1 Na ɔnate kyɛ Nyameɛ anwu yɛ anwunvo afa ɔsom adwuma he awura yɛ sa nati, yɛmba aba. 2 Mmom yahwe yɛ nwo yafi nningyein bɔ ɔyɛ fɛle bɔ bɛyɛ ye awosii nu nanwo; yɛmva nnaka-naka yɛmmɔ yɛ bra, na yɛmvra Nyameɛ dwirɛ nanu koso. Mmom yɛda nahorɛ ne ali, na yɛnate so yɛdi yɛ nwo adanzeɛ yɛkyire ebiala wɔ Nyameɛ nyunu. 3 Sɛ ɔte nahorɛ kyɛ nzɛmba bɔ yɛka naso akata a, so akata ama bɛ bɔ bɛsɛkye ne. 4 Bɛ nu yeɛ wiase he nyameɛ né asi bɛ bɔ benne benni ne adwene nye, kyɛbɔ ɔkɔyɛ a Kristo bɔ ɔte Nyameɛ sɛso* né anuonyam nzɛmba nanwo kanea ne ngɔta bɛ so. 5 Nná yɛ nwo dwirɛ yeɛ yɛka ɔ, mmom yɛka Yesu Kristo nwo dwirɛ kyɛ ɔte Awurade, na yɛ koso Yesu ti, yɛte ɛmɔ ngoaa. 6 Ofikyɛ Nyameɛ bɔ ɔhane kyɛ, "Kanea fí awosii nanu ta" ne, ye yeɛ wamaa kanea atɔ y'ahone so, kyɛbɔ ɔkɔyɛ a Nyameɛ anuonyam nimdeɛ ne kɔta y'ahone so wɔ Kristo Yesu nyunu.

7 Nakoso yanya sɔ agyapadeɛ he wɔ nningyein bɔ bafa nnɛterɛ banwo nu, kyɛbɔ ɔkɔyɛ a, tumi bɔ ɔbo sona deɛ so ne kɔyɛ Nyameɛ deɛ, na ɔtte yɛ deɛ. 8 Bɛmia yɛ paa wɔ nikye biala nu, nakoso ɔtte kyɛ yɛngora yɛ nwo kakyi koraa, y'adwene atu afra, nakoso ɔtte kyɛ yɛnya yɛ nwo yɛndete, 9 bɛtane yɛ nye, nakoso bɛ polle yɛ, babɔ yɛ bato ase, nakoso bɛsɛkyelle yɛ. 10 Ewue nwo amaneɛ bɔ Yesu nwuni ye ne, daa yɛnwu bie wɔ yɛ nipadua nu, ná wamaa bala ngoa bɔ Yesu le ye ne bie ali wɔ yɛ nipadua nu. 11 Ofikyɛ mmerɛ bɔ yɛte ase ye de, Yesu ti, daa biala yɛne ewue bɔ mbu-ne-mbu, kyɛbɔ ɔkɔyɛ a Yesu ngoa ne koso kɔla ali wɔ yɛ nwonaen bɔ owu nanu. 12 Yeti, ewue yɛ adwuma wɔ yɛ nu, na ɛmɔ de ngoa yɛ adwuma wɔ ɛmɔ nu.

13 Bahworɔ kyɛ: "Nne nnili, yeti medwudwo;" ɔnate kyɛ yɛle sɔ gyidie honhom ne bie nati, yɛ koso yedɛ yɛdi, yeti yɛdwudwo. 14 Ofikyɛ bɔ otingyele Awurade Yesu ne, yɛse kyɛ okotingye yɛ koso kɔboka Yesu so, na ɔkɔye yɛ ne ɛmɔ mukoraati kohyire. 15 Ɛmɔ ti yeɛ ɛhemɔ mukoraati kɔ so ne, kyɛbɔ ɔkɔyɛ a, adom ne bɔ wabu wabɔ ye nwo ne kɔhɔ so kɔbo so, ofikyɛ mmeni pee yeɛ bɛhyɛ Nyameɛ anuonyam ɔ.

16 Yeti, yɛmma y'abanu mmu. Sɛ kyɛbɔ yɛte wɔ anyeɛ so ne sɛkye po a, kyɛbɔ yɛte wɔ yɛ nu ne de, daa biala ɔyɛ foforɛ. 17 Na amaneɛ bɔ yɛnwu ye kesaalae ne, ɔngɔhyɛ, ná enu yɛ nyera, nakoso anuonyam bɔ ɔfa ba ne te piri, na ɔkɔtena berɛ daa; 18 yeti, nná nningyein bɔ anyeɛ nwu ye, yeɛ yɛfa y'adwene yɛ sie so ɔ, mmom nningyein bɔ anyeɛ nnwu ye. Ofikyɛ nningyein bɔ anyeɛ nwu ye ne, ɔngyɛ, nakoso bɔ anyeɛ nnwu ye ne de, ɔtena berɛ daa.