1 Ebiala bɔ odɛ di kyɛ Yesu te Kristo ne, Nyameɛ yeɛ wawo ye ɔ, na ebiala bɔ ɔdɔ Nyameɛ ne, ɔdɔ bɛ bɔ Nyameɛ awo bɛ ne. 2 Sɛ yɛdɔ Nyameɛ na yɛdi ye ahyɛdeɛ so a, ɛhene yeɛ ɔmaa yɛnwu kyɛ yɛdɔ Nyameɛ mmaa mɔ ɔ. 3 Bɔ yɛyɛ a okyire kyɛ yɛdɔ Nyameɛ yeɛ ole kyɛ, yɛkoli ye ahyɛdeɛ so; na ye ahyɛdeɛ ne nnyɛ se, 4 ofikyɛ ebiala bɔ Nyameɛ awo ye ne, wali wiase naso ngunim. Na yɛ gyidie yeɛ yɛfa yɛdi wiase naso ngunim ɔ. 5 Nwa yeɛ ɔkɔhora koli wiase naso ngunim ɔ? Sana sona bɔ odɛ di kyɛ Yesu te Nyameɛ awa ne.

6 Bɔ ɔnate nzue ne mogya so wale ne yeɛ ole Yesu Kristo. Nná nzue ngome yeɛ ɔnate so wale ɔ, mmom nzue ne mogya. Na honhom ne di ɛhe anwo adanzeɛ, ofikyɛ honhom ne yeɛ ole nahorɛ ne. 7 Nningyein nza yeɛ odi ɛhe anwo adanzeɛ ɔ: 8 Honhom, nzue, yeɛ mogya; na bɛ mmɛsa né adanzeɛ ne yia.

9 Na sɛ yedɛ sona adanzeɛ yɛto nu a, ye de, yedɛ Nyameɛ adanzeɛ ne yɛto nu paa.* Ná adanzeɛ he yeɛ Nyameɛ ali afa ɔwa nanwo ɔ. 10 Ebiala bɔ odɛ Nyameɛ awa ne di ne, ole sɔ adanzeɛ ne wɔ ye nu. Na ebiala bɔ onne Nyameɛ nni ne, wamaa Nyameɛ ayɛ ngondomboniɛ, ofikyɛ adanzeɛ bɔ Nyameɛ ali afa ɔwa nanwo ne, onne nni. 11 Adanzeɛ ne ɛhe: Nyameɛ ama yɛ daa ngoa, na sɔ ngoa ne wɔ Ɔwa ne nu. 12 Ebiala bɔ odɛ́ baa ne di ne, ole sɔ ngoa ne, na ebiala bɔ onne Nyameɛ awa ne nni ne, olle sɔ ngoa ne.

13 Metworɔ ɛhe mebrɛ ɛmɔ bɔ ɛmɔle gyidie wɔ Nyameɛ awa ne dumaa nanu ne, kyɛbɔ ɔkɔyɛ a, ɛmɔ konwu kyɛ ɛmɔle daa ngoa. 14 Ahotɔsoɛ bɔ yɛle ye wɔ Nyameɛ nu yeɛ ole kyɛ, nikye biala bɔ yɛkobisa ye, bɔ ɔne yɛ pɛ yia ne, okotie yɛ. 15 Na ɔnate kyɛ yɛse kyɛ otie bɔ yɛbisa biala nati, ye de bɔ yabisa ne, yɛ sa kɔha ye, ofikyɛ yabisa yafi ye berɛ.

16 Sɛ ebie nwu kyɛ oliema bie yɛ bɔne bɔ ɔmva ye ngɔ ewue nu a, ma ɔbɔ mbaeɛ ma ye, na Nyameɛ kɔma ye ngoa, ɔkɔma bɛ bɔ bɛyɛ sɔ bɔne ne ngoa. Nakoso bɔne bie wɔ berɛ a, ɔfa sona kɔ ewue nu; sɔ bɔne ne de, menga kyɛ ɔbɔ mbaeɛ ma ye. 17 Nikye bɔ ɔndengyɛ biala te bɔne, nakoso bɔne ne bie wɔ berɛ a, ɔmva sona ngɔ ewue nu.

18 Yɛse kyɛ, ebiala bɔ Nyameɛ awo ye ne, ɔndena bɔne nu, na Nyameɛ Awa ne bɔ ye nwo waen, yeti ɔbɔnefoɛ ne nnya ye. 19 Yɛse kyɛ Nyameɛ yeɛ ɔbɔle yɛ ɔ, nakoso ewiase namukoraati wura ɔbɔnefoɛ ne sa. 20 Yɛse kyɛ Nyameɛ Awa né awa, na wabukye y’adwene nu maa yanwu bɔ odi nahorɛ ne. Na yɛnate ɔwa Yesu Kristo so ne bɔ odi nahorɛ né ayɛ kõ. Ye yeɛ ole Nahorɛ Nyameɛ ne daa ngoa ne.

21 Me mmaa mɔ, ɛmɔhwe ɛmɔ nwo bɛfi statu bɔ ɛmɔsõ bɛ nanwo.