ಮಿಕ್ 4

ಸರ್ವೆಸ್ಪರಾಚಿ ಮಡ್ಡಿ

1 ಆಕ್ರಿಚ್ಯಾ ಎಳಾರ್ ಸರ್ವೆಸ್ಪರಾಚ್ಯಾ ಗುಡಿಚಿ ಮಡ್ಡಿ ಸಗ್ಳ್ಯಾ ಮಡ್ಡಿಯಾಂಚ್ಯಾ ಕಿಂತಾ, ಲೈ ವರ್‍ತಿ ಹೊವ್ನ್ ವಾಡಲ್ಲೆ ರಾತಾ, ತನ್ನಾ ಥೈ ಲೈ ವರ್‍ತಿ ಲೊಕಾ ತಾಂಡೆ ಹೊವ್ನ್ ಯೆತಾತ್. 2 ಥೈ ಲೈ ದೆಶಾಂಚ್ಯಾಕ್ನಾ ಲೊಕಾ ಜಾತಾತ್, ಅನಿ ಯೆವಾ ಅಮಿ ಸರ್ವೆಸ್ಪರಾಚ್ಯಾ ಮಡ್ಡಿಕ್ ಅನಿ ಜಾಕೊಬಾಚ್ಯಾ ಪಿಳ್ಗಿಚ್ಯಾ ಲೊಕಾಂಚ್ಯಾ ಗುಡಿಕ್ ಜಾಂವಾ, ತನ್ನಾ ಅಮ್ಕಾ ತೊ ಜಿವನ್ ಕರ್ತಲಿ ವಾಟ್ ದಾಕ್ವುತಾ, ಅಮಿ ತೆನಿ ಸಾಂಗಲ್ಲ್ಯಾ ಸಾರ್ಕೆ ಚಲ್ತಾವ್ ಮನುನ್ ಸಾಂಗ್ತಾತ್, ಕಶ್ಯಾಕ್ ಮಟ್ಲ್ಯಾರ್, ಸಿಯೊನಾಕ್ನಾ ದೆವಾಚಿ ಬರಿ ಶಿಕಾಪಾ ಅನಿ ಜರುಜಲೆಮಾಕ್ನಾ ಸರ್ವೆಸ್ಪರಾಚಿ ಗೊಸ್ಟಿಯಾ ಪಗಳ್ತಾತ್. 3 ಸರ್ವೆಸ್ಪರ್ ಸಗ್ಳ್ಯಾಕ್ನಿ ಝಡ್ತಿ ಕರ್ತಾ, ಲೈ ಮೊಟ್ಟ್ಯಾ ಮೊಟ್ಟ್ಯಾ ಲೊಕಾಂಚೆ ಝಗ್ಡೆ ತೊ ಸಮಾ ಕರ್ತಾ, ತೆನಿ ಅಪ್ನಾಚೆ ಕೊಯ್ತೊ ಪಾಜ್ವುನ್ ನಾಂಗ್ರಾಕ್ನಿ ಫಾಳಾ ಕರುನ್, ಭರ್ಜಿಯಾಕ್ನಿ ಇಳೆ ಸಾರ್ಕೆ ಕರುನ್ ತಯಾರ್ ಕರ್‍ತಾತ್, ಲೊಕಾ ಅನಿ ಎಕ್ ದೆಶ್ಯಾಚ್ಯಾ ವರ್‍ತಿ ವಿರೊಧ್ ಹೊವ್ನ್ ಕೊಯ್ತೊ ಉಕ್ಲಿನಾತ್, ಹೆಜ್ಯಾ ಫಿಡೆ ಪರ್‍ತುನ್ ಝಗ್ಡ್ಯಾಂಚಿ ತಯಾರಿ ಕರಿನಾತ್. 4 ಹರ್ ಎಕ್ಲ್ಯಾಕ್ಬಿ ಅಪ್ನಾಚ್ಯಾ ದರಾಕ್ಷ್ಯಾಚ್ಯಾ ಯೆಲಿಚ್ಯಾ ಬುಡಿ ಅನಿ ಅಂಜುರಾಚ್ಯಾ ಝಾಡಾಚ್ಯಾ ಬುಡಿ ಸಾವ್ಳಿಕ್ ಬಗ್ತಾತ್, ತೆಂಕಾ ಕೊನ್ಬಿ ಭ್ಹಿವ್ಸಿನಾತ್, ಸಗ್ಳೆಬಿ ಕರುಕ್ ಶಕ್ತ್ ಹೊತ್ತ್ಯಾ ಸರ್ವೆಸ್ಪರಾನುಚ್ ಹೆ ಸಗ್ಳೆ ಸಾಂಗ್ಲಾ. 5 ದುಸ್ರಿ ಲೊಕಾ ಅಪ್ನಾಚ್ಯಾ ದೆವಾಕ್ನಿ ಚಲ್ತಾತ್, ಖರೆ ಅಮಿ ಅಮ್ಚೊ ದೆವ್ ಹೊವ್ನ್ ಹೊತ್ತ್ಯಾ ಸರ್ವೆಸ್ಪರಾಚ್ಯಾ ನಾವಾಕ್ ಸದಾಸರ್ವತಾಕ್ ಚಲ್ತಾವ್.

ಇಜ್ರಾಯೆಲಾ ಗಡಿಪಾರಾಕ್ನಾ ಫಾಟಿ ಪರತಲ್ಲೆ

6 ಸರ್ವೆಸ್ಪರ್ ಅಸೊ ಮನ್ತಾ, ತ್ಯಾ ದಿಸಾತ್ನಿ ಘಾವ್ ಹೊವ್ನ್ ಕುಂಟುಲಾಗಲ್ಲ್ಯಾ ಅನಿ ಶಿಕ್ಷಾತ್ ಗಾವಲ್ಲ್ಯಾ, ಅನಿ ದೆಶ್ ಬುರ್ಸ್ಯಾಕ್ನಿ, ತರಾಸಾತ್ ಹೊತ್ತ್ಯಾ ಲೊಕಾಕ್ನಿ ಮಿಯಾ ಮಾಜೆಕ್ಡೆ ಬಲ್ವುನ್ ಘೆತಾ. 7 ತ್ಯಾ ಕುಂಟುಲಾಗಲ್ಲ್ಯಾ ಲೊಕಾಕ್ನಿ ಹುರ್ವುನ್ ರಾಕ್ತಾ, ಧುರ್ ಡಕ್ಳುನ್ ಟಾಕಲ್ಲ್ಯಾ ಲೊಕಾಕ್ನಿ ಲೈ ಬಳೆಚಿ ಲೊಕಾ ಹೊಯ್ ಸಾರ್ಕೆ ಕರ್ತಾ, ಸರ್ವೆಸ್ಪರ್ ಹೆಚ್ಯಾನ್ ಫಿಡೆ ಸಿಯೊನ್ ಮಡ್ಡಿ ವರ್‍ತಿ ಸದಾ ಸರ್ವತಾಕ್ ತೆಂಚೊ ರಾಜಾ ಹೊವ್ನ್ ರಾತಾ. 8 ತಾಂಡ್ಯಾಚ್ಯಾ ಗೊಪುರಾ ತುಜೊ ಎಳ್ ಯೆತಲೊ ಹಾಯ್, ಸಿಯೊನ್ ಬಾಪೆಲ್ ಮಡ್ಡಿ ತುಕಾ ಅನಿ ಪರ್‍ತುನ್ ಅಧಿಕಾರ್ ಗಾವ್ತಲೊ ಹಾಯ್, ಹೊಯ್ ಪಯ್ಲೆಚ್ಯಾ ಸಾರ್ಕೆ ಜರುಜಲೆಮಾತುಚ್ ತುಜೊ ರಾಜ್ವಾಡೊ ರಾತಾ. 9 ತಿಯಾ ಅತ್ತಾ ಕಶ್ಯಾಕ್ ಬೊಬ್ ಮಾರ್ತೆ? ತುಕಾ ಎವ್ಡೊ ಲೈ ತರಾಸ್ ಕಶ್ಯಾಕ್ ಯೆಲೊ, ತುಜೊ ರಾಜ್ ಸೊಡುನ್ ಗೆಲೊ ಕಾಯ್? ತುಜೊ ಚಿಂತಾಪಾಚೆ ದೆವ್ ನಾಶ್ ಹೊಲೊ ಕಾಯ್? ಹೆಚ್ಯಾ ವಯ್ನಾ ತಿಯಾ ಬಾನತ್ ಪಾನಾಚಿ ದುಕ್ಕ್ ಖಾತಲ್ಯಾ ಬಾಯ್ಕೊಮಾನ್ಸಿಚ್ಯಾ ಗತಿನ್ ತರಾಸ್ ಕರುನ್ ಘೆಟ್ಲೆ ಕಾಯ್? 10 ಸಿಯೊನ್ ಮನ್ತಲ್ಯಾ ಚೆಡ್ವಾ ಬಾನತ್ ಹೊತಲಿಚ್ಯಾ ಗತಿನ್ ದುಕ್ಕ್ ಕರುನ್ಗೆ, ತಿಯಾ ಜರುಜಲೆಮ್ ಶಾರಾಕ್ನಾ ಬಾರ್ಯ್ ಜಾವ್ನ್ ಸೆತಾತ್ನಿ ವಸ್ತಿ ರ್‍ಹಾತೆ, ಮಿಯಾ ಸಾಂಗ್ತಲೆ ಕಾಯ್ ಮಟ್ಲ್ಯಾರ್, ತಿಯಾ ಬಾಬಿಲೊನಾಕ್ ಜಾತೆ, ಖರೆ ತುಕಾ ಥೈ ರಾಕ್ವನ್ ಹೊತಾ, ತುಕಾ ಸರ್ವೆಸ್ಪರ್ ಥೈ ಯೆವ್ನ್ ರಾಕ್ವನ್ ಕರ್ತಾ, ತುಕಾ ತುಜ್ಯಾ ವಿರೊಧಿಯಾಕ್ನಾ ರಾಕ್ವನ್ ಕರ್ತಾ. 11 ತುಜ್ಯಾ ವಾಂಗ್ಡಾ ಲೈ ಲೊಕಾ ಝಗ್ಡ್ಯಾಕ್ ಯೆತಾತ್, ಥೈ ಬಗಾ, ಯೆವಾ ಅಮಿ ಸಿಯೊನಾಕ್ ಆಕ್ರಮನ್ ಕರುಂವಾ ಮನುನ್ ಸಾಂಗುಲ್ಲಾತ್. 12 ತೆನಿ ಯೆವ್ಜನ್ ಕರುಲ್ಲಾತ್ ಖರೆ, ಸರ್ವೆಸ್ಪರಾಚಿ ಯೆವ್ಜನ್ ತೆನಿ ಕಳ್ವುನ್ಗೆಯ್ನಾತ್, ಸರ್ವೆಸ್ಪರಾನ್ ಎಕ್ ವಿಶೆಸ್ ಯೆವ್ಜನ್ ಥವ್ನ್ ಘೆವ್ನ್ ಅಪ್ನಾಚ್ಯಾ ಲೊಕಾಕ್ನಿ ಹಿತ್ತೆ ಹಾನ್ಲಾ, ತಿ ಲೊಕಾ ಮ್ಹಳುಲಾಗಲ್ಲ್ಯಾಖಳ್ಯಾತ್ ಹೊತ್ತ್ಯಾ ಕನ್ಸಾಂಚ್ಯಾ ಗತಿನ್ ಫುಡ್ ಫುಡ್ ಹೊತಾತ್. 13 ಸಿಯೊನ್ ಮನ್ತಲ್ಯಾ ದಾಂಡ್ಗ್ಯಾ ಚೆಡ್ವಾ ಉಟ್, ತ್ಯಾ ಲೊಕಾಕ್ನಿ ಫುಡ್ ಕರ್, ಮಿಯಾ ತುಕಾ ಬಳಾನ್ ಭರಿ ಸಾರ್ಕೆ ಕರ್ತಾ, ತುಕಾ ಲೊಂಗ್ಟಾಚ್ಯಾ ಸಿಂಗಾ ಸಾರ್ಕೆ ಅನಿ ತಾಂಬ್ಯಾಚ್ಯಾ ಗೆಳಾಂಚ್ಯಾ ಸಾರ್ಕೆ ತುಕಾ ಕರ್ತಾ. ತಿಯಾ ಲೈ ಲೊಕಾಕ್ನಿ ತುಕ್ಡೆ ತುಕ್ಡೆ ಕರ್ತೆ ತುಜೆ ಬದಿಕ್ ಸಗ್ಳ್ಯಾ ಜಿಮ್ನಿಚೊ ವಡಿಲ್ ಹೊಲ್ಲ್ಯಾ ಸರ್ವೆಸ್ಪರಾಕ್ ಒಪ್ಸುನ್ ದಿತಾ.