1 Sɛ meka mmenia ne abɔfo dwudwolɛ, ná sɛ nnne dɔ a, nde kyɛ dɔn anaa akasaa bie bɔ ɔyɛ dede mbaen ne. 2 Sɛ nne ngɔmhyɛ akyɛdeɛ, mete edwirɛ krongron bɔ wafea ne nimdeɛ biala bo, nne gyidie bɔ okora tutu mmokaa, na sɛ nnne ɔdɔ a, nnde hwee. 3 Sɛ metɔne bɔ nne ye biala mefa metɔ aleɛ mema ahiafoɛ, na mefa me nipadua mebɔ afɔleɛ mefa mehoɔhoa me nwo, nakoso nnne ɔdɔ a, mengonya mvasoɛ biala wɔ so.

4 Ɔdɔ le aboterɛ, na ye ti anu nnyɛ se. Ɔdɔ de, ɔtte ahoɔyaa, ɔndwa ye noanu,* na ɔmma ye nwo so. 5 Ɔdɔ nnyɛ nikye bɔ ɔttemaye, nná bɔ ohia ye ngome yeɛ ɔdwene ye nwo ɔ, ɔmvɛ yaa ndɛ, na ɔmva bɔne nwura ye nu. 6 Ɔdɔ nni ahurusi wɔ nikye bɔ ɔttemaye nwo, mmom nahorɛ yeɛ odi ye nwo ahurusi ɔ. 7 Ɔdɔ to ye bo ase wɔ nikye biala nu, ole nikye biala nu gyidie, ole nikye biala nu anidasoɛ, na ɔfa animia gyina nikye biala nu.

8 Ɔdɔ bo mbɛ lle. Nakoso, sɛ ngɔmhyɛ wɔ berɛ a, yebo kɔpɛ, sɛ dwudwolɛ ahoroɛ wɔ berɛ a, ɔkɔyakyi, na nimdeɛ koso, okofi berɛ. 9 Ofikyɛ yɛ nimdeɛ nni mu, na yɛ ngɔmhyɛ koso nni mu, 10 yeti sɛ bɔ odi mu ne ba a, bɔ onni mu ne kofi berɛ.

11 Mmerɛ bɔ né nde akwalaa ne, né me dwudwo kyɛ akwalaa, me dwene kyɛ akwalaa, na né mesusu nningyein nwo kyɛ akwalaa. Nakoso nyɛle panyi ne de, mayakyi ngwalaasɛm ne. 12 Kesaalae de, yɛnea buralɛ ahwehwɛ nu, yeti yɛnwu nikye ne wusi-wusi, nakoso mmerɛ bie kɔwa, bɔ yekonwu nikye yé. Kesaalae de, me nimdeɛ nni mu, nakoso sɔ mmerɛ ne, ngonya nimdeɛ bɔ odi mu te kyɛ bɔ ɔse me yé nala.

13 Kesaalae, nningyein nza he yeɛ ɔwɔ berɛ ɔ: gyidie, anidasoɛ, yeɛ ɔdɔ; nakoso bɔ ɔte piri* wɔ nu yeɛ ole ɔdɔ.