1 Edwirɛ he te nahorɛ, sɛ ebie pena kyɛ ɔyɛ panyi* a, ne wafa adwuma pa. 2 Yeti, odikyɛ ɔyɛ ebie bɔ edwirɛ nne ye nwo, sɛ wagya a, ɔye kõ, ɔnyɛ ye nikye ma ɔmmo so, ye adwene nu la berɛ, ɔyɛ ye nikye biala pɛpɛɛpɛ, odɛ́ mmenia wɔfoɛ, ɔkora kyirekyire, 3 ɔtte kɔwenzaniɛ, ɔnyɛ basabasa, mmom ɔte edwirɛ bo, onguro ngondii, ye nye mmoro sikaa, 4 ɔte ebie bɔ ɔnea ye awuro so yé, ye mmaa nye la ase na bɛbrɛ bɛ nwo ase bɛma ye. 5 (Sɛ ebie ngora nni ye awuro so a, ɔkɔyɛ sɛɛ né wahora wanea Nyameɛ asafo so?) 6 Ɔnzɛ kyɛ ɔyɛ ebie bɔ ɔte foforɛ wɔ gyidie nanu, ofikyɛ annea a né wama ye nwo so maa wanya Abɔnzam atemmuo ne bie. 7 Afei koso, odikyɛ bɛ bɔ benne asafo nanu ne bɔ ye dumaa pa,* na ye nyunu angua ase ma wandɔ Abɔnzam ngaen nu.

8 Asafo nu asomvoɛ koso, odikyɛ bɛ nye da ase, bɛka edwirɛ a, bɛ nzesa bɛ noa, bɛnno nzãa ma bɛmmo so, bɛmmu mmenia bɛmva so, 9 na bɛfa ahonim bɔ enu te bɛtira gyidie nanwo dwirɛ krongron bɔ wafea nanu yé. 10 Sɛ bɛdi moa bɛsɔ bɛ bɛnea, na sɛ bɛfata, bɔ edwirɛ biala nne bɛ nwo a, ne bamaa basõ kyɛ asomvoɛ. 11 Sɔ ala yeɛ odikyɛ mmrasua ma bɛ nye da berɛ, bɛnzɛkye mmenia dumaa, bɛnyɛ bɛ nikye ma ɔmmo so, ná bɛdi nahorɛ wɔ nikye biala nu. 12 Asafo nu somvoɛ koso, odikyɛ ɔyɛ brienzua bɔ ɔye kõ, ebie bɔ ɔkora nea ye mmaa ne ye awuro so kama. 13 Ofikyɛ, mmrienzua bɔ bɛsõ yé ne nya dumaa pa, na bɛkora bɛfa akukuduro bɛka gyidie bɔ ɔwɔ Kristo Yesu nu nanwo dwirɛ.

14 Me nye la so kyɛ ɔngɔhyɛ biala ngɔwa wɔ berɛ, nakoso medi moa metworɔ ɛhe mebrɛ wɔ, 15 na sɛ me kyɛ a, anwu atee bɔ ɛkɔfa so kɔbɔ wɔ bra wɔ Nyameɛ awuro, kyire kyɛ Nyameɛ bɔ ɔte ase ne asafo bɔ ɔte nahorɛ ne pila, ne ye fapem nanu. 16 Nahorɛ nu, aporowaa biala nne ye nwo kyɛ, nyamesom nwo dwirɛ krongron bɔ wafea ne te piri:

Bɛlale ye ali wɔ anwoɔnaen nu,

bɛbule ye bem honhom nu,

ɔyele ye nwo ali hyirele abɔfo,

bɛhane ye nwo dwirɛ bɛhyirele maen-maen ne,

bɛlɛle ye bɛlili wɔ wiase,

bɛfale ye bɛhɔle anwuro wɔ anuonyam nu.