1 Ngoa dwirɛ bɔ ɔwɔ berɛ fi ahyɛaseɛ ne, yate ye nwo dwirɛ, yafa yɛ nye yanwu ye, yanea, na yafa yɛ sa yaha ye, 2 (bɛlale sɔ ngoa ne ali ne, yɛnwuni ye, na yɛdi ye nwo adanzeɛ, daa ngoa bɔ né ɔwɔ Baba ne nwo berɛ bɔ ɔlale ye ali ne, ɛhene yeɛ yɛka ye nwo dwirɛ yɛkyire ɛmɔ ne.) 3 Bɔ yanwu ye na yate ne, ɛhene yeɛ yɛka ye nwo dwirɛ yɛkyire ɛmɔ, ná wamaa ɛmɔ ne yɛ afa adamvoa, kyɛbɔ yɛne Baba ne né ɔwa Yesu Kristo afa adamvoa ne. 4 Yɛtworɔ ɛhe yɛbrɛ ɛmɔ, na wamaa y’anigye ali mu.

5 Edwirɛ bɔ yɛte yɛfili ye berɛ, bɔ yɛpena kyɛ yɛka yɛkyire ɛmɔ yeɛ ole kyɛ, Nyameɛ te kanea, na awosii biala nne ye nu. 6 Sɛ yɛka kyɛ "Yɛne ye afa adamvoa" na yɛkɔ so yɛnate awosii nu a, né yɛpɛ anoanu, na yɛmva nahorɛ ne yɛmmɔ yɛ bra. 7 Nakoso, sɛ yɛkɔ so yɛnate kanea nanu, kyɛbɔ ɔwɔ kanea nu ne a, ye de yɛne yɛ nwo afa adamvoa, na ɔwa Yesu mogya ne nwunzi yɛ nwo fi bɔne mukoraati nwo. 8 Sɛ yɛka kyɛ, "Bɔne nne yɛ nwo" a, né yɛlaka-laka yɛ nwo, na nahorɛ ne nne yɛ nu. 9 Nakoso ɔnate kyɛ odi nahorɛ na ɔtengyɛ nati, sɛ yɛka yɛ bɔne a, ɔkɔfa kɔhyɛ yɛ, na wanwunzi yɛ nwo wafi yɛ bɔne mukoraati nwo. 10 Sɛ yɛka kyɛ, "Yɛyɛlle bɔne a," né yɛma ɔyɛ ngondomboniɛ, na ye dwirɛ ne nne yɛ nu.