ.

5 ಅಮ್ಚ್ಯಾ ದೆಸಾತ್ ಅಶುರ್ಯಾನಿ ಗುಸುನ್ ಅಮ್ಚ್ಯಾ ರಾಜಾಚ್ಯಾ ಘರಾತ್ನಿ ತುಡ್ವುತಾನಾ, ಅಮಿ ತೆಂಕಾ ವಿರೊಧ್ ಹೊವ್ನ್ ಸಾತ್ ಲೊಕಾ ರಾಕ್ವಲ್ಯಾಕ್ನಿ ಹೊಯ್ ಆಟ್ ಬಲಿಸ್ಟ್ ಪುಡಾರಿಯಾಕ್ನಿ ತಯಾರ್ ಕರ್ತಾ. 6 ತೆಂಚೊ ಕೊಯ್ತೊ ಅಶುರ್ಯಾಂಚ್ಯಾ ದೆಸಾಕ್ ಜಾತಾ, ತೆಂಚ್ಯಾ ಕೊಯ್ತ್ಯಾಕ್ನಿ ನಿಮ್ರೊದ್ ಸಿಮೆಚೆ ಗುಸ್ತಲೆ ಜಾಗೆ ಗಾವ್ತಾತ್, ಅಶುರ್ಯಾಚೆ ರಾಜಾ ಅಮ್ಚ್ಯಾ ದೆಸಾತ್ ಗುಸುನ್ ಅಮ್ಚ್ಯಾ ಪ್ರಾಂತ್ಯಾಕ್ನಿ ತುಡ್ವುತಾನಾ, ತೊ ಸಮಾಧಾನಾಚೊ ಧನಿ ಅಮ್ಕಾ ತೆಂಚ್ಯಾ ಹಾತಿತ್ನಾ ಚುಕ್ವುತಾ. 7 ಸರ್ವೆಸ್ಪರಾಚೆ ದೆನೆ ಹೊವ್ನ್ ಹೊತ್ತಿ ಇಬ್ಬನಿ ಅನಿ ಗವ್ತಾಕ್ ವಾಡ್ವುತಲೊ ಪಾವ್ಸ್, ಮಾನ್ಸಾ ಸಾಟ್ನಿ ಅನಿ ತೆಜ್ಯಾ ಪಿಳ್ಗಿ ಸಾಟ್ನಿಬಿ ವಾಟ್ ರಾಕಿನಸ್ತಾನಾ ಬರೊ ಪಡ್ತಲ್ಯಾ ಸಾರ್ಕೆ ಯಾಕೊಬಾಚಿ ಲೊಕಾ ಲೈ ಲೊಕಾಂಚ್ಯಾ ಮದ್ದಿ ಆರಾಮಾನ್ ರಾತಾತ್. 8 ಖರೆ ಲೊಕಾಂಚ್ಯಾ ಮದ್ದಿ ಪಗ್ಳುನ್ ಗೆಲ್ಲಿ ಯಾಕೊಬಾಚ್ಯಾ ಪಿಳ್ಗಿಚಿ ಹುರಲ್ಲಿ ಲೊಕಾ ಡಂಗ್ಳಿಚ್ಯಾ ಜನಾವರಾಚ್ಯಾ ಮದ್ದಿ ಹೊತ್ತ್ಯಾ ಸಿಂವಾಗತಿನ್ ಹಾತ್, ಶೆಳಿಯಾಂಚ್ಯಾ ಹಿಂಡಾಚ್ಯಾ ಮದ್ದಿ ಹೊತ್ತ್ಯಾ ದಾಂಡ್ಗ್ಯಾ ಸಿಂವಾಗತಿನ್ ಹಾತ್, ತೊ ಸಿಂವ್ ಅಪ್ನಾಚ್ಯಾ ಮನಾಕ್ ಯೆಲ್ಲ್ಯಾ ಸಾರ್ಕೆ ಫಿರ್ತಾ, ತೆನಿ ಎಕ್ ಜನಾವರಾಕ್ ಧರ್ಲ್ಯಾರ್ ಕೊನಾಚೆನ್ಬಿ ಸೊಡ್ವುಕ್ ಹೊಯ್ನಾ ಪಗಳಲ್ಲ್ಯಾತ್ನಿ ಹುರಲ್ಲಿ ಲೊಕಾ ತೆಜ್ಯಾ ಗತಿನ್ ರಾತಾತ್. 9 ಯಾಕೊಬಾಚ್ಯಾ ಪಿಳ್ಗಿ ತಿಯಾ ತುಜ್ಯಾ ವಿರೊಧಿಯಾಂಚ್ಯಾ ವರ್‍ತಿ ಹಾತ್ ಉಕಲ್, ತುಜಿ ಸಗ್ಳಿ ವಿರೊಧಿಯಾ ನಾಶ್ ಹೊಂವ್ದಿತ್. 10 ಸರ್ವೆಸ್ಪರ್ ಅಸೊ ಮನ್ತಾ, ಮಿಯಾ ತ್ಯಾ ದಿಸಾತ್ನಿ ತುಜ್ಯಾ ಘೊಡ್ಕಿಯಾಕ್ನಿ ತುಜ್ಯಾಕ್ನಾ ತೊಡುನ್, ತುಜ್ಯಾ ರಥಾಕ್ನಿ ನಾಶ್ ಕರ್ತಾ. 11 ತುಜ್ಯಾ ದೆಶಾಚ್ಯಾ ಶಾರಾಕ್ನಿ ಹಾಳ್ ಕರುನ್, ತುಜ್ಯಾ ಕೊಟೆಕ್ನಿ ಪಾಡ್ವುನ್ ಟಾಕ್ತಾ. 12 ತುಜ್ಯಾ ಹಾತಿತ್ಲ್ಯಾ ಮೊಡ್ಗಾರಾಕ್ನಿ ಇಬೆ ಕರ್ತಾ, ಫಿಡೆ ಹೊತಲೆ ಸಾಂಗ್ತಲಿ ಲೊಕಾ ತುಜ್ಯಾಕ್ಡೆ ಹೆಜ್ಯಾನ್ ಫಿಡೆ ರ್‍ಹಾಯ್ನಾತ್. 13 ತುಜ್ಯಾ ಮುರ್ತಿಯಾಕ್ನಿ ಅನಿ ಗುಂಡ್ಯಾಚ್ಯಾ ಖಾಂಬಾಕ್ನಿ ತುಜ್ಯಾಕ್ಡೆ ಇಬೆ ರಾವ್ಕ್ ದಿನಸ್ತಾನಾ ಫೊಡುನ್ ಟಾಕ್ತಾ, ತುಜ್ಯಾ ಹಾತಿನ್ ರಚಲ್ಲ್ಯಾಕ್ ಅನಿ ಪರ್‍ತುನ್ ತಿಯಾ ಆರಾದನ್ ಕರುಕ್ ಹೊಯ್ನಾ. 14 ತುಜೆ ಅಸೆರ್ ಮನ್ತಲೆ ಮುರ್ತಿಯಾಂಚೆ ಖಾಂಬೆ ತುಜ್ಯಾಕ್ನಾ ಉಪ್ಸುನ್ ಟಾಕುನ್, ತುಜ್ಯಾ ಶಾರಾಕ್ನಿ ಚೊಕ್ಕ್ ಕರ್ತಾ. 15 ಖಾಲ್ತಿ ಹೊಯ್ ನಸಲ್ಲ್ಯಾ ಲೊಕಾಕ್ನಿ ಮೊಟ್ಟ್ಯಾ ರಾಗಾನ್ ಸೆಡ್ ಕಾಡುನ್ಗೆತಾ.