1 Aso nne ye nwo atee kyɛ meyɛ bɔ mekuro biala hɔ? Aso nnde somafoɛ? Na nnwuni y’Awurade Yesu hɔ? Na nná ɛmɔ yeɛ ɛmɔte me sa noa adwuma wɔ Awurade nu ɔ? 2 Sɛ ebiemɔ nnwu me kyɛ nde somafoɛ po a, ɛmɔ de, ɛmɔnwu me kyɛ nde somafoɛ! Na nikye bɔ ɔhyɛ me nzorɛ kyɛ nde Awurade somafoɛ yeɛ ole ɛmɔ.

3 Bɛbɔ bɛneɛnea me dwirɛ nu ne, ɛhe yeɛ mefa meye me noa ɔ: 4 Yɛlle ye nwo ate kyɛ yɛdidi ná yɛno anaa? 5 Ná yɛlle ye nwo atee kyɛ yɛgya mmrasua bɔ bɛte gyidifoɛ, na yɛfa bɛ yɛdi yɛ si kyɛbɔ asomafoɛ bɔ baha, Awurade aliemaa nemɔ, ne Kefa* yɛ ne anaa? 6 Anaa mene Barnaba ngome de, adwuma bɔ yɛyɛ yɛnea yɛ nwo ne, yɛyakyi a onyɛ yé? 7 Sogyaniɛ beni yeɛ ye bɔbɔ otua ye nwo kerɛ ɔ? Na nwa yeɛ ɔyɛ bobe boo a, onni nu mmaa ɔ? Anaa nwa yeɛ ɔnea ngaka bɔ onno bɛ nyɔfonesue ne bie ɔ?

8 Sona adwene yeɛ mefa meka ɛhe hɔ? Nná sɔ ala yeɛ mmeraa ne koso ka ɔ? 9 Bahworɔ ye wɔ Mose mmeraa nanu kyɛ: "Nnɛkyekye nandwie noa, mmerɛ bɔ ɔporo hwiit ne." Aso nandwie ne yeɛ Nyameɛ dwene ye nwo ɔ? 10 Anaa yɛ ti yeɛ ɔhane sɔ dwirɛ ne? Bɔ ɔte yeɛ ole kyɛ, yɛ ti yeɛ ɔmaa bɛhworɔle sɔ dwirɛ ne. Ofikyɛ bɔ ofundam aseɛ ne bɔ ɔboro atokoɔ ne, mmerɛ bɔ bɛyɛ sɔ ne, odikyɛ benya anidasoɛ kyɛ bekonya bɛ kyɛfa. 11 Yeti, sɛ yalua honhom nu mmaa wɔ ɛmɔ nu, na sɛ yɛpɛ anwoɔnaen nu nningyein yɛfi ɛmɔ berɛ a, ɔbo so anaa? 12 Sɛ ebiemɔ kora dɛ́ nningyein bɔ ɔte sɔ fi ɛmɔ berɛ a, yɛ de, yɛlle ye nwo atee bɔ ɔtra sɔ anaa? Nakoso, yɛ de, yamva ye nwo atee bɔ ɔte sɔ ne yanyɛ adwuma, mmom yɛbɔle mmɔden yɛgyinane ɔhaw biala noa, kyɛbɔ ɔkɔyɛ a yɛngosi Kristo nzɛmba ne atee. 13 Bɛbɔ bɛyɛ adwuma krongron wɔ asɔre awuro berɛ ne, ɛmɔnze kyɛ bɛdi ɛberɛ aleɛ ne bie? Na ɛmɔnze kyɛ bɛbɔ bɛyɛ adwuma daa wɔ afɔleɛ bokyea nanwo ne nya nningyein bɔ bɛfa bɛbɔ afɔleɛ ne bie? 14 Sɔ ala yeɛ Awurade ahyɛ mmeraa kyɛ, bɛbɔ bɛka nzɛmba ne, bɛfa nzɛmba naso bɛtena ase.

15 Nakoso sɔ nhyehyɛɛ ne, mmvale enu komapɛ po nnyɛle adwuma, yeɛ nná nningyein bɔ ngonya ngofi ɛmɔ berɛ nati yeɛ metworɔ ɛhe ɔ. Ahaa ye de ɔte pa kyɛ ngowu tra kyɛ ngɔmaa ebie kole bɔ mefa mehoɔhoa me nwo ne kofi me sa nu ɔ. 16 Sɛ meka nzɛmba ne a, ɛhene ngyire kyɛ mva nhoɔhoa me nwo, ofikyɛ ɔte adwuma bɔ odikyɛ meyɛ ɔ. Na sɛ manga nzɛmba ne a, me yaakɔ! 17 Sɛ mefia me kunu meyɛ a, ngonya ye nwo akatua, nakoso sɛ offi m’ahone nu po a, ɔte adwuma bɔ bafa bawura me sa ɔ. 18 Ye de, akatua beni yeɛ ngonya ye ɔ? Yeɛ ole kyɛ ngɔfa nzɛmba ne ngɔma mbaen, kyɛbɔ ɔkɔyɛ a ye nwo atee bɔ nne ye ne, mengɔfa mengɔyɛ bɔ ɔttemaye ɔ.

19 Ɔwɔ nu, nnwura ebiala bo, nakoso mayɛ me nwo akoaa mama ebiala, kyɛbɔ ɔkɔyɛ a, ngonya mmeni pee. 20 Nyɛle me nwo Yudaniɛ mmane Yudafoɛ, ná wamaa manya Yudafoɛ. Bɛbɔ bɛwura mmeraa bo ne, nyɛle me nwo kyɛ ebie bɔ owura mmeraa bo, ná wamaa manya bɛ. Ɔwɔ nu, me bɔbɔ de nnwura mmeraa bo. 21 Bɛbɔ benne mmeraa bo ne, nyɛle me nwo kyɛ ebie bɔ ɔnne mmeraa bo, kyɛbɔ ɔkɔyɛ a, ngonya bɛ ɔ. Ɛhene ngyire kyɛ nne mmeraa bo wɔ Nyameɛ nu oo, nwura Kristo mmeraa nabo. 22 Bɛbɔ bayɛ mmerɛ ne, nyɛle mmerɛ mmane bɛ, ná wamaa manya bɛ. Mayɛ bɔ ngɔhora biala mama mmenia ahoroɛ mukoraati, kyɛbɔ ɔkɔyɛ a, atee biala so ne, ngole bɛ nu biemɔ ngoa. 23 Nzɛmba nati yeɛ mayɛ ɛhemɔ mukoraati ne, na wamaa manya nu kyɛfa.

24 Nnaa ɛmɔse kyɛ sɛ besi akan a, bɛbɔ bɛtu mirika namukoraati tu bie, nakoso komapɛ yeɛ bɛbɔ ye aba so ɔ? Sɔ ala yeɛ ɛmɔtu mirika ne ɔ, ná wamaa ɛmɔ sa aha abasobɔdeɛ ne. 25 Ebiala bɔ osi akan ne hyɛ ye nwo so wɔ nikye biala nu, bɛyɛ sɔ kyɛbɔ ɔkɔyɛ a bekonya abasobɔdeɛ bɔ ɔsɛkye, nakoso yɛ de, yekonya abasobɔdeɛ bɔ ɔnzɛkye. 26 Yeti, me de, mendu mirika ne biala-biala; na twɔleɛ bɔ metoto ne, mendo ye kyɛ ebie bɔ ɔbo mvrama ne. 27 Ɛhene ati, meyɛ me nipadua ne aborɛ,* na mehyɛ ye kyɛ akoaa, ná wamma manyɛ ebie bɔ atee bie so ne ɔmvata, mmerɛ bɔ maha nzɛmba mahyire afoforɛ ne.