Miquéias 6

ಇಜ್ರಾಯೆಲಾಂಚ್ಯಾ ವಿರೊದ್ ಸರ್ವೆಸ್ಪರಾಚೊ ಶರಾಪ್

1 ತಿಯಾ ಮಡ್ಡಿಯಾಂಚ್ಯಾ ವರ್‍ತಿ ಝಗ್ಡೊ ಘಾಲ್, ತುಜಿ ಧನ್ ಮಡ್ಡಿಯಾಕ್ನಿ ಆಯ್ಕುಂದಿತ್ ಮನುನ್ ಮಾಕಾ ಸರ್ವೆಸ್ಪರಾನ್ ಸಾಂಗಲ್ಲೆ ಆಯ್ಕ್. 2 ಮಡ್ಡಿಯಾನು ಸರ್ವೆಸ್ಪರಾಚಿ ಧನ್ ಆಯ್ಕಾ! ಜಿಮ್ನಿಚ್ಯಾ ಶಾಶ್ವತಾಕ್ ರ್‍ಹಾತಲ್ಯಾ ಪಾಯಾನೊ, ಕಾನ್ ದಿವ್ನ್ ಆಯ್ಕಾ, ಸರ್ವೆಸ್ಪರಾಕ್ ತೆಜ್ಯಾ ಲೊಕಾಂಚ್ಯಾ ವರ್‍ತಿ ಝಗ್ಡೊ ಹಾಯ್ ತೊ ಇಜ್ರಾಯೆಲಾಕ್ನಿ ಚುಕಿದಾರಾ ಮನುನ್ ಠರ್ವುತಾ. 3 ಮಾಜ್ಯಾ ಲೊಕಾನು ತುಕಾ ಮಿಯಾ ಕಾಯ್ ಕರ್ಲೊ? ತುಕಾ ಖಲ್ಯಾ ವಿಶಯಾತ್ ಬೆಜಾರ್ ಕರ್ಲೊ? ಮನುನ್ ಸರ್ವೆಸ್ಪರ್ ಸಾಂಗ್ತಾ. 4 ಮಿಯಾ ತುಕಾ ಇಜಿಪ್ತ್ ದೆಸಾಕ್ನಾ ಸುಟ್ಕಾ ಕರುನ್ ಗುಲಾಮ್ ಗಿರಿತ್ನಾ ಸುಟ್ಕಾ ಕರ್ಲೊ, ಮೊಯ್ಜೆಕ್, ಆರೊನಾಕ್ ಅನಿ ಮಿರ್ಯಾಮಾಕ್ ತುಜಿ ಯೆಜ್ಮಾನ್ ಕರುನ್ ಧಾಡ್ಲೊ. 5 ಮಾಜ್ಯಾ ಲೊಕಾನು, ಮೊವಾಬಾಚೊ ರಾಜಾ ಬಾಲಾಕಾನ್ ದಿಲ್ಲಿ ಸಲಹಾ ಅನಿ ಬೆಯೊರಾಚೊ ಲೆಕ್ ಬಿಳಾಮಾನ್ ಸಾಂಗಲ್ಲಿ ಜವಾಬಾ ಯಾದೆಕ್ ಹಾನುನ್ ಘೆವಾ, ಸರ್ವೆಸ್ಪರಾಚಿ ಬರಿ ಕಾಮಾ ತುಜ್ಯಾ ಯಾದೆಕ್ ಯೆಯ್ ಸಾರ್ಕೆ ತುಮಿ ಶಿಟ್ಟಿಮ್ ಸೊಡಲ್ಲ್ಯಾಕ್ನಾ ಗಿಲ್ಲಾಲಾಕ್ ಪಾವಿ ಪತರ್ ಹೊಲ್ಲೆ ಸಗ್ಳೆ ಯಾದ್ ಕರುನ್ಗೆವಾ.

ಸರ್ವೆಸ್ಪರಾಚಿ ವಿನಂತಿ ಕಾಯ್

6 ಮಿಯಾ ಖಲಿ ಕಾನಿಕ್ ಘೆವ್ನ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಯೆವ್ಚೆ? ಕಾಯ್ ಭೆಟ್ವುನ್ ಮೊಹನ್ನತ್ ದೆವಾಚ್ಯಾ ಇದ್ರಾಕ್ ಡಬ್ಬ್ ಪಡುಚೆ? ಭೆಟ್ವುಕ್ ಜನಾವರಾ ಅನಿ ಎಕ್ ವರ್ಸಾಚಿ ಪಾಡಿ ಘೆವ್ನ್, ತೆಜ್ಯಾ ಇದ್ರಾಕ್ ದಾಕ್ವುನ್ ಘೆವ್ಚೆ ಕಾಯ್? 7 ಹಜಾರಾನ್ ಘಟ್ಲೆ ಟಗ್ರಾ, ಒಲಿವ್ ತೆಲಾಚೊ ಝರು ಬಗುನ್ ಸರ್ವೆಸ್ಪರ್ ಮೆಚ್ಚುನ್ಗೆತಾ ಕಾಯ್? ಮಾಜ್ಯಾ ಚುಕೆಚ್ಯಾ ವಯ್ನಾ ಮಾಜ್ಯಾ ಜಾಂನ್ತ್ಯಾ ಪೊರ್ ಭೆಟ್ವುಚೆ ಕಾಯ್? ಮಾಜ್ಯಾ ಆತ್ಮ್ಯಾಚ್ಯಾ ಪಾಪಾ ಸಾಟ್ನಿ ಗರ್ಬಾಚೆ ಫಳ್ ಭೆಟ್ವುಚೆ ಕಾಯ್? 8 ಮಾನ್ಸಾ, ಸರ್ವೆಸ್ಪರಾನ್ ಬರೆ ಖಲೆ ಮನುನ್ ತುಕಾ ದಾಕ್ವುಲ್ಯಾನ್, ಖರ್ಯಾನ್ ಚಲ್ತಲೆ, ದಯಾ ದಾಕ್ವುತಲೆ, ತುಜ್ಯಾ ದೆವಾಕ್ ಮನ್ ದಿವ್ನ್ ಚಲ್ತಲೆ, ಹೆ ತವ್ಡೆಚ್ ಸೊಡುನ್ ತುಜ್ಯಾಕ್ನಾ ಸರ್ವೆಸ್ಪರ್ ಅನಿ ಕಾಯ್ಬಿ ಆಶ್ಯಾ ಕರಿನಾ.

9 ಸರ್ವೆಸ್ಪರ್ ಶಾರಾಕ್ಡೆ ಮೊಟಿ ಧನ್ ಕರುನ್ ಬೊಬ್ ಮಾರ್ತಾ, ತುಜ್ಯಾ ನಾವಾಕ್ ಭಿಂವ್ತಲೆ ಶಾನೆಪಾನ್ ಹೊವ್ನ್ ಹಾಯ್, ಮಾರ್ತಲ್ಯಾ ದಾಂಡ್ಯಾಕ್ಡೆ ಕಾನ್ ದಿವಾ, ತೆ ತಯಾರ್ ಕರಲ್ಲೆ ಕೊನಿ ಮನುನ್ ಕಳ್ವುನ್ ಘೆವಾ. 10 ಬುರ್ಸ್ಯಾ ಮಾನ್ಸಾಚ್ಯಾ ಘರ್‍ಹಾತ್ ಬುರ್ಸೆಪಾನಾನ್ ಖಮ್ವುಲ್ಲೆ ಪಯ್ಸೆ, ಬುರ್ಸೆ ದಿಸ್ತಲೆ ಬಾರಿಕ್ ಮಾಪ್, ಹೆ ಸಗ್ಳೆ ಅಜುನ್ಬಿ ಗಾವ್ತಾ ಕಾಯ್? ಹೆ ಮಿಯಾ ದ್ವೆಶ್ ಕರ್‍ತಲೆ ವಿಶಯ್. 11 ಚೊರ್ ತಕ್ಡಿ ಅನಿ ಪಸ್ವಲ್ಲಿ ಗುಂಡ್ಯಾಚಿ ಪಿಶ್ವಿ ಕೊನಾಕ್ಡೆ ತರ್ಬಿ ರಾಲ್ಯಾರ್, ಮಿಯಾ ತೆಕಾ ಕಸೆ ಮಾಪ್ ಕರುಚೆ? 12 ಶಾರಾಚಿ ಸಾವ್ಕಾರ್ ಮಾನ್ಸಾ ಲೈ ಬಲತ್ಕಾರ್ ಕರ್‍ತಾತ್, ಥೈ ವಸ್ತಿ ರಾತಲಿ ಲೊಕಾ ಝುಟಿ, ತೆಂಚಿ ತೊಂಡಾ ಅನಿ ಜಿಬ್ಲಿಯಾ ಪಸ್ವನ್ಕಿಚಿ ಹೊವ್ನ್ ಹಾತ್. 13 ತಸೆ ಹೊವ್ನ್ ಜರುಜಲೆಮಾ, ತುಕಾ ಲೈ ಕಠಿನ್ ಮಾರ್ ದಿತಾ, ತುಕಾ ತುಜ್ಯಾ ಪಾಪಾಂಚ್ಯಾ ಸಾಟ್ನಿ ಹಾಳ್ ಕರ್ತಾ. 14 ತಿಯಾ ಜೆವ್ತೆ ಖರೆ ತುಕಾ ಪೊಟ್ ಭರಿನಾ, ತುಕಾ ಕನ್ನಾಬಿ ಭುಕ್ ಲಾಗಲ್ಲಿಚ್ ರಾತಾ, ತಿಯಾ ತುಜ್ಯಾ ಲೊಕಾಕ್ನಿ ಧಾಡುನ್ ದಿಲ್ಯಾರ್ಬಿ ತೆಂಕಾ ಚುಕ್ವುಕ್ ಹೊಯ್ನಾ, ಚುಕ್ವುಲ್ಲ್ಯಾಕ್ ಕೊಯ್ತ್ಯಾಕ್ ಗಾಯ್ ಸಾರ್ಕೆ ಕರ್ತಾ. 15 ತಿಯಾ ಪೆರ್ತೆ ಖರೆ ಕಾಪಿನೆ, ತೆಲಾಚಿ ಫಳಾ ತುಡ್ವುತೆಯ್, ಖರೆ ಆಂಗಾಕ್ ತೆಲ್ ಲಾವ್ನ್ ಘೆಯ್ನಾ, ದರಾಕ್ಷಾಚಿ ಫಳಾ ತುಡ್ವುಲ್ಯಾರ್ಬಿ ವಾಯ್ನ್ ಫಿಯ್ನೆ. 16 ಒಮ್ರಿ ರಾಜಾಚಿ ನೆಮಾ ಅನಿ ಅಹಾಬಾಚ್ಯಾ ಘರಾನಾಚಿ ಸಗ್ಳ್ಯಾ ನಮುನ್ಯಾಚಿ ಸನಾ ತುಜ್ಯಾಕ್ಡೆ ಹೊತಾತ್, ತುಜಿ ಲೊಕಾ ಅಪ್ನಾಚ್ಯಾ ಬುರ್ಸ್ಯಾ ಗತಿಕ್ ಸಮಾ ಹೊಯ್ ಸಾರ್ಕೆ ಚಲ್ತಾತ್, ತಸೆ ಹೊವ್ನ್, ಮಿಯಾ ತುಕಾ ಭ್ಹಿವಿ ಸಾರ್ಕೆ ಅನಿ ತುಜ್ಯಾಕ್ಡೆ ವಸ್ತಿ ರ್‍ಹಾತಲ್ಯಾ ಲೊಕಾಕ್ನಿ ಸಿಟಿಯಾ ಮಾರ್ತಲ್ಯಾಕ್ ಗುರಿ ಕರ್ತಾ, ಮಾಜ್ಯಾ ಲೊಕಾಕ್ನಿ ಹೊವ್ಚೆ ಹೊಲ್ಲ್ಯಾ ಅವ್ಮಾನಾಕ್ ತುಮಿ ಗುರಿ ಹೊತ್ಯಾಸಿ.