1 Me Paul bɔ Nyameɛ adaworoma nde Kristo Yesu somafoɛ, mene yɛliema Timoteo, yɛfa krataa he yɛbrɛ Nyameɛ asafo bɔ ɔwɔ Korinto ne, ɔne Akrongronfoɛ bɔ bɛwɔ Akaia nekaa biala ne.

2 Adom ne asomdwie bɔ ofi yɛ Baba Nyameɛ ne y'Awurade Yesu Kristo berɛ ha ɛmɔ.

3 Ayɛyie ha Nyameɛ, y'Awurade Yesu Kristo Baba ne, anwunvoinwunɛ Baba ɔne awerɛkyekye mukoraati Nyameɛ ne, 4 ye yeɛ ɔkyekye yɛ wora wɔ amaneɛ bɔ yɛnwu ye namukoraati nu, kyɛbɔ ɔkɔyɛ a yɛ koso, awerɛkyekye bɔ yanya yafi Nyameɛ berɛ nati, yɛkɔhora yɛkɔkyekye bɛ bɔ bɛnwu amaneɛ ne wora. 5 Na kyɛbɔ Kristo ti, amaneɛ bɔ ɔto yɛ ne sone ne, sɔ ala ye Kristo ti yɛ awerɛkyekye sone ɔ. 6 Na sɛ yɛnwu amaneɛ a, ɛmɔ awerɛkyekye ne ngoa bɔ ɛmɔ konya ye ne ti ɔ; na sɛ bɛkyekye yɛ wora a, ɛmɔ awerɛkyekye ti ɔ, ɛhene yeɛ ɔboka ɛmɔ maa ɛmɔkora begyina ɔhaw bɔ yɛ koso yɛyia bie ne noa ɔ. 7 Na anidasoɛ bɔ yele ye wɔ ɛmɔ nu né gyi berɛ pindinn, ofikyɛ yɛse kyɛ, ɔnate kyɛ ɛmɔnwu y'amaneɛ ne bie nati, awerɛkyekye bɔ yanya ye ne, ɛmɔ konya bie.

8 Aliemaa mɔ, amaneɛ bɔ yɛnwuni ye wɔ Asia mandanu dɔ ne, yɛmbena kyɛ yɛfa yɛfea ɛmɔ. Ɔhaw bɔ yɛhɔle nu ne, né ɔbo y'anwoserɛ so, né yɛse kyɛ yɛ ngoa po kofi yɛ sa. 9 Bɔ ɔte yeɛ ole kyɛ, né yɛse kyɛ yawu yayie. Nakoso ɛhe bokale yɛ, kyɛbɔ ɔkɔyɛ a yɛngɔfa yɛ nwo yɛngɔto yɛ nwo so, na mmom yɛkɔfa yɛkɔto Nyameɛ bɔ otingye awufo naso. 10 Ɔhale kaa bie ahaa yɛwu, nakoso ɔlɛle ye, na okosa kole yɛ. Na yɛle ahotɔsoɛ wɔ ye nu kyɛ, ɔkɔhɔ so kole yɛ, 11 mmerɛ bɔ ɛmɔboka yɛ wɔ mbaebɔ nu ne. Ɛhene kɔmaa mmeni pee kɔla ase kɔma yɛ wɔ adom bɔ mmeni pee mbaeɛ ti, bafa balo yɛ nanwo.

12 Ɛhe ati yeɛ yɛhoɔhoa yɛ nwo ne, yɛ ahonim di yɛ adanzeɛ kyɛ yɛfale nahorɛlilɛ ne nyamesuro yɛbɔle yɛ bra wɔ wiase nanu, ɛnga-nga mmerɛ bɔ ne yɛwɔ ɛmɔ berɛ ne. Nná sona nyanza yeɛ yɛfa yɛbɔle yɛ bra ɔ, mmom adom bɔ ofi Nyameɛ berɛ. 13 Na bɔ yɛtworɔ yɛbrɛ ɛmɔ ne, ɔtte nikye bɔ ɛmɔngora ye kenga anaa ɛmɔnde yebo ɔ. Medɛ́ medi kyɛ ɛmɔ kɔte ɛhemɔ bo yé paa, 14 kyɛbɔ ɛmɔ ate yɛ bo kaa kyɛ, ɛmɔ kɔhora bɛkɔfa yɛ bɛkɔhoɔhoa ɛmɔ nwo ne, sɔ ala yeɛ ɛmɔ koso, Awurade Yesu kyẽa ne, yɛkɔfa ɛmɔ yɛkɔ-hoɔhoa yɛ nwo.

15 Sɔ ahotɔsoɛ he ati, nyɛle m'adwene kyɛ ahaa ngosa ngɔwa ɛmɔ berɛ, kyɛbɔ ɔkɔyɛ a, ɛmɔ nye kɔgye bieku ɔ. 16 Yeti nyɛle kyɛ, sɛ me kɔ Makedonia a, ngɔfa ɛmɔ berɛ, na sɛ mvi Makedonia meba a, ngosa ngɔfa ɛmɔ berɛ, na yesi ne ɛmɔ asoma me atee maa mahɔ Yudea. 17 Mmɔle me ti anu sɔ ne, aso né m'adwene nzi me pi hɔ? Anaa nyane sɔ adwene ne wɔ anwoɔnaen nu, ma yeti sɛ meka "Yoo" a, né masesa me noa maha "Daabi"? 18 Nyameɛ de, ɔte ebie bɔ odi nahorɛ, yeti yɛnga "Yoo" yɛngyire ɛmɔ, né yasa yaha "Daabi." 19 Ofikyɛ Nyameɛ awa Yesu Kristo bɔ mene Silas* ne Timoteo hane ye nwo dwirɛ hyirele ɛmɔ ne, ɔtte ebie bɔ ɔka "Yoo" a, okyire "daabi" ɔ, mmom ye de, ɔka "Yoo" a, ɔte "Yoo." 20 Na ɔnate ye so yeɛ Nyameɛ bɔhyɛ mukoraati ayɛ "Yoo." Yeti yeɛ yɛnate ye so yɛka "Amen" yɛkyire Nyameɛ yɛfa yɛhyɛ Nyameɛ anuonyam. 21 Na Nyameɛ yeɛ wasi ye pi kyɛ, yɛne ɛmɔ mukoraati te Kristo deɛ, na ye yeɛ wasra yɛ ɔ. 22 Wahyɛ yɛ nzorɛ, na wafa ye honhom ne wama yɛ wɔ y'ahone nu wafa wali ɛhe anwo agyinam.

23 Na Nyameɛ yeɛ ɔte me adanzeniɛ kyɛ, membena kyɛ ɛmɔ wora bɔ, yeti yeɛ mmmale Korinto ne. 24 Yɛtte atumvoɛ wɔ ɛmɔ gyidie so, mmom yɛte mmenia bɔ yɛne ɛmɔ yɛ adwuma maa ɛmɔ nye gye, ofikyɛ ɛmɔ gyidie yeɛ wamaa ɛmɔ agyina pindinn.